16
Sɔm kowo gem sɑrirugii
1 Yesu u bwɑ̃ɑ be sɔ̃ɔwɑ u nɛɛ, durɔ gobigii goo wɑ̃ɑ. U sɔm kowo mɔ wi u win yɛnu nɔmu sɔndiɑ. Yerɑ bɑ sɔm kowo wi kɔrumɔtɔnu kuɑ bɑ nɛɛ u win yinnin dukiɑ sɑnkumɔ. 2 Mɑ yinni wi, u nùn sokɑ u nɛɛ, mbɑ nɑ nɔɔmɔ bɑ gerumɔ wunɛn sɔ̃. A mɑn sɔ̃ɔwɔ nge mɛ ɑ wunɛn sɔmburu koosinɑ, domi ɑ ǹ mɑɑ kpɛ̃ ɑ ko nɛn sɔm kowo. 3 Sɔm kowo wi, u tii bikiɑ u nɛɛ, mbɑ u koo ko. Wee, win yinni u nùn yɑrɑmɔ win yɛnun sɔmburun di. U ǹ dɑm mɔ u kɑ wuku, u ǹ mɑɑ sekuru kpɛ̃ u bɑrɑ ko. 4 Wee ye u koo ko, kpɑ gɑbu bu kɑ nùn mwɑ ben yɛnuɔ sɑnɑm mɛ bɑ nùn sɔmburu yɑrɑ. 5 Yerɑ u win yinnin dibugii bɑɑwure sokusiɑ mɑ u gbiikoo bikiɑ u nɛɛ, nyewɑ ɑ nɛn yinnin dibu nɛni. 6 U wisɑ u nɛɛ, gum yĩirutiru wunɔbu (100). U nùn sɔ̃ɔwɑ u nɛɛ, u win tireru suo u sinɑ fuuku kpɑ u yore weerɑɑkuru. 7 Mɑ u kpɑm goo bikiɑ u nɛɛ, wunɛ, nyewɑ ɑ nɛni. U wisɑ u nɛɛ, ɑlikɑmɑ sɑkɑku wunɔbu. Mɑ u nùn sɔ̃ɔwɑ u win tireru suo kpɑ u yore wɛnɛ. 8 Sɔm kowo nɑɑnɛ sɑrirugii win yinni u nɛɛ, bwisigiin tiiwɑ. Mɑ Yesu u nɛɛ, hɑnduniɑgibu bɑ bwisi mɔ ben wɑ̃ɑsinɑɑ sɔɔ n kere yɑm bururɑmgibu.
9 Nɑ mɑɑ bɛɛ sɔ̃ɔmɔ, i bɔrɔbɑ kɑsuo kɑ hɑnduniɑn dukiɑ, kpɑ bu rɑ bɛɛ mwɑ wɑ̃ɑ yenu sɔɔ ni nu ku rɑ kpe, sɑnɑm mɛ dukiɑ ye, yɑ kpɑ. 10 Wi u nɑɑnɛ mɔ gɑ̃ɑ piiminu sɔɔ, u mɑɑ nɑɑnɛ mɔ gɑ̃ɑ bɑkɑnu sɔɔ. Wi u kɔ̃sɑ mɔ̀ gɑ̃ɑ piiminu sɔɔ, u mɑɑ kɔ̃sɑ mɔ̀ gɑ̃ɑ bɑkɑnu sɔɔ. 11 Yen sɔ̃, ì kun nɑɑnɛ mɔ hɑnduniɑ yen dukiɑ sɔɔ, wɑrɑ koo bɛɛ dukiɑ geɑ nɔmu sɔndiɑ. 12 Ì kun mɑɑ nɑɑnɛ mɔ goon gɑ̃ɑnu sɔɔ, wɑrɑ koo bɛɛ wɛ̃ ye n sɑ̃ɑ bɛɛgiɑ.
13 Sɔm kowo kun kpɛ̃ u yinnibu yiru sɑ̃. Domi u koo turo tusi kpɑ u turo kĩɑ, ǹ kun mɛ, u koo turo tii wɛ̃, kpɑ u turo gɛm. I ǹ kpɛ̃ i Gusunɔ kɑ dukiɑ mɛnnɑ i sɑ̃ sɑnnu.
Gɑri bwese bwesekɑ
yi Yesu u geruɑ
14 Fɑlisibɑ be bɑ gobin kĩru mɔ, bɑ ye kpuro swɑɑ dɑki mɑ bɑ Yesu nɔɔ swiikinu mɔ̀. 15 U bu sɔ̃ɔwɑ u nɛɛ, bɛɛ i sɑ̃ɑwɑ be bɑ tii gem wɛ̃ɛmɔ tɔmbun wuswɑɑɔ, ɑdɑmɑ Gusunɔ u bɛɛn gɔ̃rusu yɛ̃. Domi ye bɑ siɑrɑmɔ tɔmbun mi gɑ̃ɑ kɔ̃sunɑ Gusunɔn wuswɑɑɔ.
16 Sere kɑ Yohɑnun sɑɑ, woodɑ kɑ Gusunɔn sɔmɔbu bɑ wɑ̃ɑ. Sɑɑ sɑnɑm mɛn di, bɑ bɑndun gɑri kpɑrɑmɔ te Gusunɔ u swĩi, mɑ bɑɑwure u kookɑri mɔ̀ u kɑ du kɑ dɑm. 17 Woodɑn gɑri piikon sɑnkirɑbu sɛ̃, n kere wɔllu kɑ tem kpeebu.
18 Bɑɑwure wi u win kurɔ yinɑ, mɑ u kpɑo suɑ, u sɑkɑrɑru kuɑwɑ. Bɑɑwure wi u mɑɑ kurɔ suɑ wìn durɔ nùn yinɑ, yɛ̃ro sɑkɑrɑru kuɑwɑ.
Gobigii kɑ Lɑsɑɑ
19 Mɑ Yesu kpɑm nɛɛ, durɔ dukiɑgii goo rɑɑ wɑ̃ɑ, wi u rɑ n yɑbe nɔnigiru sebuɑ te tɑ wesibu wɑ̃, mɑ bɑɑdommɑ win mi, tɔ̃ɔ bɑkɑrɑ. 20 Sɑ̃ɑro goo rɑɑ mɑɑ wɑ̃ɑ, wi bɑ sokumɔ Lɑsɑɑ. U booboosu bɑrɔ, u rɑ n kpĩwɑ dukiɑgii win yɛnu kɔnnɔwɔ. 21 Domi u kĩ u tii debiɑ kɑ dĩɑ buri yi yi wɔrumɑmɔ sɑɑ gobigii win tɑbulu wɔllun di. Bɔ̃nu rɑ mɑm nɛ nu n win booboo si dɑbirimɔ. 22 Sɑ̃ɑro wi, u gu mɑ wɔllun gɔrɑdobɑ bɑ nùn suɑ bɑ kɑ dɑ gɔriɔ mi Aburɑhɑmu u wɑ̃ɑ. Dukiɑgii wi, u mɑɑ gu, mɑ bɑ nùn sikɑ. 23 U wɑ̃ɑ nɔni swɑ̃ɑru sɔɔ gɔriɔ, mɑ u nɔni suɑ wɔllɔ u Lɑsɑɑ wɑ Aburɑhɑmun bɔkuɔ. 24 U nɔɔgiru suɑ u nɛɛ, bɑɑbɑ Aburɑhɑmu, ɑ nɛn wɔnwɔndu wɑɑwo, ɑ Lɑsɑɑ gɔrimɑ u win niki biɑn sɛ̃ru doke nim sɔɔ, kpɑ u nɛn yɑrɑ yɛmiɑsiɑ, domi nɑ nɔni swɑ̃ɑ bɑkɑru wɑɑmɔ dɔ̃ɔ yɑrɑ yeni sɔɔ. 25 Aburɑhɑmu u nɛɛ, nɛn bii, ɑ yɑɑyo mɑ ɑ wunɛn gɑ̃ɑ geenu wɑ wunɛn wɑ̃ɑrun sɑnɑm, mɛyɑ mɑɑ Lɑsɑɑ u gɑ̃ɑ kɔ̃sunu wɑ. Tɛ̃ mini win nukurɑ yɛm, wunɛ mɑɑ ɑ nɔni swɑ̃ɑru wɑɑmɔ. 26 Ye kpuron biru bɑnkokoro bɔkɔwɑ gɑ wɑ̃ɑ bɛsɛ kɑ bɛɛn bɑɑ sɔɔ. Be bɑ kĩ bu sɑrɑ minin di bu dɑ bɛɛn mi giɑ, bɑ ǹ kpɛ̃. Mɛyɑ goo kun mɑɑ kpɛ̃ u nɑ mini bɛɛn min di. 27 Dukiɑgii wi, u nɛɛ, ǹ n mɛn nɑ, nɑ nun kɑnɑmɔ, bɑɑbɑ, ɑ Lɑsɑɑ gɔrio nɛn bɑɑn yɛnuɔ, 28 domi nɑ wɔnɔbu nɔɔbu mɔ mi, kpɑ u bu yenin seedɑ diiyɑ bu ku rɑɑ kɑ nɛ ɑye tɔ̃yɑgii te sɔɔ. 29 Aburɑhɑmu u nɛɛ, bɑ Mɔwisi kɑ Gusunɔn sɔmɔbun tirenu mɔ, bu nigiɑ nɔɔwɔ. 30 Mɑ u nɛɛ, ɑɑwo bɑɑbɑ Aburɑhɑmu, goo ù n dɑ ben mi gɔrin di, bɑ koo gɔ̃ru gɔsiɑ. 31 Mɑ Aburɑhɑmu nùn sɔ̃ɔwɑ u nɛɛ, bɑ̀ kun Mɔwisi kɑ Gusunɔn sɔmɔbugiɑ nuɑ, bɑ ǹ nɑɑnɛ dokemɔ bɑɑ goo ù n seewɑ gɔrin di.