2
Hunde Dɛɛron nɑɑru
1 Yen biru, sɑnɑm mɛ Pɑntikotin tɔ̃rɑ turɑ, nɑɑnɛ dokeobu kpuro bɑ mɛnnɛ sɑnnu yɑ̃ɑtem. 2 Suɑru sɔɔ bɑ kukiribu nuɑ bi bu nɑ sɑɑ wɔllun di nge woo dɑmguu, mɑ bu dii te kpuro yibɑ mi bɑ sɔ̃. 3 Bin biru bɑ gɑ̃ɑnu wɑ nge dɔ̃ɔ yɑri yi tɛriɑ, mɑ yi sinɑ bɑɑwuren wirɔ. 4 Be kpuro be bɑ wɑ̃ɑ mi, bɑ Hunde Dɛɛro yibɑ, mɑ bɑ kɑ bɑrum tukum gɑri mɔ̀, nge mɛ Hunde Dɛɛro bu nɔɔ kɑ̃.
5 Sɑnɑm mɛ, Yuu gɑbu be bɑ Gusunɔn bɛɛrɛ yɛ̃ bɑ wɑ̃ɑ Yerusɑlɛmuɔ. Bɑ nɑwɑ tem bɑɑmɛren di. 6 Ye bɑ kukiri bi nuɑ, tɔn dɑbirɑ mɛnnɑ. Mɑ bɑ biti soorɑ gem gem, yèn sɔ̃ ben bɑɑwure u win tiin bɑrum nuɑ sɑɑ nɑɑnɛ dokeobun nɔɔn di. 7 Biti bu mwɑ n bɑndɑ, mɑ bɑ nɛɛ, nɛɛ yɑɑ, tɔn be bɑ gɑri mɔ̀ mi, be kpuro bɑ ǹ sɑ̃ɑ Gɑlilegibu ro? 8 Amɔnɑ n kɑ kuɑ bɛsɛn bɑɑwure u kɑ nɔɔmɔ bɑ kɑ win bɑrum gɑri mɔ̀. 9 Sɑ nɑ sɑɑ Pɑɑtin di kɑ Mɛdi kɑ Elɑmu, sɑɑ Mɛsopotɑmi kɑ Yudeɑ kɑ Kɑpɑdosin di kɑ Pontu kɑ Asi, 10 sɑɑ Firigin di kɑ mɑɑ Pɑnfili, sɑɑ Egibitin di kɑ mɑɑ Libin berɑn di ye yɑ wɑ̃ɑ Sirɛnin bɔkuɔ, bɛsɛn gɑbɑ mɑɑ nɑ sɑɑ Romun di. Gɑbu Yuubɑ, gɑbu mɑɑ be bɑ gɔsirɑ Yuubɑ, 11 gɑbɑ nɑ sɑɑ Keretin di kɑ mɑɑ Dɑɑrububɑn tem. Kɑ mɛ, bɛsɛ kpuro sɑ nɔɔmɔ bɑ gerumɔ kɑ bɛsɛn tiin bɑrum gɑ̃ɑ bɑkɑ ni Gusunɔ u kuɑ.
12 Mɑ bɑ biti soorɑ n sɑrɑ, bɑ bikiɑnɑ bɑ nɛɛ, mbɑ yenin tubusiɑnu.
13 Adɑmɑ gɑbu bɑ bu yɑɑkoru mɔ̀ bɑ nɛɛ, tɑmɑ tɔn be, bɑ nɔrɑ.
Piɛɛn wɑɑsu
14 Yerɑ Piɛɛ u seewɑ kɑ gɔrobu wɔkurɑ tiɑ ye sɑnnu u gbɑ̃rɑ tɔn wɔru ge sɔɔ u nɛɛ, bɛɛ Yudeɑgibu kɑ bɛɛ kpuro, bɛɛ be i wɑ̃ɑ Yerusɑlɛmuɔ i mɑn swɑɑ dɑkio, kpɑ i n yɛ̃ mɑ 15 tɔn beni bɑ ǹ tɑm nɔrɑ nge mɛ i gerumɔ. Domi bururun kɔbɑ nɔɔbɑ nnɛwɑ sɑ wɑ̃ɑ mi. 16 Adɑmɑ ye i wɑɑmɔ buru teni, yerɑ ye Gusunɔn sɔmɔ Yoɛli u rɑɑ geruɑ. 17 U nɛɛ,
<<Gusunɔ u nɛɛ, yeniwɑ kon ko sɑnɑm dɑ̃ɑkim sɔɔ.
Kon nɛn Hunde doke tɔmbu kpuro sɔɔ.
Bɛɛn bii tɔn durɔbu kɑ tɔn kurɔbu, bɑ koo Gusunɔn gɑri gere.
Bɛɛn ɑluwɑɑsibɑ bɑ ko n kɑ̃sinu wɑɑmɔ,
kpɑ bɛɛn durɔ tɔkɔnu nu n dosusu mɔ̀.
18 Sɑnɑm mɛ sɔɔ, kon nɛn Hunde doke nɛn
sɔm kowobu sɔɔ tɔn durɔbu kɑ tɔn kurɔbɔ,
kpɑ bu Gusunɔn gɑri gere.
19 Kon gɑ̃ɑ mɑɑmɑɑkiginu sɔ̃ɔsi wɔllɔ,
kɑ mɑɑ yĩrenu temɔ,
nge yɛm kɑ dɔ̃ɔ kɑ dɔ̃ɔ wiisu.
20 Sɔ̃ɔ koo tĩrɑ kpɑ suru u swɛ̃rɑ nge yɛm,
sere Yinnin tɔ̃ɔ te, tu kɑ nɑ,
tɔ̃ɔ nɑnumgii te.
21 Adɑmɑ bɑɑwure wi u Yinnin yĩsiru sokɑ dɔmɑ te,
u koo fɑɑbɑ wɑ.>>
22 I gɑri yi swɑɑ dɑkio, bɛɛ Isirelibɑ. Yesu Nɑsɑrɛtigiin gɑriyɑ nɑ bɛɛ sɔ̃ɔmɔ, wi Gusunɔ u bɛɛ giɑsiɑ sɔm dɑmginu sɔɔ, kɑ sɔm mɑɑmɑɑkigiɑ ye u kuɑ bɛɛn suunu sɔɔ, sɑɑ win min di nge mɛ bɛɛn tii i yɛ̃. 23 Durɔ wi, wi bɑ bɛɛ nɔmu sɔndiɑ, nge mɛ Gusunɔ u bwisikɑ u himbɑ kuɑ, i derɑ tɔn kɔ̃sobɑ nùn dɑ̃ɑ bunɑnɑru kpɑre bɑ go. 24 Adɑmɑ Gusunɔ u nùn wɔrɑ gɔɔn wɑhɑlɑn nɔmun di ye u kɑ nùn seeyɑ gɔrin di. Gɔɔ kun kpĩɑ u nùn nɛnuɑ win dɑm sɔɔ. 25 Win gɑri wee yi Dɑfidi u yoruɑ. U nɛɛ,
<<Nɑ Yinni Gusunɔ wɑɑmɔ bɑɑdommɑ.
U wɑ̃ɑ nɛn nɔm geuɔ kpɑ n ku kɑ wururɑ.
26 Yen sɔ̃nɑ nɛn gɔ̃ru gɑ do.
Mɑ nɑ gɑri gerumɔ kɑ nuku dobu.
Mɛyɑ mɑɑ nɛn wɑsi koo wɛ̃rɑ bɔri yɛndu sɔɔ.
27 Domi ɑ ǹ nɛn hunde derimɔ gɔribun wɑ̃ɑ yerɔ.
Mɛyɑ mɑɑ ɑ ǹ derimɔ wunɛgii wi u nɑɑnɛ mɔn wɑsi yi kɔ̃si.
28 A mɑn wɑ̃ɑrun swɛɛ sɔ̃ɔsi.
Nɑ̀ n mɑɑ wɑ̃ɑ kɑ wunɛ,
ko nɑ n nuku dobu yibɑ.>>
29 Nɛgibu, i de n bɛɛ sɔ̃ nɔni kɑ nɔni mɑ Dɑfidi bɛsɛn bɑɑbɑ u gu, mɑ bɑ nùn sikuɑ. Win sikirɑ mɑɑ wɑ̃ɑ bɛsɛn suunu sɔɔ sere kɑ gisɔn gisɔ. 30 Adɑmɑ yèn sɔ̃ u sɑ̃ɑ Gusunɔn sɔmɔ mɑ u yɛ̃ mɑ Gusunɔ u nùn nɔɔ mwɛɛru kuɑ kɑ bɔ̃ri u nɛɛ, u koo rɑ win sikɑdobu gɑgu, Kirisi, sinɑsiɑ win sinɑ kitɑrɔ, 31 yen sɔ̃, Kirisi win seebu gɔrin diwɑ u kɑ yɑ̃ ye u nɛɛ, bɑ ǹ nùn derimɔ gɔribun wɑ̃ɑ yerɔ, win wɑsi kun mɑɑ kɔ̃simɔ. 32 Kirisi wiyɑ Gusunɔ u seeyɑ gɔrin di. Bɛsɛ kpurowɑ sɑ sɑ̃ɑ yen seedɑ diobu. 33 Bɑ nùn suɑ u dɑ Gusunɔn nɔm geuɔ, mɑ u Hunde Dɛɛro mwɑ Gusunɔ Bɑɑbɑn mi wìn nɔɔ mwɛɛru bɑ kuɑ. Mɑ u sun nùn wɛ̃. Yerɑ ye i wɑɑmɔ kɑ ye i nɔɔmɔ tɛ̃. 34 Domi Dɑfidin tii u ǹ de Gusunɔ wɔllɔ, ɑdɑmɑ u nɛɛ,
<<Yinni Gusunɔ u nɛn Yinni sɔ̃ɔwɑ u nɛɛ,
ɑ sinɔ nɛn nɔm geuɔ,
35 sere n kɑ nun wunɛn yibɛrɛbɑ tɑɑreɑ.>>
36 Yen sɔ̃nɑ n weenɛ Isirelibɑ bɑ n yɛ̃ kɑm kɑm mɑ Yesu wi, wi bɛɛ i kpɑre dɑ̃ɑ bunɑnɑru wɔllɔ, Gusunɔ u nùn kuɑ Yinni kɑ mɑɑ Kirisi.
37 Ye tɔn be, bɑ yeni nuɑ, ben gɔ̃rusu bu tɑɑrɛ wɛ̃, mɑ bɑ Piɛɛ kɑ gɔro be bɑ tie bikiɑ bɑ nɛɛ, bɛsɛgibu, mbɑ sɑ ko ko.
38 Piɛɛ u bu sɔ̃ɔwɑ u nɛɛ, bɛɛ kpuro, i bɛɛn gɔ̃ru gɔsio, i bɑtɛmu ko kɑ Yesu Kirisin yĩsiru, i kɑ bɛɛn torɑnun suuru wɑ. I ko mɑɑ Gusunɔn kɛ̃ru mwɑ te tɑ sɑ̃ɑ Hunde Dɛɛro wi. 39 Domi nɔɔ mwɛɛ te, tɑ sɑ̃ɑwɑ bɛɛ kɑ bɛɛn bibugiru kɑ be kpurogiru be bɑ wɑ̃ɑ n tomɑ, be Gusunɔ bɛsɛn Yinni u koo soku win mi.
40 Kɑ kpɑm gɑri dɑbinɑ Piɛɛ u bu seedɑ diiyɑ mɑ u bu dɑm kɑ̃ u nɛɛ, i tii wunɔ tɛ̃n tɔn kɔ̃sobun min di kpɑ i fɑɑbɑ wɑ.
41 Be bɑ win gɑri wurɑ bɑ bu bɑtɛmu kuɑ. Mɑ tɔmbu nɔrɔbun subɑ itɑn (3.000) sɑkɑ sosi nɑɑnɛ dokeobun wuurɔ dɔmɑ te. 42 Mɑ bɑ rɑ n gɔrobun keu swɑɑ dɑki, bɑ nɔɔ tiɑ sɑ̃ɑ, bɑ rɑ n mɛnnɛ, bɑ yɑɑ dibu dimɔ kɑ mɑɑ Yinnin dĩɑ domɑruginu, bɑ rɑ n mɑɑ kɑnɑru mɔ̀ sɑnnu.
Nɑɑnɛ dokeobun wɑ̃ɑsinɑɑ
43 Bɛrum bɑɑwure mɔ̀, domi gɔro be, bɑ mɑɑmɑɑki dɑbinu kɑ sɔm dɑmginu mɔ̀. 44 Nɑɑnɛ dokeobu kpuro bɑ wɑ̃ɑ sɑnnu yɑ̃ɑtem mɑ bɑ ben gɑ̃ɑ mɔru kuɑ tiɑ. 45 Bɑ ben tem kɑ ben dukiɑ dɔrikirɑmɔ, mɑ bɑ yen gobi bɔnu mɔ̀ nge mɛ n kɑ bɑɑwure weenɛ. 46 Tɔ̃ɔ bɑɑtere bɑ rɑ mɛnnɛ sɑ̃ɑ yerɔ. Bɑ rɑ n mɑɑ Yinnin dĩɑ domɑruginu kɑ mɑɑ yɑɑ dibu dimɔ sɑnnu yɛnu kɑ yɛnu kɑ nuku dobu, murɑfiti sɑriru sɔɔ. 47 Bɑ rɑ n Gusunɔ siɑrɑmɔ, mɑ tɔmbu kpuro bɑ kɑ bu nɔnu geu mɛɛrɑ. Tɔ̃ɔ bɑɑtere Yinni u rɑ n be bɑ fɑɑbɑ wɑ sosimɔwɑ nɑɑnɛ dokeobu sɔɔ.