8
Yesu u tɔmbu nɔrɔbun
subɑ nnɛ diisiɑ
(I mɑɑ mɛɛrio Mɑteu 15:32-39)
1 Sɑnɑm dɔɔ sɑnɑm wee, tɔn wɔru gunɑ yɑ kpɑm mɛnnɑ win mi. N deemɑ bɑ ǹ mɔ ye bɑ koo di. Yerɑ Yesu u win bwɑ̃ɑbu sokɑ u nɛɛ, 2 tɔn wɔru gen wɔnwɔndɑ mɑn mɔ̀ domi yen sɔ̃ɔ itɑ wee mìn di bɑ kɑ mɑn wɑ̃ɑ. Bɑ ǹ mɑɑ gɑ̃ɑnu mɔ ni bɑ koo di. 3 Nɑ̀ n mɑɑ nɛɛ bu wio, bɑ kun gɑ̃ɑnu di bɑ koo wɔruku swɑɑ sɔɔ, domi mìn di ben gɑbɑ nɑ, n tomɑ.
4 Mɑ win bwɑ̃ɑbɑ nùn bikiɑ bɑ nɛɛ, mɑnɑ sɑ ko pɛ̃ɛ wɑ gbɑbu teni sɔɔ ye yɑ koo tɔn beni debiɑ.
5 Yesu bu bikiɑ u nɛɛ, pɛ̃ɛ nyewɑ i mɔ.
Mɑ bɑ nɛɛ, nɔɔbɑ yiru.
6 Yerɑ u tɔn wɔru ge sɔ̃ɔwɑ gu sinɔ temɔ. Mɑ u pɛ̃ɛ nɔɔbɑ yiru ye suɑ, u Gusunɔ siɑrɑ, mɑ u ye mururɑ u win bwɑ̃ɑbu wɛ̃ bu tɔn be yɑbuɑ. Mɑ bɑ ye tɔn wɔru ge bɔnu kuɑ. 7 Bɑ mɑɑ swɛ̃ɛ piiminu gɑnu mɔ. Mɑ Yesu u Gusunɔ siɑrɑ nin sɔ̃, mɑ u win bwɑ̃ɑbu sɔ̃ɔwɑ bu mɑɑ ni tɔn be yɑbuo. 8 Bɑ di bɑ debɑ. Mɑ bwɑ̃ɑbɑ sukum mɛ n tie gurɑ mɑ n yibɑ birenu nɔɔbɑ yiru sɔɔ. 9 Tɔn ben geerɑ turɑ nge nɔrɔbun subɑ nnɛ (4.000). Yen biru Yesu u bu yɑrinɑsiɑ. 10 Mii mii wi kɑ win bwɑ̃ɑbu bɑ goo nimkuu duɑ bɑ dɑ tem gɑm giɑ mɛ bɑ rɑ soku Dɑmɑnutɑ.
Fɑlisibɑ bɑ yĩreru bikiɑmɔ
(I mɑɑ mɛɛrio Mɑteu 16:1-4)
11 Miyɑ Fɑlisi gɑbɑ nɑ Yesun mi, mɑ bɑ kɑ nùn sikirinɔ wɔri. Bɑ nùn bikiɑ u bu sɔ̃ɔsi kɑ yĩreru mɑ win dɑm weewɑ wɔllun di. Bɑ geruɑ mɛ bu kɑ win lɑɑkɑri mɛɛri. 12 Yerɑ u wom mwɛ mɑ u bu bikiɑ u nɛɛ, mbɑn sɔ̃nɑ tɛ̃n tɔn beni bɑ yĩreru bikiɑmɔ. Kɑ geemɑ, nɑ bɛɛ sɔ̃ɔmɔ, yĩreru gɑru sɑri te bɑ koo bu sɔ̃ɔsi.
13 Mɑ u bu deri, u kpɑm goo nimkuu duɑ u kɑ tɔburɑ guru giɔ.
Fɑlisibɑn pɛ̃ɛ seeyɑtiɑ kɑ Herodugiɑ
(I mɑɑ mɛɛrio Mɑteu 16:5-12)
14 Bwɑ̃ɑ be, bɑ duɑri bu pɛ̃ɛ kusenu ko. Tiɑ tɔnɑwɑ bɑ mɔ goo nimkuu sɔɔ. 15 Yesu bu yiire u nɛɛ, i bɛɛn tii lɑɑkɑri koowo kpɑ i n Fɑlisibɑn pɛ̃ɛ seeyɑtiɑ geri kɑ mɑɑ Herodugiɑ.
16 Mɑ bɑ gerunɑmɔ ben tii tiinɛ sɔɔ bɑ nɛɛ, yèn sɔ̃ bɑ ǹ pɛ̃ɛ mɔ yen sɔ̃nɑ u geruɑ mɛ.
17 Yesu u tubɑ ye bɑ gerunɑmɔ mɑ u nɛɛ, mbɑn sɔ̃nɑ i gerumɔ i nɛɛ, yèn sɔ̃ i ǹ pɛ̃ɛ mɔ yen sɔ̃nɑ. I ǹ gie? N ǹ bɛɛ yeeri ginɑ? Bɛɛ swɑɑ tɑobɑ rò? 18 I ǹ nɔni mɔ rò? I ku rɑ yɑm wɑ? I ǹ swɑsu mɔ? I ku rɑ gɑri nɔ? I ǹ yɑɑye 19 dɔmɑ te nɑ pɛ̃ɛ nɔɔbu mururɑ tɔmbu nɔrɔbun subɑ nɔɔbun (5.000) sɔ̃? Birenu nye sɔɔrɑ i gure ye bɑ di n tiɑ.
Bɑ nùn wisɑ bɑ nɛɛ, wɔkurɑ yiru.
20 Yesu u kpɑm bu bikiɑ u nɛɛ, ye nɑ pɛ̃ɛ nɔɔbɑ yiru mururɑ tɔmbu nɔrɔbun subɑ nnɛn (4.000) sɔ̃, birenu nye sɔɔrɑ i gure ye bɑ di n tiɑ.
Bɑ nɛɛ, nɔɔbɑ yiru.
21 Mɑ u nɛɛ, n ǹ bɛɛ yeeri kɑ tɛ̃?
Yesu u wɔ̃ko bɛkiɑ Bɛsɑidɑɔ
22 Sɑnɑm mɛ bɑ turɑ wuu ge bɑ rɑ soku Bɛsɑidɑɔ, tɔmbu gɑbɑ kɑ wɔ̃ko goo nɑ Yesun mi mɑ bɑ nùn kɑnɑ u nùn bɑbɑ. 23 U wɔ̃ko win nɔmɑ nɛnuɑ u kɑ dɑ wuun biruɔ. Yen biru u yɑ̃ɑtɑm sie win nɔniɔ mɑ u yi nɔmɑ sɔndi u nɛɛ, ɑ gɑ̃ɑnu wɑɑmɔ?
24 Durɔ wi, u nɔni wukiɑ u nɛɛ, nɑ tɔmbu wɑɑmɔ. Bɑ kɑ dɑ̃nu weenɛ bɑ sĩimɔ.
25 Mɑ Yesu kpɑm win nɔmɑ sɔndi wɔ̃ko win nɔni wɔllɔ. Ye u yɑ̃ɑtem nɔni girɑri, u bɛkurɑ mɑ u kpuro wɑɑmɔ sɑ̃ɑ sɑ̃ɑ. 26 Yesu nùn sɔ̃ɔwɑ u wio, u ku mɑɑ wurɑ wuu nukurɔ.
Piɛɛ nɛɛ Yesu u sɑ̃ɑwɑ wi Gusunɔ u gɔsɑ
(I mɑɑ mɛɛrio Mɑteu 16:13-20, Luku 9:18-21)
27 Sɑnɑm mɛyɑ Yesu u doonɑ kɑ win bwɑ̃ɑbu Sesɑreɔ, Filipin tem giɑ. Mɑ swɑɑ sɔɔ u win bwɑ̃ɑbu bikiɑ u nɛɛ, nɑ nɛɛ yɑ? Wɑrɑ tɔmbɑ gerumɔ nɑ sɑ̃ɑ.
28 Bɑ nɛɛ, gɑbɑ gerumɔ Yohɑnu Bɑtɛmu kowowɑ, gɑbɑ mɑɑ gerumɔ Eliwɑ, mɑ gɑbɑ kpɑm gerumɔ ɑ sɑ̃ɑwɑ Gusunɔn sɔmɔbun turo. 29 Mɑ u bu bikiɑ u nɛɛ, to, bɛɛ mɑɑ ni, ɑmɔnɑ bɛɛn tii i gerumɔ.
Piɛɛ nùn wisɑ u nɛɛ, ɑ sɑ̃ɑwɑ Kirisi wi.
30 Yerɑ Yesu u bu gerusi u nɛɛ, bu ku rɑɑ ye goo sɔ̃.
Yesu u win gɔɔ kɑ win seebun gɑri mɔ̀
(I mɑɑ mɛɛrio Mɑteu 16:21-28, Luku 9:22-27)
31 Mɑ u bwɑ̃ɑ be sɔ̃ɔbu wɔri u nɛɛ, Tɔnun Bii u ǹ koo ko u kun nɔni swɑ̃ɑ bɑkɑru wɑ kpɑ guro gurobu kɑ yɑ̃ku kowo tɔnwerobu kɑ woodɑ yɛ̃robu bu nùn yinɑ kpɑ bu nùn go, ɑdɑmɑ u koo se gɔrin di sɔ̃ɔ itɑse.
32 U gɑri yi geruɑwɑ kpɑsɑsɑ. Yerɑ Piɛɛ kɑ nùn dɑ bɔkuɔ mɑ u nùn gerusibu wɔri. 33 Adɑmɑ Yesu sĩirɑ u win bwɑ̃ɑbu mɛɛrɑ mɑ u Piɛɛ gerusi u nɛɛ, ɑ dɛsiro nɛn birun di Setɑm, domi wunɛn bwisikunu kun sɑ̃ɑ Gusunɔginu, nu sɑ̃ɑwɑ tɔnuginu.
34 Yen biru Yesu u tɔn wɔru sokɑ kɑ win bwɑ̃ɑbu sɑnnu, mɑ u nɛɛ, goo ù n kĩ u nɛn yirɑ swĩi nge bɔ̃̀ɔ, u win gɔ̃ru kĩru derio kpɑ u win tiin dɑ̃ɑ bunɑnɑru suɑ kpɑ u mɑn swĩi. 35 Domi bɑɑwure wi u kĩ u win wɑ̃ɑru di kɑ win gɔ̃ru kĩru, u koo tu biɑ. Adɑmɑ bɑɑwure wi u win wɑ̃ɑru yinɑ nɛn sɔ̃ kɑ nɛn Lɑbɑɑri geɑn sɔ̃, wiyɑ u koo tu wɑ kɑ gem. 36 Arufɑɑni yerɑ̀ tɔnu u mɔ, bɑɑ ù n hɑnduniɑn gɑ̃ɑnu kpuro wɑ, mɑ u win wɑ̃ɑru biɑ. 37 Mbɑ tɔnu u koo kɑ win wɑ̃ɑru kɔsinɑ. 38 Ǹ n mɛn nɑ, bɑɑwure wi u nɛn sekuru mɔ̀ kɑ mɑɑ nɛn gɑri tɛ̃n tɔn kɔ̃sobun suunu sɔɔ, be bɑ ǹ kɑ Gusunɔ turo yɔ̃, Tɔnun Bii u koo win sekuru ko ù n wurɑmɑ win Bɑɑbɑn yiiko sɔɔ kɑ Gusunɔn gɔrɑdo dɛɛrobu sɑnnu.