13
À kun gɔ̃ru gɔsie kɑɑ gbi
1 Sɑɑ ye sɔɔ, tɔmbu gɑbɑ nɑ bɑ Yesu sɑɑriɑ ye n dɑɑ Gɑlilegibu deemɑ be Pilɑti u derɑ bɑ go sɑnɑm mɛ bɑ Gusunɔ yɑ̃kuru kuɑmmɛ. 2 Yesu u bu wisɑ u nɛɛ, i tɑmɑɑ Gɑlilegii beni bɑ torɑnu mɔ n kere Gɑlilegii be bɑ tie yèn sɔ̃ bɑ wɑhɑlɑ wɑ mɛn bweseru? 3 Aɑwo, nɑ bɛɛ sɔ̃ɔmɔ, bɛɛn tii ì kun gɔ̃ru gɔsie, bɛɛ kpurowɑ i ko gbi nge be. 4 Nge tɔmbu wɔkurɑ nɔɔbu kɑ itɑ ye, be Siloen dii wɔrukirɑ wɔri tɑ go, i tɑmɑɑ bɑ Yerusɑlɛmun tɔn be bɑ tie kpuro tɑɑrɛ kerewɑ? 5 Aɑwo, nɑ bɛɛ sɔ̃ɔmɔ, bɛɛn tii ì kun gɔ̃ru gɔsie, bɛɛ kpurowɑ i ko gbi nge be.
Figien dɑ̃ru te tɑ ku rɑ binu mɑ
6 U mɑɑ bu mɔn teni kuɑ u nɛɛ, durɔ goo u dɑ̃ru mɔ te bɑ rɑ soku figie te bɑ duurɑ win dɑ̃ɑ gbɑɑrɔ. U nɑ u kɑ ten binu kɑsu u sɔri, mɑ u ǹ wɑ. 7 U win sɔm kowo sɔ̃ɔwɑ u nɛɛ, n wee yen wɔ̃ɔ itɑwɑ mi, nɑ̀ n dɑ̃ɑ ten mɑrum kɑsum nɑ, nɑ ku rɑ wɑ. A te buro. Mbɑn sɔ̃nɑ tɑ ɑyeru dimɔ kɑm. 8 Sɔm kowo wi, u win yinni wisɑ u nɛɛ, ɑ te derio ginɑ wɔ̃ɔ geni sɔɔ, kon ten nuurɔ gbe n kɑ sikerenɑ, kpɑ n tɑɑki doke. 9 Sɔrɔkudo gɑsɔku tɑ koo binu mɑ. Tɑ̀ kun mɑrɑ, kpɑ ɑ sere tu burɑ.
Yesu kurɔ goo bɛkiɑ
tɔ̃ɔ wɛ̃rɑrugiru sɔɔ
10 Tɔ̃ɔ wɛ̃rɑrugiru gɑru sɔɔ Yesu u Gusunɔn gɑrin keu sɔ̃ɔsimɔ mɛnnɔ yeru gɑru sɔɔ. 11 N wee kurɔ goo mɑɑ wɑ̃ɑ mi, wi wɛrɛkunu nu kuɑ bɑrɔ sɑɑ wɔ̃ɔ wɔkurɑ nɔɔbu kɑ itɑn di. U rɑ n yɑ̃ɑrewɑ, u ku rɑ kpĩ u tii dɛmiɑ bɑɑ fiiko. 12 Ye Yesu u nùn wɑ mɑ u nùn sokɑ u nɛɛ, kurɔ wunɛ ɑ bɛkurɑwɑ mi.
13 Mɑ u nùn nɔmɑ sɔndi. Yɑnde u tii dɛmiɑ mɑ u Gusunɔ siɑrɑm wɔri. 14 Adɑmɑ mɛnnɔ yerun wirugii u mɔru bɑrɑ yèn sɔ̃ Yesu u goo bɛkiɑ tɔ̃ɔ wɛ̃rɑrugiru sɔɔ, mɑ u tɔn wɔru sɔ̃ɔwɑ u nɛɛ, sɔ̃ɔ nɔɔbɑ tiɑ wɑ̃ɑ yè sɔɔ i ko sɔmburu ko. I nɑ ye sɔɔ, bu kɑ bɛɛ bɛkiɑ, n ǹ mɔ tɔ̃ɔ wɛ̃rɑrugiru sɔɔ.
15 Yesu u nùn wisɑ u nɛɛ, murɑfiti bɛɛ, bɛɛn bɑɑwure u ku rɑ win nɑɑ ǹ kun mɛ win kɛtɛku sɔsie gu dɑ gu nim nɔ tɔ̃ɔ wɛ̃rɑrugiru sɔɔ? 16 Kurɔ wi mɑɑ Aburɑhɑmun bweserɑ. Wee, Setɑm nùn bɔkuɑ sɑɑ wɔ̃ɔ wɔkurɑ nɔɔbu kɑ itɑn di. N ǹ weenɛ bu nùn kusiɑ tɔ̃ɔ wɛ̃rɑrugiru sɔ̃ɔ?
17 Sɑnɑm mɛ u yeni gerumɔ, sekurɑ win wɛrɔbu kpuro mwɑ, mɑ tɔn wɔru gɑ nuku dobu mɔ̀ sɔm mɑɑmɑɑkiginu kpuron sɔ̃ ni u mɔ̀.
Mutɑɑdin bimɑn gɑri
(I mɑɑ mɛɛrio Mɑteu 13:31-32, Mɑɑku 4:30-32)
18 U kpɑm nɛɛ, mbɑ Gusunɔn bɑndu tɑ kɑ weenɛ. Mbɑ nɑ kon kɑ tu weesinɑ. 19 Tɑ kɑ mutɑɑdin bimɑ weenɛ, ye goo u suɑ u kɔ̃ win gbɑɑru sɔɔ. Mɑ yɑ kpiɑ yɑ kuɑ dɑ̃ru, mɑ gunɔsu su sinɑ ten kɑ̃ɑsi wɔllɔ.
Pɛ̃ɛ seeyɑtiɑn gɑri
(I mɑɑ mɛɛrio Mɑteu 13:33)
20 U kpɑm nɛɛ, mbɑ nɑ kon kɑ Gusunɔn bɑndu weesinɑ. 21 Tɑ kɑ pɛ̃ɛ seeyɑtiɑ weenɛ ye kurɔ goo u suɑ u doke sɑkɑku nɔɔ itɑn som sɔɔ mɑ mɛ kpuro mu seewɑ mu kukuɑ.
Kɔnnɔ ge gɑ ǹ yɑsu
(I mɑɑ mɛɛrio Mɑteu 7:13-14, 21-23)
22 Yesu u wuu mɑrosu kɑ bɑru kpɑɑnu bukiɑnɑmɔ mɑ u Gusunɔn gɑrin keu sɔ̃ɔsimɔ u kɑ dɔɔ Yerusɑlɛmu giɑ. 23 Goo u nùn bikiɑ u nɛɛ, yinni, tɔmbu fiiko tɔnɑwɑ bɑ koo fɑɑbɑ wɑ?
U bu wisɑ u nɛɛ, 24 i kookɑri koowo i kɑ du sɑɑ kɔnnɔ ge gɑ ǹ yɑsun di. Domi nɑ bɛɛ sɔ̃ɔmɔ, dɑbirɑ tɑ koo swɑɑ kɑsu tu kɑ du, tɑ ǹ mɑɑ kpɛ̃.
25 Sɑnɑm mɛ yɛnu yɛ̃ro u koo rɑ se u win yɛnu kɛnɛ, kpɑ bɛɛ be i wɑ̃ɑ tɔɔwɔ i n gɑmbo soomɔ i n nùn kɑnɑmɔ u bɛɛ kɛniɑ, u koo nɛɛ, u ǹ yɛ̃ mìn di i nɑ. 26 Sɑɑ yerɑ i ko i nɛɛ, i di i nɔrɑ win wuswɑɑɔ, u mɑɑ Gusunɔn gɑrin keu sɔ̃ɔsi bɛɛn wuun swɛɛɔ. 27 Sɑnɑm mɛyɑ u koo bɛɛ sɔ̃ u nɛɛ, u ǹ yɛ̃ mìn di i nɑ, i doonɔ win min di, bɛɛ kpuro bɛɛ be i kɔ̃sɑ mɔ̀. 28 Miyɑ i ko swĩ kpɑ i nɔmɑ wiru sɔndi sɑnɑm mɛ i ko Aburɑhɑmu kɑ Isɑki kɑ Yɑkɔbu kɑ Gusunɔn sɔmɔbu kpuro wɑ win bɑndu sɔɔ, kpɑ bɛɛ i deemɑ bɑ bɛɛ kɔ̃ɔ tɔɔwɔ. 29 Gɑbɑ koo nɑ sɔ̃ɔ yɑri yeru kɑ sɔ̃ɔ duu yerun di, sɔ̃ɔ yɛ̃sɑ kɑ sɔ̃ɔ yɛ̃sɑn di, kpɑ bu sinɑ bu di win bɑndu sɔɔ. 30 Wee dɑ̃ɑkobɑ wɑ̃ɑ be bɑ koo ko gbiikobu, gbiikobɑ mɑɑ wɑ̃ɑ be bɑ koo ko dɑ̃ɑkobu.
Yesu kɑ Yerusɑlɛmu
(I mɑɑ mɛɛrio Mɑteu 23:37-39)
31 Sɑɑ ye sɔɔ, Fɑlisi gɑbu bɑ nɑ bɑ nɛɛ, ɑ doonɔ minin di domi Herodu u kĩ u nun go.
32 U bu sɔ̃ɔwɑ u nɛɛ, i doo i sɛmu ge sɔ̃, n wee nɑ wɛrɛkunu girɑmɔ, nɑ tɔmbu bɛkiɑmɔ gisɔ kɑ siɑ, sɔ̃ɔ itɑseru nɑ kon nɛn sɔmburu dɑkurɑ. 33 Adɑmɑ nɑ ǹ kon ko nɑ kun wɑ̃ɑ sɑnum sɔɔ gisɔ kɑ siɑ kɑ sin teeru, domi n ǹ koorɔ Gusunɔn sɔmɔ u kɑm ko gɑm gum, mɑ n kun mɔ Yerusɑlɛmuɔ.
34 Yen biru u nɛɛ, Yerusɑlɛmu Yerusɑlɛmu, wunɛ wi ɑ rɑ Gusunɔn sɔmɔbu go, kpɑ ɑ bu kpenu kɑsuku be bɑ nun gɔriɑmɑ, nɔn nyewɑ nɑ kĩɑ n wunɛn bibu mɛnnɑ nge mɛ goo mɛro yɑ rɑ yen binu mɛnnɛ yen kɑsɑ sɔɔ, mɑ ɑ ǹ wure. 35 N wee, bɑ koo nun wunɛn yɛnu deriɑ, ɑdɑmɑ nɑ nun sɔ̃ɔmɔ, ɑ ǹ mɑɑ mɑn wɑsi sere ɑ kɑ nɛɛ, nɑ sɑ̃ɑwɑ domɑrugii wi u sisi kɑ Yinnin yĩsiru.