4
Setɑm u Yesu kɔkurɑ
(I mɑɑ mɛɛrio Mɑteu 4:1-11, Mɑɑku 1:12-13)
1 Yesu u Hunde Dɛɛro yibɑ mɑ u wurɑmɑ Yuudɛnin di. Mɑ Hunde wi, u nùn sure gbɑburu sɔɔ. 2 Miyɑ Setɑm mɑɑ nùn kɔkurɑ sɔ̃ɔ weeru. U ǹ mɑɑ gɑ̃ɑnu gɑnu di sɑnɑm mɛ sɔɔ. Ye sɑɑ yen bɑɑ yɑ kpɑ, gɔ̃ɔrɑ nùn mwɑ. 3 Mɑ Setɑm nùn sɔ̃ɔwɑ u nɛɛ, ɑ̀ n Gusunɔn Biin nɑ, ɑ kpee teni sɔ̃ɔwɔ tu gɔsirɑ pɛ̃ɛ.
4 Mɑ Yesu nùn sɔ̃ɔwɑ u nɛɛ, bɑ yoruɑ Gusunɔn gɑri sɔɔ bɑ nɛɛ, <<Tɔnu kun ko n wɑ̃ɑ dĩɑnu tɔnɑn sɔ̃.>>
5 Mɑ Setɑm u kɑ nùn dɑ guuru wɔllɔ u nùn hɑnduniɑn tem kpuro sɔ̃ɔsi nɔni kpɑki teeru mi sinɑmbɑ bɑndu dii. 6 Mɑ u nùn sɔ̃ɔwɑ u nɛɛ, nin dɑm kɑ nin yiiko kpurowɑ kon nun wɛ̃ domi bɑ mɑn wɛ̃. Wi nɑ kĩ, wiyɑ kon mɑɑ wɛ̃. 7 Ǹ n mɛn nɑ, ɑ̀ n yiirɑ ɑ mɑn sɑ̃wɑ ye kpurowɑ yɑ koo ko wunɛgiɑ.
8 Mɑ Yesu u nùn sɔ̃ɔwɑ u nɛɛ, Gusunɔn gɑri nɛɛ, <<Gusunɔ wunɛn Yinniwɑ kɑɑ n sɑ̃ɑmɔ, kpɑ ɑ n wi turon wɑ̃ɑru wɑ̃ɑ.>>
9 Mɑ u kɑ nùn dɑ Yerusɑlɛmuɔ, u nùn sɔndi sɑ̃ɑ yerun wii kpiirɔ, mɑ u nùn sɔ̃ɔwɑ u nɛɛ, ɑ̀ n Gusunɔn Biin nɑ, ɑ suro sɑɑ minin di, 10 domi Gusunɔn gɑri nɛɛ, <<U koo win gɔrɑdobɑ nɔɔ kɛ̃wɑ wunɛn sɔ̃ bu kɑ nun kɔ̃su.>> 11 <<Bɑ koo nun nɛnɛ ben nɔmɑ sɔɔ, kpɑ wunɛn nɑɑsu ku rɑɑ kperu sokurɑ.>>
12 Yesu u nùn sɔ̃ɔwɑ u nɛɛ, Gusunɔn gɑri mɑɑ nɛɛ, <<A ku rɑ Gusunɔ wunɛn Yinnin dɑm mɛɛri ɑ kɑ wɑ mɛ mu nɛ.>>
13 Ye Setɑm u nùn kɔkiri bi kpuro kuɑ u kpɑ, u nùn deri u doonɑ sere sɑɑ gɑɑ ginɑ.
Yesu win sɔmburu toruɑ Gɑlileɔ
(I mɑɑ mɛɛrio Mɑteu 4:12-17, Mɑɑku 1:14-15)
14 Yesu u wurɑ Gɑlileɔ kɑ Gusunɔn Hunden dɑm, mɑ win lɑbɑɑri yɑ nɔɔrɑ n kɑ sikerenɑ berɑ ye sɔɔ kpuro. 15 U Gusunɔn gɑrin keu sɔ̃ɔsimɔ ben mɛnnɔ yenu sɔɔ, mɑ tɔmbu kpuro bɑ nùn bɛɛrɛ wɛ̃ɛmɔ.
Bɑ Yesu yinɑ Nɑsɑrɛtiɔ
(I mɑɑ mɛɛrio Mɑteu 13:53-58, Mɑɑku 6:1-6)
16 Yesu u dɑ Nɑsɑrɛtiɔ mi u biru di. Nge mɛ win dɔɔnɛ u mɛnnɔ yeru duɑ tɔ̃ɔ wɛ̃rɑrugiru sɔɔ, mɑ u seewɑ u kɑ tireru gɑri. 17 Bɑ nùn Gusunɔn sɔmɔ Esɑin tireru wɛ̃. Ye u tu wukiɑ u wɑ mi bɑ yoruɑ bɑ nɛɛ,
18 <<Yinni Gusunɔn Hunde kɑ mɑn wɑ̃ɑ.
U mɑn gɔsɑ n kɑ dɑm sɑrirugibu Lɑbɑɑri geɑ nɔɔsiɑ.
U mɑn gɔrimɑ n kɑ yobu sɔ̃ mɑ bɑ koo yɑkiɑrɑ,
n kɑ wɔ̃kobu sɔ̃ mɑ bɑ koo yɑm wɑ,
n kɑ mɑɑ tɑkɑsigibu yɔ̃su bu doonɑ,
19 kpɑ n mɑɑ kɑ kpɑrɑ mɑ sɑɑ yɑ wee yè sɔɔ Yinni u koo tɔmbu durom kuɑ.>>
20 U tire te wukiri u mɛnnɔ yerun sɔmɔ wesiɑ mɑ u sinɑ. Be bɑ mɛnnɛ mɛnnɔ yee te sɔɔ, bɑ nùn nɔni girɑri be kpuro. 21 Mɑ u win gɑri toruɑ u bu sɔ̃ɔwɑ u nɛɛ, gisɔrɑ Gusunɔn gɑri yini yi koorɑ yi i nuɑ mi.
22 Be kpuro bɑ nùn seedɑ geɑ diiyɑ, mɑ biti yɑ bu mwɑ gɑri dure yin sɔ̃ yi yi yɑrimɔ win nɔɔn di. Mɑ bɑ mɔ̀, n ǹ Yosɛfun bii wi mi?
23 U bu sɔ̃ɔwɑ u nɛɛ, kɑ gem, i ko kpĩ i mɑn mɔn te kuɑ i nɛɛ, <<Timgii, ɑ wunɛn tii bɛkio,>> kpɑ i gere n koowo nɛn tem sɔɔ mini ye i nuɑ nɑ kuɑ kpuro Kɑpenɑmuɔ.
24 U mɑɑ nɛɛ, kɑ gem, nɑ bɛɛ sɔ̃ɔmɔ, Gusunɔn sɔmɔ goo sɑri wi u bɛɛrɛ mɔ win tiin temɔ. 25 Nɑ mɑɑ bɛɛ gem sɔ̃ɔmɔ, kurɔ gɔmini dɑbirɑ tɑ rɑɑ wɑ̃ɑ Isirelin temɔ Elin wɑɑti, ye gurɑ kun nɑ wɔ̃ɔ itɑ kɑ suru nɔɔbɑ tiɑ, mɑ gɔ̃ɔ bɑkɑru tɑ kuɑ tem kpuro. 26 Kɑ mɛ, bɑ ǹ Eli gɔre ben goon mi mɑ n kun mɔ gɔmini turo wi u wɑ̃ɑ Sɑrepɑtɑɔ Sidonin temɔ. 27 Dɑbiru be bɑ bɑrɑ disigiru mɔ bɑ rɑɑ mɑɑ wɑ̃ɑ Isirelin temɔ Gusunɔn sɔmɔ Eliseen wɑɑti. Kɑ mɛ, bɑ ǹ ben goo bɛkie, mɑ n kun mɔ Nɑmɑni Sirigii.
28 Ye bɑ gɑri yi nuɑ mɛnnɔ yee te sɔɔ, bɑ mɔru bɛsirɑ be kpuro. 29 N deemɑ ben wuu gɑ wɑ̃ɑwɑ guuru wɔllɔ. Yerɑ bɑ seewɑ bɑ nùn bɔrikiɑ bɑ kɑ dɑ wuun biruɔ bu kɑ nùn sure wɔwɑ sɔɔ. 30 Adɑmɑ u bu bukiɑnɑ mɑ u doonɑ.
Durɔ wi wɛrɛku gɑgu gɑ wɑ̃ɑsi
(I mɑɑ mɛɛrio Mɑɑku 1:21-28)
31 Yesu u sɑrɑ u dɑ Kɑpenɑmuɔ, Gɑlilen wuu gɑgɔ, mɑ u tɔmbu Gusunɔn gɑrin keu sɔ̃ɔsimɔ tɔ̃ɔ wɛ̃rɑrugiru sɔɔ. 32 Mɑ win sɔ̃ɔsirɑ bu biti kuɑ domi u gɑri gerumɔwɑ kɑ yiiko. 33 N deemɑ durɔ goo wɑ̃ɑ mɛnnɔ yeru sɔɔ wì sɔɔ wɛrɛku gɑ wɑ̃ɑ mɑ u wurɑ kuɑ wɔllɔ u nɛɛ, 34 mɑn diyɑ bɛsɛ kɑ wunɛ, Yesu Nɑsɑrɛtigii. A nɑ ɑ sun kɑm koosiɑwɑ? Nɑ yɛ̃ wi ɑ sɑ̃ɑ, wunɛ Gusunɔn tɔn Dɛɛrowɑ.
35 Mɑ Yesu u gu gerusi u nɛɛ, ɑ mɑrio, kpɑ ɑ doonɑ win min di.
Ye wɛrɛku ge, gɑ durɔ wi tem kpɑrɑnɑ ben suunu sɔɔ, mɑ gɑ doonɑ, gɑ ǹ mɑɑ nùn mɛɛrɑ kue. 36 Mɑ biti yɑ bu mwɑ kpuro bɑ bikiɑnɑmɔ bɑ mɔ̀, gɑri yiren bweserɑ yini. Domi u wɛrɛkunu woodɑ wɛ̃ɛmɔ kɑ yiiko kɑ dɑm, mɑ nu doonɑmɔ.
37 Mɑ win lɑbɑɑri yɑ nɔɔrɑ n kɑ sikerenɑ berɑ ye sɔɔ kpuro.
Yesu u tɔn dɑbinu bɛkiɑ
(I mɑɑ mɛɛrio Mɑteu 8:14-17, Mɑɑku 1:29-34)
38 Ye Yesu u yɑrɑ mɛnnɔ yee ten min di u duɑ Simɔɔn yɛnuɔ. N deemɑ Simɔɔn kurɔn mɛro u wɑsi sundu bɑrɔ tɑ bɔɔbu, mɑ bɑ nùn suuru kɑnɑ win sɔ̃. 39 U kurɔ wi tuke u wɑsi sun te gerusi mɑ tɑ nùn deri. U seewɑ yɑnde u bu nɔɔrimɔ.
40 Ye sɔ̃ɔ duɔ, bèn tɔmbɑ bɑrɑ bwese bwesekɑ mɔ kpuro bɑ kɑ bu nɑ win mi, mɑ u ben bɑɑwure nɔmɑ sɔndi u bu bɛkiɑ. 41 Wɛrɛkunu mɑɑ doonɑ tɔn dɑbirun min di, nu wuri mɔ̀ nu mɔ̀, wunɑ Gusunɔn Bii. Adɑmɑ u nu gerusi, u ǹ mɑɑ dere nu gɑri gere yèn sɔ̃ nu yɛ̃ mɑ Kirisiwɑ u sɑ̃ɑ.
Yesun wɑɑsu Yudeɑɔ
(I mɑɑ mɛɛrio Mɑɑku 1:35-39)
42 Ye yɑm sɑ̃rɑ Yesu u seewɑ u wuu yɑrɑ u dɑ gbɑburɔ. Adɑmɑ tɔn wɔru gɑ nùn kɑsu. Ye bɑ turɑ win mi, bɑ nùn suuru kɑnɑ u ku bu deri. 43 Adɑmɑ u bu sɔ̃ɔwɑ u nɛɛ, u ǹ koo ko u kun mɑɑ Gusunɔn bɑndun Lɑbɑɑri geɑ wɑɑsu kue wusu gɑsu sɔɔ, domi yen sɔ̃nɑ bɑ nùn gɔrimɑ.
44 Mɑ u wɑɑsu mɔ̀ Gɑlilen mɛnnɔ yenu sɔɔ.