LABAARI GEA
NGE MƐ MAAKU U YORUA
1
Yohɑnu Bɑtɛmu kowon wɑɑsu
1 Yesu Kirisi, Gusunɔn Biin Lɑbɑɑri geɑn torubu wee. 2 Gusunɔn sɔmɔ Esɑi u yen gɑri yoruɑ win tireru sɔɔ u nɛɛ, Gusunɔ u nɛɛ,
<<N wee, nɑ nɛn sɔmɔ gɔriɔ wunɛn wuswɑɑɔ u wunɛn swɑɑ sɔmɛ.
3 Nɛn sɔmɔn nɔɔ gɑ gbɑ̃rɑmɔ gbɑburu sɔɔ gɑ gerumɔ gɑ mɔ̀,
i Yinnin swɑɑ sɔnwɔ, kpɑ i n ye nɔɔ nɛrɑsiɑmɔ yu dɛndɑ.>>
4 Nge mɛyɑ, Yohɑnu Bɑtɛmu kowo u nɑ gbɑburu sɔɔ. U kpɑrɑmɔ u mɔ̀, bu gɔ̃ru gɔsio ben torɑnun di kpɑ u bu bɑtɛmu ko kpɑ Gusunɔ u bu ben torɑnu suuru kuɑ.
5 Tɔmbu kpuro bɑ rɑ n dɑɑmɔ win mi sɑɑ Yudeɑn tem di kɑ mɑɑ Yerusɑlɛmu mɑron di. Bɑ ben torɑnu tuubɑ mɔ̀, mɑ bɑ derimɔ u bu bɑtɛmu mɔ̀ dɑɑ te bɑ mɔ̀ Yuudɛniɔ.
6 Yohɑnu wi, u yooyoon sɑnsun yɑberu sebuɑ, mɑ u gɔnɑ sɛ̃ke win pɔrɑɔ. Twee kɑ tim bɑusɑ u rɑ di. 7 Mɑ u wɑɑsu mɔ̀ u gerumɔ u mɔ̀, goo u sisi nɛn biruɔ wi u mɑn yiiko kere. Nɛ nɑ kun mɑm turɑ n yiirɑ n yɛ̃ron bɑrɑnun wɛ̃ɛ kusiɑ. 8 Nɛ nɑ bɛɛ bɑtɛmu mɔ̀ kɑ nim, ɑdɑmɑ yɛ̃ro wi, u koo bɛɛ bɑtɛmu kowɑ kɑ Hunde Dɛɛro.
Yesun bɑtɛmu kɑ win kɔkiribu
9 Yen biru Yesu u nɑ Nɑsɑrɛtin di ye yɑ wɑ̃ɑ Gɑlilen temɔ, mɑ Yohɑnu nùn bɑtɛmu kuɑ dɑɑ te bɑ mɔ̀ Yuudɛniɔ. 10 Sɑnɑm mɛ u yɑriɔ nim di, yerɑ u wɑ wɔllɑ wukiɑrɑ, mɑ u Hunde Dɛɛro wɑ nge kpɑruko u sɑrɑm wee win wɔllɔ. 11 Mɑ u nɔɔ gɑgu nuɑ wɔllun di gɑ nɛɛ, wunɑ nɛn Bii kĩnɑsi wì sɔɔ nɛn gɔ̃ru dobu kpuro wɑ̃ɑ.
12 Sɑɑ ye sɔɔrɑ Hunde Dɛɛro u Yesu sure gbɑburu sɔɔ. 13 Mɑ u wɑ̃ɑ mi sɔ̃ɔ weeru, Setɑm nùn kɔkirimɔ. Wi kɑ gbeeku yɛɛ sɑnnɑ bɑ wɑ̃ɑ mi, mɑ wɔllun gɔrɑdobɑ bɑ nɑ bɑ nùn nɔɔri.
Yesu u susure kowobu nnɛ sokɑ
14 Ye bɑ Yohɑnu mwɑ bɑ pirisɔm doke bɑ kpɑ, yerɑ Yesu u dɑ Gɑlilen temɔ u Gusunɔn Lɑbɑɑri geɑ kpɑrɑmɔ. 15 U nɛɛ, sɑɑ yɑ turɑ, Gusunɔ u sisi u bɑndu swĩi. I gɔ̃ru gɔsio bɛɛn torɑnun di kpɑ i Lɑbɑɑri geɑ ye nɑɑnɛ doke.
16 Sɑnɑm mɛ Yesu u sĩimɔ Gɑlilen dɑɑ burerun goorɔ, u Simɔɔ wɑ kɑ win wɔnɔ Andere. Bɑ ben yɑ̃ɑkororu kpɛ̃ɛmɔ dɑɑ bure te sɔɔ, domi swɛ̃ɛ gowobɑ bɑ sɑ̃ɑ. 17 Yesu u bu sɔ̃ɔwɑ u nɛɛ, i mɑn swĩimɑ, kon de i n dɑ tɔmbu kɑsu bu mɑn swĩi.
18 Yɑnde bɑ ben yɑ̃ɑkoronun bɑɑ deri, mɑ bɑ nùn swĩi.
19 Ye u susi wuswɑɑɔ fiiko, u Yɑkɔbu wɑ kɑ win wɔnɔ Yohɑnu be bɑ sɑ̃ɑ Sebeden bibu. Bɑ wɑ̃ɑ goo nimkuu sɔɔ bɑ yɑ̃ɑkoronu kɔrumɔ. 20 Mii mii u bu sokɑ, mɑ bɑ nùn swĩi. Bɑ ben tundo Sebede deri kɑ sɔm kowobu sɑnnu goo nimkuu sɔɔ.
Durɔ wi wɛrɛku gɑgu gɑ wɑ̃ɑsi
(I mɑɑ mɛɛrio Luku 4:31-37)
21 Mɑ bɑ dɑ Kɑpenɑmuɔ. Ye n kuɑ tɔ̃ɔ wɛ̃rɑrugiru, mɑ Yesu u duɑ mɛnnɔ yerɔ, u bu Gusunɔn gɑrin keu sɔ̃ɔsim wɔri. 22 Biti bu mwɑ win keu sɔ̃ɔsi bin sɔ̃. U bu sɔ̃ɔsimɔwɑ kɑ yiiko, n ǹ mɔ nge mɛ woodɑ yɛ̃robɑ rɑ sɔ̃ɔsi.
23 N deemɑ sɑɑ ye sɔɔ, wɛrɛkunugii goo u wɑ̃ɑ ben mɛnnɔ yee te sɔɔ. U gbɑ̃rɑ u nɛɛ, 24 mbɑ sɑ mɔɔsinɛ bɛsɛ kɑ wunɛ, Yesu Nɑsɑrɛtigii. A nɑwɑ ɑ kɑ sun kɑm koosiɑ? Nɑ yɛ̃ wi ɑ sɑ̃ɑ. Wunɛ Gusunɔn tɔn Dɛɛrowɑ.
25 Yesu u wɛrɛku ge gerusi u nɛɛ, ɑ mɑrio, kpɑ ɑ yɑri durɔ win min di.
26 Yerɑ wɛrɛku ge, gɑ durɔ wi surɑ nge giri kpɑkpɑnugii, mɑ gɑ kuuki kuɑ gɑ kɑ yɑrɑ win min di. 27 Biti tɔn be kpuro mwɑ gem gem sere bɑ sɔ̃ɔnɑmɔ bɑ mɔ̀, mbɑn bweserɑ yeni. Gɑri tukiyɑ u sɔ̃ɔsimɔ kɑ yiiko. Bɑɑ kɑ wɛrɛkunɔ u nu woodɑ wɛ̃ɛmɔ, mɑ nu nùn mɛm nɔɔwɑmmɛ.
28 Mɑ win bɑɑru yɑnde kpɑrɑrɑ Gɑlilen tem kpuro sɔɔ.
Yesu u tɔn dɑbinu bɛkiɑ
(I mɑɑ mɛɛrio Mɑteu 8:14-17, Luku 4:38-41)
29 Ye Yesu yɑrɑ mɛnnɔ yerun di, wi kɑ Yɑkɔbu kɑ Yohɑnu bɑ dɑ Simɔɔ kɑ Anderen yɛnuɔ. 30 N deemɑ, Simɔɔn kurɔn mɛro u wɑsi sundu bɑrɔ u kpĩ. Ye bɑ yɑnde turɑ mi, bɑ win gɑri Yesu sɔ̃ɔwɑ. 31 Mɑ u dɑ win mi, u nùn nɔmu nɛnuɑ u kɑ nùn seesiɑ. Yɑnde wɑsi sun te, tɑ nùn doonɑri, mɑ u bu nɔɔrim wɔri.
32 Ye n kuɑ yokɑ, sɑnɑm mɛ sɔ̃ɔ duɑ, tɔmbɑ kɑ bɑrɔbu kpuro kɑ wɛrɛkunugibu nɑ win mi. 33 Mɑ wuugibu kpuro bɑ mɛnnɑ dii tèn mi u wɑ̃ɑn kɔnnɔwɔ. 34 U dɑbiru bɛkiɑ sɑɑ ben bɑrɑ bwese bwesekɑn di, mɑ u mɑɑ wɛrɛku dɑbinu girɑ. Adɑmɑ u ǹ deri wɛrɛku ni, nu gɑri gere domi nu nùn yɛ̃.
Yesu u bɔsu Gɑlilen temɔ
(I mɑɑ mɛɛrio Luku 4:42-44)
35 Yen sisiru buru buru yellu, sɑnɑm mɛ yɑm kun dɛɛrɑm kpɑ, Yesu u seewɑ u yɑrɑ. U doonɑ mi n dɛsire, u kɑnɑru mɔ̀. 36 Mɑ Simɔɔ kɑ win kpɑɑsibu bɑ nùn kɑsu. 37 Sɑnɑm mɛ bɑ nùn wɑ bɑ nùn sɔ̃ɔwɑ bɑ nɛɛ, tɔmbu kpuro wɔɔ bɑ nun kɑsu.
38 U bu sɔ̃ɔwɑ u nɛɛ, n weenɛ su dɑ wusu gɑsu sɔɔ si su kɑ sun sikerenɛ, kpɑ n mɑɑ wɑɑsu ko mi, domi yen sɔ̃nɑ nɑ nɑ.
39 Mɑ u bɔsu Gɑlilen tem kpuro sɔɔ u wɑɑsu mɔ̀ ben mɛnnɔ yenɔ, u mɑɑ wɛrɛkunu girɑmɔ.
Yesu u wi u bɑrɑ disigiru bɑrɔ bɛkiɑ
(I mɑɑ mɛɛrio Mɑteu 8:1-4, Luku 5:12-16)
40 N wee, goo u nɑ Yesun mi, wi u bɑrɑ disigiru mɔ u yiirɑ u nùn fɑɑbɑ kɑnɑ. U nɛɛ, ɑ̀ n wurɑ kɑɑ kpĩ ɑ mɑn bɛkiɑ kpɑ n dɛɛrɑ.
41 Yerɑ wɔnwɔndɑ Yesu mwɑ, mɑ u win nɔmu dɛmiɑ u nùn bɑbɑ u nɛɛ, nɑ wurɑ, ɑ bɛkuro kpɑ ɑ dɛɛrɑ.
42 Yɑnde bɑrɑ disigii te, tɑ nùn yɔ̃su, mɑ u bɛkurɑ u dɛɛrɑ. 43-44 Sɑnɑm mɛyɑ Yesu u nùn sɔ̃ɔwɑ kɑ dɑm u nɛɛ, ɑ ku goo gɛɛ sɔ̃. Adɑmɑ ɑ doo ɑ tii yɑ̃ku kowo tusiɑ, kpɑ ɑ yɑ̃kuru ko te Mɔwisi rɑɑ bɛɛ yiire, ɑ kɑ bɑɑwure seedɑ sɔ̃ɔsi mɑ ɑ bɛkurɑ ɑ dɛɛrɑ. Mɑ u derɑ u doonɑ.
45 Adɑmɑ durɔ wi, u doonɑ mɑ u dɑ u gɑri yi kpɑrɑm wɔri bɑtumɑ sɔɔ ye n koorɑ wi sɔɔ. U gɑri yi sɑɑrimɔ sere Yesu kun kpĩɑ u wuu due, ɑdɑmɑ u yɔ̃rɑ wuun biruɔ mi n dɛsire. Mɑ tɔmbɑ nɑɑmɔ win mi sɑɑ bɑɑmɑn di.