16
Fɑlisibɑ kɑ Sɑdusibɑ
bɑ yĩreru bikiɑ
1 Fɑlisibɑ kɑ Sɑdusibɑ bɑ nɑ Yesun mi, bu kɑ win lɑɑkɑri mɛɛri, bɑ nùn bikiɑ bɑ nɛɛ, u bu sɔ̃ɔsi kɑ yĩreru gɑru mɑ win dɑm weewɑ sɑɑ Gusunɔn min di. 2 Adɑmɑ Yesu bu sɔ̃ɔwɑ u nɛɛ, sɑɑ ye sɔ̃ɔ kpeeyɔ i rɑ nɛɛ, yɑm koo dorɑ gisɔ domi wɔllɑ sɔ̃ri. 3 Ǹ n bururun nɑ, i rɑ nɛɛ, gurɑ koo nɛ gisɔ domi wɔllɑ swɑ̃ɑ kɑ wɔ̃kɑ tobe kuɑ. I wɔllun yĩrenu wunɑnɑmɔ, ɑdɑmɑ i ǹ kpɛ̃ i sɑɑ yenin yĩrenu tubu. 4 Tɛ̃n tɔn kɔ̃sobu be bɑ ǹ kɑ Gusunɔ turo yɔ̃ bɑ yĩrenu bikiɑmɔ. Adɑmɑ yĩreru gɑru mɑɑ sɑri te bɑ koo bu sɔ̃ɔsi mɑ n kun mɔ Gusunɔn sɔmɔ Yonɑsigiru.
Mɑ u bu deri u doonɑ.
Fɑlisibɑ kɑ Sɑdusibɑn
pɛ̃ɛ seeyɑtiɑ
(I mɑɑ mɛɛrio Mɑɑku 8:14-21)
5 Ye win bwɑ̃ɑbɑ tɔburɔ guru giɔ, bɑ duɑri bu pɛ̃ɛ kusenu ko. 6 Yerɑ Yesu bu sɔ̃ɔwɑ u nɛɛ, i kpurɛ kpurɛ ko, i n tii sɛ kɑ Fɑlisibɑ kɑ Sɑdusibɑn pɛ̃ɛ seeyɑtiɑ.
7 Bwɑ̃ɑ be, bɑ wesiɑnɑ bɑ nɛɛ, u geruɑ mɛ yèn sɔ̃ bɑ ǹ pɛ̃ɛ kusenu kue.
8 Yesu ben bwisikunu giɑ mɑ u bu bikiɑ u nɛɛ, mbɑn sɔ̃nɑ i wesiɑnɑ i nɛɛ, yèn sɔ̃ i ǹ pɛ̃ɛ kusenu kue, yen sɔ̃nɑ nɑ geruɑ mɛ. Nɑɑnɛ doke piibugii bɛɛ. 9 N ǹ bɛɛ yeeri sere kɑ tɛ̃? I ǹ pɛ̃ɛ nɔɔbu ye yɑɑye ye nɑ mururɑ tɔmbu nɔrɔbun subɑ nɔɔbun (5.000) sɔ̃? Kɑ sukum mɛ n tiɑn birenun geeru? 10 I ǹ mɑɑ pɛ̃ɛ nɔɔbɑ yiru ye yɑɑye ye nɑ mururɑ tɔmbu nɔrɔbun subɑ nnɛn (4.000) sɔ̃? Kɑ sukum mɛ n tiɑn birenun geeru? 11 Amɔnɑ i ǹ kɑ tubɑ mɑ nɑ ǹ kɑ pɛ̃ɛ yɑ̃. I n tii sɛ kɑ Fɑlisibɑ kɑ Sɑdusibɑn pɛ̃ɛ seeyɑtiɑ.
12 Sɑnɑm mɛyɑ bwɑ̃ɑ be, bɑ tubɑ mɑ u ǹ kɑ pɛ̃ɛ seeyɑtiɑ yɑ̃. Adɑmɑ u bu sɔ̃ɔmɔwɑ bɑ n tii sɛ kɑ Fɑlisibɑ kɑ Sɑdusibɑn sɔ̃ɔsinu.
Piɛɛ u nɛɛ, Yesu u sɑ̃ɑwɑ
wi Gusunɔ u gɔsɑ
13 Yesu u turɑ Sesɑre Filipin temɔ. Mɑ u win bwɑ̃ɑbu bikiɑ u nɛɛ, wɑrɑ tɔmbɑ gerumɔ Tɔnun Bii u sɑ̃ɑ.
14 Bɑ nùn wisɑ bɑ nɛɛ, gɑbɑ gerumɔ Yohɑnu Bɑtɛmu kowowɑ ɑ sɑ̃ɑ. Gɑbɑ mɑɑ mɔ̀ Eliwɑ. Gɑbɑ mɑɑ kpɑm gerumɔ wunɛ Yeremiwɑ ǹ kun mɛ, Gusunɔn sɔmɔbun turo.
15 Yesu u nɛɛ, bɛɛ mɑɑ ni, wɑrɑ i gerumɔ nɑ sɑ̃ɑ.
16 Simɔɔ Piɛɛ nɛɛ, wunɑ mi, wi Gusunɔ u gɔsɑ, wi, Yinni wɑson Bii.
17 Yerɑ Yesu nùn wisɑ u nɛɛ, doo nɔɔrugiiwɑ wunɛ Simɔɔ, Yohɑnun Bii, domi n ǹ mɔ tɔnu u nun yeni sɔ̃ɔsi, mɑ n kun mɔ nɛn Bɑɑbɑ wi u wɑ̃ɑ wɔllɔ. 18 Nɛnɑ nɑ nun sɔ̃ɔmɔ mɑ nɑ nun sokɑ kperu\f |b16:18 kperu|d - Yĩsi te bɑ mɔ̀ Piɛɛ, ten tubusiɑnɑ kperu.\F. Kpee ten wɔllɔwɑ kon nɛn yigbɛru swĩi. Bɑɑ gɔɔn tii u ǹ kpɛ̃ u tu gɑ̃ɑnu kuɑ. 19 Wunɑ kon bɑn te Gusunɔ u swĩin kɔkɔrɔbɑ wɛ̃. Ye ɑ yinɑmɔ hɑnduniɑɔ bɑ koo ye yinɑ wɔllɔ. Ye ɑ mɑɑ wurɑ hɑnduniɑɔ bɑ koo ye wurɑ wɔllɔ.
20 Yerɑ Yesu win bwɑ̃ɑbu nɔɔ goosi u nɛɛ, bu ku rɑɑ goo sɔ̃ mɑ wiyɑ wi Gusunɔ u gɔsɑ.
Yesu u win gɔɔ kɑ win seebun gɑri mɔ̀
21 Sɑɑ sɑɑ yen min diyɑ Yesu Kirisi u win bwɑ̃ɑbu gɑri sɔ̃ɔmɔ bɑtumɑ sɔɔ u nɛɛ, u ǹ koo ko u kun Yerusɑlɛmu de, mi guro gurobu kɑ yɑ̃ku kowo tɔnwerobu kɑ woodɑ yɛ̃robɑ koo nùn nɔni sɔ̃. Bɑ koo nùn go ɑdɑmɑ sɔ̃ɔ itɑse u koo se.
22 Yerɑ Piɛɛ kɑ nùn dɑ bɔ̃ɔrɔ u nùn gerisim wɔri u nɛɛ, Gusunɔ u nun bere Yinni, yenin bweserɑ kun nun deemɑmɔ pɑi!
23 Adɑmɑ Yesu sĩirɑ u Piɛɛ sɔ̃ɔwɑ u nɛɛ, ɑ gɛɛro nɛn birun di Setɑm. A kɑsu ɑ mɑn torɑsiɑwɑ, domi ɑ ǹ bwisikumɔ nge Gusunɔ, mɑ n kun mɔ nge tɔnu.
24 Yen biru Yesu win bwɑ̃ɑbu sɔ̃ɔwɑ u nɛɛ, goo ù n kĩ u mɑn swĩi nge bɔ̃̀ɔ, u win gɔ̃ru kĩru derio kpɑ u win tiin dɑ̃ɑ bunɑnɑru suɑ u n kɑ mɑn swĩi. 25 Wi u kĩ u win wɑ̃ɑru di kɑ win gɔ̃ru kĩru u koo tu biɑ. Adɑmɑ wi u win wɑ̃ɑru yinɑ nɛn sɔ̃ u koo rɑ tu wɑ. 26 Nge ɑrufɑɑni yerɑ̀ tɔnu mɔ ù n hɑnduniɑn gɑ̃ɑnu kpuro wɑ mɑ u win wɑ̃ɑru biɑ. Nge mbɑ n wɑ̃ɑ ye tɔnu u koo kɑ win wɑ̃ɑru kɔsinɑ. 27 Tɔnun Bii u sisi kɑm kɑm kɑ win Bɑɑbɑn yiiko kɑ win gɔrɑdobɑ sɑnnu. Sɑnɑm mɛyɑ u koo bɑɑwure nùn win ɑre kɔsiɑ nge mɛ win kookoosu nɛ. 28 Geemɑ nɑ bɛɛ sɔ̃ɔmɔ tɔn be bɑ wɑ̃ɑ mini ben gɑbɑ kun gbimɔ bu kɑ Tɔnun Bii wɑ u nɑ nge sunɔ.