9
Yesu u bwɑ̃ɑbu wɔkurɑ yiru gɔrɑ
(I mɑɑ mɛɛrio Mɑteu 10:5-15, Mɑɑku 6:7-13)
1 Mɑ Yesu u win bwɑ̃ɑbu wɔkurɑ yiru sokɑ u mɛnnɑ u bu dɑm kɑ̃ kɑ yiiko bu kɑ wɛrɛkunu kpuro girɑ, bu kɑ mɑɑ bɑrɑnu bɛkiɑ. 2 Mɑ u bu gɔrɑ bu kɑ bɑn te Gusunɔ u koo swĩin wɑɑsu ko kpɑ bu bɑrɔbu bɛkiɑ. 3 Mɑ u bu sɔ̃ɔwɑ u nɛɛ, i ku gɑ̃ɑnu kusenu ko sɑnum mɛ sɔɔ, bɑɑ dɛkɑ ǹ kun mɛ bɔɔru ǹ kun mɛ dĩɑnu ǹ kun mɛ gobi, kpɑ i ku mɑɑ yɑberu yiruse nɛnɛ. 4 Yɛnu gèn mi i sɔbiɑ, i sinɔ mi sere i kɑ doonɑ wuu gen min di. 5 Wuu mi bɑ ǹ bɛɛ dɑm koosie, i yɑrio wuu gen min di, kpɑ i bɛɛn nɑɑsun tuɑ bu kpɑre nge yĩreru te tɑ bu ben tɑɑrɛ sɔ̃ɔsimɔ.
6 Bɑ seewɑ bɑ doonɑ bɑru kpɑɑ kpɑɑkɑ, bɑ Lɑbɑɑri geɑ kpɑrɑmɔ mɑ bɑ bɑrɔbu bɛkiɑmɔ yɑm kpuro.
Herodun lɑɑkɑri seewɑ
(I mɑɑ mɛɛrio Mɑteu 14:1-12, Mɑɑku 6:14-29)
7 Herodu sunɔ u nuɑ kpuro ye Yesu u mɔ̀, mɑ yɑ win lɑɑkɑri burisinɑ. Domi gɑbɑ gerumɔ Yohɑnuwɑ wurɑmɑ gɔrin di.
8 Gɑbɑ mɑɑ gerumɔ Eliwɑ kurɑmɑ.
Mɑ gɑbɑ gerumɔ Gusunɔn sɔmɔ yerukobun turowɑ wurɑmɑ sɑɑ gɔrin di.
9 Mɑ Herodu u nɛɛ, nɑ derɑ bɑ Yohɑnu wiru burɑ. Adɑmɑ wɑrɑ wini wìn gɑri nɑ nɔɔmɔ mɛnin bweseru.
Mɑ u kɑsu u nùn wɑ.
Yesu u tɔmbu nɔrɔbun
subɑ nɔɔbu diisiɑ
10 Yesun bwɑ̃ɑ be, bɑ gɔrɑ ye wɔmɑ bɑ nùn sɑɑriɑ kpuro ye bɑ kuɑ. Mɑ u bu suɑ bɑ tii mɛnɑ bɑ dɑ wuu gɑgun berɑ giɑ ge bɑ rɑ soku Bɛsɑidɑ. 11 Tɔn wɔru gɑ giɑ gee u wɑ̃ɑ, mɑ gɑ nùn swĩi. U bu dɑm koosiɑ mɑ u bu bɑn te Gusunɔ u koo swĩin gɑri sɔ̃ɔmɔ, u mɑɑ bu bɛkiɑmɔ be bɑ bɑrɔ.
12 Ye sɔ̃ɔ kpeeyɔ be wɔkurɑ yiru ye, bɑ nùn susi mɑ bɑ nɛɛ, ɑ tɔn be kɑro bu dɑ wusɔ kɑ bɑru kpɑɑnɔ bu kpin yeru kɑsu kɑ ye bɑ koo di, domi gbɑburu sɔɔrɑ sɑ wɑ̃ɑ mini.
13 Yerɑ Yesu u bu sɔ̃ɔwɑ u nɛɛ, i bu dĩɑnu wɛ̃ɛyɔ bɛɛn tii bu di.
Adɑmɑ bɑ nɛɛ, pɛ̃ɛ nɔɔbu kɑ swɛ̃ɛ yiru tɔnɑwɑ sɑ mɔ, mɑ n kun mɔ ɑ̀ n kĩ bɛsɛn tii su dɑ su dĩɑnu kɑsumɑ tɔn be kpuron sɔ̃ bɑɑsi yɑ.
14 Tɔn be sɔɔ, tɔn durɔbun geerɑ turɑ nge tɔnu nɔrɔbun subɑ nɔɔbu (5.000). Mɑ Yesu u win bwɑ̃ɑ be sɔ̃ɔwɑ u nɛɛ, i bu sinɑsio wuu wuukɑ, weerɑɑkuukuubu.
15 Mɑ bɑ kuɑ mɛ bɑ be kpuro sinɑsiɑ. 16 Yesu u pɛ̃ɛ nɔɔbu ye suɑ kɑ swɛ̃ɛ yiru ye, mɑ u nɔni seeyɑ wɔllɔ u Gusunɔn domɑru bikiɑ, mɑ u ye mururɑ u bwɑ̃ɑ be wɛ̃ bu tɔn dɑbi te yɑbuɑ. 17 Be kpuro bɑ di bɑ debɑ. Mɑ bɑ sukum gure birenu wɔkurɑ yiru sɔɔ ye bɑ di n tiɑrɑ.
Piɛɛ nɛɛ, Yesu u sɑ̃ɑwɑ
wi Gusunɔ u gɔsɑ
(I mɑɑ mɛɛrio Mɑteu 16:13-19, Mɑɑku 8:27-29)
18 Sɔ̃ɔ teeru sɑnɑm mɛ Yesu u kɑnɑru mɔ̀ bee tiɑ, kɑ win bwɑ̃ɑbu sɑnnu, u bu bikiɑ u nɛɛ, wɑrɑ tɔmbɑ gerumɔ nɑ sɑ̃ɑ.
19 Bɑ nɛɛ, Yohɑnu Bɑtɛmu kowowɑ. Gɑbɑ rɑ gere, Eliwɑ, gɑbɑ rɑ mɑɑ nɛɛ, Gusunɔn sɔmɔ yerukobun turowɑ u wurɑmɑ gɔrin di. 20 Mɑ u bu bikiɑ u nɛɛ, bɛɛn tii mɑɑ ni, wɑrɑ i gerumɔ nɑ sɑ̃ɑ.
Piɛɛ u nɛɛ, wunɑ Kirisi wi Gusunɔ u gɔrimɑ.
21 Mɑ u bu nɔɔ goosi bu ku rɑɑ goo sɔ̃.
Yesu u win gɔɔ kɑ win seebun
gɑri mɔ̀
(I mɑɑ mɛɛrio Mɑteu 16:20-28, Mɑɑku 8:30-9:1)
22 Yesu u kpɑm nɛɛ, Tɔnun Bii u ǹ koo ko u kun nɔni sɔ̃ɔre gem gem, kpɑ guro gurobu bu nùn yinɑ kɑ yɑ̃ku kowo tɔnwerobu kɑ woodɑ yɛ̃robu, kpɑ bu nùn go kpɑ u sikurɑ sɔ̃ɔ itɑse.
23 Mɑ u be kpuro sɔ̃ɔwɑ u nɛɛ, goo ù n kĩ u mɑn swĩi nge bɔ̃̀ɔ, u win gɔ̃ru kĩru derio, kpɑ u win tiin dɑ̃ɑ bunɑnɑru suɑ bɑɑdommɑ, kpɑ u n mɑn swĩi. 24 Domi bɑɑwure wi u kĩ u win wɑ̃ɑru di kɑ win gɔ̃ru kĩru, u koo tu biɑ. Adɑmɑ bɑɑwure wi u win wɑ̃ɑru yinɑ nɛn sɔ̃, wiyɑ u koo tu wɑ kɑ gem. 25 Arufɑɑni yerɑ̀ tɔnu u mɔ, bɑɑ ù n hɑnduniɑn gɑ̃ɑnu kpuro wɑ, mɑ u tii kɑm koosiɑ ǹ kun mɛ u win wɑ̃ɑru biɑ. 26 Domi bɑɑwure wi u nɛn sekuru mɔ̀ kɑ mɑɑ nɛn gɑri, Tɔnun Bii u koo mɑɑ win sekuru ko ù n wurɑmɑ kɑ win yiiko kɑ Bɑɑbɑgiɑ kɑ wɔllun gɔrɑdo dɛɛrobugiɑ. 27 Nɑ bɛɛ sɔ̃ɔmɔ kɑ gem, gɑbu bɑ yɔ̃ mini be bɑ ǹ gbimɔ bu kɑ bɑn te wɑ te Gusunɔ u koo swĩi.
Yesun wɑsi gɔsiɑ
(I mɑɑ mɛɛrio Mɑteu 17:1-8, Mɑɑku 9:2-8)
28 Ye u gɑri yi geruɑ u kpɑ, yen sɔ̃ɔ nɔɔbɑ itɑse u Piɛɛ kɑ Yohɑnu kɑ Yɑkɔbu suɑ u yɔɔwɑ guuru wɔllɔ u wɑ u kɑ kɑnɑru ko. 29 Nge mɛ u kɑnɑru mɔ̀ win wuswɑɑ gɔsiɑ tukɑ, mɑ win yɑ̃nu bururɑ fem fem. 30-31 N wee tɔmbu yiru, Mɔwisi kɑ Eli, bɑ kurɑmɑ kɑ wɔllun girimɑ bɑ kɑ nùn win doonɑrun gɑri mɔ̀ te u koo doonɑ Yerusɑlɛmun di. 32 Piɛɛ kɑ win kpɑɑsibu ben wɑsi buniɑ kɑ dom, ɑdɑmɑ bɑ dom kpɑrurɑ mɑ bɑ Yesun yiikon girimɑ wɑ kɑ tɔn be yiru be bɑ yɔ̃ kɑ wi. 33 Nge mɛ tɔn be, bɑ Yesu dɛsirɑrimɔ, Piɛɛ nùn sɔ̃ɔwɑ u nɛɛ, yinni, n wɑ̃ sɑ n wɑ̃ɑ mini. Su kunu itɑ ko, teeru wunɛgiru, teeru Mɔwisigiru, teeru mɑɑ Eligiru. Domi u ǹ yɛ̃ ye u gerumɔ.
34 Nge mɛ u gɑri mɔ̀ mɛsum, bukɔ gɑ nɑ gɑ bu wukiri, mɑ bɛrum bwɑ̃ɑ be mwɑ ye bɑ wɑ mɛsum. 35 Mɑ nɔɔ gɑgu gɑ nɔɔrɑ bukɔ gen min di gɑ nɛɛ, winiwɑ nɛn Bii wi nɑ tii gɔsiɑ, i wigiɑ nɔɔwɔ.
36 Gɑri yin biru, Yesu tiɑ wi turo. Bwɑ̃ɑ be, bɑ ye bɑ wɑ mi tii mɑrisi, bɑ ǹ goo gɛɛ sɔ̃ɔwɑ sɔ̃ɔ mɛɛ te sɔɔ.
Yesu u bii wi wɛrɛku gɑ wɑ̃ɑsi
bɛkiɑ
(I mɑɑ mɛɛrio Mɑteu 17:14-18, Mɑɑku 9:14-27)
37 Yen sisiru, sɑnɑm mɛ bɑ sɑrɑ guuru wɔllun di, tɔn wɔru gunɑ yɑ Yesu sennɔ nɑ. 38 Yerɑ tɔn wɔru gen suunu sɔɔn di durɔ goo u gbɑ̃rɑ u nɛɛ, yinni, nɑ nun kɑnɑmɔ, ɑ nɛn bii durɔbu ge mɛɛrio, domi u sɑ̃ɑ bii teere te nɑ mɔ. 39 Wɛrɛku gɑ rɑ nùn sɛ̃rewɑ kpɑ u gbɑ̃rɑ suɑru sɔɔ, kpɑ gu nùn bemisiɑ, kpɑ gu de u n yɑ̃ɑtɑm pɔkeru mɔ̀ kpɑ u tii mɛɛrɑ ko, yen biru kpɑ gu nùn doonɑri. 40 Nɑ wunɛn bwɑ̃ɑbu kɑnɑ bu gu girɑ, ɑdɑmɑ bɑ ǹ kpĩɑ.
41 Yesu nɛɛ, tɔn kɔ̃so nɑɑnɛ doke sɑrirugibu, sere sɑɑ yerɑ̀ ko nɑ n kɑ bɛɛ wɑ̃ɑ. Sere dommɑ ko nɑ n kɑ bɛɛ tɛmɑnɛ. Mɑ u durɔ wi sɔ̃ɔwɑ u nɛɛ, ɑ kɑ wunɛn bii wi nɑ mini.
42 Sɑnɑm mɛ u kɑ bii wi susiɔ, wɛrɛku ge, gɑ nùn tem kpɑrɑnɑ mɑ gɑ nùn bemisiɑ. Adɑmɑ Yesu u gu gerusi u bii wi bɛkiɑ, mɑ u nùn win tundo wesiɑ. 43 Mɑ Gusunɔn sinɑ te, tɑ tɔn be kpuro mɑɑmɑɑki kuɑ.
Yesu kpɑm win gɔɔ
kɑ win seebun gɑri mɔ̀
(I mɑɑ mɛɛrio Mɑteu 17:22-23, Mɑɑku 9:30-32)
Sɑnɑm mɛ bɑɑwure u kɑ̃sɑ kɑ ye Yesu u mɔ̀, u win bwɑ̃ɑbu sɔ̃ɔwɑ u nɛɛ, 44 bɛɛ i gɑri yini swɑɑ dɑkio sɑ̃ɑ sɑ̃ɑ. Bɑ koo Tɔnun Bii tɔmbu nɔmu sɔndiɑ.
45 Adɑmɑ win bwɑ̃ɑbɑ kun gɑri yi tubɑ, domi bɑ bu yi berue ginɑ, bu ku kɑ giɑ. Mɑ bɑ bɛrum mɔ̀ bu kɑ nùn gɑri yin yɑɑsi bikiɑ.
Wɑrɑ gisonkoru bo
(I mɑɑ mɛɛrio Mɑteu 18:1-5, Mɑɑku 9:33-37)
46 Sikirinɔ gɑ duɑ bwɑ̃ɑ ben suunu sɔɔ domi bɑ kĩ bu giɑ be sɔɔ wi u bo. 47 Yesu u ben gɔ̃run bwisikunu yɛ̃. Yerɑ u bii yɑ̃kɑbu suɑ u yɔ̃rɑsiɑ win bɔkuɔ, 48 mɑ u nɛɛ, bɑɑwure wi u bii yɑ̃kɑbu geni wurɑ nɛn yĩsirun sɔ̃, nɛn tiiwɑ u wurɑ, bɑɑwure wi u mɑɑ mɑn wurɑ, u wi u mɑn gɔrimɑ wurɑwɑ. Domi wi u sɑ̃ɑ yɑ̃kɑbu bɛɛn suunu sɔɔ, wiyɑ kpuro kere.
Wi u kun kɑ bɛɛ
yibɛrɛ tɛɛru nɛni, bɛɛgiiwɑ
(I mɑɑ mɛɛrio Mɑɑku 9:38-40)
49 Yohɑnu u nɛɛ, yinni, sɑ goo wɑ wi u wɛrɛkunu girɑmɔ kɑ wunɛn yĩsiru, mɑ sɑ nùn yinɑri yèn sɔ̃ u ǹ nun swĩi kɑ bɛsɛ sɑnnu.
50 Yesu nùn sɔ̃ɔwɑ u nɛɛ, i ku yɛ̃ro yinɑri, domi wi u kun kɑ bɛɛ yibɛrɛ tɛɛru nɛni, bɛɛgiiwɑ.
Sɑmɑrin wuu gɑgugibɑ yinɑ
bu Yesu dɑm koosiɑ
51 Sɑnɑm mɛ sɑɑ yɑ turuku koomɑ bu kɑ nùn suɑ u dɑ wɔllɔ, u gɔ̃ru doke dim dim u Yerusɑlɛmu dɑ. 52 Mɑ u sɔmɔbu gɑbu gbiisiɑ bɑ dɑ bɑ duɑ Sɑmɑrigibun wuu gɑgu sɔɔ bu kɑ nùn ɑyeru sɔɔru kuɑ. 53 Adɑmɑ wuu migibu bɑ ǹ nùn dɑm koosie yèn sɔ̃ bɑ wɑ n sɑ̃ɑre nge u dɔɔ Yerusɑlɛmu giɑ. 54 Ye win bwɑ̃ɑ beni Yɑkɔbu kɑ Yohɑnu bɑ wɑ mɛ, bɑ bikiɑ bɑ nɛɛ, Yinni, ɑ kĩ su de dɔ̃ɔ u sɑrɑmɑ wɔllun di u tɔn be wɔri?
55 U bu sĩire mɑ u bu gerusi kɑ dɑm. ((U nɛɛ, i ǹ yɛ̃ ye i bwisikumɔ. 56 Domi Tɔnun Bii u ǹ nɛ u kɑ tɔnun hunde kɑm koosiɑ. U nɑwɑ u kɑ ye fɑɑbɑ ko.)) Mɑ bɑ dɑ wuu gɑm giɑ.
Be bɑ kĩ bu Yesu swĩi
(I mɑɑ mɛɛrio Mɑteu 8:19-22)
57 Sɑnɑm mɛ bɑ sĩimɔ swɑɑ sɔɔ goo u nùn sɔ̃ɔwɑ mɑ u koo nùn swĩi bɑɑmɑ mi u dɔɔ.
58 Yesu nùn sɔ̃ɔwɑ u nɛɛ, sɛmusu bweusu mɔ, gunɔsu mɑɑ sokunu mɔ, ɑdɑmɑ Tɔnun Bii u ǹ ɑyeru mɔ mi u koo kpunɑ.
59 U kpɑm goo sɔ̃ɔwɑ u nɛɛ, ɑ mɑn swĩiyɔ.
Adɑmɑ yɛ̃ro u nɛɛ, ɑ de n ginɑ dɑ n nɛn tundo sike.
60 Yerɑ Yesu u nùn sɔ̃ɔwɑ u nɛɛ, ɑ derio gɔribu bu ben gɔribu sike, ɑdɑmɑ wunɛ ɑ doo ɑ Gusunɔn bɑndun Lɑbɑɑri geɑ nɔɔsiɑ bɑɑmɑ.
61 Mɑ goo u kpɑm nùn sɔ̃ɔwɑ u nɛɛ, Yinni, kon nun swĩi ɑdɑmɑ ɑ de n ginɑ dɑ n nɛgibu nɔɔ kɑnɑ.
62 Yesu u nùn sɔ̃ɔwɑ u nɛɛ, bɑɑwure wi u tebo nɔmu sɔndi, mɑ u biru sĩirɑ, u ǹ mɑɑ ɑrufɑɑni gɑɑ mɔ bɑn te Gusunɔ u koo swĩi sɔɔ.