3
Bɑ yɛmɔ bɛkiɑ
1 Sɔ̃ɔ teeru, Piɛɛ kɑ Yohɑnu bɑ dɔɔ sɑ̃ɑ yerɔ yokɑn kɔbɑ itɑ, kɑnɑrun sɑɑ. 2 N deemɑ bɑ mɑɑ kɑ durɔ goo dɔɔ mi, wi bɑ mɑrɑ kɑ yɛmɔru. Bɑ rɑ nùn yiwɑ sɑ̃ɑ yerun kɔnnɔwɔ ge bɑ mɔ̀ Burɔ, u n kɑ bɑrɑ mɔ̀ sɑnɑm mɛ tɔmbɑ duɔ. 3 Ye u Piɛɛ kɑ Yohɑnu wɑ bɑ duɔ sɑ̃ɑ yerɔ u bu bɑrɑ koosi. 4 Piɛɛ kɑ Yohɑnu bɑ nùn nɔni girɑri, mɑ Piɛɛ nɛɛ, ɑ sun mɛɛrio. 5 Mɑ u bu mɛɛrɑ tii yèn sɔ̃ u gɑ̃ɑnu yĩiyɔ ben mi. 6 Piɛɛ nùn sɔ̃ɔwɑ u nɛɛ, nɑ ǹ gobi mɔ, ɑdɑmɑ kon nun wɛ̃ ye nɑ mɔ. Kɑ Yesu Kirisi Nɑsɑrɛtigiin yĩsirɑ nɑ nun sɔ̃ɔmɔ, ɑ seewo ɑ sĩ.
7 Mɑ u durɔ win nɔm geu nɛnuɑ, u kɑ nùn seeyɑ. Mii mii durɔ win nɑɑsu kɑ win nɑɑ wĩinu dɑm kuɑ. 8 U yɔ̃ɔwɑ u surɑ mɑ u sɑnum wɔri u sɑ̃ɑ yeru duɑ kɑ be sɑnnu, u sĩimɔ u yɔ̃ɔkumɔ u Gusunɔ siɑrɑmɔ. 9 Tɔmbu kpuro bɑ nùn wɑ u sĩimɔ u Gusunɔ siɑrɑmɔ. 10 Ye bɑ tubɑ mɑ bɑrɑ kowo wi u rɑɑ sɔ̃ sɑ̃ɑ yerun kɔnnɔwɔ ge bɑ mɔ̀ Burɔ, wiyɑ mi, bɑ biti soorɑ n sɑrɑ ye n nùn koorɑn sɔ̃.
Piɛɛn wɑɑsu sɑ̃ɑ yerɔ
11 Tɔmbu kpuro bɑ duki dɑ kɑ biti sɑ̃ɑ yerun bee tiɑɔ ye bɑ rɑ soku Sɑlomɔɔn kɔbɛ, mi yɛmɔ wi, u wɑ̃ɑ u Piɛɛ kɑ Yohɑnu nɛni. 12 Ye Piɛɛ bu wɑ, u bu sɔ̃ɔwɑ u nɛɛ, bɛɛ Isirelibɑ, mbɑn sɔ̃nɑ i biti soore i sun mɛɛrɑ mɛ. I tɑmɑɑ sɑ̃ɑ bɛsɛn tiin dɑm, ǹ kun mɛ bɛsɛn dɑɑ geɑ yɑ derɑ durɔ wi, u sĩimɔ? 13 Aburɑhɑmu kɑ Isɑki kɑ Yɑkɔbu be bɑ sɑ̃ɑ bɛsɛn sikɑdobɑ, Gusunɔ ben Yinni u win sɔmɔ Yesu kuɑ yiikogii, wi i tem yɛ̃robu nɔmu sɔndiɑ, mɑ i nùn yinɑ Pilɑtin wuswɑɑɔ, bɑɑ mɛ Pilɑti u rɑɑ gɔ̃ru doke u nùn yɔ̃su. 14 Adɑmɑ bɛɛ i nùn yinɑ wi, wi u sɑ̃ɑ tɔn dɛɛro kɑ gemgii, mɑ i Pilɑti bikiɑ u bɛɛ tɔn gowo kɑrɑ. 15 I wɑ̃ɑrun yɛ̃ro go, ɑdɑmɑ Gusunɔ u nùn seeyɑ gɔrin di, mɑ bɛsɛ sɑ sɑ̃ɑ yen seedɑ diobu. 16 Yesu win yĩsiru kɑ nɑɑnɛ dokebu yĩsi te sɔɔ, yerɑ n durɔ wi bɛkiɑ wi i wɑ, i tubɑ mi. Geemɑ, nɑɑnɛ dokebu Kirisi sɔɔ biyɑ bu durɔ wi bwɑ̃ɑ dobu wɛ̃ bɛɛ kpuron wuswɑɑɔ.
17 Tɛ̃, nɛgibu nɑ yɛ̃ mɑ ye bɛɛ i kuɑ mi, i ye kuɑwɑ yɛ̃ru sɑriru sɔɔ, mɛyɑ mɑɑ bɛɛn wirugibu. 18 Nge mɛyɑ gɑri yi, yi koorɑ yi Gusunɔ u kpɑrɑ yellun di win sɔmɔbu kpuron nɔɔ sɔɔn di u nɛɛ, mɑ win wi u gɔsɑ u ǹ koo ko u kun nɔni sɔ̃ɔre. 19 Yen sɔ̃, i gɔ̃ru gɔsio i gɔsirɑ Gusunɔn mi, u kɑ bɛɛn torɑnu wunɑ, 20 kpɑ Yinni u sun wɛ̃rɑ geebu wɛ̃ sɑɑ win min di, kpɑ u kpɑm Yesu gɔrimɑ wi bɑ kuɑ bɛɛn Mɛsi. 21 Tilɑsiwɑ Yesu wi, u n wɑ̃ɑ wɔllɔ sere sɑɑ yu kɑ turi gɑ̃ɑnu kpuro nu kɑ wurɑmɑ nge yellu, nge mɛ Gusunɔ u geruɑ yellun di win sɔmɔ dɛɛrobun min di. 22 Domi Mɔwisi u nɛɛ, <<Yinni Gusunɔ u koo bɛɛ sɔmɔ goo seeyɑ bɛɛn bweserɔ nge wi. Ye u koo bɛɛ sɔ̃ kpuro i ye swɑɑ dɑkio. 23 Bɑɑwure wi u kun sɔmɔ win gɑri swɑɑ dɑki, bɑ koo nùn wunɑ Gusunɔn tɔmbun suunu sɔɔn di bu nùn kpeerɑsiɑ.>> 24 Mɛyɑ mɑɑ Sɑmuɛli kɑ Gusunɔn sɔmɔ be bɑ nɑ win biruɔ, be kpurowɑ bɑ sɑɑ yenin gɑri geruɑ. 25 Bɛɛyɑ Gusunɔn sɔmɔbun tubi diobu, i mɑɑ bɔnu mɔ nɔɔ mwɛɛ te sɔɔ, te Gusunɔ u bɛɛn sikɑdobɑ kuɑ, ye u Aburɑhɑmu sɔ̃ɔwɑ u nɛɛ, <<Hɑnduniɑn bwesenu kpuro nu koo domɑru wɑ sɑɑ wunɛn bweserun di.>> 26 Bɛɛyɑ Gusunɔ u gbiɑ u win sɔm kowo seeyɑ, mɑ u nùn gɔrɑ, u kɑ bɛɛn bɑɑwure gɔsiɑ win kom kɔ̃sum di, kpɑ u bɛɛ domɑru kuɑ.