6
Nɑsɑrɛtigibɑ kun Yesu wure
(I mɑɑ mɛɛrio Mɑteu 13:53-58, Luku 4:16-30)
1 Yesu u doonɑ min di u dɑ win tiin wuuɔ, mɑ win bwɑ̃ɑbɑ kɑ nùn dɑ. 2 Ye n kuɑ tɔ̃ɔ wɛ̃rɑrugiru u Gusunɔn gɑrin keu sɔ̃ɔsim wɔri mɛnnɔ yerɔ. Tɔn dɑbi te tɑ nùn swɑɑ dɑki, biti bu mwɑ. Mɑ bɑ mɔ̀, mɑn diyɑ u yenin bweseru wɑɑmɑ. Bwisi yirɑ̀n bweserɑ bɑ nùn kɑ̃. Amɔnɑ u kɑ sɔm dɑmgii ninin bweseru mɔ̀. 3 N ǹ dɑ̃ɑ dɑ̃ko wi mini? Mɑɑrin bii? Yɑkɔbu kɑ Yosɛfu kɑ Yudu kɑ Simɔɔbɑn mɔɔ? N ǹ bɛsɛ kɑ win sesubɑ sɑ wɑ̃ɑ mini sɑnnu?
Yenibɑn sɔ̃nɑ bɑ ǹ nùn nɑɑnɛ doke. 4 Mɑ Yesu u bu sɔ̃ɔwɑ u nɛɛ, gɑm sɑri mi Gusunɔn sɔmɔ ku rɑ n bɛɛrɛ mɔ mɑ n kun mɔ win tiin temɔ kɑ win tɔmbun suunu sɔɔ kɑ win yɛnuɔ.
5 Yesu u ǹ kpĩɑ u sɔm dɑmgiru gɑru kue mi, mɑ n kun mɔ ye u bɑrɔbu gɑbu nɔmɑ sɔndi u kɑ bu bɛkiɑ. 6 Mɑ u biti kuɑ gem gem ben nɑɑnɛ doke sɑrirun sɔ̃.
Yesu u bwɑ̃ɑbu wɔkurɑ yiru gɔrɑ yiru yiru
(I mɑɑ mɛɛrio Mɑteu 10:5-15, Luku 9:1-6)
Yen biru Yesu u bɑru kpɑɑnu dɑɑmɔ, u Gusunɔn gɑrin keu sɔ̃ɔsimɔ. 7 Mɑ u wɔkurɑ yiru ye sokɑ u bu gɔrimɔ yiru yiru. U bu dɑm kɑ̃ wɛrɛkunun wɔllɔ, 8 mɑ u bu yiire bu ku gɑ̃ɑnu kusenu ko sɑnum sɔ̃ mɑ n kun mɔ dɛki. Bu ku dĩɑnu suɑ, ǹ kun mɛ bɔɔru, ǹ kun mɛ gobi yɑnsurɔru sɔɔ. 9 U nɛɛ bu sɑlubɑtɑ dokeo ɑdɑmɑ bu ku yɑberu yiruse suɑ.
10 Mɑ u bu sɔ̃ɔwɑ u nɛɛ, ì n wuu gɑgu duɑ, i koowo yɛnu teun sɔbu sere i kɑ wuu ge yɑri. 11 Bɑ̀ kun bɛɛ dɑm koosie gɑm, mɑ bɑ kun bɛɛn gɑri swɑɑ dɑki, ì n doonɔ i bɛɛn nɑɑsun tuɑ bu kpɑreo. Yeniwɑ n ko n sɑ̃ɑ seedɑ ye yɑ bu tɑɑrɛ wɛ̃ɛmɔ.
12 Yerɑ bwɑ̃ɑ be, bɑ doonɑ, bɑ wɑɑsu mɔ̀ bɑ gerumɔ tɔmbu bu ben gɔ̃rusu gɔsio torɑnun di. 13 Mɑ bɑ wɛrɛku dɑbinu girɑmɔ, bɑ mɑɑ bɑrɔ dɑbinu gum tɑ̃remɔ bɑ bu bɛkiɑmɔ.
Yohɑnu Bɑtɛmu kowon gɔɔ
(I mɑɑ mɛɛrio Mɑteu 14:1-12, Luku 9:7-9)
14 N wee, sunɔ Herodu u nuɑ ye gɔro be, bɑ kuɑ, domi Yesun yĩsirɑ yɑrɑ. Mɑ bɑ nɛɛ, Yohɑnu Bɑtɛmu kowowɑ seewɑ gɔrin di. Yen sɔ̃nɑ u dɑm mɔ u kɑ mɑɑmɑɑki mɔ̀.
15 Gɑbɑ nɛɛ, Eliwɑ.
Mɑ gɑbɑ mɑɑ nɛɛ, u sɑ̃ɑwɑ Gusunɔn sɔmɔ nge win sɔmɔ yerukobu.
16 Adɑmɑ ye Herodu u ye nuɑ, u nɛɛ, Yohɑnuwɑ wìn wiru u derɑ bɑ burɑ, wiyɑ u seewɑ gɔrin di.
17-19 N deemɑ Herodu wi, u rɑɑ win wɔnɔ Filipun kurɔ Herodiɑ suɑ kurɔ, mɑ Yohɑnu u nùn sɔ̃ɔwɑ mɑ n ǹ kɑ nùn weenɛ u win wɔnɔn kurɔ yɛnu doke. Yen sɔ̃nɑ Herodiɑ u Yohɑnun mɔru nɛni, u kĩ u nùn go mɑ u kpɑnɑ. Adɑmɑ Herodu u derɑ bɑ Yohɑnu mwɑ bɑ pirisɔm doke u kɑ Herodiɑn gɔ̃ru yɛmiɑsiɑ. 20 Domi Herodu u Yohɑnun bɛɛrɛ yɛ̃. U yɛ̃ mɑ Yohɑnu sɑ̃ɑ tɔn geo wìn wɑ̃ɑru tɑ dɛɛre, mɑ u nùn beruɑ u ku wɑhɑlɑ wɑ. U rɑ kɑ̃ u Yohɑnun gɑri swɑɑ dɑki bɑɑ mɛ gɑri yi u rɑ nɔ, yi rɑ win lɑɑkɑri seeye.
21 Dɔmɑ te Herodu u dim bɑkɑm kuɑ u kɑ win mɑru tɔ̃ru yɑɑyɑ, u tɔnwerobu kɑ tɑbu wirugibu kɑ Gɑlilen gobigibu sokɑ. Dɔmɑ teyɑ sɑnɑm Herodiɑ nɑɑwɑ. 22 Ye win bii tɔn kurɔ yɑɑbu duɑ u yɑwɑ, n Herodu kɑ win sɔbu dore. Mɑ Herodu u wɔndiɑ wi sɔ̃ɔwɑ u nɛɛ, ɑ mɑn bikio ye ɑ kĩ, kon nun ye kɛ̃. 23 Yen biru u geruɑ kɑ bɔ̃ri u nɛɛ, ye ɑ bikiɑ kpuro kon nun kɛ̃, bɑɑ ǹ n nɛn tem bɔnun nɑ.
24 Mɑ wɔndiɑ wi, u yɑrɑ u dɑ u win mɛro bikiɑ mbɑ n weenɛ u sunɔ bikiɑ.
Mɑ mɛro u nùn sɔ̃ɔwɑ u nɛɛ, u Yohɑnu Bɑtɛmu kowon wiru bikio.
25 Yɑnde wɔndiɑ wi, u wurɑ kɑ sɛndɑru sunɔn mi, mɑ u nùn sɔ̃ɔwɑ u nɛɛ, nɑ kĩ ɑ mɑn Yohɑnu Bɑtɛmu kowon wiru kɛ̃ tɛ̃n tɛ̃ pɛrɛnti sɔɔ.
26 Bɑɑ mɛ sunɔ win nukurɑ sɑnkirɑ gem gem, kɑ mɛ, win bɔ̃ri kɑ win sɔbun sɔ̃, u ǹ kĩ u nùn yinɑri. 27 Mɑ u win kiruku turo gɔrɑ kɑ woodɑ u kɑ Yohɑnu Bɑtɛmu kowon wiru nɑ. Mɑ kiruku u dɑ u Yohɑnun wiru burɑ pirisɔm dirɔ, 28 mɑ u kɑ wii te nɑ pɛrɛnti sɔɔ u wɔndiɑ wi wɛ̃, mɑ wɔndiɑ mɑɑ suɑ u win mɛro wɛ̃. 29 Ye Yohɑnun bwɑ̃ɑbɑ gɑri yi nuɑ, bɑ dɑ bɑ win goru suɑ bɑ sikuɑ.
Yesu u tɔmbu nɔrɔbun
subɑ nɔɔbu diisiɑ
30 Gɔro be, bɑ wurɑmɑ Yesun mi, mɑ bɑ nùn sɑɑriɑ kpuro ye bɑ kuɑ, kɑ yèn keu bɑ sɔ̃ɔsi. 31 Mɑ tɔn dɑbirɑ nɑɑmɔ ben mi tɑ wemɔ sere wi kɑ win bwɑ̃ɑbɑ fɛɛ biɑ bu di. Yen sɔ̃nɑ u bu sɔ̃ɔwɑ u nɛɛ, i nɑ su tii kɑrɑ su dɑ gbɑburu giɑ i wɛ̃rɑ fiiko.
32 Mɑ bɑ goo nimkuu duɑ bɑ doonɑ gbɑburu giɑ, wi kɑ win bwɑ̃ɑbu. 33 Adɑmɑ tɔn dɑbirɑ wɑ bɑ doonɔ, mɑ bɑ bu tubɑ. Yen sɔ̃nɑ tɔmbɑ gbiɑ bɑ duki dɑ wusu kpuron di mi Yesu kɑ win bwɑ̃ɑbɑ dɔɔ.
34 Ye Yesu u yɑrɑ goon di u tɔn wɔru gunɑ wɑ, mɑ u yen wɔnwɔndu wɑ yèn sɔ̃ bɑ sɑ̃ɑ nge yɑ̃ɑnu ni nu kun kpɑro mɔ. Mɑ u bu gɑ̃ɑ dɑbinu keu sɔ̃ɔsim wɔri. 35 Ye sɔ̃ɔ yɑ̃ɑrɑ win bwɑ̃ɑbɑ nùn susi bɑ nɛɛ, yɑm mi gbɑburɑ, sɔ̃ɔ wee mɑɑ yɑ̃ɑrɑ. 36 A de tɔn be, bu dɑ bɑru kpɑɑnɔ kɑ wuu si su wɑ̃ɑ turuku bu dwe ye bɑ koo di.
37 Adɑmɑ u bu sɔ̃ɔwɑ u nɛɛ, i bu dĩɑnu wɛ̃ɛyɔ bɛɛn tii.
Bɑ nùn bikiɑ bɑ nɛɛ, ɑ kĩ su sɔ̃ɔ goobun (200) sɔmburun gobi suɑ su dɑ su kɑ pɛ̃ɛ dwe kpɑ su bu wɛ̃ bu di?
38 Mɑ Yesu u bu bikiɑ u nɛɛ, pɛ̃ɛ nyewɑ i mɔ. I doo i wɑ.
Ye bɑ wɑ bɑ nɛɛ, pɛ̃ɛ nɔɔbuwɑ kɑ mɑɑ swɛ̃ɛ yiru.
39 Mɑ u win bwɑ̃ɑbu yiire bu tɔn be sinɑsiɑ wuu wuukɑ yɑkɑ bekusu sɔɔ. 40 Mɑ bɑ sinɑ wuu wuukɑ gɑm wunɔbu (100), gɑm weerɑɑkuru. 41 Yerɑ Yesu u pɛ̃ɛ nɔɔbu ye suɑ kɑ swɛ̃ɛ yiru ye, mɑ u win nɔni suɑ wɔllɔ u Gusunɔ siɑrɑ. Mɑ u pɛ̃ɛ ye mururɑ u win bwɑ̃ɑbu wɛ̃ɛmɔ bu tɔn be yɑbuɑ. U mɑɑ swɛ̃ɛ yi bɔnu kuɑ tɔmbu kpuro bu kɑ wɑ. 42 Mɑ be kpuro bɑ di bɑ debɑ. 43 Mɑ win bwɑ̃ɑbɑ pɛ̃ɛ kɑ swɛ̃ɛn sukum gurɑ ye tɔmbɑ di n tiɑrɑ mɑ n yibɑ birenu wɔkurɑ yiru sɔɔ. 44 Be bɑ pɛ̃ɛ ye di sɔɔ, tɔn durɔbun geerɑ turɑ nɔrɔbun subɑ nɔɔbu (5.000).
Yesu u sĩimɔ nim wɔllɔ
(I mɑɑ mɛɛrio Mɑteu 14:22-33, Yohɑnu 6:15-21)
45 Ye bɑ kpɑ yɑnde, Yesu u win bwɑ̃ɑbu sɔ̃ɔwɑ bu goo nimkuu duo bu nùn gbiiyɑ guru giɔ Bɛsɑidɑ giɑ kpɑ win tii u n tɔn be yɑrinɑsiɑmɔ. 46 Ye u tɔn be nɔɔ kɑnɑ u kpɑ, u doonɑ guurun berɑ giɑ u kɑ kɑnɑru ko. 47 Sɑnɑm mɛ yɑm tĩrɑ bwɑ̃ɑ be, bɑ wɑ̃ɑ goo nimkuu sɔɔ dɑɑ burerun suunuɔ, mɑ Yesu tiɑ wi turo guruɔ. 48 U wɑ mɑ ben sɛsɛrɑ kun mɑɑ nim murɑmɔ yèn sɔ̃ woo dɑmguu gɑ kɑ bu yinnɑmɔ. Sɑnɑm mɛ yɑm sɑ̃rɑm dɔɔ, mɑ u bu turuku koomɑ u sĩimɔ nim wɔllɔ u kĩ u bu gbiiri. 49 Adɑmɑ ye bɑ nùn wɑ u sĩimɔ nim wɔllɔ bɑ tɑmɑɑ siiniwɑ, mɑ bɑ nɔɔgiru suɑ, 50 domi be kpuro bɑ nùn wɑɑmɔ mɑ bɑ nɑndɑ. Mɑ yɑnde Yesu kɑ bu gɑri kuɑ u nɛɛ, nɛnɑ, i de bɛɛn lɑɑkɑri yu wurɑmɑ, i ku nɑndɑ.
51 Mɑ u duɑ ben goo sɔɔ mɑ woo gɑ mɑri. Yerɑ biti bu mwɑ n bɑndɑ, 52 domi pɛ̃ɛ yen sɔm mɑɑmɑɑkigirɑ kun bu yeeri ben lɑɑkɑri sɑrirun sɔ̃.
Yesu u bɑrɔbu bɛkiɑ Genɛsɑrɛtin temɔ
(I mɑɑ mɛɛrio Mɑteu 14:34-36)
53 Sɑnɑm mɛ bɑ tɔburɑ bɑ kpɑ, bɑ turɑ Genɛsɑrɛtin temɔ, mɑ bɑ gooru girɑri. 54 Ye bɑ yɑrɑ goon di, migum migum tɔmbɑ Yesu tubɑ. 55 Yerɑ tem mɛn tɔmbu kpuro bɑ duki dɑɑmɔ mɑ bɑ kɑ ben bɑrɔbu nɑɑmɔ bɑɑmɑ kpuron di Yesun mi, mi bɑ gesi nuɑ u wɑ̃ɑ. 56 Yɑm kpuro mi Yesu u dɑ, bɑru kpɑɑnɔ kɑ wuu mɑrosɔ kɑ gberu kpɑɑnɛbɑ sɔɔ bɑ rɑ kɑ bɑrɔbu nɛwɑ ben yɑɑrɑɔ kpɑ bu nùn kɑnɑ u de bu gesi win yɑberun swɑɑ buɑ bɑbɑ. Be bɑ mɑɑ ye bɑbɑ kpuro bɑ bɛkurɑ.