10
Bwɑ̃ɑbu wɔkurɑ yiru yen yĩsɑ
1 Yesu u win bwɑ̃ɑbu wɔkurɑ yiru mɛnnɑ mɑ u bu yiiko wɛ̃ bu kɑ wɛrɛkunu girɑ, kpɑ bu bɑrɑru kɑ wɑsin dɑm sɑriru bɑɑtere bɛkiɑ. 2 Bwɑ̃ɑbu wɔkurɑ yiru yen yĩsɑ wee. Gbiikoo Simɔɔ wi bɑ rɑ soku Piɛɛ kɑ win wɔnɔ Andere, kɑ Yɑkɔbu kɑ win wɔnɔ Yohɑnu, Sebeden bibu, 3 kɑ Filipu kɑ Bɑɑtelemi kɑ Tomɑɑ kɑ Mɑteu wi u rɑɑ sɑ̃ɑ gbere mwɑɔ, kɑ Yɑkɔbu Alufen bii kɑ Tɑde, 4 kɑ Simɔɔ wi u win tem gɑri kĩ, kɑ Yudɑsi Isikɑriɔtu wi u tɔmbu Yesu nɔmu sɔndiɑ.
Yesu u bwɑ̃ɑbu wɔkurɑ yiru gɔrɑ
5 Yesu u tɔmbu wɔkurɑ yiru ye gɔrɑ kɑ woodɑ yeni u nɛɛ, i ku swɑɑ gɑɑ swĩi ye yɑ dɔɔ tɔn tukobun tem giɑ, i ku mɑɑ Sɑmɑrigibun wuu gɑgu du. 6 Adɑmɑ i doo Isirelibɑn mi, be bɑ kɔ̃ɔrɑ nge yɑ̃ɑnu. 7 I doo i kpɑrɑ i nɛɛ, Gusunɔ u sisi u bɑndu swĩi. 8 I bɑrɔbu bɛkio, i gɔribu seeyo, i be bɑ bɑrɑ disigiru mɔ bɛkio bu dɛɛrɑ, kpɑ i wɛrɛkunu girɑ tɔmbun wɑsi sɔɔn di. Yèn sɔ̃ i wɑ kɔsiɑru sɑri, i mɑɑ wɛ̃ɛyɔ n kun kɑ kɔsiɑru. 9 I ku dukiɑ gɑɑ suɑ i kɑ dɑ, nge wurɑ ǹ kun mɛ sii geesu, ǹ kun mɛ sii gɑndu bɛɛn bɔɔrɔ. 10 I ku kɑ yɑ̃ɑ kureru dɑ, ǹ kun mɛ yɑberu yiruse, ǹ kun mɛ bɑrɑnu ǹ kun mɛ dɛkɑ. N weenɛ bu sɔm kowo wɛ̃ yèn bukɑtɑ u mɔ u n kɑ wɑ̃ɑ.
11 Ì n turɑ wuu mɑroɔ ǹ kun mɛ wuu piibu sɔɔ, i de i mɛɛri wi u weenɛ u bɛɛ dɑm koosiɑ, kpɑ i sinɑ win yɛnuɔ sere i kɑ sĩ wuu gen min di. 12 Ì n yɛnu gɑgu duɑ i gen tɔmbu tɔbirio kpɑ i nɛɛ, Gusunɔ u bɛɛ ɑlɑfiɑ kɛ̃. 13 Yɛnu gegibu bɑ̀ n kɑ ɑlɑfiɑ ye weenɛ, i de yɑ n wɑ̃ɑ be sɔɔ, ɑdɑmɑ bɑ̀ kun kɑ weenɛ, i de yu wurɑmɑ bɛɛn mi. 14 Wuu gɑgu ǹ kun mɛ yɛnu gɑgun tɔmbu bɑ̀ n mɑɑ yinɑ bu bɛɛ dɑm koosiɑ, bu sere bɛɛn gɑri swɑɑ dɑki, i doonɔ min di kpɑ i bɛɛn nɑɑsun tuɑ bu kpɑre. 15 Kɑ geemɑ nɑ bɛɛ sɔ̃ɔmɔ, siribun sɑnɑm Gusunɔ u koo Sodomu kɑ Gomɔrɑgibu wɔnwɔndu sɔ̃ɔsi n kere wuu gen tɔmbu.
Nɔni swɑ̃ɑru te tɑ sisi
16 Yesu mɑɑ nɛɛ, wee, nɑ bɛɛ gɔrimɔ nge yɑ̃ɑnu dɛmɑkunun suunu sɔɔ. I de i n bwisi mɔ nge wɛɛ, kpɑ i n kɑ kpɑrukonu weenɛ tɑki sɑriru sɔɔ. 17 I lɑɑkɑri koowo domi gɑbɑ koo bɛɛ mwɑ bu kɑ dɑ siri yerɔ, kpɑ bu bɛɛ sɛni so ben mɛnnɔ yenɔ. 18 Bɑ koo bɛɛ siri tem yɛ̃robu kɑ sinɑmbun wuswɑɑɔ nɛn sɔ̃, kpɑ i kɑ seedɑ di ben mi kɑ tɔn tukobun mi. 19 Bɑ̀ n kɑ bɛɛ dɑ siri yerɔ, i ku wururɑ kɑ gɑri yi i ko gere. I ku mɑɑ wururɑ nge mɛ i ko gerusinɑ. Sɑɑ ye, yɑ̀ n turɑ, i ko wɑ gɑri yi i ko gere. 20 Domi gɑri yi i ko gere yi ǹ ko n sɑ̃ɑ bɛɛgii, yi koo nɑwɑ sɑɑ bɛɛn Bɑɑbɑn Hunden min di wi u wɑ̃ɑ bɛɛ sɔɔ.
21 Gɑbɑ koo ben wɔnɔbu ǹ kun mɛ ben mɑɑbu sɔ̃ɔsi bu kɑ bu go. Bɑɑbɑbɑ bɑ ko mɑɑ ko mɛ ben bibu sɔɔ, mɑ bibu bɑ koo ben mɔwɔbu kɔrumɔtɔnu kuɑ bu kɑ bu go. 22 Bɑɑwure u koo bɛɛ tusi nɛn yĩsirun sɔ̃. Adɑmɑ wi u tɛmɑnɑ sere kɑ nɔrɔ u koo fɑɑbɑ wɑ. 23 Bɑ̀ n bɛɛ nɔni sɔ̃ɔwɑ wuu teu sɔɔ, i duki doonɔ wuu gɑgun mi. Nɑ bɛɛ sɔ̃ɔmɔ kɑ gem, i ǹ ko i Isirelin wusu kpuro sɑsiri i kpe, Tɔnun Bii u kɑ tunumɑ.
24 Mɛɛro sɑri wi u win sɔ̃ɔsio kere. Yoo mɑɑ sɑri wi u win yinni kere. 25 Ǹ n mɛn nɑ, n turɑ mɛɛro u kɑ win sɔ̃ɔsio weenɑ kpɑ yoo u kɑ win yinni weenɑ. Bɑ̀ n yɛnu yɛ̃ro sokumɔ Beseburu, bɑ koo win yɛnugibu yĩsi kɔ̃sunu kɛ̃ n kere wi.
Wìn bɛrum n weenɛ i ko
(I mɑɑ mɛɛrio Luku 12:2-7)
26 Yesu mɑɑ nɛɛ, yen sɔ̃, i ku ben bɛrum ko, domi ye yɑ wukiri yɑ koo terɑ, yen ɑsirin gɑ̃ɑnu mɑɑ sɑri ni bɑ ǹ koo giɑ. 27 Ye nɑ bɛɛ sɔ̃ɔmɔ yɑm wɔ̃kuru sɔɔ, i ye geruo yɑm bururɑm sɔɔ. Ye i mɑɑ nuɑ ɑsiri sɔɔ, i yɔɔwo gidɑmbisɑ wɔllɔ i kɑ ye kpuro kpɑrɑ. 28 I ku bu nɑsiɑ be bɑ koo wɑsi tɔnɑ go, be bɑ ǹ kpɛ̃ bu hunde go. Adɑmɑ i yɛ̃ro nɑsio wi u koo kpĩ u wɑsi kɑ hunde go sɑnnu dɔ̃ɔ wi u ku rɑ gbi sɔɔ. 29 I ǹ ko kpĩ i gunɔminu yiru dwe kɑ fɑrɑm? Kɑ mɛ, bɑɑ nin teu, gɑ ǹ koo wɔrumɑ temɔ mɑ n kun mɔ bɛɛn Bɑɑbɑ u wurɑ. 30 Bɛɛ mɑɑ, bɑ mɑm bɛɛn wirun serin geeru yɛ̃. 31 Ǹ n mɛn nɑ, i ku bɛrum ko, i gunɔminu bɛɛrɛ kere sere mi n tomɑ.
Wi u Kirisi wurɑ
tɔmbun wuswɑɑɔ
(I mɑɑ mɛɛrio Luku 12:8-9)
32 Yesu mɑɑ nɛɛ, bɑɑwure wi u mɑn wurɑ tɔmbun wuswɑɑɔ, kon mɑɑ yɛ̃ro wurɑ nɛn Bɑɑbɑn wuswɑɑɔ wi u wɑ̃ɑ wɔllɔ. 33 Adɑmɑ wi u mɑn yinɑ tɔmbun wuswɑɑɔ, kon mɑɑ yɛ̃ro yinɑ nɛn Bɑɑbɑn wuswɑɑɔ wi u wɑ̃ɑ wɔllɔ.
Alɑfiɑ kɑ tɑkobin gɑri
34 Yesu mɑɑ nɛɛ, i kun tɑmɑɑ nɑ nɑwɑ hɑnduniɑɔ n kɑ ɑlɑfiɑ wɛ̃, ɑɑwo, tɑkobiwɑ nɑ kɑ nɑ. 35 Nɑ nɑwɑ n kɑ sɑnnɔ doke bii tɔn durɔ kɑ win tundon suunu sɔɔ, kɑ mɑɑ bii tɔn kurɔ kɑ win mɛron suunu sɔɔ, kɑ mɑɑ kurɔ mɔro kɑ win dwɑɑ mɛron suunu sɔɔ. 36 Tɔnun yɛnugibu beyɑ bɑ ko n sɑ̃ɑ win yibɛrɛbɑ.
37 Wi u win tundo ǹ kun mɛ win mɛro kĩ n mɑn kere u ǹ turɑ u n kɑ sɑ̃ɑ nɛgii. Nge mɛyɑ wi u win bii kĩ n mɑn kere u ǹ turɑ u n kɑ sɑ̃ɑ nɛgii. 38 Mɑ wi u kun win dɑ̃ɑ bunɑnɑru sue u n kɑ mɑn swĩi u ǹ turɑ u n kɑ sɑ̃ɑ nɛgii. 39 Wi u kĩ u win wɑ̃ɑru di kɑ win gɔ̃ru kĩru u koo tu biɑ. Adɑmɑ wi u win wɑ̃ɑru yinɑ nɛn sɔ̃ u koo tu wɑ kɑ gem.
Aren gɑri
(I mɑɑ mɛɛrio Mɑɑku 9:41)
40 Yesu mɑɑ nɛɛ, wi u bɛɛ dɑm koosiɑ nɛnɑ u dɑm koosiɑ. Wi u mɑɑ mɑn dɑm koosiɑ, u wi u mɑn gɔrimɑ dɑm koosiɑwɑ. 41 Wi u Gusunɔn sɔmɔ dɑm koosiɑ yèn sɔ̃ u sɑ̃ɑ Gusunɔn sɔmɔ, u koo ɑre wɑ nge Gusunɔn sɔmɔgii. Wi u mɑɑ tɔn geo dɑm koosiɑ, yèn sɔ̃ u sɑ̃ɑ tɔn geo, u koo ɑre wɑ nge tɔn geogii. 42 Wi u bwɛ̃ɛbwɛ̃ɛ benin turo gɑ̃ɑnu kɑ̃ yèn sɔ̃ u sɑ̃ɑ nɛn bɔ̃ɔ, bɑɑ ǹ n nim nɔrurɑm nɑ, nɑ bɛɛ sɔ̃ɔmɔ kɑ gem, yɛ̃ro kun win ɑre biɑmɔ.