28
Yesun seebu gɔrin di
1 Tɔ̃ɔ wɛ̃rɑrugirun biru, ɑlusumɑ buu sɔ̃nu buru buru yellu, Mɑɑri Mɑdɑlɑgii kɑ Mɑɑri wiɔnɔ bɑ siki te tendem dɑ. 2 Suɑru sɔɔ tem yĩiri bɑkɑbu seewɑ, mɑ Yinnin gɔrɑdo u sɑrɑmɑ wɔllun di u nɑ u kpee te bɔriɑ u sinɑri. 3 Win wuswɑɑ bɑllimɔ nge guru mɑɑkinu mɑ win yɑ̃nu buriri nge suru. 4 Bɛrum bɑkɑm mu kɔ̃so be mwɑ bɑ diirɑ mɑ bɑ kuɑ nge gonu. 5 Gɔrɑdo wi, u kurɔ be sɔ̃ɔwɑ u nɛɛ, i ku bɛrum ko bɛɛ! Nɑ yɛ̃ mɑ Yesuwɑ i kɑsu, wi bɑ kpɑre dɑ̃ɑ bunɑnɑrɔ. 6 U ǹ wɑ̃ɑ mini, u seewɑ nge mɛ u rɑɑ geruɑ. I nɑ i wɑ mi u rɑɑ kpĩ, 7 kpɑ i dɑ fuuku fuuku i win bwɑ̃ɑbu sɔ̃ mɑ u seewɑ gɔrin di. Wee, u bɛɛ gbiiyɔ u dɔɔ Gɑlileɔ. Miyɑ i ko nùn wɑ. Yerɑ nɑ bɛɛ sɔ̃ɔbu nɑ.
8 Bɑ gɔsirɑ kpɑɑkɑ sikiru min di kɑ bɛrum kɑ nuku doo bɑkɑbu, bɑ duki dɑ bu bwɑ̃ɑ be lɑbɑɑri ye sɔ̃. 9 Wee Yesu kɑ bu yinnɑ mɑ u nɛɛ, nɑ bɛɛ tɔburɑ.
Mɑ bɑ nɑ bɑ win nɑɑsu nɛnuɑ bɑ nùn sɑ̃wɑ.
10 Yerɑ Yesu u bu sɔ̃ɔwɑ u nɛɛ, i ku bɛrum ko, i doo i nɛgibu sɔ̃ bu doo Gɑlileɔ. Miyɑ bɑ koo mɑn wɑ.
Kɔ̃so ben gɑri
11 Nge mɛ bɑ dɔɔ, kɔ̃so ben gɑbɑ duɑ wuu sɔɔ bɑ yɑ̃ku kowo tɔnwerobu sɔ̃ɔwɑ ye n koorɑ kpuro. 12 Mɑ yɑ̃ku kowo tɔnwero be, bɑ mɛnnɑ kɑ guro gurobu bɑ wesiɑnɑ mɑ bɑ tɑbu kowobu gobi bɛkɛ kɑ̃. 13 Bɑ bu sɔ̃ɔwɑ bɑ nɛɛ, i geruo mɑ win bwɑ̃ɑbɑ bɑ nɑ wɔ̃kuru bɑ win goru gbɛnɑ sɑnɑm mɛ i do. 14 Tem yɛ̃ro ù n gɑri yi nuɑ sɑ yɛ̃ mɛ sɑ ko nùn kuɑ su kɑ bɛɛ yɑrɑ wɑhɑlɑn di.
15 Tɑbu kowo be, bɑ gobi yi mwɑ mɑ bɑ kuɑ nge mɛ bɑ bu yiire. Yeyɑ n derɑ Yuubɑ bɑ rɑ n gɑri yi gerumɔ sere kɑ gisɔ.
Yesu u win bwɑ̃ɑbu tii sɔ̃ɔsi
16 Bwɑ̃ɑbu wɔkurɑ tiɑ ye, yɑ dɑ Gɑlileɔ guu ten mi, te Yesu rɑɑ bu yĩreru kuɑ. 17 Ye bɑ nùn wɑ, bɑ nùn sɑ̃wɑ. Adɑmɑ ben gɑbɑ gɔ̃rusu yiru mɔ̀. 18 Yesu bu susi u nɛɛ, wɔllu kɑ tem yiiko kpurowɑ bɑ mɑn wɛ̃. 19 Yen sɔ̃, i doo bwesenu kpuron mi, kpɑ i bu ko nɛn bwɑ̃ɑbu. I bu bɑtɛmu koowo kɑ Bɑɑn yĩsiru kɑ Biigiru kɑ Hunde Dɛɛrogiru. 20 Kpɑ i de ye nɑ bɛɛ sɔ̃ɔwɑ bɑ n ye kpuro mɛm nɔɔwɑmmɛ. N wee, ko nɑ n kɑ bɛɛ wɑ̃ɑ bɑɑdommɑ sere kɑ hɑnduniɑn kpeerɔ._