Mɑteu 3

Yohɑnu Bɑtɛmu kowon wɑɑsu

(I mɑɑ mɛɛrio Mɑɑku 1:1-8, Luku 3:1-18, Yohɑnu 1:19-28)

¹ Sɑnɑm mɛ sɔɔ, Yohɑnu Bɑtɛmu kowo u nɑ u wɑɑsu mɔ̀ Yudeɑn gbɑburɔ. ² U nɛɛ, i bɛɛn gɔ̃ru gɔsio domi Gusunɔ u sisi u bɑndu swĩi.

³ Yohɑnu wiyɑ wìn gɑri Gusunɔn sɔmɔ Esɑi u mɔ̀ sɑnɑm mɛ u nɛɛ,

<<Goo u gerumɔ kɑ dɑm gbɑburɔ u mɔ̀,

i Yinnin swɑɑ sɔnwɔ,

kpɑ i n ye nɔɔ nɛrɑsiɑmɔ yu dɛndɑ.>>

⁴ Yohɑnu wi, u yooyoon sɑnsun yɑberu sebuɑ, mɑ u gɔnɑn kpɑkɑ sɛ̃ke pɔrɑɔ. Win dĩɑnɑ twee kɑ tim bɑusu. ⁵ Tɔmbɑ nɑ win mi sɑɑ Yerusɑlɛmun di kɑ Yudeɑn tem kpuro, kɑ tem kpuron di mɛ mu dɑɑ te bɑ mɔ̀ Yuudɛni sikerenɛ. ⁶ Bɑ ben torɑnu tuubɑ kuɑ mɑ u bu bɑtɛmu kuɑ dɑɑ te bɑ mɔ̀ Yuudɛniɔ.

⁷ Ye Yohɑnu u wɑ mɑ Fɑlisibɑ kɑ Sɑdusibɑ dɑbinu bɑ nɑ win mi u kɑ bu bɑtɛmu ko, u bu sɔ̃ɔwɑ u nɛɛ, bɛɛ wɑɑ gɔsɔnu wɑrɑ u mɑɑ bɛɛ sɔ̃ɔwɑ i Gusunɔn mɔru dukɑ suuri ye yɑ wee. ⁸ I de bɛɛn kookoosu su sɔ̃ɔsi mɑ i gɔ̃ru gɔsiɑ. ⁹ I kun tɑmɑɑ i ko gɑfɑrɑ wɑ Aburɑhɑmun sɔ̃ domi i gerumɔ i mɔ̀ u sɑ̃ɑ bɛɛn bɑɑbɑ. Nɑ bɛɛ sɔ̃ɔmɔ Gusunɔ u koo kpĩ u kpee ni suɑ u kɑ Aburɑhɑmu bibu kuɑ. ¹⁰ Wee, bɑ gbɑ̃ɑ wɑsi kɔ bu kɑ dɑ̃ɑ wukiri. Dɑ̃ru bɑɑtere te tɑ ǹ bii geenu mɑrumɔ terɑ bɑ koo burɑ kpɑ bu doke dɔ̃ɔ sɔɔ. ¹¹ Nɛ nɑ bɛɛ bɑtɛmu mɔ̀ kɑ nim i kɑ gɔ̃ru gɔsiɑbun seedɑ di, ɑdɑmɑ wi u sisi nɛn biruɔ u koo bɛɛ bɑtɛmu ko kɑ Hunde Dɛɛro kɑ dɔ̃ɔ. U mɑn dɑm kere gem gem, sere nɑ ǹ mɑm turɑ n kɑ win bɑrɑnu suɑ n nɛnɛ. ¹² U win sɑrɑtiɑ nɛni win nɔmɑɔ, u koo win ɑlikɑmɑ soo yeru kurɑ kpɑ u win ɑlikɑmɑ gurɑ u doke birɑru sɔɔ. Adɑmɑ u koo sɑkosu doke dɔ̃ɔ sɔɔ wi u ku rɑ gbi.

Yesun bɑtɛmu

(I mɑɑ mɛɛrio Mɑɑku 1:9-11, Luku 3:21-22)

¹³ Sɑnɑm mɛyɑ Yesu u nɑ sɑɑ Gɑlilen di u dɑ dɑɑ te bɑ mɔ̀ Yuudɛniɔ, Yohɑnu u kɑ nùn bɑtɛmu ko. ¹⁴ Adɑmɑ Yohɑnu u kĩ u yinɑ. U nɛɛ, wunɑ n weenɛ ɑ mɑn bɑtɛmu ko, yerɑ ɑ mɑɑ nɑ nɛn mi? ¹⁵ Adɑmɑ Yesu u nùn wisɑ u nɛɛ, ɑ de n koorɑ mɛ ginɑ, domi nge mɛyɑ sɑ ko kɑ kpuro ko ye Gusunɔ u bikiɑmɔ.

Mɑ Yohɑnu u wurɑ. ¹⁶ Ye u Yesu bɑtɛmu kuɑ u kpɑ, mii mii Yesu u yɑrɑ nim sɔɔn di. Yerɑ wɔllɑ wukiɑrɑ, mɑ u Gusunɔn Hunde wɑ u sɑrɑm wee nge kpɑruko, u nɑ u sinɑ win wiru wɔllɔ. ¹⁷ Mɑ nɔɔ gɑgu gɑ nɔɔrɑ wɔllun di gɑ nɛɛ, winiwɑ nɛn Bii kĩnɑsi wì sɔɔ nɛn gɔ̃ru dobu kpuro wɑ̃ɑ.