9
Yesu u durɔ goo bɛkiɑ
wìn wɑsin bee tiɑ gu
1 Yesu u goo nimkuu duɑ mɑ u wure u dɑɑ bure te tɔburɑ, mɑ u turɑ win tiin wuuɔ. 2 Tɔmbu gɑbu bɑ kɑ nùn durɔ goo nɑɑwɑ wìn wɑsin bee tiɑ yɑ gu. Durɔ wi, u kpĩ kpinu wɔllɔ. Ye Yesu u ben nɑɑnɛ dokebu wɑ, u bɑrɔ wi sɔ̃ɔwɑ u nɛɛ, bii durɔbu, ɑ ku mwiɑ kpɑnɑ, ɑ wunɛn durum suuru wɑ.
3 Mɑ woodɑ yɛ̃robu gɑbɑ bwisikɑ bɑ tii sɔ̃ɔwɑ bɑ nɛɛ, durɔ wini u Gusunɔ wɔmmɔwɑ.
4 Yesu u yɛ̃ ye bɑ bwisikumɔ mɑ u nɛɛ, mbɑn sɔ̃nɑ i kɔ̃sɑ bwisikumɔ bɛɛn gɔ̃ruɔ. 5 Yerɑ̀ yɑ sɛ̃sɔ bo, n tɔnu sɔ̃ u win durum suuru wɑ, ǹ kun mɛ n nùn sɔ̃ u seewo u sĩ. 6 Nɑ kĩ i n yɛ̃ mɑ Tɔnun Bii u yiiko mɔ hɑnduniɑ sɔɔ u kɑ tɔnun durum suuru ko.
Yen sɔ̃nɑ u bɑrɔ wi sɔ̃ɔwɑ u nɛɛ, ɑ seewo ɑ wunɛn kpinu suɑ kpɑ ɑ we yɛnuɔ.
7 Durɔ wi, u seewɑ mɑ u sĩɑ win yɛnuɔ. 8 Ye tɔn be, bɑ yeni wɑ bɛrum bu mwɑ mɑ bɑ Gusunɔ siɑrɑ yèn sɔ̃ u yiiko yen bweseru tɔnu wɛ̃.
Yesu u Mɑteu sokɑ
9 Yesu u doonɑ min di. Ye u sĩimɔ swɑɑɔ u gbere mwɑɔ goo wɑ wi bɑ rɑ soku Mɑteu u sɔ̃ gbere yerɔ. Mɑ u nùn sɔ̃ɔwɑ u nɛɛ, ɑ mɑn swĩiyɔ.
Mɑ Mɑteu u seewɑ u nùn swĩi.
10 Ye Yesu u dimɔ durɔ win yɛnuɔ, gbere mwɑɔbu kɑ kɔ̃sɑn kowobu dɑbinu bɑ nɑ bɑ sinɑ kɑ Yesu kɑ win bwɑ̃ɑbu sɑnnu. 11 Fɑlisi gɑbɑ wɑ mɛ, mɑ bɑ win bwɑ̃ɑbu bikiɑ bɑ nɛɛ, mbɑn sɔ̃nɑ bɛɛn yinni u dimɔ kɑ gbere mwɑɔbu kɑ kɔ̃sɑn kowobu.
12 Yesu u ben gɑri yi nuɑ mɑ u nɛɛ, be bɑ bwɑ̃ɑ do bɑ ǹ timgiin bukɑtɑ mɔ mɑ n kun mɔ be bɑ bɑrɔ. 13 I doo i Gusunɔn gɑrin tubusiɑnu kɑsu yi yi nɛɛ, <<Wɔnwɔndɑ nɑ kĩ, n ǹ mɔ yɑ̃kuru.>> Domi nɑ ǹ nɛ n kɑ geegibu soku mɑ n kun mɔ torobu.
Nɔɔ bɔkurun gɑri
14 Mɑ Yohɑnu Bɑtɛmu kowon bwɑ̃ɑbɑ nɑ Yesun mi bɑ bikiɑ bɑ nɛɛ, mbɑn sɔ̃nɑ bɛsɛ kɑ Fɑlisibɑ sɑ rɑ nɔɔ bɔke, ɑdɑmɑ wunɛ, wunɛn bwɑ̃ɑbu bɑ ku rɑ nɔɔ bɔke.
15 Yesu u bu wisɑ u nɛɛ, be bɑ sokɑ kurɔ kpɑɑ yerɔ bɑ ko n nukuru sɑnkire sɑnɑm mɛ kurɔ kpɑon durɔ wɑ̃ɑ ben suunu sɔɔ? Aɑwo, ɑdɑmɑ sɑɑ yɑ sisi yè sɔɔ bɑ koo kurɔ kpɑon durɔ wɔrɑ ben min di. Sɑɑ yerɑ bɑ koo nɔɔ bɔke.
16 Goo ku rɑ yɑ̃ɑ tɔkɔnu kɔre kɑ yɑsi kpɑɑ ye bɑ ǹ nim doke. Ù n kuɑ mɛ, yɑsi kpɑɑ ye, yɑ koo gɑwɑnɑ kpɑ yu yɑ̃ɑ tɔkɔ ni gĩɑm sosi. 17 Goo ku rɑ mɑɑ tɑm kpɑm doke gɔnɑn bɔɔ tɔkɔnu sɔɔ. Ù n kuɑ mɛ, bɔɔ ni, nu koo kurɑ kpɑ tɑm mɛ, mu yɑri kpɑ bɔɔnu nu sɑnkirɑ. Adɑmɑ bɑ rɑ tɑm kpɑm wisiwɑ gɔnɑn bɔɔ kpɑɑnu sɔɔ. Sɑnɑm mɛ, ye yiru yen gɑɑ kun sɑnkirɑmɔ.
Wirugii goon bii kɑ kurɔ wi u Yesun yɑberu bɑbɑn gɑri
18 Sɑnɑm mɛ Yesu u bu yeni sɔ̃ɔmɔ wirugii goo u nɑ u yiirɑ win wuswɑɑɔ u nɛɛ, nɛn bii tɔn kurɔ u gu tɛ̃, ɑdɑmɑ ɑ nɑ ɑ nùn nɔmu sɔndi kpɑ u se.
19 Mɑ Yesu u seewɑ kɑ win bwɑ̃ɑbu bɑ durɔ wi swĩi.
20 Sɑnɑm mɛ bɑ dɔɔ, kurɔ goo wi u yɛm wĩibu bɑrɔ sɑɑ wɔ̃ɔ wɔkurɑ yirun di, u susi Yesun biruɔ u win yɑberun swɑɑ buɑ bɑbɑ. 21 U geruɑ win tiin gɔ̃ruɔ u nɛɛ, ù n gesi win yɑberu bɑbɑ u koo bɛkurɑ.
22 Yesu u sĩirɑ u nùn wɑ mɑ u nɛɛ, kurɔ wunɛ, ɑ ku mwiɑ kpɑnɑ, wunɛn nɑɑnɛ dokebu nun bɛkiɑ.
Yɑnde mɑ kurɔ wi, u bɛkurɑ.
23 Ye Yesu u turɑ wirugii win dirɔ, yerɑ u deemɑ gɑbɑ guunu soomɔ mɑ be kpuro bɑ sirenɛ. 24 Mɑ u nɛɛ, i yɑrio bɛɛ kpuro, wɔndiɑ wi kun gu, u dowɑ.
Mɑ be kpuro bɑ nùn yɑɑkoru wɔri. 25 Ye bɑ tɔmbu yɑrɑ bɑ kpɑ Yesu u duɑ u wɔndiɑ win nɔmu nɛnuɑ, mɑ wɔndiɑ wi, u seewɑ. 26 Yenin lɑbɑɑri yɑ kpɑrɑrɑwɑ tem mɛ kpuro sɔɔ.
Yesu u wɔ̃kobu yiru bɛkiɑ
27 Yesu u doonɑ min di. Nge mɛ u win sɑnum dɔɔ, wɔ̃kobu yiru gɑbɑ nùn swĩi. Bɑ nɔɔgiru sue bɑ mɔ̀, Dɑfidin sikɑdobu, ɑ bɛsɛn wɔnwɔndu wɑɑwo.
28 Ye Yesu u duɑ dirɔ wɔ̃ko be, bɑ nɑ win mi, mɑ u bu bikiɑ u nɛɛ, i nɑɑnɛ sɑ̃ɑ mɑ kon kpĩ n yeni ko?
Mɑ bɑ nɛɛ, mɛyɑ Yinni.
29 Sɑnɑm mɛyɑ Yesu ben nɔni bɑbɑ mɑ u nɛɛ, n bɛɛ kooro nge mɛ i nɑɑnɛ sɑ̃ɑ.
30 Mɑ bɑ yɑm wɑ. Yerɑ Yesu u bu sɔ̃ɔwɑ u sire u nɛɛ, bu ku rɑɑ goo yeni sɔ̃.
31 Adɑmɑ ye bɑ doonɑ min di kese bɑ win lɑbɑɑri kpɑrɑm wɔri tem mɛ kpuro sɔɔ.
Yesu u soso bɛkiɑ
32 Ye tɔn be, bɑ doonɑ mɑ gɑbɑ kɑ durɔ goo nɑ Yesun mi, wi u sɑ̃ɑ soso yèn sɔ̃ u wɛrɛku gɑgu mɔ win wɑsi sɔɔ. 33 Sɑnɑm mɛ Yesu u wɛrɛku ge girɑ durɔ wi, u gɑri gerubu wɔri. Mɑ tɔmbɑ biti kuɑ mɑ bɑ nɛɛ, sɑ ǹ yenin bweseru wɑɑre Isireli sɔɔ.
34 Adɑmɑ Fɑlisibɑ nɛɛ, wɛrɛkunun wirugiiwɑ u nùn dɑm wɛ̃ u kɑ nu girɑ.
Yesu u tɔmbu wɔnwɔndu kuɑ
35 Yesu u bɔsu wuu mɑrosu kpuro sɔɔ kɑ bɑru kpɑɑnɔ. U keu sɔ̃ɔsimɔ ben mɛnnɔ yenɔ u Gusunɔn bɑndun Lɑbɑɑri geɑ kpɑrɑmɔ, mɑ u tɔmbu bɛkiɑmɔ sɑɑ bɑrɑru kɑ wɑsin dɑm sɑriru bwese bwesekɑn di. 36 Ye u tɔn wɔrusu wɑ ben wɔnwɔndɑ nùn mwɑ yèn sɔ̃ bɑ wurure mɑ bɑ yɑrinɛ nge yɑ̃ɑ ni nu kun kpɑro mɔ. 37 Mɑ u win bwɑ̃ɑbu sɔ̃ɔwɑ u nɛɛ, ye yɑ ye bu kɑ gɛ̃ yɑ kpɑ̃, ɑdɑmɑ be bɑ gɛ̃ɛmɔ bɑ ǹ dɑbi. 38 Yen sɔ̃, i gbee yɛ̃ro kɑnɔ u kpɑm tɔmbu mɔrisiɑmɑ bu kɑ gɛ̃.