4
Piɛɛ kɑ Yohɑnu wuun wirugibun wuswɑɑɔ
1 Nge mɛ Piɛɛ kɑ Yohɑnu bɑ kɑ tɔn be gɑri mɔ̀, yɑ̃ku kowobu bɑ tunumɑ kɑ sɑ̃ɑ yerun kɔ̃sobun tɔnwero kɑ mɑɑ Sɑdusibɑ. 2 Bɑ mɔru bɑrɑ yèn sɔ̃ gɔro be, bɑ tɔmbu keu sɔ̃ɔsimɔ bɑ Yesun seebu gɔrin di kpɑrɑmɔ bi bu sɔ̃ɔsimɔ mɑ tɔmbɑ koo se gɔrin di. 3 Yen sɔ̃nɑ bɑ bu mwɑ bɑ bɛrisi pirisɔm sɔɔ sere sisiru, domi yokɑ kuɑ kɔ. 4 Adɑmɑ tɔn dɑbinu be bɑ gɑri yi nuɑ bɑ nɑɑnɛ doke. Mɑ ben geerɑ sosi sere bɑ kuɑ tɔnu nɔrɔbun subɑ nɔɔbun (5.000) sɑkɑ.
5 Yen sisiru wuun wirugibu kɑ guro gurobu kɑ mɑɑ woodɑ yɛ̃robu bɑ mɛnnɑ Yerusɑlɛmuɔ. 6 Bɑ mɛnnɑ kɑ yɑ̃ku kowo tɔnwero wi bɑ rɑ nɛɛ Ani kɑ mɑɑ Kɑifɑ kɑ Yohɑnu kɑ Alesɑndu kɑ be kpuro be bɑ sɑ̃ɑ yɑ̃ku kowo tɔnwerobun bweseru. 7 Bɑ gɔro be yɔ̃rɑsiɑ ben wuswɑɑɔ mɑ bɑ bu bikiɑm wɔri bɑ nɛɛ, kɑ weren yiikowɑ nge kɑ yĩsi terɑ̀ i kɑ yeni kuɑ.
8 Sɑnɑm mɛyɑ Piɛɛ wi u Hunde Dɛɛro yibɑ u bu wisɑ u nɛɛ, bɛɛ wirugibu kɑ guro gurobu, 9 ì n sɔm geerun gɑri bikiɑmɔ te sɑ yɛmɔ kuɑ kɑ nge mɛ u kɑ bɛkurɑ, 10 n weenɛ bɛɛ kpuro kɑ mɑɑ Isirelibɑ kpuro i n yɛ̃ mɑ durɔ wi i wɑɑmɔ u yɔ̃ bɛɛn wuswɑɑɔ, u bɛkurɑwɑ mɑm mɑm kɑ Yesu Kirisi Nɑsɑrɛtigiin yĩsirun dɑm, wi i kpɑre dɑ̃ɑ bunɑnɑru wɔllɔ mɑ Gusunɔ nùn seeyɑ gɔrin di. 11 Yesu wiyɑ, kpee te bɛɛ bɑnɔbu i yinɑ, mɑ tɑ kuɑ gɑni gɔmburun dɑm. 12 Fɑɑbɑgii goo sɑri mɑ n kun mɔ wi. Domi Gusunɔ kun mɑɑ tɔmbu yĩsiru gɑru wɛ̃ hɑnduniɑ sɔɔ te bɑ koo soku bu kɑ fɑɑbɑ wɑ.
13 Sɑnɑm mɛ bɑ giɑ mɑ Piɛɛ kɑ Yohɑnu bɑ sɑ̃ɑwɑ bwɛ̃ɛbwɛ̃ɛbu, bɑ ǹ mɑɑ keu kue, ben wɔrugɔrɑ bu biti kuɑ, mɑ bɑ tubɑ mɑ bɑ rɑɑ wɑ̃ɑ kɑ Yesu sɑnnu. 14 Ye bɑ durɔ wi u bɛkurɑ wɑ u yɔ̃ kɑ Piɛɛ kɑ Yohɑnu sɑnnu, bɑ ǹ fɛɛ wɑ bu gɑri gɛɛ gere. 15 Yen sɔ̃nɑ bɑ bu sɔ̃ɔwɑ bɑ nɛɛ, bu yɑrio mɛnnɔ yee ten min di. Ye bɑ yɑrɑ, be bɑ wɑ̃ɑ mi, bɑ wesiɑnɑ 16 bɑ nɛɛ, mbɑ sɑ ko kɑ durɔ be ko. Domi Yerusɑlɛmugibu kpuro bɑ yɛ̃ mɑ bɑ sɔm dɑmgii bɑkɑru kuɑ, sɑ ǹ kpɛ̃ su ye siki. 17 Adɑmɑ su bu gerusi su nɛɛ, bu ku rɑɑ mɑɑ goo gɑ̃ɑnu sɔ̃ kɑ yĩsi te, kpɑ gɑri yi, yi ku mɑɑ kpɑrɑrɑ tɔmbun suunu sɔɔ.
18 Yerɑ bɑ kpɑm bu sokɑ mɑ bɑ bu yinɑri bu mɑɑ gɑri gere ǹ kun mɛ bu wɑɑsu ko kɑ Yesun yĩsiru. 19 Adɑmɑ Piɛɛ kɑ Yohɑnu bɑ bu sɔ̃ɔwɑ bɑ nɛɛ, bɛɛn tii i bwisikuo i wɑ ǹ n koo Gusunɔ wɛ̃re su bɛɛ mɛm nɔɔwɑ, kpɑ su nùn deri. 20 Domi bɛsɛ sɑ ǹ kpɛ̃ sɑ kun geruɑ ye sɑ wɑ kɑ ye sɑ nuɑ.
21 Bɑ kpɑm bu gerusi gem gem, mɑ bɑ bu yɔ̃su. Bɑ ǹ swɑɑ wɑ ye bɑ koo kɑ bu sɛɛyɑsiɑ yèn sɔ̃ tɔmbu kpurowɑ bɑ Gusunɔ siɑrɑmɔ ye yɑ koorɑn sɔ̃. 22 Domi durɔ wi bɑ bɛkiɑ kɑ mɑɑmɑɑki mi, u wɔ̃ɔ weeru kere.
Nɑɑnɛ dokeobɑ wɔrugɔru kɑnɑmɔ
23 Ye bɑ Piɛɛ kɑ Yohɑnu yɔ̃su bɑ kpɑ, bɑ wurɑ ben berusebun mi, mɑ bɑ bu kpuro sɑɑriɑ ye yɑ̃ku kowo tɔnwerobu kɑ guro gurobɑ bu sɔ̃ɔwɑ. 24 Sɑnɑm mɛ bɑ gɑri yi nuɑ, be kpuro bɑ kɑ nɔɔ tiɑ Gusunɔ kɑnɑ, bɑ nɛɛ, Yinni, wunɑ ɑ wɔllu kɑ tem kɑ nim wɔ̃ku tɑkɑ kuɑ kɑ ye yɑ wɑ̃ɑ mi sɔɔ kpuro. 25 Wunɑ ɑ mɑɑ geruɑ kɑ Hunde Dɛɛron bɑɑ sɑɑ bɛsɛn sikɑdo Dɑfidi wunɛn sɔm kowon nɔɔn di ɑ nɛɛ,
<<Mbɑn sɔ̃nɑ tɔn tukobu bɑ mɔru bɑrɑ.
Mbɑn sɔ̃nɑ tɔmbɑ bwisikumɔ ye yɑ ǹ koorɔ.
26 Hɑnduniɑn sinɑmbɑ seewɑ.
Mɑ wirugibɑ mɛnnɑ bu kɑ Yinni Gusunɔ kɑ win Kirisi tɑbu ko.>>
27 Geemɑ, wuu geni sɔɔrɑ Herodu kɑ Pɔnsu Pilɑti kɑ tɔn tukobu kɑ mɑɑ Isirelibɑ, be kpuro bɑ mɛnnɑ bɑ kɑ Yesu wunɛn sɔmɔ dɛɛro wi ɑ kuɑ Kirisi tɑbu kuɑ. 28 Mɛyɑ bɑ yɑbu bɑɑyere kuɑ ye ɑ rɑɑ yi wunɛn dɑm kɑ wunɛn himbɑ sɔɔ. 29 Yen sɔ̃ tɛ̃, Yinni ɑ ben gerusibu lɑɑkɑri koowo, kpɑ ɑ de bɛsɛ wunɛn sɔm kowobu su wunɛn gɑri yi kpɑrɑ kɑ wɔrugɔru. 30 A wunɛn nɔmu dɛmiɔ gu tɔmbu bɛkiɑ, ɑ de yĩrenu kɑ sɔm mɑɑmɑɑkiginu nu koorɑ kɑ wunɛn sɔmɔ dɛɛro Yesu win yĩsiru.
31 Ye bɑ kɑnɑru kuɑ bɑ kpɑ yɑm mi bɑ mɛnnɛ mi, mu yĩirɑ diki diki. Be kpuro bɑ Hunde Dɛɛro yibɑ, mɑ bɑ Gusunɔn gɑri wɑɑsu wɔri kɑ wɔrugɔru.
Nɑɑnɛ dokeobun mɔɔ teeru
32 Nɑɑnɛ dokeo be kpuro bɑ wɑ̃ɑ nɔɔ tiɑ sɔɔ mɑm mɑm. Goo sɑri wi u geruɑ gɑ̃ɑ ni u mɔ wiginɑ, bɑ ye kpuro mɛnnɑwɑ bɑ mɔ sɑnnu. 33 Kɑ yiiko bɑkɑ gɔro be, bɑ kɑ Yinni Yesun seebu gɔrin din seedɑ dimɔ, mɑ Gusunɔn durom bɑkɑm wɑ̃ɑ be kpuro sɔɔ. 34 Goo sɑri be sɔɔ wi u sɑ̃ɑru mɔ. Domi be bɑ gbenu mɔ ǹ kun mɛ yɛnusu, bɑ ye kpuro dɔrikirɑwɑ mɑ bɑ kɑ yen gobi nɑ 35 bɑ gɔrobu wɛ̃, mɑ bɑ gobi yi bɔnu kuɑ nge mɛ bɑɑwuren bukɑtɑ nɛ.