27
Bɑ kɑ Yesu dɑ
Pilɑtin wuswɑɑɔ
1 Ye n kuɑ buru buru yellu yɑ̃ku kowo tɔnwerobu kɑ guro gurobu bɑ nɔɔ tiɑ kuɑ bu kɑ Yesu go. 2 Ye bɑ nùn bɔkuɑ bɑ kpɑ bɑ kɑ nùn dɑ bɑ Pilɑti tem yɛ̃ro nɔmu bɛriɑ.
Yudɑsin gɔɔ
(I mɑɑ mɛɛrio Gɔrobun Kookoosu 1:18-19)
3 Ye Yudɑsi wi u Yesu dɔmɛ u wɑ bɑ Yesu tɑɑrɛ wɛ̃ bu go, win nuki sɑnkirɑ mɑ u kɑ sii geesun gobi tɛnɑ ye wurɑ yɑ̃ku kowo tɔnwerobu kɑ guro gurobun mi. 4 U nɛɛ, nɑ durum kuɑ ye nɑ kɑ tɔn dɛɛro gɔɔ bɔrie.
Mɑ bɑ nùn wisɑ bɑ nɛɛ, bɛsɛn bɑɑye, wunɛn gɑriyɑ.
5 Yudɑsi gobi yi yɑri sɑ̃ɑ yerɔ mɑ u yɑrɑ u dɑ u tii soorɑ doke.
6 Yɑ̃ku kowo tɔnwerobu bɑ gobi yi dɔburɑ bɑ nɛɛ, n ǹ weenɛ su gobi yi kpɛ̃ɛ sɑ̃ɑ yerun gobi beru yerɔ, domi tɔnun yɛm gobiyɑ.
7 Ye bɑ wesiɑnɑ bɑ kpɑ bɑ kɑ gobi yi tem dwɑ mɔmɔn mi, mi bɑ ko n dɑ sɔbu sike. 8 Yen sɔ̃nɑ bɑ tem mɛ sokumɔ tem yɛmgim sere kɑ gisɔn gisɔ. 9 Yerɑ Gusunɔn sɔmɔ Yeremin gɑri yi koorɑ yi yi nɛɛ, <<Bɑ sii geesun gobi tɛnɑ ye suɑ, gobi yi Isirelibɑ bɑ wesiɑnɑ bɑ wɛ̃ win sɔ̃, 10 bɑ kɑ tem dwɑ mɔmɔn mi, nge mɛ Yinni u mɑn yiire.>>
Pilɑti u Yesu gɑri bikiɑmɔ
11 Yesu yɔ̃ tem yɛ̃ro Pilɑtin wuswɑɑɔ mɑ tem yɛ̃ro wi, u nùn bikiɑ u nɛɛ, wunɑ Yuubɑn sunɔ?
Yesu nùn wisɑ u nɛɛ, wunɛn tii ɑ geruɑ kɔ.
12 Yen biru sɑnɑm mɛ yɑ̃ku kowo tɔnwerobu kɑ guro gurobu bɑ nùn mɛm mɑni, u ǹ gɛɛ wisɑ. 13 Yerɑ Pilɑti nùn bikiɑ u nɛɛ, ɑ ǹ mɛm kpuro nɔɔmɔ mɛ bɑ nun mɑnimɔ?
14 Adɑmɑ Yesu kun nùn wisɑ bɑɑ nɔn teeru sere biti bɑkɑ tem yɛ̃ro wi mwɑ.
Bɑ Yesu tɑɑrɛ wɛ̃ bu go
15 Gɔɔ sɑrɑribun tɔ̃ɔ bɑkɑru bɑɑtere tem yɛ̃ro rɑ pirisɔm turo kɑrewɑ wi tɔn wɔru gɑ kĩ. 16 N deemɑ sɑɑ ye sɔɔ, pirisɔm yĩsirugii goo wɑ̃ɑ mi, wi bɑ sokumɔ Bɑrɑbɑ. 17 Yen sɔ̃nɑ sɑnɑm mɛ bɑ mɛnnɛ, Pilɑti u bu bikiɑ u nɛɛ, wɑrɑ i kĩ n bɛɛ kɑrɑ, Bɑrɑbɑ? Nge Yesu wi bɑ sokumɔ Kirisi.
18 Domi u yɛ̃ sɑ̃ɑ sɑ̃ɑ mɑ nisinun sɔ̃nɑ bɑ nùn Yesu nɔmu bɛriɑ.
19 Ye Pilɑti sɔ̃ win siri yerɔ win kurɔ nùn tɔnu gɔriɑ u nɛɛ, ɑ ku nɔmɑ doke durɔ gemgii win gɑri sɔɔ domi wɔ̃ku te, nɑ wɑhɑlɑ wɑ dosu sɔɔ durɔ win sɔ̃.
20 Yɑ̃ku kowo tɔnwerobu kɑ guro gurobu bɑ tɔn wɔru sɔ̃ɔmɔ gu de bu Bɑrɑbɑ kɑrɑ kpɑ bu Yesu go. 21 Pilɑti u bu bikiɑ u nɛɛ, be yiru ye sɔɔ, ben wɑrɑ i kĩ n bɛɛ kɑrɑ.
Bɑ nɛɛ, Bɑrɑbɑ.
22 Mɑ Pilɑti nɛɛ, ǹ n mɛn nɑ, mbɑ kon ko kɑ Yesu wi bɑ mɔ̀ Kirisi.
Be kpuro bɑ nɛɛ, ɑ nùn kpɑreo dɑ̃ɑ bunɑnɑrɔ.
23 Pilɑti u nɛɛ, kɔ̃sɑ yerɑ̀ u kuɑ.
Adɑmɑ bɑ nɔɔgiru suɑ wɔllɔ bɑ nɛɛ, ɑ nùn kpɑreo dɑ̃ɑ bunɑnɑrɔ.
24 Ye Pilɑti wɑ mɑ ye u mɔ̀ kpuro kɑmɑ, wurenu sosimɔwɑ, yerɑ u nim sɔkɑ u niɑ tɔn wɔru gen wuswɑɑɔ u nɛɛ, durɔ gemgii win yɛm yɑribu kun mɑn wɑ, bɛɛn gɑriyɑ.
25 Mɑ tɔn be kpuro bɑ nɛɛ, win yɛm mu ko bɛsɛ kɑ bɛsɛn bibun sɔmunu.
26 Yerɑ Pilɑti bu Bɑrɑbɑ kɑrɑ, mɑ u derɑ bɑ Yesu sɛni so. Yen biru u nùn bu nɔmu sɔndiɑ bu nùn kpɑre dɑ̃ɑ bunɑnɑrɔ.
Tɑbu kowobɑ Yesu
yɑɑkoru mɔ̀
(I mɑɑ mɛɛrio Mɑɑku 15:16-20, Yohɑnu 19:2-3)
27 Pilɑtin tɑbu kowobu bɑ kɑ Yesu dɑ tem yɛ̃ron siri yerɔ, mɑ tɑbu kowobu kpuro bɑ mɛnnɑ mi. 28 Bɑ nùn win yɑ̃nu potɑri mɑ bɑ nùn gurumusu swɑ̃ɑbu sebusiɑ. 29 Mɑ bɑ sɑ̃ki tundu bɔkɑnɑ bɑ nùn dokeɑ wirɔ, mɑ bɑ nùn dɛkɑ wɛ̃ win nɔm geuɔ. Yen biru bɑ nùn yiirɑmmɛ bɑ yɑɑkoru mɔ̀ bɑ mɔ̀, Yuubɑn sunɔ, fɔɔ bɑɑsirɑ.
30 Bɑ nùn yɑ̃ɑtɑm siriki mɑ bɑ dɛkɑ wɛ̃ɛnɑ bɑ kɑ nùn soomɔ wirɔ. 31 Ye bɑ nùn yɑɑkoru kuɑ bɑ kpɑ, bɑ nùn gurumusu te potɑri bɑ kpɑm nùn win yɑ̃nu sebusiɑ mɑ bɑ kɑ nùn dɑ bu dɑ̃ɑ bunɑnɑru kpɑre.
Bɑ Yesu kpɑre dɑ̃ɑ bunɑnɑru wɔllɔ
32 Ye bɑ yɑriɔ bɑ kɑ Sirɛnin durɔ goo yinnɑ wi bɑ mɔ̀ Simɔɔ, mɑ bɑ nùn Yesun dɑ̃ɑ bunɑnɑru sɔbi kɑ tilɑsi. 33 Ye bɑ turɑ yɑm mi bɑ rɑ soku Gɔɔgɔtɑ, yen tubusiɑnɑ ɑye te tɑ kɑ wii koko weenɛ, 34 miyɑ bɑ Yesu tɑm wɛ̃ u nɔ kɑ tim mɛ mu rɑ yɛm go. Ye u mu dendɑ u ǹ wure u mwɛ.
35 Bɑ nùn kpɑre dɑ̃ɑ bunɑnɑru sɔɔ, mɑ bɑ win yɑ̃nu tɛtɛ toosi bɑ bɔnu kuɑ. 36 Mɑ bɑ sinɑ bɑ nùn kɔ̃su. 37 Win wii wɔllɔ bɑ yorɑ gɑɑ bwɛ̃ ye yɑ win tɑɑrɛ gerumɔ yɑ nɛɛ, winiwɑ Yesu, Yuubɑn sunɔ. 38 Bɑ mɑɑ gbɛnɔbu yiru kpɑre dɑ̃ɑ bunɑnɑnɔ Yesun bɔkuɔ, turo win nɔm geuɔ, turo mɑɑ nɔm dwɑrɔ.
39 Be bɑ sɑrɔ berɑ mi, bɑ nùn wiru diirisimɔ bɑ wɔmmɔ. 40 Bɑ mɔ̀, wunɛ wi kɑɑ sɑ̃ɑ yeru surɑ kpɑ ɑ tu bɑni sɔ̃ɔ itɑn bɑɑ sɔɔ, ɑ tii fɑɑbɑ koowo. À n sɑ̃ɑ Gusunɔn Biin nɑ, ɑ sɑrɑmɑ dɑ̃ɑ bunɑnɑrun di.
41 Nge mɛyɑ yɑ̃ku kowo tɔnwerobu kɑ woodɑ yɛ̃robu kɑ guro gurobu bɑ nùn yɑɑkoru mɔ̀ bɑ nɛɛ, 42 u gɑbu fɑɑbɑ kuɑ ɑdɑmɑ u kpɑnɑ u tii fɑɑbɑ ko. Isirelibɑn sunɔwɑ. U den sɑrɑmɑ dɑ̃ɑ bunɑnɑrun di kpɑ su nùn nɑɑnɛ doke. 43 U Gusunɔ nɑɑnɛ sɑ̃ɑ mɑ u nɛɛ, wiyɑ Gusunɔn Bii. Ǹ n mɛn nɑ, Gusunɔ u nùn fɑɑbɑ koowo ù n nùn kĩ.
44 Mɛyɑ mɑɑ gbɛnɔ be bɑ kpɑre kɑ wi sɑnnu, ben tii bɑ nùn wɔmmɔ.
Yesun gɔɔ
45 Ye n kuɑ sɔ̃ɔ wii wɔllu, yerɑ yɑm tĩrɑ tem mɛ sɔɔ kpuro sere n kɑ turɑ yokɑn kɔbɑ itɑ. 46 Kɔbɑ itɑn sɑkɑ Yesu u nɔɔgiru suɑ u nɛɛ, Eli, Eli, lemɑ sɑbɑtɑni. Yen tubusiɑnɑ, Gusunɔ nɛn Yinni mbɑ n kuɑ ɑ kɑ mɑn deri.
47 Tɔn be bɑ wɑ̃ɑ mi, ye ben gɑbɑ nuɑ mɛ, bɑ nɛɛ, u Eli soku.
48 Yɑnde ben turo u dukɑ dɑ u swɛɛ dukɛ dukɛsu suɑ u kpɛ̃ɛ tɑm mɔmmɔm sɔɔ u bɛri dɛkɑɔ u kɑ nùn tĩi u nɔ. 49 Adɑmɑ be bɑ tie bɑ nɛɛ, ɑ yɔ̃ro ginɑ, su wɑ nge Eli u koo nɑ u nùn fɑɑbɑ ko.
50 Yesu u kpɑm nɔɔgiru suɑ mɑ u nɔɔ mɑri.
51 Sɑɑ ye sɔɔrɑ, beku kɑre te tɑ wɑ̃ɑ sɑ̃ɑ yerɔ tɑ gɛ̃ɛrɑ sɑɑ wɔllun di sere temɔ. Tem mu yĩirɑ mɑ kpenu bɛsikirɑ. 52 Sikinu wukiɑrɑ, mɑ Gusunɔgii dɑbinu be bɑ rɑɑ gu bɑ seewɑ. 53 Bɑ yɑrɑ sikɑn di Yesun seebun biru, bɑ duɑ Yerusɑlɛmu Gusunɔn wuuɔ, bɑ tii tɔn dɑbinu sɔ̃ɔsi.
54 Tɑbu sinɑmbu kɑ be bɑ wɑ̃ɑ kɑ wi bɑ Yesu kɔ̃su, bɑ tem yĩiri bi wɑ kɑ kpuro ye yɑ koorɑ, mɑ bɛrum bɑkɑm bu mwɑ bɑ nɛɛ, kɑ geemɑ Gusunɔn Biiwɑ. 55 Tɔn kurɔ dɑbinu nu yɔ̃ mi, nu Yesu mɛɛrɑ sɑɑ sɑrun di. Bɑ rɑɑ nùn swĩimɑwɑ sɑɑ Gɑlilen di bu kɑ nùn nɔɔri. 56 Be sɔɔ, Mɑɑri Mɑdɑlɑgii kɑ Mɑɑri, Yɑkɔbu kɑ Yosɛfun mɛro, kɑ Sebeden bibun mɛro, bɑ wɑ̃ɑ mi.
Yesun sikubu
57 Ye n kuɑ yokɑ, durɔ gobigii goo nɑ, Arimɑtegiiwɑ, win yĩsirɑ Yosɛfu, u mɑɑ sɑ̃ɑ Yesun bɔ̃ɔ. 58 U dɑ Pilɑtin mi, u nùn kɑnɑ u nùn Yesun goru wɛ̃. Yerɑ Pilɑti nùn tu yɔllɑɑ kuɑ, u derɑ bɑ nùn tu wɛ̃. 59 Yosɛfu wi, u goo te suɑ u beku kpɑɑru tɛ̃kusi te bɑ wesɑ kɑ wɛ̃ɛ dɑmgii. 60 U tu kpĩ win tiin sikirɔ te u derɑ bɑ nùn dɑ̃kuɑ kperɔ. Yen biru u kpee bɑkɑru bimiɑmɑ u kɑ siki ten nɔɔ kɔruɑ mɑ u doonɑ. 61 Mɑɑri Mɑdɑlɑgii kɑ Mɑɑri wiɔnɔ bɑ sɔ̃ siki ten bɔkuɔ.
Sikirun kɔ̃subu
62 Ye n kuɑ sisiru, tɔ̃ɔ wɛ̃rɑrugiru, yɑ̃ku kowo tɔnwerobu kɑ Fɑlisibɑ bɑ dɑ Pilɑtin mi sɑnnu. 63 Bɑ nɛɛ, yinni sɑ yɑɑye ye weesugii wi, u rɑɑ gerure sɑnɑm mɛ u wɑ̃ɑ hɑnduniɑ sɔɔ. U nɛɛ, sɔ̃ɔ itɑn biru u koo se gɔrin di. 64 Yen sɔ̃, ɑ woodɑ wɛ̃ɛyɔ bu siki te kɔ̃su sere sɔ̃ɔ itɑ, kpɑ win bwɑ̃ɑbu bu ku rɑɑ nɛ bu win goru gbɛni, kpɑ bu tɔmbu sɔ̃ bu nɛɛ, u seewɑ gɔrin di. Wee dɑ̃ɑki sini su koo gbiikisu kpɑ̃ɑru kerɑ.
65 Pilɑti u bu sɔ̃ɔwɑ u nɛɛ, i tɑbu kowobu mɔ, i doo i tu kɔ̃su nge mɛ i ko kpĩ.
66 Bɑ doonɑ mɑ bɑ yĩreru kuɑ siki ten nɔɔwɔ bu kɑ tubu goo ù n wukiɑ. Mɑ bɑ tɑbu kowobu yi, bɑ tu kɔ̃su.