13
Dĩɑ bwese yɛ̃kon gɑri
1 Sɔ̃ɔ tee te sɔɔ, Yesu u yɑrɑ yɛnun di u dɑ u sinɑ dɑɑ burerun goorɔ. 2 Mɑ tɔn wɔru gɑ nùn mɛnnɛ sere u duɑ goo nimkuu sɔɔ u sinɑ. Mɑ tɔn be kpuro bɑ yɔ̃ dɑɑ bure ten goorɔ. 3 U bu gɑ̃ɑ dɑbinu sɔ̃ɔwɑ kɑ mɔnnu u nɛɛ, durɔ goowɑ yɑrɑ u dĩɑ bweseru yɛ̃kɑm dɔɔ. 4 Nge mɛ u yɛ̃kɑmɔ sukum wɔri swɑɑ bɑɑrɔ, mɑ gunɔsu nɑ su di. 5 Mɑ sukum gɑm wɔri kpee sɑɑrɑ wɔllɔ mi tem kun duku. Mɑ mu kpiɑ mii mii yèn sɔ̃ tem kun duku mi. 6 Sɑnɑm mɛ sɔ̃ɔ gurɑ u kpii te yɑniɑ tɑ gberɑ yèn sɔ̃ tɑ ǹ gbini bɛkɛ mɔ. 7 Sukum gɑm mɑɑ wɔri sɑ̃kin suunu sɔɔ. Mɑ sɑ̃ki kɑ mu kpɛ̃ɑ sɑnnu mɑ yi mu sɛ̃kenɛ yi go. 8 Adɑmɑ sukum gɑm wɔri tem gem sɔɔ mɑ mu binu mɑrɑ, gɑm gum wunɔbu (100), gɑm gum wɑtɑ, gɑm gum tɛnɑ.
9 Mɑ u nɛɛ, wi u swɑɑ mɔ u kɑ nɔ, u nɔɔwɔ.
Mɔnnun ɑsɑnsi
10 Yerɑ win bwɑ̃ɑbɑ dɑ bɑ nùn deemɑ bɑ bikiɑ bɑ nɛɛ, mbɑn sɔ̃nɑ u rɑ kɑ bu mɔnnu gɑri sɔ̃.
11 Mɑ u bu wisɑ u nɛɛ, bɛɛyɑ bɑ Gusunɔn bɑndun ɑsiri sɔ̃ɔsi, ɑdɑmɑ be bɑ tie, bɑ ǹ bu sɔ̃ɔsi. 12 Domi wi u gɑ̃ɑnu mɔ, wiyɑ bɑ koo sosiɑ kpɑ win mɔru tu kpɛ̃ɑ. Adɑmɑ wi u kun gɑ̃ɑnu mɔ, fiiko ye u mɔ, yerɑ bɑ koo mɑɑ nùn wɔrɑri. 13 Yenin sɔ̃nɑ nɑ kɑ bu mɔnnu gɑri sɔ̃ɔmɔ. Domi bɑ mɛɛrimɔ ɑdɑmɑ bɑ ǹ wɑɑmɔ. Bɑ swɑɑ dɑki ɑdɑmɑ bɑ ǹ nɔɔmɔ n sere bu yeeri. 14 Nge mɛyɑ gɑri yi Esɑi u geruɑ ben sɔ̃ yi sɔ̃ɔsirɑmɔ, ye u nɛɛ,
<<I ko n nɔɔmɔ kɑ gem, ɑdɑmɑ n ǹ koo bɛɛ yeeri.
I ko n mɛɛrimɔ ɑdɑmɑ i ǹ ko i wɑ.
15 Domi tɔn benin gɔ̃ru gɑ ǹ biti mɔ.
Bɑ ben tiin swɑɑ kɔruɑ, bɑ nɔni yinwɑ.
Kpɑ bu ku wɑ kɑ ben nɔni.
Kpɑ bu ku nɔ kɑ ben swɑɑ.
Kpɑ bu ku giɑ kɑ ben bwisi.
Kpɑ bu ku rɑɑ kɑ gɔsirɑmɑ nɛn mi n kɑ bu bɛkiɑ.>>
16 Doo nɔɔrugibɑ bɛɛ, yèn sɔ̃ bɛɛn nɔni wɑɑmɔ, bɛɛn swɑɑ mɑɑ nɔɔmɔ. 17 Kɑ geemɑ nɑ bɛɛ sɔ̃ɔmɔ, Gusunɔn sɔmɔbu dɑbiru kɑ win tɔn geobu bɑ kĩɑ bu wɑ ye i wɑɑmɔ tɛ̃, bɑ ǹ mɑɑ ye wɑ. Mɛyɑ bɑ mɑɑ kĩɑ bu nɔ ye i nɔɔmɔ tɛ̃, bɑ ǹ mɑɑ nuɑ.
Mɔn ten tubusiɑnu
18 Mɑ Yesu u nɛɛ, tɛ̃ i mɔn ten tubusiɑnu nɔɔwɔ tè tɑ kɑ bwese yɛ̃ko yɑ̃ mi. 19 Be bɑ Gusunɔn bɑndun gɑri nɔɔmɔ mɑ yi ǹ bu yeeri, bɑ kɑ swɑɑ bɑɑru weenɛ mi bwese te, tɑ wɔri. Tɔn kɔ̃so wi, u rɑ nɛ u wunɑ ye bɑ duurɑ ben gɔ̃ruɔ. 20 Gɑbɑ mɑɑ kɑ kpee sɑɑrɑn tem mɛ weenɛ mi bwese ten gɑrɑ wɔri. Bɑ gɑri yi nɔɔmɔ, mii mii bɑ yi mwɑɑmɔ kɑ nuku dobu. 21 Adɑmɑ bɑ ǹ derimɔ yi gbini ko ben gɔ̃ruɔ. Mɑ bɑ ǹ yɔ̃rɑmɔ n kɑ tɛ. Sɑnɑm mɛ wɑhɑlɑ ǹ kun mɛ nɔni swɑ̃ɑrɑ tunumɑ gɑri yin sɔ̃ kpɑ bu biru wurɑ yɑnde. 22 Gɑbɑ mɑɑ bwese te mwɑ nge tem sɑ̃kunugum sɔɔ. Bɑ gɑri yi nuɑ ɑdɑmɑ hɑnduniɑn wɑ̃ɑrun wururɑbu kɑ gobin nɔni wɔ̃kubu bu gɑri yi tɛɛsi, yi ǹ mɑɑ binu mɑrɑ. 23 Gɑbɑ mɑɑ bwese te mwɑ nge tem gem sɔɔ. Beyɑ be bɑ gɑri yi nɔɔmɔ mɑ yi bu yeerimɔ. Mɑ bɑ binu mɑrumɔ gɑbu wunɔbu (100), gɑbu wɑtɑ, gɑbu tɛnɑ.
Yɑkɑ kɔ̃susun mɔndu
24 Yesu kpɑm bu mɔndu kuɑ u nɛɛ, n wee ye Gusunɔn bɑndun gɑri yi kɑ weenɛ. Durɔ goowɑ u dĩɑ bwese geeru duurɑ win gbɑɑrɔ. 25 Sɑnɑm mɛ bɑɑwure kpuro u dweeyɑ, durɔ win yibɛrɛ u nɑ, u yɑkɑ kɔ̃susu duurɑ ɑlikɑmɑ ye sɔɔ, mɑ u doonɑ. 26 Mɑ ɑlikɑmɑ yɑ kpiɑ yɑ kpɛ̃ɑ yɑ mɑrumɔ, mɑ yɑkɑ kɔ̃su si, su mɑɑ kpiɑ mɑ bɑ kpɛ̃ɑ sɑnnu. 27 Gbɑɑ yɛ̃ron sɔm kowobɑ nɑ bɑ nɛɛ, yinni, n ǹ dĩɑ bwese geerɑ ɑ duurɑ wunɛn gbɑɑrɔ? Mɑ giɑn diyɑ yɑkɑ kɔ̃su sini. 28 Mɑ u bu wisɑ u nɛɛ, yibɛrɛwɑ, u kuɑ mɛ. Sɔm kowo be, bɑ nùn bikiɑ bɑ nɛɛ, ǹ n mɛn nɑ, ɑ kĩ su dɑ su yɑkɑ kɔ̃su si wukiri? 29 Mɑ u nɛɛ, ɑɑwo domi ì n su wukirimɔ tɛ̃, kɑ ɑlikɑmɑ sɑnnɑ ko i rɑ wukiri. 30 I de ye yiru kpuro yu kpɛ̃ɑ sɑnnu sere gɛ̃ɛbun sɑɑ yɑ̀ n turɑ. Sɑnɑm mɛyɑ kon sɔm kowobu sɔ̃ bu ginɑ yɑkɑ kɔ̃su si mɛnnɔ bu bɔkunu ko bu dɔ̃ɔ doke, yen biru bu sere ɑlikɑmɑ gɛ̃ bu mɛnnɑ nɛn birɑru sɔɔ.
Mutɑɑdin bimɑn gɑri
31 Yesu kpɑm bu mɔndu gɑru kuɑ u nɛɛ, Gusunɔn bɑndɑ kɑ mutɑɑdin bimɑ weenɛ ye durɔ goo u suɑ u duurɑ win gbɑɑrɔ. 32 Dɑ̃ɑ binu kpuro sɔɔ yeyɑ yɑ piiburu bo. Adɑmɑ yɑ̀ n kpiɑ yɑ kpɑ yɑ gberun kiku bɑɑgere kpɑ̃ɑru kere. Domi yɑ rɑ ko dɑ̃ru sere gunɔsu rɑ nɛ su sin sokunu ko ten kɑ̃ɑsin wɔllɔ.
Pɛ̃ɛ seeyɑtiɑn gɑri
(I mɑɑ mɛɛrio Luku 13:20-21)
33 Yesu kpɑm bu mɔndu gɑru kuɑ u nɛɛ, Gusunɔn bɑndɑ kɑ pɛ̃ɛ seeyɑtiɑ weenɛ ye kurɔ goo suɑ u doke sɑkɑku nɔɔ itɑn som sɔɔ, mɑ mɛ kpuro mu seewɑ mu kukuɑ.
Mɔndun yɑɑsi
(I mɑɑ mɛɛrio Mɑɑku 4:33-34)
34 Kɑ mɔnnɑ Yesu u rɑ tɔn wɔru gɑri yi kpuro sɔ̃, u ku rɑ bu gɑ̃ɑnu sɔ̃ n kun kɑ mɔnnu. 35 Nge mɛyɑ Gusunɔn sɔmɔn gɑri yi koorɑ yi yi nɛɛ,
<<Mɔnnɑ ko nɑ n dɑ kɑ bu gɑri sɔ̃. Nɑ kon mɑɑ ye gere bɑtumɑ sɔɔ ye yɑ kukuɑ sɑɑ hɑnduniɑn tɑkɑ kobun di.>>
Yesu yɑkɑ kɔ̃susun gɑri tubusiɑ
36 Sɑnɑm mɛyɑ Yesu u seewɑ tɔn wɔru gen min di u duɑ yɛnuɔ. Mɑ win bwɑ̃ɑbɑ dɑ win mi bɑ nɛɛ, ɑ sun mɔn te tubusio te tɑ kɑ yɑkɑ kɔ̃su sin gɑri yɑ̃ mi.
37 Mɑ u bu wisɑ u nɛɛ, Tɔnun Biiwɑ u dĩɑ bwese gee te duurɑ. 38 Hɑnduniɑ yerɑ yɑ sɑ̃ɑ gbɑɑru. Gusunɔn bɑndun bibɑ bɑ sɑ̃ɑ dĩɑ bwese gee te. Tɔn kɔ̃so win bibɑ bɑ mɑɑ sɑ̃ɑ yɑkɑ kɔ̃su si. 39 Setɑmwɑ mɑɑ sɑ̃ɑ yibɛrɛ wi u su duurɑ. Gɛ̃ɛbun sɑɑ mɑɑ sɑ̃ɑ hɑnduniɑn kpeeru. Gusunɔn gɔrɑdobɑrɑ bɑ mɑɑ sɑ̃ɑ gbɑɑ sɔm kowobu. 40 Nge mɛ bɑ rɑ yɑkɑ kɔ̃susu wunɛ bu dɔ̃ɔ doke, nge mɛyɑ n ko n ko hɑnduniɑn kpeeru sɔɔ. 41 Tɔnun Bii u koo win wɔllun gɔrɑdobɑ gɔrimɑ, bu kɑ bɑɑyere wunɑ ye yɑ tɔmbu torɑsiɑmɔ mi u bɑndu dii, kɑ be bɑ kɔ̃sɑ mɔ̀. 42 U koo mɑɑ bu kpɛ̃ɛ dɔ̃ɔ wi u ku rɑ gbi sɔɔ, mi bɑ koo wiru nɔmɑ sɔndi bu swĩ. 43 Sɑnɑm mɛ sɔɔrɑ be bɑ kuɑ ye Gusunɔ u bikiɑ bɑ ko n bɑllimɔ nge sɔ̃ɔ mi ben Bɑɑbɑ u bɑndu swĩi. Wi u swɑɑ mɔ u kɑ nɔ, u nɔɔwɔ.
Dukiɑ ye yɑ beruɑn gɑri
44 Yesu mɑɑ nɛɛ, Gusunɔn bɑndu tɑ mɑɑ sɑ̃ɑwɑ nge dukiɑ ye yɑ beruɑ gbɑɑru sɔɔ. Ye durɔ goo ye kɑmɛ mɑ u ye berum sɔnwɑ. Mɑ u dɑ kɑ nuku dobu u dɔrɑ kpuro ye u mɔ, mɑ u gɔsirɑmɑ u gbɑɑ te dwɑ.
Goo gobigirun gɑri
45 Yesu mɑɑ nɛɛ, Gusunɔn bɑndu tɑ mɑɑ sɑ̃ɑwɑ nge goo gobigii ni nu wɑ̃, ni tenku goo u kɑsu. 46 Sɑnɑm mɛ u nin teeru wɑ te tɑ gobi mɔ too, mɑ u dɑ u win bɑɑyere dɔrɑ ye u mɔ, mɑ u tu dwɑ.
Yɑ̃ɑkororun gɑri
47 Yesu mɑɑ nɛɛ, Gusunɔn bɑndu tɑ kpɑm sɑ̃ɑwɑ nge yɑ̃ɑkororu te bɑ rɑ kpɛ̃ɛ nim wɔ̃ku sɔɔ kpɑ tu swɛ̃ɛ bwese bwesekɑ mwɑ. 48 Tɑ̀ n yibɑ bɑ rɑ gɑwɑmɛ guruɔ, kpɑ bu sinɑ bu gɔsi ye yɑ wɑ̃ bu doke bireru sɔɔ, kpɑ bu ye yɑ kun geɑ sɑ̃ɑ yɑri. 49 Nge mɛyɑ n ko n sɑ̃ɑ hɑnduniɑn kpeeru sɔɔ. Wɔllun gɔrɑdobɑ bɑ koo nɑ bu tɔn kɔ̃sobu kɑ geegibu wunɑnɑ. 50 Kpɑ bu tɔn kɔ̃so be doke dɔ̃ɔ wi u ku rɑ gbi sɔɔ. Miyɑ bɑ koo nɔmɑ wiru sɔndi bu swĩ.
Dukiɑ kpɑɑ kɑ gurɑ
51 Yesu u bu bikiɑ u nɛɛ, yɑbu ye kpuro yɑ bɛɛ yeeri?
Mɑ bɑ nɛɛ, oo.
52 Yerɑ u bu sɔ̃ɔwɑ u nɛɛ, woodɑ yɛ̃ro bɑɑwure wi u Gusunɔn bɑndun gɑri giɑ, u kɑ yɛnu yɛ̃ro weenɛ wi u gɑ̃ɑ kpɑɑnu kɑ gɑ̃ɑ gurunu wunɑmɔ win dukiɑn di.
Nɑsɑrɛtigibɑ kun Yesu wure
53 Ye Yesu u mɔn ni kpuro kuɑ u kpɑ, mɑ u doonɑ min di. 54 U dɑ win tiin wuuɔ mɑ u tɔmbu keu sɔ̃ɔsim wɔri ben mɛnnɔ yerɔ sere be kpuro bɑ biti soorɑ. Mɑ bɑ nɛɛ, mɑn diyɑ u bwisi yinin bweseru wɑɑmɑ. Amɔnɑ u kɑ kpĩɑ u sɔm mɑɑmɑɑkigii nini mɔ̀. 55 N ǹ dɑ̃ɑ dɑ̃kon bii wi mini? N ǹ wiyɑ wi Mɑɑri mɑrɑ? N ǹ win wɔnɔbɑ Yɑkɔbu kɑ Yosɛfu kɑ Simɔɔ kɑ Yudu? 56 N ǹ kɑ win sesubu kpuro sɑnnɑ sɑ wɑ̃ɑ mini? Ǹ n mɛn nɑ, mɑn diyɑ u dɑm mɛ kpuro wɑ.
57 Yeni kpuro yɑ bu yinɑri bu nùn nɑɑnɛ doke. Yerɑ Yesu bu sɔ̃ɔwɑ u nɛɛ, gɑm sɑri mi Gusunɔn sɔmɔ ku rɑ n bɛɛrɛ mɔ mɑ n kun mɔ win tiin temɔ kɑ win yɛnuɔ.
58 U ǹ mɑɑ sɔm dɑmgii dɑbinu kue mi, ben nɑɑnɛ dokebu sɑrirun sɔ̃.