14
Yohɑnu Bɑtɛmu kowon gɔɔ
1 Sɑɑ ye sɔɔrɑ Herodu, Gɑlilen tem yɛ̃ro u Yesun bɑɑru nuɑ. 2 Mɑ u win sɔm kowobu sɔ̃ɔwɑ u nɛɛ, Yohɑnu Bɑtɛmu kowowɑ u seewɑ gɔrin di. Yen sɔ̃nɑ u dɑm mɔ u kɑ sɔm mɑɑmɑɑkiginu mɔ̀.
3-4 N deemɑ Yohɑnu Bɑtɛmu kowo rɑɑ Herodu sɔ̃ɔwɑ mɑ n ǹ weenɛ u win wɔnɔ Filipun kurɔ Herodiɑ suɑ kurɔ. Yen sɔ̃nɑ Herodu u Yohɑnu Bɑtɛmu kowo mwɑ mɑ u derɑ bɑ nùn bɔkuɑ bɑ doke pirisɔm dirɔ Herodiɑ win sɔ̃.
5 Mɑ u kĩ u nùn go, ɑdɑmɑ u tɔmbun nɔnu nɑsie yèn sɔ̃ bɑ nùn mɛɛrɑ Gusunɔn sɔmɔ.
6 Adɑmɑ dɔmɑ te bɑ Herodun mɑru tɔ̃ru yɑɑyɑmɔ, Herodiɑn bii wɔndiɑ u dweebu duɑ u yɑwɑ. N Herodu dore, 7 sere u nùn nɔɔ mwɛɛru kuɑ kɑ bɔ̃ri u kɑ nùn wɛ̃ ye u koo nùn bikiɑ kpuro. 8 Ye u win mɛron gere nuɑ u Herodu sɔ̃ɔwɑ u nɛɛ, ɑ mɑn Yohɑnu Bɑtɛmu kowon wiru wɛ̃ɛmɑ mini pɛrɛnti sɔɔ.
9 Sunɔ win nukurɑ sɑnkirɑ, ɑdɑmɑ u nɛɛ bu nùn tu wɛ̃ɛyɔ. U geruɑ mɛ yèn sɔ̃ u bɔ̃ruɑ win tɔmbun wuswɑɑɔ. 10 Mɑ u gɔrɑ bɑ Yohɑnu wiru burɑ pirisɔm dirɔ. 11 Bɑ wii te kpɛ̃ɛmɑ pɛrɛnti sɔɔ bɑ bii wi wɛ̃ mɑ u kɑ win mɛro tu dɑɑwɑ. 12 Mɑ Yohɑnun bwɑ̃ɑbɑ nɑ bɑ win goru suɑ bɑ sikuɑ mɑ bɑ dɑ bɑ Yesu sɔ̃ɔwɑ.
Yesu u tɔmbu nɔrɔbun
subɑ nɔɔbu diisiɑ
13 Ye Yesu u nuɑ mɛ, u doonɑ min di. U goo nimkuu duɑ u dɑ gbɑburɔ wi turo. Sɑnɑm mɛ tɔmbɑ nuɑ mɛ, bɑ yɑrɑ wusun di mɑ bɑ nùn nɑɑ girɑ mi giɑ kɑ nɑɑsu. 14 Ye Yesu u yɑrɑ goon di, u tɔn wɔru gunɑ wɑ. Ben wɔnwɔndɑ nùn mwɑ mɑ u yɑnde ben bɑrɔbu bɛkiɑm wɔri.
15 Sɑnɑm mɛ sɔ̃ɔ duɔ win bwɑ̃ɑbɑ nɑ win mi bɑ nɛɛ, wee, gbɑburu sɔɔrɑ sɑ wɑ̃ɑ mini, sɔ̃ɔ mɑɑ kpɑ. A tɔn be kɑro bu dɑ bɑru kpɑɑnɔ bu ben tii dĩɑnu dwiɑ.
16 Mɑ Yesu bu sɔ̃ɔwɑ u nɛɛ, n ǹ tilɑsi bu kɑ doonɑ. Bɛɛn tii i bu dĩɑnu wɛ̃ɛyɔ.
17 Yerɑ bɑ nɛɛ, pɛ̃ɛ nɔɔbu tɔnɑwɑ sɑ mɔ mini kɑ swɛ̃ɛ yiru.
18 Mɑ u nɛɛ, i mɑn ye wɛ̃ɛmɑ mini.
19 Yen biru u nɛɛ, tɔn wɔru ge, gu yɑkɑsu yɑmɔ gu sinɑ. Mɑ u pɛ̃ɛ nɔɔbu kɑ swɛ̃ɛ yiru ye suɑ u wuswɑɑ seeyɑ wɔllɔ u Gusunɔ siɑrɑ. Mɑ u pɛ̃ɛ ye mururɑ u win bwɑ̃ɑbu wɛ̃ bɑ tɔn wɔru ge yɑbuɑ. 20 Ben bɑɑwure di u debɑ. Ye bɑ di n tiɑrɑ bɑ gure birenu wɔkurɑ yiru sɔɔ bɑ kɑ doonɑ. 21 Be bɑ di ben geerɑ turɑ tɔnu nɔrɔbun subɑ nɔɔbu (5.000), tɔn kurɔbu kɑ bibu bɑɑsi.
Yesu u sĩimɔ nim wɔllɔ
(I mɑɑ mɛɛrio Mɑɑku 6:45-52, Yohɑnu 6:15-21)
22 Yen biru mii mii Yesu derɑ win bwɑ̃ɑbɑ goo nimkuu duɑ bɑ nùn gbiiyɔ bu kɑ tɔburɑ guru giɔ. Sɑnɑm mɛyɑ win tii u tɔn wɔru yɑrinɑsiɑmɔ. 23 Ye u bu yɑrinɑsiɑ u kpɑ u yɔɔwɑ guuru wɔllɔ wi turo u kɑ kɑnɑru ko. Mɑ u wɑ̃ɑ mi, wi tɔnɑ, sere yɑm mu kɑ tĩrɑ. 24 N deemɑ sɑɑ ye sɔɔ, goo nimkuu ge, gɑ wɑ̃ɑ nim suunu sɔɔ. Nim kurenu gu bɔrikiɑmɔ yèn sɔ̃ woo gɑ gu nɔm birɑ koosi. 25 Buru buru yɑm sɑ̃reru, yerɑ Yesu u sĩimɔ nim wɔllɔ u dɔɔ win bwɑ̃ɑbun berɑ giɑ. 26 Adɑmɑ sɑnɑm mɛ bɑ nùn wɑ u sĩimɔ nim wɔllɔ, bɑ bɛrum soorɑ bɑ nɛɛ siiniwɑ.
Mɑ bɑ kuuki wɔri bɛrum sɑɑbu. 27 Adɑmɑ mii mii Yesu kɑ bu gɑri kuɑ u nɛɛ, i ku mwiɑ kpɑnɑ, nɛnɑ, i ku bɛrum ko.
28 Yerɑ Piɛɛ nùn sɔ̃ɔwɑ u nɛɛ, Yinni, ǹ n wunɛn nɑ, ɑ mɑn nɔɔ kɛ̃ɛyɔ n nɑ wunɛn mi nim wɔllɔ.
29 Mɑ Yesu nɛɛ, ɑ nɑ.
Yerɑ Piɛɛ u yɑrɑ goon di u nim nɔɔ sɔndi u sĩimɔ u dɔɔ Yesun mi. 30 Adɑmɑ ye u woo lɑɑkɑri kuɑ bɛrum nùn mwɑ. Mɑ nge mɛ u nummɔ u wurɑ kuɑ u nɛɛ, Yinni, ɑ mɑn fɑɑbɑ koowo.
31 Mii mii Yesu nɔmɑ dɛmiɑ u nùn nɛnuɑ mɑ u nɛɛ, nɑɑnɛ doke piibugii wunɛ, mbɑn sɔ̃nɑ ɑ sikɑ kuɑ.
32 Be yiru kpuro bɑ duɑ goo sɔɔ mɑ woo gɑ mɑri. 33 Yerɑ be bɑ wɑ̃ɑ goo ge sɔɔ, bɑ yiirɑ Yesun wuswɑɑɔ bɑ nɛɛ, kɑ geemɑ wunɛ Gusunɔn Biiwɑ.
Yesu u bɑrɔbu bɛkiɑ Genɛsɑrɛtin temɔ
(I mɑɑ mɛɛrio Mɑɑku 6:53-56)