11
Yohɑnu Bɑtɛmu kowon gɔrobu
(I mɑɑ mɛɛrio Luku 7:18-35)
1 Sɑnɑm mɛ Yesu u win bwɑ̃ɑbu wɔkurɑ yiru ye bwisi yi kɑ̃ u kpɑ, u doonɑ min di u dɑ berɑ yen wuu mɑrosu giɑ u kɑ keu sɔ̃ɔsi kpɑ u mɑɑ kɑ wɑɑsu ko.
2 N deemɑ Yohɑnu Bɑtɛmu kowo u Yesu wi bɑ mɔ̀ Kirisin sɔmɑn gɑri nuɑ sere pirisɔm diru mi u wɑ̃ɑ. Yerɑ u nùn win bwɑ̃ɑbun gɑbu gɔriɑ 3 bu kɑ nùn bikiɑ, wiyɑ wi u koo be nɑ? Nge bɑ n kpɑo mɑrɑ.
4 Yesu bu wisɑ u nɛɛ, i gɔsiro i Yohɑnu tusiɑ ye i nuɑ kɑ ye i wɑ. 5 Wɔ̃kobɑ yɑm wɑɑmɔ, yɛmɔbɑ sĩimɔ, bɑ be bɑ bɑrɑ disigiru mɔ bɛkiɑmɔ bu kɑ dɛɛrɑ, sosobɑ gɑri nɔɔmɔ, bɑ gɔribu seeyɑmɔ gɔrin di, mɑ bɑ sɑ̃ɑrobu Lɑbɑɑri geɑ wɑɑsu kuɑmmɛ. 6 Doo nɔɔrugiiwɑ wi nɛn gɑri kun torɑsiɑmɔ.
7 Ye Yohɑnun bwɑ̃ɑbɑ sĩɑ Yesu u Yohɑnun gɑri tɔn dɑbiru sɔ̃ɔbu wɔri u nɛɛ, mbɑ i yɑrɑ i mɛɛrim dɑ gbɑburɔ. Yɑkɔ ge woo gɑ toorimɔ? Aɑwo. 8 Ǹ n mɛn nɑ, mbɑ i mɛɛrim dɑ. Durɔ wi u yɑ̃ɑ bɛɛrɛginu sebuɑ? Nɑ bɛɛ sɔ̃ɔmɔ be bɑ yɑ̃ɑ bɛɛrɛginu sebuɑ bɑ wɑ̃ɑ sinɑ kpɑɑnɔ. 9 Mbɑ i re kobu dɑ. Gusunɔn sɔmɔwɑ i mɛɛrim dɑ? Mɛyɑ nɑ bɛɛ sɔ̃ɔmɔ, yɛ̃ro mɑm Gusunɔn sɔmɔ kere sere mi n tomɑ. 10 Domi Yohɑnu wiyɑ wìn sɔ̃ Gusunɔn gɑri nɛɛ, <<N wee nɑ nɛn sɔmɔ gɔriɔ wunɛn wuswɑɑɔ wi u koo wunɛn swɑɑ sɔmɛ.>> 11 Kɑ gem nɑ bɛɛ sɔ̃ɔmɔ, be tɔn kurɔbɑ mɑrɑ sɔɔ goo kun Yohɑnu Bɑtɛmu kowo kere. Adɑmɑ wi u yɑ̃kɑbu bo bɑn te Gusunɔ u swĩi sɔɔ u nùn kere. 12 Sɑɑ mìn di Yohɑnu wi u wɑɑsu mɔ̀ sere kɑ tɛ̃ bɑ bɑn te kɑsuwɑ kɑ dɑm, mɑ dɑmgibɑ tu mwɑɑmɔ. 13 Mɔwisi u bɑn ten gɑri geruɑ win woodɑ sɔɔ. Gusunɔn sɔmɔbu kpuro bɑ mɑɑ yi geruɑ sere kɑ Yohɑnu Bɑtɛmu kowon wɑɑti. 14 Ì n kĩ i tubu, wiyɑ Eli wi, wi u koo rɑ nɑ. 15 Wi u swɑɑ mɔ u kɑ nɔ, u nɔɔwɔ.
16 Mbɑ kon kɑ tɛ̃n tɔmbu weesinɑ. Bɑ kɑ bibu weenɛ be bɑ sɔ̃ yɑburɔ bɑ sokunɑmɔ bɑ mɔ̀, 17 sɑ bɛɛ guuru soowɑ mɑ i ǹ yɑwɑ, sɑ bɛɛ gɔɔ womu kuɑ, i ǹ mɑɑ swĩ. 18 Domi Yohɑnu Bɑtɛmu kowo u nɑ u ǹ di u ǹ nɔrɑ nge gɑbu, mɑ bɑ nɛɛ u wɛrɛkunu mɔwɑ. 19 Tɔnun Bii mɑɑ nɑ u dimɔ u nɔrumɔ, mɑ bɑ gerumɔ bɑ mɔ̀ u sɑ̃ɑ dim kĩro kɑ tɑm nɔro, kɑ mɑɑ gbere mwɑɔbu kɑ kɔ̃sɑn kowobun bɔrɔ. Kɑ mɛ, Gusunɔn bwisi yi rɑ sɔ̃ɔsi mɑ yi sɑ̃ɑ gem yin kookoosun di.
Wuu sìn tɔmbɑ yinɑmɔ
bu nɑɑnɛ doke
(I mɑɑ mɛɛrio Luku 10:13-15)
20 Mɑ Yesu u wuu si gerisim wɔri mi u sɔm mɑɑmɑɑkigii dɑbinu kuɑ, domi sin tɔmbɑ kun bwisikɑ bɑ ben gɔ̃ru gɔsie. 21 U nɛɛ, nuku sɑnkirɑnugiiwɑ wunɛ Kɔrɑsɛni. Nuku sɑnkirɑnugiiwɑ wunɛ Bɛsɑidɑ, domi bɑ̀ n sɔm mɑɑmɑɑkigiɑ ye kuɑ Tiri kɑ Sidoni sɔɔ ye bɑ kuɑ bɛɛn suunu sɔɔ, wuu sin tɔmbu bɑ ko n dɑɑ gɔ̃ru gɔsie sɑɑ tɛɛbun di bɑ n sɔ̃ torom sɔɔ bɑ n sɑɑki sebuɑ nuku sɑnkirɑnun sɔ̃. 22 Yen sɔ̃, nɑ bɛɛ sɔ̃ɔmɔ, siribun sɑnɑm sɔɔ Tiri kɑ Sidonigiɑ koo ko kpɑkɑkɑ kɑ bɛɛ. 23 Wunɛ mɑɑ Kɑpenɑmu, ɑ yĩiyɔ kɑɑ suɑrɑ sere wɔllɔ? Aɑwo, bɑ koo nun surewɑ sere gɔriɔ. Domi sɔm mɑɑmɑɑkigiɑ ye yɑ koorɑ wunɛ sɔɔ, yɑ̀ n koorɑ Sodomuɔ, wuu ge, gɑ n wɑ̃ɑ kɑ gisɔ. 24 Yen sɔ̃nɑ nɑ bɛɛ sɔ̃ɔmɔ, siribun sɑnɑm Sodomugiɑ koo ko kpɑkɑkɑ kɑ wunɛ.
I nɑ nɛn mi i wɛ̃rɑbu mwɑ
(I mɑɑ mɛɛrio Luku 10:21-22)
25 Sɑɑ ye sɔɔ, Yesu u nɛɛ, Bɑɑbɑ, wɔllu kɑ tem Yinni, nɑ nun siɑrɑ yèn sɔ̃ ɑ yɑbu ye bibu sɔ̃ɔsi bɑɑ mɛ ɑ ye bwisigibu kɑ yɛ̃rugibu beruɑ. 26 N wɑ̃ Bɑɑbɑ, domi mɛyɑ n kɑ nun nɑɑwɑ wunɛn kĩru sɔɔ.
27 Nɛn Bɑɑbɑ mɑn bɑɑyere kpuro wɛ̃. Goo sɑri wi u Bii wi yɛ̃ mɑ n kun mɔ Bɑɑbɑ wi. Goo mɑɑ sɑri wi u Bɑɑbɑ wi yɛ̃ mɑ n kun mɔ Bii kɑ mɑɑ wi Bii u kĩ u nùn sɔ̃ɔsi.