9
1 U kpɑm bu sɔ̃ɔwɑ u nɛɛ, kɑ geemɑ nɑ bɛɛ sɔ̃ɔmɔ gɑbu be bɑ yɔ̃ mini, bɑ koo wɑ Gusunɔ u bɑndu swĩi kɑ ten yiiko bu sere gbi.
Yesun wɑsi gɔsiɑ
(I mɑɑ mɛɛrio Mɑteu 17:1-13, Luku 9:28-36)
2 Sɔ̃ɔ nɔɔbɑ tiɑn biru, Yesu u kɑ Piɛɛ kɑ Yɑkɔbu kɑ Yohɑnu dɑ bee tiɑ, mɑ u bu kpɑrɑ u kɑ dɑ guu bɑkɑru gɑrun wɔllɔ be tɔnɑ. Nge mɛ bɑ nùn mɛɛrɑ bɑ wɑ win wɑsi gɔsiɑ tuki. 3 Win yɑ̃nu mɑɑ bɑllimɔ gem gem mɑ nu bururɑ fem fem. Goo sɑri hɑnduniɑ mi, wi u koo kpĩ u bekuru teɑ tu bururɑ nge mɛn bweseru. 4 Yen biru Eli kɑ Mɔwisi bɑ bu kuremɑ bɑ kɑ Yesu gɑri mɔ̀. 5 Mɑ Piɛɛ u Yesu sɔ̃ɔwɑ u nɛɛ, Yinni, n wɑ̃ sɑ n wɑ̃ɑ mini. A de su kunu itɑ ko, teeru wunɛgiru, teeru Mɔwisigiru, teeru mɑɑ Eligiru.
6 U yeni geruɑ yèn sɔ̃ u ǹ yɛ̃ ye u koo gere, domi bɑ nɑndɑ gem gem. 7 Mɑ guru wirɑ nɑ tɑ bu wukiri, mɑ bɑ nɔɔ gɑgu nuɑ guru wii ten min di gɑ nɛɛ, winiwɑ nɛn Bii kĩnɑsi, i wigii swɑɑ dɑkio.
8 Mii mii ye bwɑ̃ɑ be, bɑ mɛɛrɑ bɑ kɑ sikerenɑ, bɑ ǹ mɑɑ goo wɑ mɑ n kun mɔ Yesu turo kɑ be.
9 Nge mɛ bɑ sɑrɔ guurun di, Yesu u bu yiire bu ku goo sɔ̃ ye bɑ wɑ sere Tɔnun Bii u kɑ se sɑɑ gɔrin di.
10 Bɑ kuɑ ye u bu yiire ɑdɑmɑ bɑ bikiɑnɑmɔ ben tii tiinɛ sɔɔ bɑ nɛɛ, mbɑ seebu gɔrin din tubusiɑnu.
11 Mɑ bɑ nùn bikiɑ bɑ nɛɛ, mbɑn sɔ̃nɑ woodɑ yɛ̃robɑ gerumɔ mɑ Eliwɑ koo gbi u nɑ.
12 U bu wisɑ u nɛɛ, mɛyɑ Eliwɑ koo gbi u nɑ u bɑɑyere kpuro wesiɑ nge mɛ yɑ rɑɑ sɑ̃ɑ. Ǹ n mɛn nɑ, mbɑn sɔ̃nɑ Gusunɔn gɑri mɑɑ Tɔnun Biin gɑri gerumɔ yi nɛɛ, u ǹ koo ko u kun nɔni sɔ̃ɔre gem gem, kpɑ bu nùn gɛm. 13 Adɑmɑ nɑ bɛɛ sɔ̃ɔmɔ, Eli u nɑ kɔ mɑ bɑ nùn kuɑ nge mɛ bɑ kĩ, nge mɛ Gusunɔn gɑri yi win gɑri gerumɔ.
Yesu u bii wi wɛrɛku gɑ wɑ̃ɑsi bɛkiɑ
(I mɑɑ mɛɛrio Mɑteu 17:14-21, Luku 9:37-43ɑ)
14 Sɑnɑm mɛ bɑ wurɑmɑ bwɑ̃ɑ be bɑ tien mi, bɑ tɔn wɔru wɑ gɑ bu sikerenɛ, mɑ woodɑ yɛ̃robɑ kɑ bu sikirinɑmɔ. 15 Ye tɔn be kpuro bɑ Yesu wɑ, bɑ biti soorɑ too too, mɑ bɑ duki dɑɑmɔ win mi bu kɑ nùn tɔbiri. 16 Mɑ u win bwɑ̃ɑbu bikiɑ u nɛɛ, mbɑn sikirinɔwɑ i mɔ̀ bɛɛ kɑ be.
17 Tɔn wɔru ge sɔɔn di goo u nùn wisɑ u nɛɛ, yinni, nɑ kɑ nun nɛn bii nɑɑwɑwɑ yèn sɔ̃ u wɛrɛku mɔ ge gɑ yinɑmɔ u gɑri gere. 18 Bɑɑmɑ mi gɑ nùn seeri gɑ rɑ nùn surewɑ temɔ, kpɑ u yɑ̃ɑtɑm pɔkeru yɑri u n donnu temmɔ kpɑ u bemi. Nɑ mɑɑ wunɛn bwɑ̃ɑbu kɑnɑ bu gu girɑ ɑdɑmɑ bɑ kpɑnɑ.
19 Mɑ Yesu u bu wisɑ u nɛɛ, bɛɛ tɔn nɑɑnɛ doke sɑrirugibu, sere sɑɑ yerɑ̀ ko nɑ n kɑ bɛɛ wɑ̃ɑ. Sere dommɑ ko nɑ n kɑ bɛɛ tɛmɑnɛ. I kɑ mɑn bii wi nɑɑwɑ mini.
20 Mɑ bɑ kɑ nùn dɑ win mi. Ye wɛrɛku ge, gɑ Yesu wɑ, yɑnde, gɑ bii wi surɑ temɔ kɑ dɑm u bindimɔ mɑ u yɑ̃ɑtɑm pɔkeru yɑrimɔ. 21 Yesu bii win bɑɑ bikiɑ u nɛɛ, sɑɑ dommɑn diyɑ yeni yɑ nùn deemɑ.
Mɑ u nɛɛ, sɑɑ win birun diyɑ. 22 Kiri kiri gɑ rɑ nùn sure dɔ̃ɔ sɔɔ, ǹ kun mɛ nim sɔɔ, kpɑ gɑ n kĩ gu nùn kɑm koosiɑ. Adɑmɑ ɑ̀ n kɑɑ kpĩ ɑ gɑ̃ɑnu ko, ɑ bɛsɛn wɔnwɔndu wɑɑwo, kpɑ ɑ sun fɑɑbɑ ko.
23 Mɑ Yesu u nùn sɔ̃ɔwɑ u nɛɛ, ɑ nɛɛ, nɑ̀ n kon kpĩ ro! Wi u nɑɑnɛ doke, kpuro n koo nùn koorɑ.
24 Mɑ bii win bɑɑ u nɔɔgiru suɑ u nɛɛ, nɑ nɑɑnɛ doke, ɑ mɑn somiɔ kpɑ nɛn nɑɑnɛ dokebu bu sosi.
25 Ye Yesu wɑ mɑ tɔn wɔru gɑ duki nɑɑmɔ gɑ mɛnnɑmɔ u wɛrɛku ge gerusi u nɛɛ, wɛrɛku wunɛ, wunɛ wi ɑ rɑ tɔnu ko soso kpɑ u kpɑnɑ u gɑri gere, ɑ bii wi doonɑrio, ɑ ku rɑ mɑɑ wurɑmɛ win mi.
26 Yerɑ gɑ bii wi surɑ kɑ dɑm, mɑ gɑ kuuki mɔ̀ gɑ kɑ doonɔ. Mɑ bii wi, u kuɑ nge goru sere tɔn dɑbirɑ mɔ̀, u guwɑ. 27 Adɑmɑ Yesu u win nɔmu nɛnuɑ u seeyɑ, mɑ u yɔ̃rɑ.
28 Sɑnɑm mɛ Yesu u duɑ yɛnuɔ tɔn tuko goo kun mɑɑ kɑ bu wɑ̃ɑ, win bwɑ̃ɑbɑ nùn bikiɑ bɑ nɛɛ, mbɑn sɔ̃nɑ be, bɑ kpɑnɑ bu wɛrɛku ge girɑ.
29 Mɑ u bu sɔ̃ɔwɑ u nɛɛ, wɛrɛku genin bweserɑ ku rɑ doonɛ mɑ n kun mɔ kɑ kɑnɑru.
Yesu u kpɑm win gɔɔ
kɑ win seebun gɑri mɔ̀
(I mɑɑ mɛɛrio Mɑteu 17:22-23, Luku 9:43b-45)
30 Yen biru bɑ doonɑ min di, mɑ bɑ Gɑlilen tem bukiɑnɑ. N deemɑ u ǹ kĩ goo u n yɛ̃ mi u wɑ̃ɑ, 31 domi u win bwɑ̃ɑbu sɔ̃ɔmɔ u mɔ̀, bɑ koo Tɔnun Bii tɔmbu nɔmu sɔndiɑ bu nùn go, ɑdɑmɑ sɔ̃ɔ itɑse u koo se gɔrin di.
32 Ye u geruɑ mi, yɑ ǹ bu yeeri. Mɑ bɑ bɛrum mɔ̀ bu kɑ nùn yen tubusiɑnu bikiɑ.
Wɑrɑ gisonkoru bo
(I mɑɑ mɛɛrio Mɑteu 18:1-5, Luku 9:46-48)
33 Mɑ bɑ turɑ Kɑpenɑmuɔ. Sɑɑ ye u wɑ̃ɑ yɛnuɔ u bu bikiɑ u nɛɛ, mbɑ bɑ sikirinɛmɔ swɑɑ sɔɔ.
34 Adɑmɑ bɑ mɑri sɔ̃ɔ yèn sɔ̃ swɑɑ sɔɔ bɑ sikirinɑmɔwɑ bɑ n kɑ yɛ̃ ben suunu sɔɔ wi u bo. 35 Mɑ u sinɑ u wɔkurɑ yiru ye sokɑ u bu sɔ̃ɔwɑ u nɛɛ, goo ù n kĩ u ko be kpuron wirugii, u koowo be kpuron biruko kɑ be kpuron sɔmɔ.
36 Yerɑ u bii piibu gɑgu nɔmu nɛnuɑ u kɑ nɑ ben suunu sɔɔ. U nùn suɑ mɑ u bu sɔ̃ɔwɑ u nɛɛ, 37 bɑɑwure wi u bii winin bweseru wurɑ nɛn yĩsirun sɔ̃, nɛnɑ u wurɑ. Bɑɑwure wi u mɑɑ mɑn wurɑ, n ǹ nɛ turo u wurɑ, u mɑɑ wi u mɑn gɔrimɑ wurɑwɑ.
Wi u kun kɑ sun yibɛrɛ tɛɛru nɛni, bɛsɛgiiwɑ
(I mɑɑ mɛɛrio Luku 9:49-50)
38 Yohɑnu nùn sɔ̃ɔwɑ u nɛɛ, Yinni sɑ goo wɑ u wɛrɛkunu girɑmɔ kɑ wunɛn yĩsiru, mɑ sɑ nùn yinɑri yèn sɔ̃ u ǹ nun swĩi kɑ bɛsɛ sɑnnu.
39 Adɑmɑ Yesu u nɛɛ, i ku yɛ̃ro yinɑri, domi goo sɑri wi u koo mɑɑmɑɑki ko kɑ nɛn yĩsiru, ù n kpɑ u n yɑnde nɛn kɔ̃sɑ gerumɔ. 40 Domi wi u kun kɑ sun yibɛrɛ tɛɛru nɛni bɛsɛgiiwɑ. 41 Kɑ geemɑ, nɑ bɛɛ sɔ̃ɔmɔ, bɑɑwure wi u bɛɛ nim kɑ̃ i nɔrɑ yèn sɔ̃ i sɑ̃ɑ Kirisigibu yɛ̃ro u koo win ɑre wɑ.
Torɑrun bɑberu
(I mɑɑ mɛɛrio Mɑteu 18:6-9, Luku 17:1-2)
42 Adɑmɑ bɑɑwure wi u bii piimii ni nu mɑn nɑɑnɛ doke min teu torɑsiɑ, n sɑnɔ bu nùn nɛɛru gbinisiɑ win wĩirɔ, kpɑ bu nùn kpɛ̃ɛ nim wɔ̃ku sɔɔ. 43-46 Ǹ n mɛn nɑ, wunɛn nɔmu ǹ kun mɛ wunɛn nɔɔ teu gɑ̀ n nun torɑsiɑ ɑ gu buro. N sɑnɔ bo ɑ kɑ nɔm teu ǹ kun mɛ nɑɑ teesu wɑ̃ɑru wɑ te tɑ ku rɑ kpe, n kere ɑ n nɔmɑ yiru kɑ nɑɑsu yiru mɔ kpɑ bu nun kpɛ̃ɛ dɔ̃ɔ sɔɔ ((mi kɔkɔ ni nu ko n ben wɑsi dimɔ nu ǹ gbimɔ, kɑ mi dɔ̃ɔ kun gbimɔ.)) 47 Ǹ n mɑɑ wunɛn nɔnun nɑ, gɑ nun torɑsiɑ ɑ gu wɔwo. N sɑnɔ ɑ n nɔnu teu mɔ ɑ kɑ dɑ mi Gusunɔ u bɑndu swĩi kɑ sere ɑ n nɔni yiru mɔ kpɑ bu nun kpɛ̃ɛ dɔ̃ɔ sɔɔ, 48 mi kɔkɔ ni nu ko n ben wɑsi dimɔ nu ǹ gbimɔ kɑ mi dɔ̃ɔ kun gbimɔ. 49 Domi bɑ koo bɑɑwure dɔ̃ɔ wisi nge mɛ bɑ rɑ bɔru yɛ̃ke dĩɑnu wɔllɔ.
50 Bɔru\f |b9:50 bɔru|d - Bɔɔ te bɑ kɑ yɑ̃ mini tɑ kɑ bɔɔ swɑ̃ɑru weenɛ. Tɑ koo kpĩ tu nɔɔ gbi.\F gɑ̃ɑ geenɑ, ɑdɑmɑ bɔru tɑ̀ n nɔɔ gu, kɑ mbɑ bɑ koo kpɑm tu dorɑsiɑ. I n bɔru mɔ bɛɛn tii sɔɔ, kpɑ i n nɔɔ nɛ bɛɛn tii tiinɛ sɔɔ.