Luku 12

I tii lɑɑkɑri ko kɑ murɑfitiru

¹ Sɑɑ ye sɔɔ, tɔn wɔru gunɑ yɑ mɛnnɑ sere bɑ bɔrikiɑnɑmɔ mɑ Yesu u gbiɑ u win bwɑ̃ɑbu sɔ̃ɔwɑ u nɛɛ, i tii lɑɑkɑri ko kɑ Fɑlisibɑn pɛ̃ɛ seeyɑtiɑ ye yɑ sɑ̃ɑ murɑfitiru. ² Gɑ̃ɑnu sɑri ni nu wukiri mɑ nu ǹ koo terɑ. Asirin gɑ̃ɑnu mɑɑ sɑri ni bɑ ǹ koo giɑ. ³ Yen sɔ̃nɑ ye i geruɑ kpuro yɑm wɔ̃kurɔ yɑ koo nɔɔrɑ yɑm bururɑm sɔɔ. Ye i mɑɑ geruɑ diɑ sɔɔ soon bɔkuɔ yɑ koo kpɑrɑrɑ gidɑmbisɑ wɔllun di.

Wi i ko nɑsiɑ

(I mɑɑ mɛɛrio Mɑteu 10:28-31)

⁴ Yesu mɑɑ nɛɛ, nɑ bɛɛ sɔ̃ɔmɔ, bɛɛ be i sɑ̃ɑ nɛn bɔrɔbɑ, i ku bu nɑsiɑ be bɑ koo wɑsi go, mɑ yen biru bɑ ǹ kpɛ̃ bu mɑɑ gɑ̃ɑnu gɑnu ko. ⁵ Nɑ kon bɛɛ sɔ̃ wi n weenɛ i nɑsiɑ. I nùn nɑsio wi u yiiko mɔ u kɑ kpɛ̃ɛ dɔ̃ɔ sɔɔ wi u ku rɑ gbi, ù n go ù n kpɑ. Mɛyɑ nɑ bɛɛ sɔ̃ɔmɔ, wiyɑ n weenɛ i nɑsiɑ.

⁶ Nge bɑ ku rɑ gunɔminu nɔɔbu dɔre fɑrɑm yiru ro? Kɑ mɛ, bɑɑ nin teu, Gusunɔ u ku rɑ duɑri. ⁷ Bɑɑ mɑm bɛɛn wirun seri u yin geeru yɛ̃. Yen sɔ̃, i ku gɑ̃ɑnu nɑsiɑ domi i gunɔmii dɑbinu bɛɛrɛ kere.

Wi u Kirisi wurɑ

tɔmbun wuswɑɑɔ

(I mɑɑ mɛɛrio Mɑteu 10:32-33, 12:32, 10:19-20)

⁸ Yesu mɑɑ nɛɛ, nɑ bɛɛ sɔ̃ɔmɔ, bɑɑwure wi u mɑn wurɑ tɔmbun wuswɑɑɔ, Tɔnun Bii u koo nùn wurɑ wɔllun gɔrɑdobɑn wuswɑɑɔ. ⁹ Adɑmɑ wi u mɑn yinɑ tɔmbun wuswɑɑɔ, Tɔnun Bii u koo mɑɑ nùn yinɑ wɔllun gɔrɑdobɑn wuswɑɑɔ.

¹⁰ Bɑɑwure wi u Tɔnun Biin kɔ̃sɑ geruɑ, bɑ koo nùn suuru kuɑ, ɑdɑmɑ wi u Hunde Dɛɛro gɑri kɑm gerusi, u ǹ suuru kobu wɑsi.

¹¹ Bɑ̀ n kɑ bɛɛ dɑ mɛnnɔ yenɔ, wirugibu kɑ dɑmgibun mi, i ku wururɑ i n kɑsu nge mɛ i ko kɑ tii yinɑ, ǹ kun mɛ ye i ko gere. ¹² Domi Hunde Dɛɛro u koo bɛɛ sɔ̃ɔsi sɑɑ ye, ye n weenɛ i gere.

Gobigii gɑri bɔkɔ goon gɑri

¹³ Goo tɔn wɔru sɔɔn di u Yesu kɑnɑ u nɛɛ, u nùn win mɔɔ sɔ̃ɔwɔ u de bu ben tubi bɔnu ko.

¹⁴ Yesu u yɛ̃ro wisɑ u nɛɛ, wɑrɑ mɑn kuɑ siri kowo bɛɛn suunu sɔɔ ǹ kun mɛ bɛɛn tubi bɔnu kowo.

¹⁵ Mɑ u bu sɔ̃ɔwɑ u nɛɛ, bɑ n ben tii lɑɑkɑri sɑ̃ɑ gem gem kɑ binɛ bɑɑyere, domi dukiɑn kpɑ̃ɑrɑ kun tɔnun wɑ̃ɑrun wiru.

¹⁶ Mɑ u bu mɔndu gɑru kuɑ u nɛɛ, durɔ gobigii goon gberɑ dĩɑnu kuɑ gem gem. ¹⁷ U bwisikɑ u nɛɛ, mbɑ u koo ko domi u ǹ ɑyeru mɔ mi u koo win dĩɑnu doke. ¹⁸ U nɛɛ, ye u koo ko wee. U koo win birɑnu surɑ, kpɑ u kpɑɑnu bɑni ni nu ni kere, kpɑ u win ɑlikɑmɑ kpuro gure mi kɑ win dĩɑ ni nu tie. ¹⁹ Kpɑ u win tii sɔ̃ u nɛɛ, wi, u gɑ̃ɑ bɑkɑnu mɔ ni nu beruɑ wɔ̃ɔ dɑbinun sɔ̃. U koo wɛ̃rɑ kpɑ u n dimɔ u n nɔrumɔ kpɑ u n yɛ̃ɛrimɔ. ²⁰ Adɑmɑ Gusunɔ u nùn sɔ̃ɔwɑ u nɛɛ, gɑri bɔkɔ, wɔ̃ku teni bɑ koo nun wunɛn hunde bikiɑ. Ye u sɔɔru kuɑ mi, weregiɑ yɑ ko n sɑ̃ɑ.

²¹ Mɑ Yesu u nɛɛ, mɛyɑ n ko n sɑ̃ɑ kɑ wi u dukiɑ tɑɑsinɑmɔ win tiin sɔ̃ mɑ u ǹ dukiɑ mɔ Gusunɔn mi.

A Gusunɔ nɑɑnɛ koowo

(I mɑɑ mɛɛrio Mɑteu 6:25-34)

²² Yen biru Yesu u win bwɑ̃ɑbu sɔ̃ɔwɑ u nɛɛ, yenin sɔ̃nɑ nɑ bɛɛ sɔ̃ɔmɔ i ku wururɑ bɛɛn wɑ̃ɑrun sɔ̃ ye i ko i di, ǹ kun mɛ bɛɛn wɑsin sɔ̃ ye i ko kɑ yi wukiri. ²³ Domi wɑ̃ɑru tɑ dĩɑnu kere, wɑsi mɑɑ yɑ̃nu kere. ²⁴ I gbɑnɑmgbɑɑnu lɑsɑbu koowo. Nu ku rɑ duure, nu ku rɑ mɑɑ gɛ̃, nu ǹ beru yeru mɔ, mɛyɑ nu ǹ mɑɑ birɑru mɔ, Gusunɔ mɑɑ nu diisiɑmɔ. I ǹ gunɔsu bɛɛrɛ kere sere mi n tomɑ? ²⁵ Wɑrɑ bɛɛ sɔɔ, win wururɑbun sɑɑbu, u koo kpĩ u win wɑ̃ɑrun dɛ̃ɛbu sosi, bɑɑ gɔm soo teeru. ²⁶ Ì kun kpɛ̃ i gɑ̃ɑ piimii nini ko, mbɑn sɔ̃nɑ i wurure kɑ ye n tie. ²⁷ I biibii mɛɛrio. Yɑ ku rɑ sɔmburu ko, mɛyɑ yɑ ku rɑ mɑɑ tɑri. Kɑ mɛ, nɑ bɛɛ sɔ̃ɔmɔ, bɑɑ Sɑlomɔɔ kɑ win yiiko bɑkɑ, u ǹ burɑru koore nge biibii yen tiɑ. ²⁸ Gusunɔ ù n gberun yɑkɑsu burɑru wɛ̃ nge mɛ, si su wɑ̃ɑ gisɔ, mɑ siɑ su koo dɔ̃ɔ mwɑɑrɑ, u ǹ koo bɛɛ yɑ̃nu sebusiɑ n kere mɛ? Nɑɑnɛ doke piibugibu bɛɛ. ²⁹ I kun ye i ko di, kɑ ye i ko nɔ tɔnɑn kɑso mɔ̀, kpɑ i n wurure yen sɔ̃. ³⁰ Hɑnduniɑn tɔmbɑ bɑ yeni kpuro kɑsu, ɑdɑmɑ bɛɛn Bɑɑbɑ u yɛ̃ mɑ i yen bukɑtɑ mɔ. ³¹ I kɑsuo i kɑ du mi Gusunɔ u bɑndu swĩi, yen biru u koo bɛɛ wɛ̃ ye yɑ tie.

A dukiɑ beruo wɔllɔ

(I mɑɑ mɛɛrio Mɑteu 6:19-21)

³² Yesu mɑɑ nɛɛ, ɑ ku nɑndɑ yɑ̃ɑ gɔ̃ɔ piibu, domi n bɛɛn Bɑɑbɑn gɔ̃ru duɑ u kɑ bɛɛ doke bɑn te u swĩi sɔɔ. ³³ I dɔro ye i mɔ kpɑ i yen gobi sɑ̃ɑrobu kɛ̃. I tii yɑnsurɔnu kuo ni nu ku rɑ tɔkɔ ko, kɑ beru yeru Gusunɔ wɔllɔ tè sɔɔ dukiɑ ku rɑ kpe, mi gbɛnɔ sɑri wi u koo susi, mi gɛmɑ mɑɑ sɑri ye yɑ koo sɑnku. ³⁴ Domi mi bɛɛn dukiɑ beruɑ, miyɑ bɛɛn gɔ̃ru gɑ rɑ n woo.

Sɔm kowo be bɑ swɑɑ mɛɛrɑ

³⁵ Mɑ Yesu kpɑm nɛɛ, i de i n sɔɔru sɑ̃ɑ i n kpɑkɑ sɛ̃ke pɔrɑɔ kpɑ i de bɛɛn fitilɑnu nu n sɔ̃re. ³⁶ I de i n kɑ tɔmbu weenɛ be bɑ ben yinnin wurɑmɑru mɑrɑ kurɔ kpɑɑ yerun di, kpɑ bu kɑ nùn kɛniɑ mii mii sɑnɑm mɛ u tunumɑ u gɑmbo so. ^37-38 Doo nɔɔrugibɑ sɔm kowo be, bèn yinni u koo deemɑ bɑ swɑɑ mɛɛrɑ ù n tunumɑ, bɑɑ ǹ n wɔ̃ku suunun nɑ, ǹ kun mɛ goo gbiikɑɑ yɑ̀ n sumɔ. Kɑ geemɑ nɑ bɛɛ sɔ̃ɔmɔ, u koo sɔɔru ko kpɑ u bu sinɑsiɑ u bu nɔɔri. ³⁹ I de i n yɛ̃ sɑ̃ɑ sɑ̃ɑ mɑ yɛnu yɛ̃ro ù n yɛ̃ sɑɑ ye gbɛnɔ u koo nɑ, u koo dom se, u ǹ koo de bu win diru kɔrɑ. ⁴⁰ Bɛɛ mɑɑ, i n sɔɔru sɑ̃ɑ domi Tɔnun Bii, u koo nɑwɑ sɑɑ ye i ǹ kɑ nùn yĩiyɔ.

Yoo nɑɑnɛgii

kɑ nɑɑnɛ sɑrirugii

(I mɑɑ mɛɛrio Mɑteu 24:45-51)

⁴¹ Piɛɛ nɛɛ, Yinni bɛsɛrɑ ɑ mɔn te kuɑ? Nge tɔmbu kpuro.

⁴² Mɑ Yinni u nɛɛ, wɑrɑ yoo lɑɑkɑrigii wi u nɑɑnɛ mɔ. Wiyɑ wi yɛnu yɛ̃ro u koo ko yobun wirugii u kɑ bu dĩɑnu yɑbuɑ sɑɑ ye n weenɛ. ⁴³ Doo nɔɔrugiiwɑ yoo wi, win yinni ù n deemɑ u mɔ̀ mɛ, sɑnɑm mɛ u tunumɑ. ⁴⁴ Kɑ geemɑ nɑ bɛɛ sɔ̃ɔmɔ, yinni wi, u koo nùn win dukiɑ kpuro nɔmu bɛriɑ. ⁴⁵ Adɑmɑ yoo wi, ù n bwisikumɔ mɑ win yinni u tɛɛmɔ kpɑ u se u yoo tɔn durɔbu kɑ tɔn kurɔbu soberu wɔri, kpɑ u n dimɔ u n nɔrumɔ, tɑm mu n nùn goomɔ, ⁴⁶ win yinni u koo tunumɑ dɔmɑ te yoo wi, u ǹ kɑ nùn yĩiyɔ, kɑ sɑɑ ye u ǹ yɛ̃. U koo nùn bɔɔri kpiri kpirikɑ kpɑ u de u bɔnu wɑ kɑ nɑɑnɛ sɑrirugibu sɑnnu.

⁴⁷ Yoo wi u win yinnin kĩru giɑ, mɑ u ǹ gɑ̃ɑnu sɔɔru kue, mɑ u ǹ win kĩru kue, win soberɑ tɑ koo kpɛ̃ɑ. ⁴⁸ Adɑmɑ wi u kun gie, mɑ u kookoosu kuɑ si su kɑ sɛɛyɑsiɑbu nɛ, win soberɑ kun kpɛ̃ɑmɔ. Wi bɑ gɑ̃ɑ dɑbinu wɛ̃, bɑ koo nùn gɑ̃ɑ dɑbinu bikiɑ. Wi bɑ mɑɑ gɑ̃ɑ dɑbinu nɔmu sɔndiɑ, wiyɑ bɑ koo bikiɑ n kere.

Yesu kɑ kɑrɑnɑbu nɑ

(I mɑɑ mɛɛrio Mɑteu 10:34-36)

⁴⁹ Mɑ Yesu mɑɑ nɛɛ, dɔ̃ɔwɑ nɑ yɛ̃kɑm nɑ hɑnduniɑɔ, nɑ kĩwɑ u n dɑɑ yɑbure. ⁵⁰ Bɑtɛmu gɑɑ wɑ̃ɑ ye nɑ ǹ kon ko nɑ kun kue. Nɛn bwɛ̃rɑ kun kpĩ yèn sɔ̃ yɑ ǹ ginɑ koore. ⁵¹ I tɑmɑɑ nɑ nɑwɑ n kɑ ɑlɑfiɑ wɛ̃ tem mɛ sɔɔ? Aɑwo, nɑ bɛɛ sɔ̃ɔmɔ, kɑrɑnɑbɑ nɑ kɑ nɑ. ⁵² Domi sɑɑ tɛ̃n di tɔmbu nɔɔbu bɑ̀ n wɑ̃ɑ yɛnu teu sɔɔ, bɑ koo bɔnu ko. Nɔɔsinɑɑ sɑrirɑ ko n wɑ̃ɑ itɑ kɑ yirun suunu sɔɔ, ǹ kun mɛ yiru kɑ itɑn suunu sɔɔ. ⁵³ Bɑɑ kɑ bii bɑ ǹ nɔɔsinɑmɔ, mɛro kɑ bii wɔndiɑ bɑ ǹ nɔɔsinɑmɔ, mɛyɑ mɑɑ dwɑɑ mɛro kɑ biin kurɔ bɑ ǹ nɔɔsinɑmɔ.

Sɑɑn yĩrenu

(I mɑɑ mɛɛrio Mɑteu 16:2-3)

⁵⁴ U kpɑm tɔn wɔru sɔ̃ɔwɑ u nɛɛ, ì n guru wiru wɑ tɑ seemɔ sɔ̃ɔ duu yerun di, i rɑ gere yɑnde i nɛɛ, gurɑ wee, mɛyɑ n dɑ mɑɑ ko. ⁵⁵ Ì n mɑɑ wɑ woo gɑ mɔ̀ sɑɑ sɔ̃ɔ yɛ̃sɑn nɔm dwɑrun di, i rɑ nɛɛ, yɑm mu koo swĩɑ. Mɛyɑ n dɑ mɑɑ ko. ⁵⁶ Murɑfiti bɛɛ, i wɔllu kɑ tem yĩrenun tubusiɑnu yɛ̃. Amɔnɑ i ǹ kɑ sɑɑ yenin tubusiɑnu yɛ̃.

Gɑrin wii goberu

(I mɑɑ mɛɛrio Mɑteu 5:25-26)

⁵⁷ Mɑ Yesu kpɑm nɛɛ, mbɑn sɔ̃nɑ i ku rɑ bɛɛn tii bwisikue i kɑ wɑ ye n dɛnde. ⁵⁸ Sɑnɑm mɛ wunɛn yibɛrɛ u kɑ nun dɔɔ siri yerɔ, ɑ nùn suuru kɑnɔ swɑɑ mi, kpɑ ɑ wɑ ɑ yɑri, kpɑ u ku kɑ nun dɑ siri kowon mi, kpɑ siri kowo u ku nun sɑndɑmu nɔmu sɔndiɑ, kpɑ sɑndɑmu u ku nun doke pirisɔm sɔɔ. ⁵⁹ Nɑ nun sɔ̃ɔmɔ ɑ ǹ yɑrimɔ ɑ kun kɔsie ye bɑ nun bure. Bɑɑ yen fɑrɑm, ɑ ǹ derimɔ.