Mɑɑku 7

Sikɑdobɑn deemɑ

¹ N wee, Fɑlisibɑ kɑ woodɑ yɛ̃robu gɑbu be bɑ nɑ Yerusɑlɛmun di, bɑ mɛnnɑ Yesun mi. ² Bɑ wɑ win bwɑ̃ɑbu gɑbu bɑ dimɔ kɑ nɔm gbebɑ, bɑ ǹ niɛ.

³ N deemɑ Fɑlisibɑ kɑ mɑɑ Yuubɑ be bɑ tie bɑ ben sikɑdobɑn deemɑ swĩi. Bɑ̀ kun niɛ wɑsɑ wɑsɑ bɑ ku rɑ gɑ̃ɑnu di. ⁴ Mɛyɑ mɑɑ, bɑ̀ n yɑrɑ bɑ wurɑmɑ tɔɔwɔn di, bɑ̀ kun woburɑ bɑ ku rɑ di. Gɑ̃ɑ dɑbinɑ bɑ rɑ mɑɑ ko ni nu sɑ̃ɑ ben deemɑ nge nɔrin teɑbu, kɑ wekenu, kɑ mɑɑ gbɛ̃ɑ ye bɑ kuɑ kɑ sii gɑndu.

⁵ Yen sɔ̃nɑ Fɑlisibɑ kɑ woodɑ yɛ̃robu bɑ Yesu bikiɑ bɑ nɛɛ, mbɑn sɔ̃nɑ wunɛn bwɑ̃ɑbɑ ku rɑ sikɑdobɑn deemɑ swĩi. Mbɑn sɔ̃nɑ bɑ rɑ di kɑ nɔm gbebɑ.

⁶ Mɑ Yesu u bu wisɑ u nɛɛ, Esɑi u rɑɑ Gusunɔn gɑri geruɑ sɑ̃ɑ sɑ̃ɑ bɛɛ murɑfitibɑn sɔ̃ sɑnɑm mɛ u yoruɑ,

<<Gusunɔ u nɛɛ,

bwese teni tɑ mɑn bɛɛrɛ wɛ̃ɛmɔ kɑ nɔɔ.

Adɑmɑ ten gɔ̃ru gɑ kɑ mɑn tomɑ.

⁷ Kɑmɑ tɑ mɑn sɑ̃ɑmɔ.

Domi tɔmbun woodɑwɑ yɑ kuɑ ben sɔ̃ɔsiru.>>

⁸ Mɑ Yesu u nɛɛ, i Gusunɔn woodɑ derimɔ, mɑ i tɔmbun komɑnu swĩi.

⁹ U mɑɑ bu sɔ̃ɔwɑ u nɛɛ, ɑnnɑ ɑ bwisi wɑ, mɑ i Gusunɔn woodɑ yinɑ mɑ i bɛɛn deemɑ swĩi. ¹⁰ Domi Mɔwisi u geruɑ u nɛɛ, <<A wunɛn tundo kɑ wunɛn mɛro bɛɛrɛ wɛ̃ɛyɔ.>> Mɑ u kpɑm nɛɛ, <<Wi u win tundo ǹ kun mɛ win mɛro kɔ̃sɑ gerusi, bɑ koo yɛ̃ro gowɑ.>> ¹¹ Adɑmɑ bɛɛ i gerumɔ mɑ goo ù n win tundo ǹ kun mɛ win mɛro sɔ̃ɔwɑ u nɛɛ, win dukiɑ ye u koo kpĩ u kɑ nùn somi, koobɑniwɑ, yen tubusiɑnɑ yɑ kuɑ Gusunɔgiɑ, ¹² n ǹ mɑɑ weenɛ yɛ̃ro wi, u win tundo ǹ kun mɛ win mɛro somi. ¹³ Nge mɛyɑ i Gusunɔn gɑri tɛɛsimɔ mɑ i bɛɛn deemɑ swĩi ye bɑ bɛɛ deriɑ. I mɑɑ gɑ̃ɑ dɑbinu gɑnu mɔ̀ ni nu kɑ ye weenɛ.

Ye yɑ tɔnu mɔ̀ disigii

(I mɑɑ mɛɛrio Mɑteu 15:10-20)

¹⁴ Mɑ Yesu u kpɑm tɔn wɔru sokɑ win mi, mɑ u bu sɔ̃ɔwɑ u nɛɛ, i mɑn swɑɑ dɑkio bɛɛ kpuro i nɔ. ¹⁵ Gɑ̃ɑ tɔɔkinu sɑri ni nu dumɔ tɔnu sɔɔ ni nu koo kpĩ nu nùn ko disigii. Adɑmɑ gɑ̃ɑ ni nu yɑrimɔ tɔnu sɔɔn di, niyɑ nu nùn mɔ̀ disigii. (( ¹⁶ Goo ù n swɑɑ mɔ u kɑ nɔ, u nɔɔwɔ.))

¹⁷ Sɑnɑm mɛ u tɔn wɔru gunɑ ye deri u duɑ yɛnuɔ, win bwɑ̃ɑbɑ nùn mɔn ten tubusiɑnu bikiɑ. ¹⁸ U bu sɔ̃ɔwɑ u nɛɛ, bɛɛn tii i mɑɑ sɑ̃ɑ bwisi sɑrirugibu? I ǹ tubɑ mɑ gɑ̃ɑ tɔɔkinu ni nu dumɔ tɔnu sɔɔ nu ǹ kpɛ̃ nu nùn ko disigii? ¹⁹ Domi dĩɑnu kun dumɔ win gɔ̃ru sɔɔ mɑ n kun mɔ win nukurɔ, kpɑ nu kɑm ko.

Nge mɛyɑ Yesu u bu sɔ̃ɔsimɔ mɑ dĩɑnu kpurowɑ nu dɛɛre.

^20-21 Mɑ u nɛɛ, gɑ̃ɑ ni nu yɑrimɔ tɔnun gɔ̃run di niyɑ nu nùn mɔ̀ disigii. Niyɑ bwisiku kɔ̃sunu kɑ kɔ̃ɔ mɛnnɑbu tɑntɑnɑru sɔɔ kɑ gbɛnɑ kɑ tɔn goobu (200) ²² kɑ sɑkɑrɑru kɑ kɔdɛ kɑ nuku kɔ̃suru kɑ tɑki kɑ kom bɛrɛtɛkɛ kɑ nɔnu kɑ tɔn sɑnkubu kɑ tii suɑbu kɑ ɑtɑfiiru. ²³ Gɑ̃ɑ kɔ̃su ni kpuro nu yɑrimɔwɑ tɔnu sɔɔn di mɑ nu yɛ̃ro mɔ̀ disigii.

Kurɔ sɔɔ goo u Yesu nɑɑnɛ doke

(I mɑɑ mɛɛrio Mɑteu 15:21-28)

²⁴ Mɑ Yesu u swɑɑ wɔri u doonɑ Tirin tem giɑ. U duɑ yɛnu gɑgu sɔɔ, u ǹ kĩ goo u n yɛ̃ ɑdɑmɑ u ǹ kpĩɑ u kuke. ²⁵ Mɑ kurɔ goo wìn bii tɔn kurɔ sɑ̃ɑ wɛrɛkunugii, u nuɑ bɑ Yesun gɑri mɔ̀, mɑ u nɑ u kpunɑ win wuswɑɑɔ. ²⁶ Kurɔ wi, u sɑ̃ɑwɑ Gɛrɛki wi bɑ mɑrɑ Fenisiɔ, Sirin tem sɔɔ. U Yesu kɑnɑmɔ u nùn win biin wɛrɛku girɑ. ²⁷ Adɑmɑ Yesu nùn sɔ̃ɔwɑ u nɛɛ, n weenɛ bu ginɑ bibu dĩɑnu wɛ̃, domi n ǹ wɑ̃ bu bibun dĩɑnu suɑ bu bɔ̃nu kɔ̃ɔwɑ.

²⁸ Mɑ u Yesu wisɑ u nɛɛ, mɛyɑ Yinni, ɑdɑmɑ bɑɑ bɔ̃ɔ binu nu rɑ bibun dĩɑ buri dɔbiri tɑbulun kɔkɔrɔ.

²⁹ Yesu u nùn sɔ̃ɔwɑ u nɛɛ, wisi bin sɔ̃, ɑ wio. Wɛrɛku ge, gɑ wunɛn bii doonɑri.

³⁰ Ye u turɑ yɛnuɔ u deemɑ bii wi, u kpĩ kpin yerɔ, wɛrɛku ge, gɑ nùn doonɑri.

Yesu u durɔ soso goo bɛkiɑ

³¹ Yen biru Yesu u gɔsirɑmɑ Tirin tem di u dɔɔ Gɑlilen dɑɑ bureru giɑ. Nge mɛ u dɔɔ u Sidonin tem kɑ tem mɛ bɑ mɔ̀ Wusu wɔkuru bukiɑnɑ. ³² Yerɑ gɑbɑ kɑ soso goo nɑ win mi, wi u ku rɑ kpĩ u gɑri ko sɑ̃ɑ sɑ̃ɑ. Mɑ bɑ Yesu kɑnɑ u nùn nɔmɑ sɔndi u bɛkiɑ. ³³ U kɑ nùn dɑ bee tiɑ mi n kɑ tɔn wɔru tomɑ, mɑ u win niki binu doke soso win swɑsu sɔɔ. Mɑ u yɑ̃ɑtɑm siɑ u kɑ win yɑrɑ bɑbɑ. ³⁴ Mɑ Yesu u nɔni suɑ wɔllɔ, u wom mwɛ, mɑ u nɛɛ, Efɑtɑ, yen tubusiɑnɑ swɑsu su wukiɑro.

³⁵ Mii mii mɑ durɔ win swɑsu wukiɑrɑ, win yɑrɑ dɛndɑ, mɑ u gɑri kobu wɔri dee dee. ³⁶ Yesu bu yiire bu ku rɑɑ goo sɔ̃ ɑdɑmɑ nge mɛ u bu sɔ̃ɔmɔ kpeetim sɑri, mɛyɑ bɑ mɑɑ gerumɔ kpeetim sɑri. ³⁷ Mɑ biti bɑkɑ bu mwɑ n bɑndɑ mɑ bɑ gerumɔ bɑ mɔ̀, ye u mɔ̀ kpuro gɑ̃ɑ burɑnɑ. U mɑm derimɔ sosobɑ gɑri nɔɔmɔ. Be bɑ ku rɑ rɑɑ mɑɑ gere, bɑ gerumɔ.