Bay musuruf təl təl kə lebeɗ Yesu
4
A dəwən səna, Mbiɗ ngə Bayzlav ngazl Yesu a dab donu kə jan Bay musuruf kə lebeɗ tik. 2 Yesu maa ɗiy dalyam wan ngər foɗ ɓəw vuɗ ngər foɗ za, a dəwən səna mitis ɗiya hamenni.3 Za acin, Bay musuruf və mbeh a sin, ɗiya luwenni: ‹‹Mana hoh kər ngə Bayzlav wər, a luwen a gugwəniy nhi mə mbaɗiy kə bret. ›› 4 Yesu zlawenni, ɗiya luw: ‹‹Mə ɗəɗefe kaɗ am deftere ngə Bayzlav anhi: ‹Bret acin taa kaw micin ngə hidi a gendik dap kwən, amma zləgamiy cike taa pətiy taa kəma ngə Bayzlav za təm.›››ª
5 Zəni Bay musuruf tep Yesu a Ursalima, liɓde maa kweɗek. Sin tep am meceɓelem ngə jik ngə Bayzlav. 6 Za ɗiya luwenni: ‹‹Mana hoh kər ngə Bayzlav wər, a mbir aa talan jik nhi za kəv kayək, kadaban mə ɗəɗefeh kaɗ am deftere ngə Bayzlav anhi:
‹Bayzlav av kə luwen a mbaslayiy tik kə kalawigi avə ngər ngatan
kə jan ngaziy koh kə duroɓiy am gugwəniy kwən.› ››ª
7 Yesu zlawenni, ɗiya luw: ‹‹Mə ɗəɗefe kaɗ am deftere ngə Bayzlav təm anhi: ‹Hoh gər kə sla nəv ngə Bayzlav Məmar Hid kwən.› ››
8 Bay musuruf ngazl Yesu atalan meceɓelem ngə wərum təm. Sin ɗiya ɗefen hayəkiy təm talan mahayək cike ɓəw arayiy tə kimin cike wayza. 9 Za ɗiya luwenni: ‹‹Kat təv kə vəloh təkəniy nhi cike, mana hoh tu gbəli titimbiz a kibik ɗa kə mbəzlakku. ››
10 Yesu zlawenni, ɗiya luw: ‹‹A jel awənhi za, hoh bay musuruf! Deftere ngə Bayzlav a luw: ‹A mbəzl Bayzlav Məmar Hidi a gendik, za ma ɗiy kəzəɗ ngetik a gendik palpal.› ››ª 11 A dəwən səna, bay musuruf geɗ kaɗ, vətik acin. Mbaslayiy ngə Bayzlav yiy angər Yesu kə ɗiyenta kəzəɗ.
Yesu a diw kəzəɗ ngetik am hayək Galili
12 Hidiy kawiy Yuhana mə njə kə juroɓ baptisma, za pekta am jik jaw. Yesu maa zlim ləbar səna za, sliɗ va am hayək Galili. 13 Sin ma hos am hayək səna za, a ɗew a liɓde Nasaratu sin mə gəl təbəgo bugwən. Sin va ɗewey tik a liɓde Kafarnahum maa mbeh atalan maza Galili, təm hayək Zabulon avə Neftali. 14 Sin a ɗew abəgo kə jan kə ɗiy tiɗtiɗe mana Esaya, mokotuf ngə Bayzlav mə ceɗu, sin a luw:
15 ‹‹Hin hidiy təm hayək ngə Zabulon avə ngə Neftali,
hin hidiy mə ɗewiy maa mbeh a maza mordoy, a dəwən maz Urdun,
hin hidiy maa səban kin par a Yahudigi, mə vəliy ngəra a hayək Galili!
16 Hin hidiy mə ɗewiy təm kpizlik,
hin mə lim zləzlaɗ mordoy zaª.
Hin hidiy mə ɗewiy am kpizlik ngə mimcigi,
lay tu zləzlaɗ kəkay kəkay atalan kin. ››
17 Dəga am mandal səna, Yesu diw kə zləgam, ɗiya luwenta: ‹‹Mə buw ngar ngəkin kaɗ! Mindiwin, Bay tə dibizlav awan mbeh avə hin! ››
Yesu ɗefenma a wəriy gawliy tik ngə tizin
18 Pic takan Yesu aa ton aa talan maza tə Galili. Mandal sin taa ton, lim hid avə galmən hidiy mə kawiy kilif. Zlim ngatan Simon ta njə kə luwta Piyer, sin avə galmən Andire. Aa fəkiy jəva ngatan a liɓ yəm. 19 Yesu ɗiya luwenta: ‹‹Mə yah səbakku, təv kə ɗiyehin kə hidiy məv kə ɗefentəma a hidiy məpərmay kə səbiy mozlokotuf ɗa. ›› 20 Njoɗ taniy geɗiy jəva kaɗ, ɗiya səbiy Yesu.
21 Yesu va gwedek a kibik, lim hidiy saray baha, hid avə galmən, zlim ngatan Yakuba avə Yuhana, wəriy Zebede. Taniy awaniy a liɓ pay ngə zlan maza avə bahbay tan Zebede, aa zaɓiy jəv ngatan. Yesu ɗefentəma. 22 Njoɗ taniy a pay ngə zlan maza ɓəw a bahbay tan geɗta kaɗ, ɗiya səbiy Yesu.
Yesu ceɗ ləbar ngə Bayzlav za vəl zoy kəsəm a hidiy mə daldaligi
23 A dəwən səna, Yesu a njə kə tal hayək Galili cike wayza. Sin a njə kə ɗiy jəgwan am jik jəgwan ngə yahudigi. Sin a njə ceɗ ləbar atalan bay ngə Bayzlav. Sin vəl zoy kəsəm a hidiy njə məc maa parpar cike wayza. 24 Hidiy aa taliy zlim ngetik mgbaw hayək Siriya. Hidiy təm hayək səna dahiy hidiy ngatan njə məc maa par par tə kəsəm angər tik. A dahiy hidiy njə musuruf tə kəsəm, mocoɓlonigi ɓəw vəderigi. Yesu tu mbəlta cike wayza.
25 Zəgudiy ɗiya səbta. Hidiy səna a yiy aa mə hayək Galili za, za məpərmay a yiy aa mə hayək zlim tik Liɓde Gəɓ. Sənan a yiy aa liɓde Ursalima za ɓəw aa liɓde məpərmayiy təm hayək Yahudiya. Za məpərmay baha a yiy aa dəwən maza Urdun.