15
Sikɑdobɑn deemɑ
(I mɑɑ mɛɛrio Mɑɑku 7:1-13)
1 Yerɑ Fɑlisibɑ kɑ woodɑ yɛ̃robu gɑbu bɑ nɑ Yesun mi sɑɑ Yerusɑlɛmun di, bɑ nùn bikiɑ bɑ nɛɛ, 2 mbɑn sɔ̃nɑ wunɛn bwɑ̃ɑbu bɑ ǹ bɛsɛn sikɑdobɑn deemɑ mɛm nɔɔwɑmmɛ. Domi bɑ ku rɑ niɛ bu sere di.
3 Yesu bu wisɑ u nɛɛ, bɛɛ mɑɑ ni, mbɑn sɔ̃nɑ i rɑ Gusunɔn woodɑ sɑre mɑ i sere bɛɛn deemɑ nɛni. 4 Domi Gusunɔ u nɛɛ, <<A wunɛn tundo kɑ wunɛn mɛro bɛɛrɛ wɛ̃ɛyɔ.>> U mɑɑ nɛɛ, <<Wi u win tundo ǹ kun mɛ win mɛro kɔ̃sɑ gerusi bɑ koo nùn gowɑ.>> 5 Adɑmɑ bɛɛ i gerumɔ mɑ goo ù n win tundo ǹ kun mɛ win mɛro sɔ̃ɔwɑ u nɛɛ, win dukiɑ ye u koo kpĩ u kɑ nùn somi yɑ kuɑ Gusunɔgiɑ, 6 n ǹ mɑɑ weenɛ durɔ wi, u win tundo ǹ kun mɛ win mɛro somi. Nge mɛyɑ i Gusunɔn gɑri tɛɛsimɔ mɑ i bɛɛn deemɑ swĩi. 7 Murɑfiti bɛɛ, kɑ geemɑ bɛɛn sɔ̃nɑ Gusunɔ u geruɑ sɑɑ Esɑin nɔɔn di u nɛɛ,
8 <<Tɔn beni bɑ mɑn bɛɛrɛ wɛ̃ɛmɔ kɑ nɔɔ.
Adɑmɑ ben gɔ̃ru gɑ kɑ mɑn tomɑ.
9 Kɑmɑ bɑ mɑn sɑ̃ɑmɔ.
Domi tɔmbun woodɑwɑ yɑ kuɑ ben sɔ̃ɔsiru.>>
Ye yɑ tɔnu mɔ̀ disigii
(I mɑɑ mɛɛrio Mɑɑku 7:14-23)
10 Mɑ Yesu u tɔn wɔru sokɑ u nɛɛ, i nɔɔwɔ kpɑ i de n bɛɛ yeeri. 11 N ǹ mɔ ye yɑ dumɔ tɔnun nɔɔ sɔɔ yerɑ yɑ nùn mɔ̀ disigii, mɑ n kun mɔ ye yɑ yɑrimɔ sɑɑ win nɔɔn di, yeyɑ yɑ rɑ tɔnu ko disigii.
12 Yerɑ win bwɑ̃ɑbɑ nɑ win mi bɑ nɛɛ, n ǹ ɑ yɛ̃ mɑ gɑri yi ɑ geruɑ mi, yi Fɑlisibɑ duɑwɑ mi yɑ.
13 U bu wisɑ u nɛɛ, dɑ̃ru bɑɑtere te nɛn Bɑɑbɑ wɔrukoo kun duure bɑ koo tu wukɑwɑ. 14 I bu derio. Swɑɑ gbio wɔ̃kobɑ. Wɔ̃ko ù n mɑɑ win wɔ̃kosi swɑɑ gbiiye be yiru kpurowɑ bɑ koo tokoro wɔri.
15 Piɛɛ nùn sɔ̃ɔwɑ u nɛɛ, ɑ sun mɔn te tubusio.
16 Yesu u nɛɛ, n ǹ bɛɛn tii yeeri kɑ tɛ̃? 17 I ǹ yɛ̃ mɑ ye yɑ dumɔ nɔɔ sɔɔ kpuro nukurɔwɑ yɑ dɔɔ? Mɑ ǹ n sosi yɑ koo yɑri wɑsin di. 18 Adɑmɑ ye yɑ yɑrimɔ nɔɔn di, gɔ̃run diyɑ yɑ wee. Yeyɑ yɑ rɑ tɔnu ko disigii. 19 Domi gɔ̃run diyɑ bwisiku kɔ̃sunu wee, kɑ tɔn goberu, kɑ sɑkɑrɑru, kɑ kɔ̃ɔ mɛnnɑbu tɑntɑnɑru sɔɔ kɑ gbɛnɑ kɑ weesu kɑ tɔn sɑnkubu. 20 Yeyɑ mi, ye yɑ rɑ tɔnu ko disigii. Adɑmɑ nɔm kɛsɛnun dibu ku rɑ tɔnu ko disigii.
Kurɔ sɔɔ goo u Yesu
nɑɑnɛ doke
(I mɑɑ mɛɛrio Mɑɑku 7:24-30)
21 Yen biru Yesu doonɑ min di u dɑ Tiri kɑ Sidonin berɑ giɑ. 22 Kurɔ Kɑnɑnigii goo wi u wɑ̃ɑ berɑ mi, u nɑ win mi, mɑ u nɔɔgiru suɑ u nɛɛ, Yinni, Dɑfidin sikɑdobu, ɑ nɛn wɔnwɔndu wɑɑwo. Nɛn bii tɔn kurɔ u wɛrɛkunu mɔ nu nùn nɔni sɔ̃ɔwɑ too.
23 Kɑ mɛ, Yesu kun nùn gɑri gɛɛ wisɑ. Mɑ win bwɑ̃ɑbɑ nɑ win mi, bɑ nùn kɑnɑ u de kurɔ wi, u doonɑ min di domi u kuuki mɔ̀ u kɑ bu swĩi biruɔ.
24 U bu wisɑ u nɛɛ, Isirelibɑ tɔnɑn miyɑ bɑ mɑn gɔrimɑ be, be bɑ kɔ̃ɔre nge yɑ̃ɑnu.
25 Adɑmɑ kurɔ wi, u nɑ Yesun wuswɑɑɔ u yiirɑ u nɛɛ, Yinni, ɑ mɑn somiɔ.
26 Yesu nùn sɔ̃ɔwɑ u nɛɛ, n ǹ weenɛ bu bibun dĩɑnu suɑ bu bɔ̃nu kɔ̃ɔwɑ.
27 Kurɔ wi nɛɛ, geemɑ, Yinni. Kɑ mɛ, bɔ̃nu rɑ dĩɑ buri di yi yi wɔrumɑ nin yinnibun tɑbulun di.
28 Yerɑ Yesu nùn sɔ̃ɔwɑ u nɛɛ, kurɔ wunɛ, wunɛn nɑɑnɛ dokebu kpɑ̃ too. N koo nun kuɑ nge mɛ ɑ kĩ.
Sɑɑ ye sɔɔ, mɑ kurɔ win bii wi, u bɛkurɑ.
Yesu u bɑrɔ dɑbinu bɛkiɑ
29 Yesu u doonɑ min di u dɑ Gɑlilen dɑɑ burerun goorɔ. Mɑ u yɔɔwɑ guuru wɔllɔ u sinɑ. 30 Yerɑ tɔn wɔru gunɑ nɑ win mi. Bɑ kɑ yɛmɔbu nɑ kɑ wɔ̃kobu kɑ ɑlebugibu kɑ sosobu, kɑ kpɑm bɑrɔ dɑbinu bɑ yi Yesun wuswɑɑɔ, mɑ u bu bɛkiɑ. 31 Biti bɑkɑ tɔn be mwɑ ye bɑ wɑ sosobɑ gɑri mɔ̀, ɑlebugibɑ bɛkurɑ, yɛmɔbɑ sĩimɔ, wɔ̃kobɑ yɑm wɑɑmɔ, mɑ bɑ Gusunɔ Isirelibɑn Yinni siɑrɑbu wɔri.
Yesu u tɔmbu nɔrɔbun
subɑ nnɛ diisiɑ
(I mɑɑ mɛɛrio Mɑɑku 8:1-10)
32 Yesu u win bwɑ̃ɑbu sokɑ u nɛɛ, tɔn benin wɔnwɔndɑ mɑn mɔ̀. Yen sɔ̃ɔ itɑ wee ye bɑ kɑ wɑ̃ɑ nɛn mi, gɑ̃ɑnu kun mɑɑ bu tie ni bɑ koo di. Nɑ ǹ mɑɑ kĩ n bu kɑrɑ kɑ gɔ̃ɔru kpɑ bu ku rɑɑ dɑm biɑ swɑɑɔ bu wɔri.
33 Win bwɑ̃ɑbɑ nùn bikiɑ bɑ nɛɛ, mɑnɑ sɑ ko sere dĩɑnu wɑ gbɑburu sɔɔ mini ni nu koo tɔn dɑbi teni debu.
34 Yesu bu bikiɑ u nɛɛ, pɛ̃ɛ nyewɑ i sere mɔ.
Mɑ bɑ nɛɛ, wɑsi nɔɔbɑ yiru kɑ swɛ̃ɛ piiminu gɑnu.
35 Yesu u tɔn wɔru ge sinɑsiɑ temɔ. 36 Mɑ u pɛ̃ɛ nɔɔbɑ yiru ye suɑ kɑ swɛ̃ɛ yi, u Gusunɔ siɑrɑ mɑ u mururɑ u win bwɑ̃ɑbu wɛ̃ bɑ tɔn wɔru ge yɑbuɑ. 37 Be kpuro bɑ di bɑ debɑ. Ye bɑ di n tiɑ bɑ gure birenu nɔɔbɑ yiru sɔɔ bɑ kɑ doonɑ. 38 Be bɑ ye di ben geerɑ turɑ tɔnu nɔrɔbun subɑ nnɛ (4.000), tɔn kurɔbu kɑ bibu bɑɑsi. 39 Ye u tɔn wɔru ge yɑrinɑsiɑ u kpɑ, u goo nimkuu duɑ u dɑ Mɑgɑdɑn tem giɑ.