6
Wɔnwɔndun kɛ̃run gɑri
1 Yesu u bu sɔ̃ɔwɑ u nɛɛ, i lɑɑkɑri koowo, i ku bɛɛn geɑn kobu sɔ̃ɔsi bɑtumɑ sɔɔ, tɔmbu bu kɑ wɑn sɔ̃. Ì n kuɑ mɛ, i ǹ ɑre gɛɛ wɑsi bɛɛn Bɑɑbɑ wɔrukoon min di.
2 Yen sɔ̃, ɑ̀ n sɑ̃ɑrobu gɑ̃ɑnu kɑ̃, ɑ ku woo kɑnɑ nge mɛ be bɑ yɛ̃ɛru kɑsu bɑ rɑ ko mɛnnɔ yenɔ kɑ swɛɛɔ. Bɑ rɑ ko mɛ, tɔmbu bu kɑ bu siɑrɑn sɔ̃. Nɑ bɛɛ sɔ̃ɔmɔ kɑ gem, bɑ ben ɑre kpuro wɑ kɔ. 3 Ǹ n mɛn nɑ, ɑ̀ n sɑ̃ɑro goo gɑ̃ɑnu kɛ̃mɔ, ɑ ku de wunɛn nɔm dwɑru tu giɑ ye wunɛn nɔm geu gɑ mɔ̀. 4 N weenɛ ɑ gɑ̃ɑ gee ni ko ɑsiri sɔɔ, kpɑ wunɛn Bɑɑbɑ wi u rɑ wɑ ye yɑ koorɑ ɑsiri sɔɔ u nun ɑre wɛ̃.
Kɑnɑrun gɑri
(I mɑɑ mɛɛrio Luku 11:2-4)
5 Yesu mɑɑ nɛɛ, ì n mɑɑ kɑnɑru mɔ̀, i ku ko nge be bɑ yɛ̃ɛru kɑsu. Bɑ rɑ kɑ̃ bu kɑnɑru ko bɑ n yɔ̃ mɛnnɔ yenɔ kɑ wuu suunun swɑɑ kɛɛnɑnu sɔɔ kpɑ tɔmbu kpuro bu kɑ bu wɑ. Nɑ bɛɛ sɔ̃ɔmɔ kɑ gem, bɑ ben ɑre kpuro wɑ kɔ. 6 Adɑmɑ ɑ̀ n kɑnɑru mɔ̀ ɑ doo wunɛn dii sɔɔwɔ ɑ gɑmbo kɛnɛ, kpɑ ɑ wunɛn Bɑɑbɑ kɑnɑ wi u wɑ̃ɑ ɑsiri sɔɔ mi. Mɑ wunɛn Bɑɑbɑ wi, wi u wɑɑmɔ ye ɑ mɔ̀ ɑsiri sɔɔ, u koo nun ɑre wɛ̃.
7 I ku bɛɛn kɑnɑru gɑwɑ nge tɔn tukobu be bɑ tɑmɑɑ Gusunɔ u koo ben kɑnɑru nɔ ben gɑri gɑwɑbun sɔ̃. 8 I ku bu sɑɑri. Bɛɛn Bɑɑbɑ u bɛɛn bukɑtɑ yɛ̃ i sere nùn kɑnɑ. 9 Yen sɔ̃, wee nge mɛ i ko i n dɑ kɑnɑru ko. I n dɑ nɛɛ,
bɛsɛn Bɑɑbɑ wi u wɑ̃ɑ wɔllɔ, ɑ de bɑ n yɛ̃ mɑ wunɑ sɑ̃ɑ Dɛɛro.
10 A nɑ ɑ bɑndu swĩi.
A de bu wunɛn kĩru ko tem sɔɔ mini, nge mɛ bɑ mɔ̀ wɔllɔ.
11 A sun bɛsɛn gisɔn dĩɑnu kɛ̃.
12 A sun bɛsɛn torɑnu suuru kuo, nge mɛ be bɑ rɑ sun tore, sɑ bu suuru kuɑmmɛ.
13 A ku kɑ sun dɑ kɔkiribun berɑ giɑ.
Adɑmɑ ɑ sun wunɑ sɑɑ tɔn kɔ̃son nɔmun di.
((Domi wunɑ ɑ bɑndu kɑ dɑm kɑ yiiko mɔ sere kɑ bɑɑdommɑɔ. Ami.))
14 Domi ì n gɑbun torɑnu suuru kuɑ, ni bɑ bɛɛ kuɑ, bɛɛn Bɑɑbɑ wɔllugii u koo mɑɑ bɛɛ suuru kuɑ. 15 Adɑmɑ ì kun gɑbu suuru kue, bɛɛn Bɑɑbɑ u ǹ koo mɑɑ bɛɛ bɛɛn torɑnu suuru kuɑ.
Nɔɔ bɔkurun gɑri
16 Mɑ Yesu nɛɛ, ì n mɑɑ nɔɔ bɔkuɑ i ku de bɛɛn wuswɑɑ yu bɛɛn wɑhɑlɑ sɔ̃ɔsi nge be bɑ yɛ̃ɛru kɑsu. Bɑ rɑ ben wuswɛɛ kɔsi kpɑ gɑbu bu wɑ mɑ bɑ nɔɔ bɔkuɑ. Nɑ bɛɛ sɔ̃ɔmɔ kɑ gem bɑ ben ɑre kpuro wɑ kɔ. 17 Adɑmɑ ɑ̀ n nɔɔ bɔkuɑ ɑ wubuo kpɑ ɑ wunɛn wuswɑɑ gum sɑwɑ, 18 kpɑ tɔmbu bu ku tubu mɑ ɑ nɔɔ bɔkuɑ, mɑ n kun mɔ wunɛn Bɑɑbɑ wi u kun wɑɑrɔ. Wunɛn Bɑɑbɑ wi, wi u wɑ̃ɑ ɑsiri sɔɔ mi, u wɑɑmɔ ye ɑ mɔ̀. U koo nun ɑre wɛ̃.
A dukiɑ beruo wɔllɔ
(I mɑɑ mɛɛrio Luku 12:33-34)
19 Mɑ Yesu nɛɛ, i ku dukiɑ bere hɑnduniɑ sɔɔ mini, mi gɛmi yi rɑ di, kɑ mi yɑ koo wururɑ nɔrurɑ, kɑ mi gbɛnɔbu bɑ koo du kɑ dɑm bu gbɛni. 20 Adɑmɑ i dukiɑ beruo wɔllɔ mi gɛmi kɑ wururɑ yen gɑɑ kun kpɛ̃ yu ye sɑnku, mi gbɛnɔbu bɑ ǹ kpɛ̃ bu du bu gbɛni. 21 Domi mi wunɛn dukiɑ wɑ̃ɑ miyɑ wunɛn gɔ̃ru gɑ rɑ n woo.
Wɑsin yɑm fitilɑ
(I mɑɑ mɛɛrio Luku 11:34-36)
22 Mɑ Yesu nɛɛ, nɔni yi sɑ̃ɑwɑ nge wɑsin fitilɑ. Wunɛn nɔni yì n bwɑ̃ɑ do, wɑsi kpurowɑ yi ko n yɑm bururɑm mɔ. 23 Adɑmɑ wunɛn nɔni yì n bɑrɔ, wɑsi yi ǹ yɑm bururɑm wɑsi. Ǹ n mɛn nɑ, yɑm bururɑm mɛ mu wɑ̃ɑ wunɛ sɔɔ mù n tĩrɑ, ɑnnɑ ɑ yɑm wɔ̃kurun kpɑ̃ɑru nɔ mi!
A ǹ kpɛ̃ ɑ yinnibu yiru sɑ̃
(I mɑɑ mɛɛrio Luku 16:13)
24 Yesu mɑɑ nɛɛ, goo kun kpɛ̃ u yinnibu yiru sɑ̃. U koo turo tusi kpɑ u turo kĩɑ, ǹ kun mɛ, u koo turo tii wɛ̃ kpɑ u turo gɛm. I ǹ kpɛ̃ i Gusunɔ kɑ dukiɑ mɛnnɑ i sɑ̃.
A Gusunɔ nɑɑnɛ koowo
(I mɑɑ mɛɛrio Luku 12:22-31)
25 Yesu mɑɑ nɛɛ, yen sɔ̃, i ku wururɑ kɑ dĩɑnun gɑri, ǹ kun mɛ ye i ko nɔ i n kɑ wɑ̃ɑ, ǹ kun mɛ ye i ko bɛɛn wɑsi wukiri. Wɑ̃ɑru tɑ dĩɑnu kere, wɑsi mɑɑ yi yɑ̃nu kere. 26 I gunɔsu mɛɛrio. Su ku rɑ duure su sere gɛ̃ su sere gɑ̃ɑnu doke birɑru sɔɔ. Kɑ mɛ, bɛɛn Bɑɑbɑ wɔllugii u su diisiɑmɔ. Kɑɑ sere gere bɛɛ? I ǹ gunɔ si bɛɛrɛ kere? 27 Wɑrɑ bɛɛ sɔɔ u koo kpĩ win wururɑbun sɑɑbu u win wɑ̃ɑru sosi bɑɑ gɔm soo teeru.
28 Mbɑn sɔ̃nɑ i rɑ n wurure yɑ̃nun sɔ̃. I biibii mɛɛrio ye yɑ rɑ kpi gberɔ. Yɑ ku rɑ sɔmburu ko, yɑ ku rɑ mɑɑ tɑri. 29 Adɑmɑ nɑ bɛɛ sɔ̃ɔmɔ, bɑɑ Sɑlomɔɔ kɑ win yiiko bɑkɑ u ǹ burɑru koore nge biibii yen tiɑ. 30 Gusunɔwɑ u yɑkɑsu burɑru wɛ̃ɛmɔ gberɔ, si su wɑ̃ɑ gisɔ ɑdɑmɑ siɑ bɑ koo su kpɛ̃ɛ dɔ̃ɔ sɔɔ. Yerɑ u ǹ koo bɛɛ yɑ̃nu wɛ̃ n kere yɑkɑ si? Annɑ ɑ wɑ mɛ bɛɛn nɑɑnɛ dokebu piibu kuɑ. 31 I ku mɑɑ wururɑ i gere, mbɑ sɑ ko di, mbɑ sɑ ko nɔ, ǹ kun mɛ mbɑ sɑ ko wukiri. 32 Gɑ̃ɑ nini kpuron weeweenɑ tɔn tukobɑ mɔ̀. Adɑmɑ bɛɛn Bɑɑbɑ wɔllugii u yɛ̃ mɑ i yeni kpuron bukɑtɑ mɔ. 33 Yen sɔ̃, i ginɑ hɑniɑ koowo i kɑ du mi Gusunɔ u bɑndu swĩi kpɑ i n sɑ̃ɑ win tɔn geobu. Yen biru u koo bɛɛ wɛ̃ ye yɑ tie. 34 Tɔ̃ɔ bɑɑteren wɑhɑlɑ yɑ tu turɑ. Yen sɔ̃, i ku siɑn wururɑbu ko, domi siɑ yɑ mɑɑ yen wɑhɑlɑ mɔ.