GƆROBUN KOOKOOSU
1
Bɑ gɔrobu Hunde Dɛɛro
nɔɔ mwɛɛru kuɑ
1 Teofiru nɛgii, nɛn tire gbiikiru sɔɔ nɑ kpuro yoruɑ ye Yesu u kuɑ kɑ ye u keu koosiɑ sɑɑ mìn di u win sɔmburu toruɑ 2 sere u kɑ wurɑ Gusunɔ wɔllɔ, ye u win gɔro be u gɔsɑ woodɑ wɛ̃ u kpɑ kɑ Hunde Dɛɛron dɑm. 3 Sɔ̃ɔ weeru win tiin gɔɔn biru, u win tii bu sɔ̃ɔsi nɔn dɑbiru. Sɔ̃ɔsi bi, bu sɑ̃ɑ seedɑ ye yɑ kun sikɑ mɔ mɑ u wɑsi. Bɑ nùn wɑ, u mɑɑ bu Gusunɔn bɑndun gɑri tubusiɑ. 4 Sɔ̃ɔ teeru, sɑnɑm mɛ Yesu u kɑ bu dimɔ sɑnnu, u bu sɔ̃ɔwɑ bu ku rɑɑ doonɑ Yerusɑlɛmun di, ɑdɑmɑ bu sinɑ bu win Bɑɑbɑn nɔɔ mwɛɛru mɑ, tèn gɑri u rɑɑ bu sɔ̃ɔwɑ u nɛɛ, 5 Yohɑnu u rɑɑ tɔmbu bɑtɛmu kuɑ kɑ nim, ɑdɑmɑ sɔ̃ɔ mɛɛ te sɔɔ, Hunde Dɛɛrowɑ bɑ koo kɑ bɛɛ bɑtɛmu ko.
Yesu u dɑ Gusunɔ wɔllɔ
6 Mɑ be bɑ mɛnnɛ mi, bɑ nùn bikiɑ bɑ nɛɛ, Yinni sɑɑ yeni sɔɔrɑ kɑɑ wunɛn bɑndu swĩi Isireliɔ?
7 U bu sɔ̃ɔwɑ u nɛɛ, n ǹ bɛɛn bɑɑ i n kɑ tɔ̃ru yɛ̃ ǹ kun mɛ sɑɑ ye Gusunɔ Bɑɑbɑ u yii kɑ win tiin yiiko. 8 Adɑmɑ i ko i dɑm mwɑ sɑnɑm mɛ Hunde Dɛɛro u duɑ bɛɛ sɔɔ. I ko n sɑ̃ɑ nɛn seedɑ diobu Yerusɑlɛmuɔ, kɑ Yudeɑ kpuro sɔɔ, kɑ mɑɑ Sɑmɑriɔ, kɑ sere sere tem nɔrɔ.
9 Ye Yesu u gɑri yi geruɑ u kpɑ, bɑ nùn mɛɛrɑ u suɑrɑ wɔllɔ, mɑ guru wirɑ nùn beruɑ ben wuswɑɑɔ.
10 Nge mɛ bɑ nùn mɛɛrɑ swee u doonɔ wɔllɔ, yerɑ suɑru sɔɔ tɔn durɔbu yiru gɑbu be bɑ yɑbe kpikinu sebuɑ, bɑ bu kure. 11 Bɑ nɛɛ, bɛɛ Gɑlilegibu mbɑn sɔ̃nɑ i yɔ̃ i wɔllu mɛɛrɑ. Yesu wi, wi u suɑrɑ wɔllɔ bɛɛn min di, u koo kpɑm wurɑmɑ nge mɛ i wɑ u dɔɔ wɔllɔ.
Yudɑsin kɔsire
12 Sɑnɑm mɛyɑ gɔro be, bɑ gɔsirɑmɑ Yerusɑlɛmuɔ sɑɑ guu ten wɔllun di te bɑ rɑ soku Olifi, te tɑ wɑ̃ɑ kilo tiɑn sɑkɑ wuu bɔkɔ gen min di. 13 Ye bɑ Yerusɑlɛmu duɑ, bɑ dɑ gidɑmbisɑ yen wɔllɔ, mi bɑ rɑɑ wɑ̃ɑ. Piɛɛ wɑ̃ɑ mi, kɑ Yohɑnu kɑ Yɑkɔbu kɑ Andere kɑ Filipu kɑ Tomɑɑ kɑ Bɑɑtelemi kɑ Mɑteu kɑ Yɑkɔbu Alufen bii kɑ Simɔɔ wi u win tem gɑri kĩ kɑ Yudu Yɑkɔbun bii. 14 Kɑ gɔ̃ru teuwɑ tɔn be kpuro bɑ rɑ n mɛnnɛ bɑ n kɑnɑru mɔ̀ kɑ tɛmɑnɑbu kɑ kurɔbu gɑbu kɑ Mɑɑri Yesun mɛro kɑ mɑɑ Yesun wɔnɔbu.
15 Sɔ̃ɔ mɛɛrun biru nɑɑnɛ dokeobɑ kpɑm mɛnnɑ. Ben geerɑ dɔɔ nge wunɑɑ teeru, mɑ Piɛɛ u seewɑ u yɔ̃rɑ ben suunu sɔɔ u nɛɛ, 16 nɛgibu, Gusunɔn gɑri yi ǹ koo ko yi kun koore, yi Hunde Dɛɛro u geruɑ sɑɑ Dɑfidin nɔɔ sɔɔn di Yudɑsin sɔ̃, wi u kuɑ durɔ ben swɑɑ gbio be bɑ Yesu mwɑ. 17 Yudɑsi wi, u rɑɑ sɑ̃ɑ bɛsɛn turo, u rɑɑ mɑɑ nɔmu mɔ bɛsɛn sɔmburu sɔɔ.
18 Gobi yi u wɑ win kom kɔ̃sum sɔ̃ mi, u kɑ yi tem dwɑ, mɑ u wɔrumɑ u kibɑri u kurɑ, mɑ win nuki kpuro yɑrɑ. 19 Tɔmbu kpuro be bɑ wɑ̃ɑ Yerusɑlɛmuɔ bɑ gɑri yi nuɑ. Yen sɔ̃, ben bɑrum sɔɔ bɑ tem mɛ sokɑ Akedɑmɑ. Yĩsi ten tubusiɑnɑ, tem yɛmgim.
20 Domi bɑ yoruɑ Dɑfidin womusun tirerɔ bɑ nɛɛ,
<<A de win wɑ̃ɑ yeru tu ko bɑnsu.
Goo u ku mɑɑ sinɑ mi.>>
Bɑ mɑɑ yoruɑ,
<<A de goo u ko win kɔsire sɔmburu sɔɔ.>>
21-22 Ǹ n mɛn nɑ, n weenɛ su Yudɑsin kɔsire gɔsi, u n sɑ̃ɑ Yinni Yesun seebu gɔrin din seedɑ dio kɑ bɛsɛ sɑnnu. N weenɛ yɛ̃ro wi, u n sɑ̃ɑ ben turo be bɑ sun swĩi sɑnɑm mɛ Yesu u kɑ sun wɑ̃ɑ, sɑɑ mìn di Yohɑnu u nùn bɑtɛmu kuɑ sere u kɑ wurɑ wɔllɔ.
23 Mɑ bɑ durɔbu yiru gɑbu gɔsɑ, ben turon yĩsirɑ Yosɛfu, wi bɑ mɔ̀ Bɑɑsɑbɑ, ǹ kun mɛ Yusitu, yirusen yĩsirɑ Mɑtiɑsi. 24-25 Mɑ bɑ kɑnɑru kuɑ bɑ nɛɛ, Yinni wunɛ wi ɑ tɔmbu kpuron gɔ̃rusu yɛ̃, ɑ sun sɔ̃ɔsio wi ɑ gɔsɑ wunɛn gɔro be yiru ye sɔɔ u kɑ sɔmbu te suɑ te Yudɑsi u deri u wigiru doonɑ.
26 Mɑ bɑ tɛtɛ tobɑ mɑ Mɑtiɑsi u tɛtɛ di mɑ bɑ nùn doke gɔrobu wɔkurɑ tiɑ yen wuuru sɔɔ.