Mɑɑku 16

Yesun seebu gɔrin di

(I mɑɑ mɛɛrio Mɑteu 28:1-8, Luku 24:1-12 Yohɑnu 20:1-10)

¹ Ye tɔ̃ɔ wɛ̃rɑrugirɑ sɑrɑ, Mɑɑri Mɑdɑlɑgii kɑ Sɑlomɛ kɑ Mɑɑri Yɑkɔbun mɛro, bɑ turɑre dwɑ bu kɑ Yesun goru yɛ̃kɑ. ² Ye n kuɑ ɑlusumɑ buun buru buru yellu kurɔ be, bɑ dɑ siki ten mi. ³ Swɑɑɔ bɑ bikiɑnɑmɔ, wɑrɑ u koo bu kpee te bimiɑ siki ten nɔɔn di.

⁴ Ye bɑ mɛɛrɑ mɑ bɑ wɑ, wee kpee te, tɑ bimiɑre bɑɑ mɛ tɑ kpɑ̃ too. ⁵ Ye bɑ duɑ siki te sɔɔ bɑ ɑluwɑɑsi goo wɑ u sɔ̃ ben nɔm geuɔ u yɑbe kpikiru sebuɑ. Mɑ bɛrum bu mwɑ gem gem. ⁶ U bu sɔ̃ɔwɑ u nɛɛ, i ku bɛrum ko. Nɑ yɛ̃ mɑ Yesu Nɑsɑrɛtigiiwɑ i kɑsu wi bɑ kpɑre dɑ̃ɑ bunɑnɑru sɔɔ. U seewɑ gɔrin di u ǹ wɑ̃ɑ mini. I mɛɛrio mi bɑ rɑɑ nùn kpĩi. ⁷ Ǹ n mɛn nɑ, i doo i win bwɑ̃ɑbu sɔ̃ kɑ Piɛɛn tii mɑ u koo bu gbiiyɑ u dɑ Gɑlileɔ. Miyɑ bɑ koo nùn wɑ nge mɛ u rɑɑ bu sɔ̃ɔwɑ.

⁸ Yerɑ bɑ yɑrimɑ bɑ duki doonɑ sikiru min di kɑ diiribu domi bɛrum bu mwɑ gem gem. Bɑ ǹ mɑɑ goo gɑ̃ɑnu gɑnu sɔ̃ɔwɑ bɛrum sɑɑbu.

Yesu u Mɑɑri Mɑdɑlɑgii kure

(I mɑɑ mɛɛrio Mɑteu 28:9-10, Yohɑnu 20:11-18)

(( ⁹ Ye Yesu u seewɑ gɔrin di ɑlusumɑ buun buru buru yellu, Mɑɑri Mɑdɑlɑgiiwɑ u gbiɑ u tii sɔ̃ɔsi, wì sɔɔn di u wɛrɛkunu nɔɔbɑ yiru girɑ. ¹⁰ Mɑ kurɔ wi, u dɑ u win kpɑɑsibu lɑbɑɑri ye sɔ̃ɔwɑ be bɑ wɑ̃ɑ nuku sɑnkirɑnu kɑ swĩi sɔɔ. ¹¹ Sɑnɑm mɛ bɑ nuɑ Yesu kuɑ wɑso, kurɔ wi mɑɑ nùn wɑ, bɑ ǹ ye wure.

Yesu u bwɑ̃ɑbu yiru kure

(I mɑɑ mɛɛrio Luku 24:13-35)

¹² Yenin biru, Yesu u wigibu yiru gɑbu kure ye bɑ sĩimɔ swɑɑɔ bɑ bɑru kpɑɑru gɑru dɔɔ ɑdɑmɑ u tii kɔsɑ ben nɔni sɔɔ. ¹³ Ye bɑ wɔmɑ wuu min di bɑ be bɑ tie yen lɑbɑɑri sɔ̃ɔwɑ, ɑdɑmɑ bɑ ǹ mɑɑ ye nɑɑnɛ kue.

Yesu u tii bwɑ̃ɑbu

wɔkurɑ tiɑ ye sɔ̃ɔsi

(I mɑɑ mɛɛrio Mɑteu 28:16-20, Luku 24:36-49, Yohɑnu 20:19-23, Gɔrobun Kookoosu 1:6-8)

¹⁴ Yen biru Yesu u bwɑ̃ɑbu wɔkurɑ tiɑ ye kuremɑ ye bɑ dimɔ. Mɑ u bu gerusi ben nɑɑnɛ dokebu sɑrirun sɔ̃ kɑ mɑɑ ben degɑngɑm sɔ̃, domi bɑ ǹ tɔn ben gɑri wure be bɑ nùn wɑ u seewɑ gɔrin di. ¹⁵ Mɑ u bu sɔ̃ɔwɑ u nɛɛ, i doo hɑnduniɑn bɑɑmɑ kpuro kpɑ i bweseru bɑɑtere Lɑbɑɑri geɑ wɑɑsu kuɑ. ¹⁶ Bɑɑwure wi u ye nɑɑnɛ doke, mɑ bɑ nùn bɑtɛmu kuɑ, u koo hunden fɑɑbɑ wɑ. Bɑɑwure wi u kun mɑɑ ye nɑɑnɛ doke, u koo tɑɑrɛ wɑ. ¹⁷ Sɔm mɑɑmɑɑkiginu wee ni nɑɑnɛ dokeobu bɑ koo ko. Bɑ koo wɛrɛkunu girɑ kɑ nɛn yĩsiru kpɑ bu kɑ bɑrum kpɑm gɑri gere. ¹⁸ Bɑ̀ n wɑɑ gɔsɔnu suɑ nɔmɑɔ, ǹ kun mɛ bɑ̀ n dɛ̃ɛ nɔrɑ, bɑ ǹ wɑhɑlɑ gɑɑ wɑsi. Bɑ̀ n mɑɑ bɑrɔbu nɔmu sɔndi, bɑ koo bɛkurɑwɑ.

Yesu u doonɔ Gusunɔn mi

(I mɑɑ mɛɛrio Luku 24:50-53, Gɔrobun Kookoosu 1:9-11)

¹⁹ Ye Yinni Yesu kɑ bu gɑri yi kuɑ u kpɑ, u suɑrɑ wɔllɔ u dɑ u sinɑ Gusunɔn nɔm geuɔ. ²⁰ Mɑ bwɑ̃ɑ be, bɑ dɑ bɑ wɑɑsu kuɑ bɑɑmɑ kpuro. Mɑ Yinni u kɑ bu sɔmbu te mɔ̀, u sɔ̃ɔsimɔ kɑ sɔm mɑɑmɑɑkiginu mɑ ben gɑri sɑ̃ɑwɑ gem.))_