LABAARI GEA
NGE MƐ YOHANU U YORUA
Yohɑnu u kĩ u tɔmbu sɔ̃ɔsi win tire te sɔɔ mɑ Yesu u sɑ̃ɑwɑ Gusunɔn Bii. Wi u nùn nɑɑnɛ doke kpɑ yɛ̃ro u n wɑ̃ɑru mɔ sere kɑ bɑɑdommɑɔ, wiru 20:30-31. Yohɑnu u ǹ mɔn dɑbinu yoruɑ nge mɛ Mɑteu kɑ be bɑ tie bɑ yoruɑ. Adɑmɑ u gɑrin weenɑsii suɑ u kɑ sɔ̃ɔsi mɛ Yesu u sɑ̃ɑ. U mɑrubu nɔm mɛɛrusen gɑri yoruɑ, wiru 3, kɑ nim wɑ̃ɑrugim gɑri, wiru 4, kɑ dĩɑ wɑ̃ɑruginun gɑri, wiru 6, kɑ hɑnduniɑn yɑm bururɑm gɑri, wiru 8. U mɑɑ sun Yesun sɔmburun tore sɔ̃ɔmɔ kɑ win dim dɑ̃ɑkim mɛ bɑ di kɑ win bwɑ̃ɑbu, wiru 13, kɑ gɑri dɑ̃ɑki yi u bu sɔ̃ɔwɑ u kɑ bu nukuru yɛmiɑsiɑ, wiru 14-16, kɑ sere mɑɑ kɑnɑ te u kuɑ win tɔmbu kpuron sɔ̃, wiru 17.
U mɑɑ nɛɛ, Yesu u sɑ̃ɑwɑ Gusunɔn gɑri, kɑ dĩɑ wɑ̃ɑruginu kɑ hɑnduniɑn yɑm bururɑm kɑ swɑɑ ye yɑ dɔɔ Gusunɔn mi, kɑ gem, kɑ wɑ̃ɑru, kɑ tɔ̃ki mɛro.
Tire te sɔɔ, Yohɑnu u mɑɑmɑɑki nɔɔbɑ tiɑ siɑ ye Yesu u kuɑ ye Mɑteu kɑ Mɑɑku kɑ Luku bɑ ǹ yoruɑ. Adɑmɑ u ǹ Yesun mɑrubu kɑ win sɔmburu te u kuɑ Gɑlileɔ yoruɑ kɑ sere kɔkiri bi Yesu u wɑ kɑ Yinnin dĩɑ domɑruginun gɑri. Domi tɔn dɑbirɑ tɑ yeni kpuro yɛ̃ kɔ win wɑɑti ye sɔɔ.
Tire ten kpunɑɑ
1. Yɑm bururɑm kɑ wɑ̃ɑrun gɑri, wiru 1:1-18.
2. Yesu u tii tɔmbu sɔ̃ɔsi, wiru 1:19n di sere wiru 12:50.
3. Yesu Kirisin gɑri dɑ̃ɑki yi u kɑ win bwɑ̃ɑbu nukuru yɛmiɑsiɑ, wiru 13n di sere wiru 17.
4. Yesun sɑnɑm dɑ̃ɑkim hɑnduniɑ sɔɔ, wiru 18n di sere wiru 21.