24
Yesun seebu gɔrin di
1 Ye n kuɑ ɑlusumɑ buun buru buru yellu, kurɔ be, bɑ dɑ sikiru mi kɑ gum nuburugim mɛ bɑ sɔɔru kuɑ. 2 Bɑ deemɑ kperɑ bimiɑre sikirun nɔɔn di. 3 Bɑ duɑ ɑdɑmɑ bɑ ǹ Yinni Yesun goru deemɛ. 4 Nge mɛ bɑ kɑ yen biti yɔ̃, n wee tɔmbu yiru gɑbɑ bu kuremɑ bɑ yɑ̃nu sebuɑ ni nu bɑllimɔ. 5 Kurɔ be, bɑ nɑndɑ mɑ bɑ tukɑ mɑ durɔ be, bɑ nɛɛ, mbɑn sɔ̃nɑ i wɑso kɑsu gɔribun suunu sɔɔ. 6 U ǹ wɑ̃ɑ mini, u seewɑ gɔrin di. I yɑɑyo ye u rɑɑ bɛɛ sɔ̃ɔwɑ sɑnɑm mɛ u wɑ̃ɑ Gɑlileɔ. 7 U nɛɛ, bɑ ǹ koo ko bɑ kun Tɔnun Bii tɔn kɔ̃sobu nɔmu sɔndie, kpɑ bu nùn dɑ̃ɑ bunɑnɑru kpɑre, kpɑ u kpɑm se sɔ̃ɔ itɑse.
8 Mɑ kurɔ be, bɑ Yesun gɑri yi yɑɑyɑ. 9 Bɑ gɔsirɑ sikiru min di bɑ dɑ bɑ ye kpuro bwɑ̃ɑbu wɔkurɑ tiɑ ye kɑ be bɑ tie kpuro nɔɔsiɑ. 10 Mɑɑri Mɑdɑlɑgii kɑ Yoɑnɑ kɑ Mɑɑri, Yɑkɔbun mɛro kɑ kurɔbu gɑbu, beyɑ bɑ ye gɔro be sɔ̃ɔwɑ. 11 Adɑmɑ gɑri yi, yi bu sɑ̃ɑre sukuru, bɑ ǹ kurɔ ben gere nɑɑnɛ kue. (( 12 Mɑ Piɛɛ u seewɑ u dukɑ dɑ sikiru mi. Ye u yɑ̃ɑrɑ, u ǹ gɑ̃ɑnu wɑ mɑ n kun mɔ beku te bɑ rɑɑ kɑ goo te tɛ̃kuɑ tɑ subɑ temɔ. Mɑ u gɔsirɑ win yɛnuɔ kɑ biti.))
Emɑyusin dɑɑbu
(I mɑɑ mɛɛrio Mɑɑku 16:12-13)
13 Yerɑ sɔ̃ɔ tee te sɔɔ, gɔro ben yiru yɑ wuu dɔɔ ge bɑ sokumɔ Emɑyusi. Gɑ kɑ Yerusɑlɛmu tomɑ nge kilo wɔkurɑ tiɑn sɑkɑ. 14 Ye n koorɑ kpuro, bɑ yen fɑɑgi mɔ̀. 15 Sɑnɑm mɛ bɑ gɑri yin fɑɑgi mɔ̀ bɑ sikirinɛmɔ, Yesu u susi ben bɔkuɔ u swɑɑ mɔ̀ kɑ be sɑnnu. 16 Bɑ nùn wɑ ɑdɑmɑ gɑ̃ɑnu yinɑ bu nùn tubu. 17 U bu bikiɑ u nɛɛ, gɑri yirɑ̀ i mɔ̀ mɛ, i kɑ sĩimɔ.
Mɑ bɑ yɔ̃rɑ bɑ wuswɑɑ burisinɛ kɑ nuku sɑnkirɑnu. 18 Ben turo, wi bɑ sokumɔ Keleopɑ, u nɛɛ, mɑ n kun wunɛ turo bɑɑsi, wɑrɑ wɑ̃ɑ Yerusɑlɛmuɔ wi u kun yɛ̃ ye n koorɑ sɔ̃ɔ mɛɛ te sɔɔ.
19 Mɑ u bikiɑ u nɛɛ, mbɑn bweserɑ n kuɑ.
Bɑ nɛɛ, ye bɑ Yesu Nɑsɑrɛtigii kuɑn gɑriyɑ sɑ mɔ̀. Durɔ wi, u sɑ̃ɑ Gusunɔn sɔmɔ wi u rɑ sɔm mɑɑmɑɑkiginu ko kpɑ u gɑri gere kɑ yiiko Gusunɔ kɑ tɔmbu kpuron wuswɑɑɔ. 20 Bɛsɛn yɑ̃ku kowo tɔnwerobu kɑ wuun wirugibu bɑ nùn tɔmbu nɔmu sɔndiɑ bu kɑ nùn tɑɑrɛ wɛ̃ bu go mɑ bɑ nùn dɑ̃ɑ bunɑnɑru kpɑre. 21 Sɑ rɑɑ yĩiyɔ wiyɑ u koo Isirelibɑ yɑkiɑ, ɑdɑmɑ yen sɔ̃ɔ itɑse wee, ye yeni kpuro yɑ kɑ koorɑ. 22 Yen biruwɑ kurɔbu gɑbu bɛsɛ sɔɔn di bɑ sun gidi swee. Bɑ dɑ sikiru mi buru buru yellu, 23 bɑ ǹ Yesun goru deemɛ. Mɑ bɑ nɑ bɑ nɛɛ, wɔllun gɔrɑdobɑ bɑ bu kure mɑ bɑ bu sɔ̃ɔwɑ u be wɑsi. 24 Gɑbu bɛsɛn wuuru sɔɔ bɑ dɑ siki ten mi mɑ bɑ bɑɑyere deemɑ nge mɛ kurɔ be, bɑ bu sɔ̃ɔwɑ, ɑdɑmɑ bɑ ǹ win tii wɑ.
25 Yerɑ Yesu u bu sɔ̃ɔwɑ u nɛɛ, tɔn bwisi sɑri bɛɛ, kɑ be bɑ ku rɑ nɑɑnɛ doke fuuku ye Gusunɔn sɔmɔbu bɑ bu sɔ̃ɔwɑ, 26 Kirisi u koo ko u kun nɔni sɔ̃ɔre u sere du win yiiko sɔɔ?
27 Mɑ u toruɑ Mɔwisin min di kɑ Gusunɔn sɔmɔbu kpuro, u bu win gɑri tubusiɑ yi yi wɑ̃ɑ Gusunɔn gɑri kpuro sɔɔ.
28 Sɑnɑm mɛ bɑ wuu turuku kuɑ ge bɑ dɔɔ, u kuɑ nge u kĩ u dɑ wuswɑɑɔ. 29 Mɑ bɑ nùn suuru kɑnɑ bɑ nɛɛ, u sinɔ kɑ be domi yokɑ kuɑ kɔ, sɔ̃ɔ mɑɑ kpɑ. Mɑ u wurɑ u kɑ bu sinɑ. 30 Sɑnɑm mɛ u dimɔ kɑ be, u pɛ̃ɛ suɑ u ye domɑru koosi, mɑ u ye mururɑ u bu wɛ̃. 31 Sɑɑ yerɑ ben nɔni wukiɑrɑ bɑ nùn tubɑ, yɑnde mɑ bɑ nùn biɑ. 32 Mɑ bɑ sɔ̃ɔnɑmɔ bɑ nɛɛ, bɛsɛn gɔ̃ru gɑ ǹ kɑ sun gɑri kue swɑɑ sɔɔ ye u kɑ sun gɑri mɔ̀ mɑ u sun Gusunɔn gɑri tubusiɑmɔ?
33 Mɑ bɑ yɑnde seewɑ bɑ gɔsirɑ Yerusɑlɛmuɔ. Bɑ deemɑ wɔkurɑ tiɑ ye kɑ gɑbu bɑ mɛnnɛ. 34 Be bɑ mɛnnɛ mi, bɑ tɔnu yiru ye sɔ̃ɔwɑ bɑ nɛɛ, Yinni u seewɑwɑ gɔrin di kɑ gem, u tii Simɔɔ sɔ̃ɔsi.
35 Mɑ tɔnu yiru ye, yɑ mɑɑ geruɑ ye n bu deemɑ swɑɑ sɔɔ kɑ nge mɛ bɑ nùn tubɑ sɑnɑm mɛ u pɛ̃ɛ ye mururɑ u bu wɛ̃.
Yesu u win bwɑ̃ɑbu tii sɔ̃ɔsi
36 Sɑnɑm mɛ bɑ gɑri yi mɔ̀, win tii u kurɑmɑ ben suunu sɔɔ ((u nɛɛ, Gusunɔ u bɛɛ ɑlɑfiɑ kɛ̃)).
37 Bɑ nɑndɑ, bɛrum bu mwɑ. Bɑ tɑmɑɑ siiniwɑ. 38 Adɑmɑ u bu sɔ̃ɔwɑ u nɛɛ, mbɑn sɔ̃nɑ bɛɛn lɑɑkɑri burisirɑ. Mbɑn sɔ̃nɑ bwisiku ninin bweserɑ wɑ̃ɑ bɛɛn gɔ̃rusɔ. 39 I nɛn nɔmɑ kɑ nɛn nɑɑsu mɛɛrio. Nɛnɑ. I mɑn bɑbo i wɑ. Siini yɑ ku rɑ n wɑsi kɑ kukunu mɔ, nge mɛ i wɑ nɑ mɔ.
(( 40 Sɑnɑm mɛ u ye gerumɔ u bu win nɔmɑ kɑ win nɑɑsu sɔ̃ɔsi.)) 41 Ben nuku dobu sɔɔ, bɑ ǹ ginɑ nɑɑnɛ doke, mɑ bɑ sɑɑron sɑ̃ɑ. Yen sɔ̃nɑ u bu bikiɑ u nɛɛ, i gɑ̃ɑnu mɔ n di?
42 Bɑ nùn swɑ̃ɑ kuseru wɛ̃ te bɑ sɛ̃ɛwɑ. 43 U tu suɑ u temɑ ben wuswɑɑɔ. 44 Mɑ u bu sɔ̃ɔwɑ u nɛɛ, yeyɑ nɑ rɑɑ bɛɛ sɔ̃ɔwɑ sɑnɑm mɛ nɑ wɑ̃ɑ kɑ bɛɛ nɑ nɛɛ, kpuro ye bɑ yoruɑ nɛn sɔ̃ Mɔwisin woodɑn tireru sɔɔ kɑ Gusunɔn sɔmɔbuginu kɑ yerukobun womusu sɔɔ, yɑ ǹ koo ko yɑ kun koore.
45 Yerɑ u ben bwisi wukiɑ Gusunɔn gɑri yi kɑ bu yeeri. 46 Mɑ u bu sɔ̃ɔwɑ u nɛɛ, nge mɛyɑ bɑ yoruɑ, Kirisi u koo nɔni swɑ̃ɑru wɑ, kpɑ u se gɔrin di sɔ̃ɔ itɑse. 47 Kpɑ bu tem kpuron tɔmbu sɔ̃ kɑ win yĩsiru bu nɛɛ, bu gɔ̃ru gɔsio bu kɑ ben torɑnun suuru wɑ. Bɑ koo torewɑ Yerusɑlɛmun di. 48 Bɛɛyɑ mɑɑ yen seedɑ diobu. 49 Wee, kon bɛɛ mɔrisiɑmɑ yèn nɔɔ mwɛɛru nɛn Bɑɑbɑ u kuɑ. Adɑmɑ i n wɑ̃ɑ wuu ge sɔɔ sere wɔllun dɑm mu kɑ bɛɛ wukiri.
Yesu u doonɑ wɔllɔ
(I mɑɑ mɛɛrio Mɑɑku 16:19-20, Gɔrobun Kookoosu 1:9-11)