5
Yesun bwɑ̃ɑ gbiikobun sokubu
(I mɑɑ mɛɛrio Mɑteu 4:18-22, Mɑɑku 1:16-20)
1 Ye Yesu u yɔ̃rɑ dɑɑ burerun bɔkuɔ te bɑ rɑ soku Genɛsɑrɛti, tɔn wɔru gɑ nùn mɛnnɛ gu kɑ Gusunɔn gɑri nɔ. 2 Mɑ u goosu yiru wɑ dɑɑ bure ten goorɔ sìn min di swɛ̃ɛ gowobu bɑ sɑrɑ bɑ ben yɑ̃ɑkoronu teɔ dɑ. 3 Mɑ u duɑ goo sin teu sɔɔ ge gɑ sɑ̃ɑ Simɔɔguu, mɑ u nùn kɑnɑ u kɑ gu gooru tondɑsiɑ fiiko. Yen biru u sinɑ u tɔn wɔrusu Gusunɔn gɑri sɔ̃ɔsimɔ gen min di.
4 Ye u win gɑri gerubu mɑri, u Simɔɔ sɔ̃ɔwɑ u nɛɛ, ɑ wunɛn goo bɔrieyo bwerɔ kpɑ i bɛɛn yɑ̃ɑkoronu kpɛ̃ɛ i kɑ swɛ̃ɛ mwɑ.
5 Simɔɔ u nùn sɔ̃ɔwɑ u nɛɛ, yinni wɔ̃ku girirɑ sɑ sɔmburu kuɑ, sɑ ǹ mɑɑ gɑ̃ɑnu wɑ sɑ mwɛ, ɑdɑmɑ wunɛn gɑrin sɔ̃ kon yɑ̃ɑkoro te kpɛ̃ɛ.
6 Ye bɑ kuɑ mɛ, bɑ swɛ̃ɛ dɑbi dɑbiru gurɑ sere ben yɑ̃ɑkororɑ gɛ̃ɛrɔ. 7 Mɑ bɑ kɑ yĩreru ben berusebu sokɑ be bɑ wɑ̃ɑ goo yiruse sɔɔ bu nɑ bu bu somi. Bɑ nɑ mɑ bɑ goosu yiru ye swɛ̃ɛ yibiɑ sere su kĩ su num. 8 Ye Simɔɔ Piɛɛ u yeni wɑ u kpunɑ Yesun wuswɑɑɔ u nɛɛ, Yinni, ɑ tii gɑwo nɛn bɔkun di, domi nɛ torowɑ.
9 Domi wi kɑ win berusebu kpuro bɑ biti kuɑ swɛ̃ɛ dɑbi ten sɔ̃ te bɑ gurɑ. 10 Mɛyɑ mɑɑ biti yɑ Simɔɔn berusebu Yɑkɔbu kɑ Yohɑnu, Sebeden bibu mwɑ. Yesu u Simɔɔ sɔ̃ɔwɑ u nɛɛ, ɑ ku bɛrum ko, sɑɑ tɛ̃n di tɔmbɑ kɑɑ n kɑsu bu mɑn swĩi.
11 Sɑnɑm mɛ bɑ kɑ ben goosu dɑ goorɔ, mɑ bɑ si kpuro deri bɑ nùn swĩi.
Yesu u wi u bɑrɑ disigiru bɑrɔ
bɛkiɑ
(I mɑɑ mɛɛrio Mɑteu 8:1-4, Mɑɑku 1:40-45)
12 Sɑnɑm mɛ Yesu u wɑ̃ɑ wuu gɑgu sɔɔ durɔ goo wi u bɑrɑ disigiru bɑrɔ u nùn wɑ, mɑ u yiirɑ win wuswɑɑɔ u nùn suuru kɑnɑ u nɛɛ, Yinni ɑ̀ n wurɑ, nɑ yɛ̃ mɑ kɑɑ kpĩ ɑ mɑn bɛkiɑ kpɑ n dɛɛrɑ.
13 Mɑ Yesu u win nɔmu dɛmiɑ u nùn bɑbɑ u nɛɛ, nɑ wurɑ, ɑ bɛkuro kpɑ ɑ dɛɛrɑ.
Mii mii bɑrɑ disigii te, tɑ nùn doonɑri. 14 Yesu u nùn yiire u nɛɛ, u ku rɑɑ goo gɑ̃ɑnu gɑnu sɔ̃, ɑdɑmɑ u doo u win tii yɑ̃ku kowo tusiɑ, kpɑ u yɑ̃kuru ko win dɛɛrɑsiɑbun sɔ̃ nge mɛ Mɔwisin woodɑ yɑ geruɑ, kpɑ tu kɑ ko seedɑ tɔmbun wuswɑɑɔ.
15 Kɑ mɛ, win lɑbɑɑri yɑ yɑbi, mɑ tɔn dɑbirɑ mɛnnɑmɔ bu kɑ win gɑri nɔ, kpɑ bu kɑ bɛkurɑ ben bɑrɑnu sɔɔn di. 16 Adɑmɑ Yesu u rɑ dewɑ gbɑburɔ wi turo u n kɑnɑru mɔ̀.
Yesu u durɔ goo bɛkiɑ
wìn wɑsin bee tiɑ gu
(I mɑɑ mɛɛrio Mɑteu 9:1-8, Mɑɑku 2:1-12)
17 Sɔ̃ɔ teeru Yesu u Gusunɔn gɑrin keu sɔ̃ɔsimɔ mɑ Fɑlisibɑ kɑ woodɑ yɛ̃robu bɑ sɔ̃ mi, be bɑ nɑ sɑɑ Gɑlile kɑ Yudeɑn wuu bɑɑgeren di, kɑ mɑɑ Yerusɑlɛmun di, mɑ Yinnin dɑm mu derɑ u bɑrɔbu bɛkiɑmɔ. 18 Sɑɑ ye yɑnde, tɔmbu gɑbɑ durɔ goo sɔɔwɑ kɑ kpinu wìn wɑsin bee tiɑ yɑ gu. Bɑ kɑsu mɛ bɑ koo kɑ du kpɑ bu nùn yi Yesun wuswɑɑɔ. 19 Ye bɑ kun wɑ mi bɑ koo kɑ nùn duusiɑ tɔn wɔrun sɔ̃, yerɑ bɑ yɔɔwɑ diru mi u wɑ̃ɑn wɔllɔ, mɑ bɑ tu yɑbɑ bɑ nùn sɑrɑsiɑ kɑ win kpinu tɔn wɔru gen suunu sɔɔ Yesun wuswɑɑɔ. 20 Ye u ben nɑɑnɛ dokebu wɑ, yerɑ u durɔ wi sɔ̃ɔwɑ u nɛɛ, ɑ wunɛn durum suuru wɑ.
21 Woodɑ yɛ̃robu kɑ Fɑlisibɑ bɑ bwisikum wɔri bɑ tii bikiɑmɔ, wɑrɑ wini wi u Gusunɔ wɔmmɔ. Wɑrɑ koo kpĩ u tɔnu win durum suuru kuɑ mɑ n kun mɔ Gusunɔ turo.
22 Adɑmɑ Yesu u ben bwisikunu giɑ mɑ u bu bikiɑ u nɛɛ, mbɑn sɔ̃nɑ i bwisikumɔ mɛ bɛɛn gɔ̃ruɔ. 23 Yen yerɑ̀ yɑ sɛ̃sɔ bo, bu nɛɛ, bɑ tɔnu nùn win durum suuru kuɑ, ǹ kun mɛ bu nɛɛ, u seewo u sĩ. 24 Ǹ n mɛn nɑ, kon bɛɛ sɔ̃ɔsi mɑ Tɔnun Bii, u yiiko mɔ hɑnduniɑ mi, u kɑ durum suuru ko.
Mɑ u bɑrɔ wi sɔ̃ɔwɑ u nɛɛ, nɑ nun sɔ̃ɔmɔ, ɑ seewo ɑ wunɛn kpinu suɑ kpɑ ɑ we yɛnuɔ.
25 Mɑ u seewɑ mii mii ben wuswɑɑɔ u suɑ ye u rɑɑ kpunɑri, mɑ u Gusunɔ siɑrɑmɔ u kɑ dɔɔ yɛnuɔ. 26 Yerɑ biti yɑ be kpuro mwɑ mɑ bɑ Gusunɔ siɑrɑmɔ. Bɛrum mɑɑ bu mwɑ mɑ bɑ mɔ̀, sɑ gɑ̃ɑ mɑɑmɑɑkiginu wɑ gisɔ.
Yesu u Lefi sokɑ
(I mɑɑ mɛɛrio Mɑteu 9:9-13, Mɑɑku 2:13-17)
27 Yenibɑn biru Yesu u yɑrɑ mɑ u gbere mwɑɔ goo wɑ wi bɑ rɑ soku Lefi u sɔ̃ gbere yerɔ, mɑ u nùn sɔ̃ɔwɑ u nɛɛ, ɑ mɑn swĩiyɔ.
28 Lefi u seewɑ u ye kpuro deri mɑ u nùn swĩi.
29 Yen biru u Yesu tɔ̃ɔ bɑkɑ dim kuɑ win yɛnuɔ. Gbere mwɑɔ dɑbinu kɑ mɑɑ gɑbu bɑ kɑ bu dimɔ. 30 Fɑlisibɑ kɑ ben woodɑ yɛ̃robu gɑbu bɑ win bwɑ̃ɑbu wɔkisi bɑ bikiɑ bɑ nɛɛ, mbɑn sɔ̃nɑ i dimɔ i nɔrumɔ kɑ gbere mwɑɔbu kɑ kɔ̃sɑn kowobu.
31 Yesu u bu wisɑ u nɛɛ, be bɑ bwɑ̃ɑ do bɑ ǹ timgiin bukɑtɑ mɔ mɑ n kun mɔ be bɑ bɑrɔ. 32 Nɑ ǹ nɛ n kɑ geegibu soku. Nɑ nɑwɑ n kɑ kɔ̃sɑn kowobu soku bu kɑ ben gɔ̃ru gɔsiɑ.
Nɔɔ bɔkurun gɑri
(I mɑɑ mɛɛrio Mɑteu 9:14-17, Mɑɑku 2:18-22)
33 Bɑ nùn sɔ̃ɔwɑ bɑ nɛɛ, Yohɑnun bwɑ̃ɑbu kɑ Fɑlisibɑgibu bɑ rɑ nɔɔ bɔke kiri kiri, bɑ rɑ mɑɑ kɑnɑru ko, ɑdɑmɑ wunɛgibɑ dimɔ bɑ nɔrumɔ.
34 Mɑ u nɛɛ, i ko i kpĩ i kurɔ kpɑon durɔn bɔrɔbɑ nɔɔ bɔkusiɑ sɑnɑm mɛ u wɑ̃ɑ kɑ be? 35 Adɑmɑ sɑnɑm wee mɛ bɑ koo kurɔ kpɑon durɔ wɔrɑ ben nɔmɑn di. Sɑnɑm mɛ sɔɔrɑ bɑ koo nɔɔ bɔke.
36 U mɑɑ bu mɔndu kuɑ u nɛɛ, bɑ ku rɑ yɑbe kpɑɑru gĩɛ bu kɑ yɑbe tɔkɔru kɔre. Bɑ̀ n kuɑ mɛ, bɑ koo kpɑɑru gĩɑ, kpɑɑrun yɑsɑ mɑɑ yɑ ko n sɑ̃ɑ nɛnɛm yɑbe tɔkɔru sɔɔ. 37 Goo ku rɑ mɑɑ tɑm kpɑm doke gɔnɑn bɔɔ tɔkɔnu sɔɔ. Ù n kuɑ mɛ, tɑm kpɑm mɛ, mu koo bɔɔnu kurɑsiɑ kpɑ mu yɑri, kpɑ bɔɔnu nu sɑnkirɑ. 38 Adɑmɑ bɑ ǹ koo ko bɑ kun tɑm kpɑm doke bɔɔ kpɑɑnu sɔɔ. 39 Goo sɑri wi u ko n tɑm kpɑm kĩ, sɑnɑm mɛ u tɑm gurum nɔrɑ, domi u koo gere u nɛɛ, gurum kɑ nùn nɛrenɑ.