23
Bɑ kɑ Yesu dɑ Pilɑtin wuswɑɑɔ
1 Mɑ bɑ seewɑ be kpuro sɑnnu bɑ kɑ Yesu dɑ Pilɑtin kɔnnɔwɔ. 2 Bɑ nùn durum mɑnibu wɔri bɑ nɛɛ, sɑ wini deemɑ u tɔmbu bwisi kɛ̃mɔ bu kɑ bɑndu kɔ̃ri bwiɑ, u mɑɑ yinɑmɔ bu tem yɛ̃ro wɔ̃ɔ gobi kɔsiɑ. U tii sokumɔ Kirisi, sinɑ boko.
3 Pilɑti u nùn bikiɑ u nɛɛ, wunɛ Yuubɑn sinɑ bokowɑ?
Yesu u nɛɛ, oo, nge mɛ ɑ geruɑ.
4 Pilɑti u yɑ̃ku kowo tɔnwerobu kɑ tɔn wɔru sɔ̃ɔwɑ u nɛɛ, nɑ ǹ tɑɑrɛ gɑɑ wɑ durɔ wi sɔɔ.
5 Adɑmɑ bɑ nɔɔ girɑri bɑ nɛɛ, u tɔmbu bwisi kɛ̃mɔwɑ bu kɑ sɑnnɑ, u bu yen keu sɔ̃ɔsimɔ. U toruɑ Gɑlilen di mɑ u dɑ Yudeɑn tem kpuro sɔɔ. Wee, u mɑɑ nɑ mini tɛ̃.
Bɑ kɑ Yesu dɑ
Herodun wuswɑɑɔ
6 Ye Pilɑti u yeni nuɑ, u bikiɑ durɔ wi, ù n Gɑlilegiin nɑ. 7 Ye u giɑ mɑ u weewɑ Herodun bɑndun tem di, u nùn gɔsiɑ win mi. Herodu mɑɑ wɑ̃ɑ Yerusɑlɛmuɔ sɑɑ ye sɔɔ. 8 Sɑnɑm mɛ Herodu u Yesu wɑ, win nukurɑ dorɑ gem gem. Sɑɑ tɛɛbun diyɑ u kɑsu u nùn wɑ, win lɑbɑɑri ye u nɔɔmɔ bɑ gerumɔn sɔ̃. Domi u yĩiyɔ u Yesun sɔm mɑɑmɑɑkigiru wɑ dɔmɑ te u koo nùn wɑ. 9 U nùn gɑri bikiɑ n kɑ tɛ ɑdɑmɑ Yesu kun nùn gɛɛ wisɑ. 10 Yɑ̃ku kowo tɔnwerobu kɑ woodɑ yɛ̃robɑ wɑ̃ɑ mi, bɑ nùn durum mɑnimɔ kɑ dɑm. 11 Herodu kɑ win tɑbu kowobu bɑ nùn yɑɑkoru kuɑ mɑ bɑ nùn gɑri bɔkɔ kuɑ. Ye bɑ nùn yɑbe burɑru sebusiɑ bɑ kpɑ bɑ nùn gɔsiɑ Pilɑtin mi. 12 Yen dɔmɑ terɑ Pilɑti kɑ Herodu bɑ dorɑ, be, be bɑ rɑɑ yibɛrɛ tɛɛru mɔɔsinɛ.
Bɑ Yesu tɑɑrɛ wɛ̃ bu go
13 Pilɑti u yɑ̃ku kowo tɔnwerobu kɑ Yuubɑn wirugibu kɑ tɔn wɔru sokusiɑ. 14 U bu sɔ̃ɔwɑ u nɛɛ, i kɑ mɑn durɔ wini nɑɑwɑ nge wi u tɔmbu bwisi kɛ̃mɔ bu kɑ bɑndu kɔ̃ri bwiɑ. N wee, nɑ gɑri yin ɑsɑnsi bikiɑ bɛɛn wuswɑɑɔ, nɑ ǹ mɑɑ gɑ̃ɑnu wɑ durɔ wi sɔɔ, ni nu sɔ̃ɔsimɔ mɑ geemɑ ye i geruɑ win sɔ̃. 15 Mɛyɑ mɑɑ Herodun tii, domi u sun nùn wesiɑmɑ. Durɔ wi kun gɑ̃ɑnu kue ye n kɑ gɔɔ nɛ. 16 Yen sɔ̃, nɑ kon nùn kɑrɑ nɑ̀ n nùn sɛɛyɑsiɑ nɑ kpɑ.
18 Bɑ nɔɔgiru suɑ be kpuro sɑnnu bɑ nɛɛ, ɑ wini goowo, kpɑ ɑ sun Bɑrɑbɑ kɑrɑ!
19 Bɑ rɑɑ Bɑrɑbɑ wi doke pirisɔm sɔɔ yèn sɔ̃ u tɔmbu sɑnnɔ bɔrie wuu sɔɔ, u mɑɑ tɔnu go. 20 Pilɑti u kpɑm kɑ bu gɑri kuɑ yèn sɔ̃ u gɔ̃ru doke u Yesu kɑrɑ. 21 Adɑmɑ bɑ wurenu seewɑ bɑ nɛɛ, ɑ kpɑreo, ɑ nùn dɑ̃ɑ bunɑnɑru kpɑreo!
22 Pilɑti u kpɑm bu sɔ̃ɔwɑ nɔn itɑse u nɛɛ, kɔ̃sɑ yerɑ̀ u kuɑ. Nɑ ǹ gɑ̃ɑnu wɑ wi sɔɔ ye n kɑ gɔɔ nɛ. Yen sɔ̃, nɑ̀ n nùn sɛɛyɑsiɑ nɑ kpɑ, kon nùn kɑrɑ.
23 Adɑmɑ bɑ wure bɑ nɔɔgiru suɑ bɑ nɛɛ, bu nùn kpɑreo. Mɑ ben wurenu nu nùn kɑmiɑ. 24 Mɑ Pilɑti u woodɑ yi nge mɛ bɑ bikiɑ. 25 U wi bɑ bikiɑ yɔ̃su wi bɑ pirisɔm doke sɑnnɔ kɑ tɔn goobun (200) sɔ̃, mɑ u bu Yesu deriɑ ben gɔ̃ru kĩru sɔɔ.
Bɑ Yesu kpɑre
dɑ̃ɑ bunɑnɑru wɔllɔ
26 Sɑnɑm mɛ bɑ kɑ Yesu dɔɔ, bɑ goo mwɑ wi bɑ mɔ̀ Simɔɔ Sirɛnigii, wi u win gberu wee, mɑ bɑ nùn dɑ̃ɑ bunɑnɑru sɔbi u kɑ Yesu swĩi.
27 Tɔn wɔru gunɑ yɑ nùn swĩi. Ye sɔɔ, tɔn kurɔbu gɑbɑ wɑ̃ɑ be bɑ sumɔ bɑ kpɑsɑ wɔri mɔ̀ win sɔ̃. 28 Yesu u sĩirɑ ben mi giɑ mɑ u nɛɛ, Yerusɑlɛmun tɔn kurɔbu, i ku swĩ nɛn sɔ̃, ɑdɑmɑ i swĩiyɔ bɛɛn sɔ̃ kɑ bɛɛn bibun sɔ̃. 29 Domi n wee, sɑnɑm sisi ye bɑ koo nɛɛ, doo nɔɔrugibɑ wĩrobu kɑ bèn nukurɑ kun mɑrure, kɑ bèn bwɑ̃ɑ kun bii bɔm kɛ̃ɛre. 30 Sɑɑ yerɑ bɑ koo guunu sɔ̃ bu nɛɛ, i sun sɛ̃sikio, kpɑ bu gungunu sɔ̃ bu nɛɛ, i sun wukirio. 31 Domi bɑ̀ n yenin bweseru dɑ̃ɑ bekuru kuɑ, ɑmɔnɑ n ko n sɑ̃ɑ dɑ̃ɑ gbeburun mi.
32 Sɑɑ ye sɔɔ, bɑ mɑɑ kɔ̃sɑn kowobu yiru gɑbu kɑ dɑ be bɑ koo go kɑ Yesu sɑnnu. 33 Sɑnɑm mɛ bɑ turɑ yɑm mi n kɑ wii koko weenɛ, bɑ nùn dɑ̃ɑ bunɑnɑru kpɑre kɑ kɔ̃sɑn kowobu yiru ye, turo nɔm geuɔ, turo nɔm dwɑrɔ. 34 Yesu u nɛɛ, Bɑɑbɑ ɑ bu suuru kuo domi bɑ ǹ yɛ̃ ye bɑ mɔ̀.
Bɑ win yɑ̃nu tɛtɛ toosi bɑ bɔnu kuɑ. 35 Tɔn wɔru gɑ wɑ̃ɑ mi, gɑ nùn mɛɛrɑ. Kɑ wirugibɔ, bɑ Yesu yɑɑkoru mɔ̀ bɑ mɔ̀, u gɑbu fɑɑbɑ kuɑ. Ù n sɑ̃ɑn nɑ Kirisi wi Gusunɔ u gɔsɑ, u mɑɑ win tii fɑɑbɑ koowo.
36 Tɑbu kowobu bɑ mɑɑ susi bu kɑ nùn yɑɑkoru ko, kpɑ bu nùn tɑm mɔmmɔm wɛ̃. 37 Mɑ bɑ nɛɛ, ɑ̀ n sɑ̃ɑn nɑ Yuubɑn sinɑ boko, ɑ tii fɑɑbɑ koowo wunɛn tii.
38 Dɑ̃ɑ tè sɔɔ bɑ nùn kpɑren wɔllɔ, yorɑ gɑɑ wɑ̃ɑ ye yɑ gerumɔ winiwɑ Yuubɑn sinɑ boko.
39 Kɔ̃sɑn kowo ben turo be bɑ dɑ̃ɑ bunɑnɑru kpɑre mi, u Yesu gɑri kɑm gerusimɔ u mɔ̀, n ǹ wunɛ ɑ sɑ̃ɑ Kirisi wi? A tii fɑɑbɑ koowo, kpɑ ɑ mɑɑ sun fɑɑbɑ ko.
40 Adɑmɑ win turo u nùn gerusi u nɛɛ, ɑ ǹ Gusunɔ nɑsie? Wunɛ wi bɑ tɑɑrɛ wɛ̃ nge wi? 41 Bɛsɛn mi, n kɑ sun dɛnde domi bɛsɛn kookoosun ɑreyɑ sɑ mwɑɑmɔ, ɑdɑmɑ sii wini u ǹ gɑ̃ɑ kɔ̃sunu gɑnu kue.
42 Mɑ u nɛɛ, Yesu, dɔmɑ te ɑ sinɑ wunɛn bɑndu sɔɔ, ɑ mɑn yɑɑyo.
43 Yesu u nùn wisɑ u nɛɛ, kɑ geemɑ nɑ nun sɔ̃ɔmɔ, gisɔ kɑɑ n wɑ̃ɑ kɑ nɛ gɔribun wɑ̃ɑ yee geeru sɔɔ.
Yesun gɔɔ
44 Sɑɑ ye, sɔ̃ɔ wii wɔllɑ, mɑ yɑm mu tĩrɑ hɑnduniɑ kpuro sɔɔ sere sɔ̃ɔ kɑ yɑ̃ɑrɑ. Yen tɛɛbu kɑ kɔbɑ itɑ nɛ. 45 Sɔ̃ɔ yɑm tĩrɑ mɑ beku kɑre te tɑ wɑ̃ɑ sɑ̃ɑ yeru sɔɔ tɑ gɛ̃ɛrɑ tɑ bɔnu kuɑ yiru. 46 Yesu u gbɑ̃rɑ kɑ dɑm u nɛɛ, Bɑɑbɑ, nɑ nun nɛn hunde nɔmu sɔndiɑ.
Ye u gɑri yi geruɑ u kpɑ, mɑ u sɑriru kuɑ. 47 Ye tɑbu kowobun tɔnwero u wɑ ye yɑ koorɑ, u Gusunɔ siɑrɑ u nɛɛ, kɑ geemɑ, durɔ wini geegiiwɑ.
48 Yen biru tɔn wɔru ge gɑ wɑ̃ɑ mi, ye gɑ wɑ ye yɑ koorɑ, gɑ gɔsirɑ kɑ biti bɑkɑ. 49 Be bɑ Yesu yɛ̃ kpuro kɑ tɔn kurɔ be bɑ nùn swĩimɑ Gɑlilen di, bɑ yɔ̃ n dɛsire bɑ kɑ mɛɛrɑ ye n koorɑmɔ.
Yesun sikubu
50-51 Durɔ goo wɑ̃ɑ wi bɑ sokumɔ Yosɛfu. U nɑ sɑɑ Yuubɑn wuu gɑgun di ge bɑ mɔ̀ Arimɑte. U sɑ̃ɑ geegii kɑ tɔn geo mɑ u mɑrɑ Gusunɔ u nɑ u win bɑndu swĩi. U wɑ̃ɑ siri kowobun wuuru sɔɔ, ɑdɑmɑ u ǹ dɑɑ ben gere kɑ ben kookoosu wure. 52 Wiyɑ u dɑ Pilɑtin mi, u Yesun goru kɑnɑ. 53 U tu sɑrɑsiɑ dɑ̃ɑ bunɑnɑrun di mɑ u kɑ tu bekuru tɛ̃kuɑ, u tu kpĩ siki kpee wɔrugirɔ, mi bɑ ǹ goo dokere. 54 Tɔ̃ɔ te, tɔ̃ɔ wɛ̃rɑrugirun sɔɔrun tɔ̃rɑ, tèn yokɑn di tɔ̃ɔ wɛ̃rɑrugirɑ koo tore.
55 Kurɔ be bɑ rɑɑ Yesu swĩimɑ Gɑlilen di, bɑ Yosɛfu yɔ̃siri mɑ bɑ siki te wɑ, kɑ nge mɛ bɑ Yesun goru kpĩisinɑ. 56 Mɑ bɑ gɔsirɑ bɑ gum mɛ mu nuburu do kɑ turɑren sɔɔru kobu dɑ.
Tɔ̃ɔ wɛ̃rɑrugiru sɔ̃nu bɑ wɛ̃rɑ nge mɛ woodɑ yɑ geruɑ.