Wazlayiy yiy aa kaɗkaɗ kə safiy Yesu
2
A mbuwiy Yesu a liɓde Baytilama am hayək Yahudiya. Mandal səna, Hirudus acin bay ngə hayək səna. Za wazlayiy mə səniy ma ngə cəwzlerekiy yiy a kaɗkaɗ za a Ursalima. 2 Ma hosiy za, ɗiya nehiy hidigi, luwenta: ‹‹ A kway bay ngə yahudiy mə mbuwta maa tanjinhi nhi? Yikwan tə kaɗkaɗ, yikwan lim batay mə ɗef mbuw ngetik, yikwan mə yah kə səban tik.››3 Bay Hirudus maa zlim ləbar səna za, tu wələken talan. Za hidiy tə liɓde Ursalima cike wələk wələk təm. 4 Asəna acin, bay Hirudus ɗefenma a mogroy ngə masayigi ɓəw mogroy ngə jəgwan ngə mə jaw jaw ngə Bayzlav. Sin nehta, ɗiya luw: ‹‹ Av kə mbuwiy Kristu a ki ? ›› 5 Taniy zlawenta, ɗiya luwta: ‹‹ Av kə mbuwta a liɓde Baytilama am hayək Yahudiya. Kadaban mokotuf ngə Bayzlav mə ɗəɗef za am deftere ngetik. Sin a luw:
6 ‹ Hoh Baytilama təm hayək Yahudiya,
a liɓdiy Yahudiy cike, hoh acin liɓde mandez day kwən.
Mindiwin, kadaban bay av kə pətah aa liɓde koh.
Sin av kə ɗew kə kər mə gəlgəla ngə hidiy ngaɗa Israyiligi.› ››
7 Hirudus maa zlim atəgo za, sin ɗefenma a wazlayiy mə səniy ma ngə cəwzlerekiy tafnan avə ɓah. Ɗiya nehta, luwenta: ‹‹Batay mə pətah tə kibik kin səna, a pətah lay waceki ? ›› 8 Adəwən səna, sin zlənta kə viy a liɓde Baytilama. Sin luwenta anhi: ‹‹ Mə va neheh ma atalan kər səna law law. Mandal hin tu jan tik, hin kə jəɓaha kə ceɗek səka, kat təm kat kəv kə səban tik. ››
9 Maa zlimiy zləgam ngə Bay za, taniy sliɗiy vigi acin. Zəni limiy batay taniy mə limta tafnan a kibik tan. Batay səna aa va a kibik tan. Maa hos am lay mə mbuwiy kər səna za, ɗiya gar. 10 Taniy maa limiy batay mə gara kaɗ za, ɗiya zəzayiy day day. 11 Pətiy a jik, za janiy kər səna avə mamay tik Mariyama. Gbəlihiy titimbiz, daɓiy kə səbanta. Zəni taniy zləriy gabal ngatan kaɗ kə vəlenta təkən malaw. Wətiy melenge, za wətiy tub pay ta njə kə kəɗawta kə njif nek, ɓəw wətiy dorson njif tik maa nek, zlim tik Mir, vəlenta a kər səna. 12 A dəwən səna, Bayzlav ceɗenta am sisin, taniy kə buwiy angər bay Hirudus ɗaba. Taniy sliɗiy viy tan a de a pal məpərmay.
Yusufu ɓiy Yesu avə mahmay tik, siy tan a Misra
13 Wazlayiy maa viy tan za, mbaslay ngə Bayzlav ɗef talan a Yusufu am sisin. Mbaslay səna ɗiya luwenni: ‹‹ A sliɗ za, maa ɓiy kərti avə mamay tik, maa vəkoh am hayək Misra, maa ɗewey koh abəgo hos am mandal kat tu kə luwoh hoh kə buwah koh. Kadaban Hirudus av kə jar kə wəzl kər nhi kaɗ. ››
14 Yusufu maa zlim atəgo za, sliɗ, wət kərti avə mamay kərti, vətik ngə vuɗu səna am hayək Misra. 15 Taniy ɗewiy tan abəgo hos am məc ngə bay Hirudus. Təkən səna a ɗiy atəgo kə jan kə ɗiy tiɗtiɗe mana Bayzlav mə luwu avə ma ngə mokotuf ngetik. Sin a luw: ‹‹ Kat tə ɗefenma a kərti ɗa kə pətah tik aa mə hayək Misra za. ››
Bay Hirudus wəzl wəriy maa cicer tə liɓde Baytilama
16 Bay Hirudus maa sən wazlayiy mə jəkta za, nəv ngetik ɗiya bas day day. Wazlayiy mə ceɗenta za mandal batay mə pətaha. Kadaban səna acin, sin luwen a hidiy ngetik kə wəzliy wəriy kərtawəl kaɗ. Kə wəzliy wəriy tə liɓde Baytilama ɓəw wəriy tə liɓdiy maa mbeh mbeh, wəriy kərtawəl maa leɓek cike wayza hos am wəriy məmariy di saray. 17 Asəna acin, a ɗiy tiɗtiɗe mana Yeremiya mokotuf ngə Bayzlav mə luwu. 18 Sin a luw:
‹‹Tu ciy wəla a liɓde Rama.
A hanigi ɓəw a jəkiy drif ngə mimci day day.
Rahilu acin taa han wəriy tik.
Aa may hidiy kə bacenta nəv kwən,
kadaban wəriy tik tu məcigi.ª››
Jəɓah ngə Yusufu ɓəw Yesu avə mahmay tik aa Misra za
19 Bay Hirudus maa məc za, mbaslay ngə Bayzlav Məmar Hidi yen a Yusufu am sisin a Misra. 20 Mbaslay səna luwenni: ‹‹A sliɗ za, maa wət kərti avə mahmay tik, maa jəɓ koh am hayək Israyila, kadaban hidiy mə gər kə wəzliy kər səna tu məcigi. ›› 21 Za acin, Yusufu sliɗ, ɓiy kərti avə mahmay tik, jəɓiy tan am hayək Israyila. 22 Amma taniy maa hosiy am hayək Israyila za, zlimta Arkilawus acin bay təm hayək Yahudiya am lay ngə bahbay tik Hirudus. Zəni Yusufu hovok kə ɗew am hayək səna. Bayzlav Məmar Hidi zləgamenni am sisin sin kə vətik am hayək Galili. 23 Sin va, ɗewey tik a liɓde Nasaratu, a ɗiy atəgo kə jan kə ɗiy tiɗtiɗe mana mokotufiy ngə Bayzlav mə zləgamta. A luwta: ‹‹Av kə centa zlimi njə Nasaratu. ››