17
Yesun wɑsi gɔsiɑ
1 Sɔ̃ɔ nɔɔbɑ tiɑn biru Yesu Piɛɛ suɑ kɑ Yɑkɔbu kɑ Yohɑnu, Yɑkɔbun wɔnɔ, u kɑ bu dɑ guu bɑkɑru gɑrun wɔllɔ be tɔnɑ. 2 Win wɑsi gɔsiɑ tuki ben nɔni sɔɔ, mɑ win wuswɑɑ bɑllimɔ nge sɔ̃ɔ, win yɑ̃nu mɑɑ bururɑ fem fem nge suru. 3 Yen biru bɑ Mɔwisi kɑ Eli wɑ bɑ kɑ Yesu gɑri mɔ̀. 4 Yerɑ Piɛɛ u Yesu sɔ̃ɔwɑ u nɛɛ, Yinni, n wɑ̃ sɑ n wɑ̃ɑ mini. À n kĩ, kon kunu itɑ ko, teeru wunɛgiru, teeru Mɔwisigiru, teeru mɑɑ Eligiru.
5 U ǹ gɑri yi gerum kpɑ, bukɔ kpiku gɑ kɑ bu wukiri. Mɑ bɑ nɔɔ gɑgu nuɑ sɑɑ bukɔ min di gɑ nɛɛ, winiwɑ nɛn Bii kĩnɑsi wì sɔɔ nɛn gɔ̃ru dobu kpuro wɑ̃ɑ. I wigii swɑɑ dɑkio.
6 Ye bwɑ̃ɑ be, bɑ nɔɔ ge nuɑ bɛrum bu mwɑ sere bɑ wɔrumɑ bɑ wuswɑɑ tem girɑri. 7 Yesu nɑ ben mi u bu nɔmɑ sɔndi u nɛɛ, i seewo, i ku bɛrum ko.
8 Ye bɑ wuswɑɑ seeyɑ bɑ ǹ mɑɑ goo wɑ mɑ n kun mɔ Yesu turo.
9 Sɑnɑm mɛ bɑ sɑrɑm wee guu ten min di, Yesu bu sɔ̃ɔwɑ u nɛɛ, bu ku rɑɑ goo sɔ̃ ye bɑ wɑ mi, sere Tɔnun Bii u kɑ se gɔrin di.
10 Bwɑ̃ɑ be, bɑ nùn bikiɑ bɑ nɛɛ, mbɑn sɔ̃nɑ woodɑ yɛ̃robɑ rɑ gere Eliwɑ koo gbi u nɑ.
11 U bu wisɑ u nɛɛ, kɑ geemɑ Eli koo nɑ kpɑ u yɑbu bɑɑyere wesiɑ yen ɑyerɔ. 12 Adɑmɑ nɑ bɛɛ sɔ̃ɔmɔ, Eli u nɑ kɔ, bɑ ǹ nùn tubɑ, mɑ bɑ nùn kuɑ nge mɛ bɑ kĩ. Nge mɛyɑ bɑ koo Tɔnun Biin tii nɔni sɔ̃.
13 Yerɑ n win bwɑ̃ɑbu yeeri mɑ Yohɑnu Bɑtɛmu kowon gɑriyɑ u mɔ̀.
Yesu u bii wi wɛrɛku gɑ wɑ̃ɑsi bɛkiɑ
14 Ye bɑ tunumɑ mi tɔn wɔru gɑ wɑ̃ɑ, durɔ goo u nɑ u yiirɑ Yesun wuswɑɑɔ 15 u nɛɛ, Yinni, ɑ nɛn biin wɔnwɔndu wɑɑwo. U giri kpɑkpɑnu bɑrɔ nu nùn wɑhɑlɑ mɔ̀ gem gem sere nu rɑ gɑsɔ nùn kpɛ̃ɛ dɔ̃ɔ sɔɔ ǹ kun mɛ nim sɔɔ. 16 Nɑ kɑ nùn wunɛn bwɑ̃ɑbu nɑɑwɑ ɑdɑmɑ bɑ kpɑnɑ bu nùn bɛkiɑ.
17 Yesu u nɛɛ, bɛɛ tɔn kɔ̃so nɑɑnɛ doke sɑrirugibu, sere sɑɑ yerɑ̀ ko nɑ n kɑ bɛɛ wɑ̃ɑ. Nge sere dommɑ ko nɑ n kpɑm kɑ bɛɛ tɛmɑnɛ. I kɑ mɑn bii wi nɑɑwɑ mini.
18 Yesu u wɛrɛku ge gerusi mɑ gɑ bii wi doonɑri mɑ u bɛkurɑ mii mii.
19 Yerɑ Yesun bwɑ̃ɑbɑ dɑ win mi be tɔnɑ bɑ nùn bikiɑ bɑ nɛɛ, mbɑn sɔ̃nɑ bɑ kpɑnɑ bu wɛrɛku ge girɑ.
20 Yesu bu wisɑ u nɛɛ, yèn sɔ̃ bɛɛn nɑɑnɛ dokebu kun kpɑ̃. Kɑ geemɑ nɑ bɛɛ sɔ̃ɔmɔ, bɑɑ bɛɛn nɑɑnɛ dokebu bù n piibu sɑ̃ɑ nge dĩɑ bimɑ ye yɑ piiburu bo i ko guu teni sɔ̃ tu wukuro minin di tu dɑ giɔ. Mɛyɑ tɑ koo mɑɑ wukurɑ. Gɑ̃ɑnu mɑɑ sɑri ni i ko kpɑnɑ i ko. (( 21 Adɑmɑ wɛrɛku genin bweserɑ ku rɑ doonɛ mɑ n kun kɑ kɑnɑru kɑ nɔɔ bɔkuru.))
Yesu u kpɑm win gɔɔ
kɑ win seebun gɑri mɔ̀
(I mɑɑ mɛɛrio Mɑɑku 9:30-32, Luku 9:43b-45)
22 Sɔ̃ɔ teeru nge mɛ bwɑ̃ɑ be, bɑ mɛnnɛ sɑnnu Gɑlileɔ Yesu bu sɔ̃ɔwɑ u nɛɛ, bɑ koo Tɔnun Bii tɔmbu nɔmɑ bɛriɑ 23 bu nùn go, ɑdɑmɑ sɔ̃ɔ itɑse u koo se gɔrin di.
Yerɑ bwɑ̃ɑ ben nukurɑ sɑnkirɑ gem gem.
Sɑ̃ɑ yerun wɔ̃ɔ gobin kɔsiɑbu
24 Sɑnɑm mɛ Yesu kɑ win bwɑ̃ɑbu bɑ turɑ Kɑpenɑmuɔ, yerɑ sɑ̃ɑ yerun wɔ̃ɔ gobigibɑ nɑ Piɛɛn mi bɑ nɛɛ, bɛɛn yinni u ku rɑ sɑ̃ɑ yerun wɔ̃ɔ gobi kɔsie?
25 Piɛɛ nɛɛ, ɑ, u rɑ kɔsie.
Ye Piɛɛ u duɔ dirɔ Yesu gbiɑ u nùn bikiɑ u nɛɛ, ɑmɔnɑ ɑ wɑ Simɔɔ. Berɑ̀ n weenɛ bu hɑnduniɑ min sinɑmbu gbere gobi kɔsiɑ. Sinɑ bibu? Nge gɑbu.
26 Piɛɛ nɛɛ, gɑbu.