Yuhana məjuroɓ Baptisma a ceɗ ləbar ngə Bayzlav
3
Mandal səna, Yuhana mə njə kə juroɓ baptisma sliɗ, va a dab donu təm hayək Yahudiya. Aa ceɗ zləgam ngə Bayzlav a hidigi. 2 A luw: ‹‹Mə buw ngar kaɗ, kadaban mandal Bayzlav tu kə zəm bay mbeh kə hosohoh! ››3 Esaya mokotuf ngə Bayzlav tu zləgam atalan Yuhana. Sin a luw:
‹‹Hid məpərmay aa cə wəla a dab donu, a luw:
‹Mə zaɓen mozlokotuf a Məmar Hidi
mə zaɓen mozlokotuf səksək.› ››
4 Yuhana səna a njə kə kwəl ləkwət mə ba ba tav suson ngə zlogomo, za sin mə jawa maslapa ngə bagwəla am gben. A njə kə ham wayək ɓəw kə zləɓ njəzlem ɓəɓam tə donu. 5 Zəni hidiy tə liɓde Ursalima avə təm hayək Yahudiya cike ɓəw təm hayəkiy ma mbeh a maza Urdun cike wayza, yiy angər tik a dab donu səna. 6 Taniy ɗiya ceɗiy mə ngavngav ngatan mgban mgban a kibik hidigi. Za Yuhana juroɓenta baptisma a maza Urdun.
7 Farisiy avə Sadukiy dolom yiy angər Yuhana, sin kə juroɓenta baptisma. Sin ma limta za, ɗiya luwenta: ‹‹Hin hidiy maa lem mana kurslu cah! Mə ceɗehin hin məv kər ler am dalgway ngə Bayzlav tu yah yi? 8 Mə ɗiy kəzəɗ malaw, kə jan hidiy kə sənta a kimin, hin tu buw ngar ngəkin kaɗ. 9 Mə gər kə ɓən kə luw: ‹Didi ngiykwan acin Ibrahima kwən.› Mindiwin, kata luwe hin, gugwəniy hin taa limta nhi, Bayzlav kwəl kə mbaɗta kə wəriy ngə Ibrahima!
10 ‹‹Yo tanjinhi ta ceɗe hin, jeni mə sləsləɓa kaɗ ngə bəl pay nha am zemiy tik. Payiy maa aa mbuwiy wəriy malaw ɗahkwən, av kə bəlta kə fək kaɗ am kuhu.
11 ‹‹ Kat wər, kata juroɓehin baptisma avə yəm, kə jan hidiy kə sənta a kimin hin maa buw ngar kin. Amma hid tu kə yah aa dəwən ɗa, sin day kata avə gədan. Kat tə hos gəga kə cok krap təm ngaz tik kwən. Sin av kə juroɓehin baptisma avə kuhu ngə Mbiɗ ngə Bayzlav. 12 Sin mə kawa kaslak ngə bem ngirmi maa cehceh a ngirmi hiziɗ am ngəra, av kə pətar ngirmi maa cehceh a ngirmi hiziɗ avə sagway. Av kə zek ngirmi maa cehceh a ngirmi hiziɗ a debin, amma sagway wər av kə kəɗaw kaɗ avə kuhu maa aa məc ɗahkwən. ››
Yuhana juroɓen baptisma a Yesu
13 Mandal səna, Yesu sliɗ aa mə hayək Galili za, sin yah a maza mordoy tə Urdun angər Yuhana kə jan sin kə ɗiyen Baptisma. 14 Amma Yuhana aa ngəm kə juroɓen baptisma kwən. Sin ɗiya luwen a Yesu: ‹‹Lawlaw kata acin ngə vay, hoh kə juroɓok baptisma. Ya za acin, hoh yah angər ɗa ɗər acin vu? ›› 15 Yesu zlawenni, ɗiya luw: ‹‹A ngəm kə ɗiy atəgo səna tanjinhi, kadaban Bayzlav a may yikwan kə ɗiy atəgo . ›› Zəni Yuhana ngəm, juroɓen Baptisma.