4
Setɑm u Yesu kɔkurɑ
1 Yen biru Hunde Dɛɛro u kɑ Yesu dɑ gbɑburɔ Setɑm u kɑ nùn kɔkiri. 2 Ye Yesu u nɔɔ bɔkuɑ sɔ̃ɔ sɔɔ weeru kɑ wɔ̃kuru weeru, yen biru gɔ̃ɔrɑ nùn mɔ̀. 3 Mɑ Setɑm u nɑ win mi u nɛɛ, ɑ̀ n sɑ̃ɑ Gusunɔn Biin nɑ, ɑ kpee nini sɔ̃ɔwɔ nu gɔsio pɛ̃ɛ.
4 Yesu nùn wisɑ u nɛɛ, Gusunɔn gɑri yi geruɑ yi nɛɛ, tɔnu kun ko n wɑ̃ɑ dĩɑnu tɔnɑn sɔ̃. U mɑɑ wɑ̃ɑwɑ Gusunɔn gere kpuron sɔ̃.
5 Mɑ Setɑm u kɑ nùn dɑ Yerusɑlɛmu wuu dɛɛrɔ gen mi, u nùn sɔndi sɑ̃ɑ yerun wii kpiirɔ. 6 Mɑ u nɛɛ, ɑ̀ n sɑ̃ɑ Gusunɔn Biin nɑ, ɑ yɔ̃ɔwɔ ɑ surɑ temɔ domi Gusunɔn gɑri yi geruɑ yi nɛɛ,
<<Gusunɔ u koo win gɔrɑdobɑ nɔɔ kɛ̃ wunɛn sɔ̃ bu nun nɛnɛ kɑ ben nɔmɑ,
kpɑ ɑ ku rɑ kɑ wunɛn nɑɑsu kperu sokurɑ.>>
7 Yesu nùn wisɑ u nɛɛ, ɑdɑmɑ Gusunɔn gɑri yi mɑɑ geruɑ yi nɛɛ, <<A ku rɑ Gusunɔ wunɛn Yinnin dɑm mɛɛri ɑ kɑ wɑ mɛ mu nɛ.>>
8 Yen biru Setɑm u kɑ Yesu dɑ guu bɑkɑru gɑrun wɔllɔ, u nùn duniɑn tem kpuro sɔ̃ɔsi kɑ mɛn bɛɛrɛ mi sinɑmbɑ bɑndu dii. 9 Mɑ u nɛɛ, yeni kpurowɑ kon nun wɛ̃ ɑ̀ n yiirɑ ɑ mɑn sɑ̃wɑ.
10 Mɑ Yesu u wisɑ u nɛɛ, ɑ doonɔ min di Setɑm. Domi bɑ yoruɑ bɑ nɛɛ, <<Kɑɑ Gusunɔ wunɛn Yinni sɑ̃, kpɑ ɑ n wi turon wɑ̃ɑru wɑ̃ɑ.>>
11 Yerɑ Setɑm u doonɑ win min di, mɑ Gusunɔn gɔrɑdobɑ bɑ nɑ bɑ nùn nɔɔri.
Yesu win sɔmburu toruɑ Gɑlileɔ
12 Ye Yesu u nuɑ mɑ bɑ Yohɑnu mwɑ bɑ doke pirisɔm sɔɔ, yerɑ u doonɑ Gɑlileɔ. 13 U ǹ sinɛ Nɑsɑrɛtiɔ, u dɑ u sinɑwɑ Kɑpenɑmuɔ, ye yɑ wɑ̃ɑ dɑɑ burerun bɔkuɔ te bɑ rɑ soku Gɑlile, Nɛfitɑli kɑ Sɑbulonin temɔ. 14 Kpɑ ye Gusunɔn sɔmɔ Esɑi u rɑɑ geruɑ yu kɑ koorɑ, ye u nɛɛ,
15 <<Sɑbulonin tem kɑ Nɛfitɑlin tem mu wɑ̃ɑ nim wɔ̃ku giɑ,
dɑɑ te bɑ mɔ̀ Yuudɛnin guruɔ Gɑlileɔ mi tɔn tukobɑ wɑ̃ɑ.
16 Be bɑ sɔ̃ yɑm wɔ̃kuru sɔɔ mi, bɑ koo yɑm bururɑm bɑkɑm wɑ.
Be, be gɔɔn bɛrum wukiri nge yɑm wɔ̃kuru,
berɑ yɑm bururɑm koo kuremɑ.>>
17 Sɑɑ sɑɑ yen diyɑ Yesu u win wɑɑsu toruɑ. U nɛɛ, i bɛɛn gɔ̃rusu gɔsio, domi Gusunɔ u sisi u bɑndu swĩi.
Yesu u susure kowobu nnɛ sokɑ
18 Nge mɛ Yesu u sĩimɔ Gɑlilen dɑɑ burerun bɔkuɔ u susure kowobu yiru gɑbu wɑ, mɔɔ kɑ wɔnɔ, Simɔɔ wi bɑ rɑ soku Piɛɛ kɑ win wɔnɔ Andere. Bɑ susure mɔ̀ dɑɑ bure te sɔɔ kɑ yɑ̃ɑkororu. 19 Yesu u bu sɔ̃ɔwɑ u nɛɛ, i mɑn swĩimɑ, kon bɛɛ sɔ̃ɔsi nge mɛ i ko kɑ tɔmbu kɑsu bu mɑn swĩi. 20 Mii mii bɑ ben yɑ̃ɑkoronu deri, mɑ bɑ nùn swĩi.
21 Ye u susi wuswɑɑɔ u mɑɑ mɔɔ kɑ wɔnɔ wɑ Yɑkɔbu kɑ Yohɑnu, Sebeden bibu. Bɑ wɑ̃ɑ ben goo nimkuu sɔɔ kɑ ben tundo Sebede, bɑ ben yɑ̃ɑkoronu kɔrumɔ. Yesu u bu sokɑ. 22 Mii mii bɑ ben tundo deri goo nimkuu sɔɔ, mɑ bɑ Yesu swĩi.
23 Yesu u bɔsu Gɑlilen tem kpuro sɔɔ u keu sɔ̃ɔsimɔ ben mɛnnɔ yenɔ u bɑn te Gusunɔ u koo swĩin Lɑbɑɑri geɑ wɑɑsu mɔ̀, mɑ u tɔmbu ben bɑrɑ bwese bwesekɑ bɛkiɑmmɛ. 24 Win bɑɑru yɑ yɛ̃bi bɑɑmɑ kpuro Sirin tem sɔɔ sere tɔmbɑ kɑ ben bɑrɔbu nɑ win mi, be bɑ bɑrɑ bwese bwesekɑ mɔ kɑ be bɑ wuriri dɑbinun wɑhɑlɑ mɔ̀ kɑ be bɑ wɛrɛkunu mɔ, kɑ girikpɑkpɑ wɔrobu kɑ bèn wɑsin bee tiɑ gu gu. Mɑ Yesu u be kpuro bɛkiɑ. 25 Mɑ tɔn wɔru guni nùn swĩi sɑɑ Gɑlile kɑ berɑ ye bɑ mɔ̀ wusu wɔkurun di, kɑ Yerusɑlɛmu kɑ Yudeɑ kɑ tem mɛ mu wɑ̃ɑ dɑɑ te bɑ mɔ̀ Yuudɛnin gurun di.