5
Anɑniɑ kɑ Sɑfirɑ
1 Adɑmɑ durɔ goo mɑɑ wɑ̃ɑ wi bɑ rɑ nɛɛ Anɑniɑ, kɑ win kurɔ Sɑfirɑ. Durɔ wi, u win tem gɑm dɔrɑ, 2 mɑ u mɛn gobin sukum tii yiiyɑ, kɑ win kurɔn yɛ̃ru, mɑ u sukum mɛ n tie gɔrobu wɛ̃. 3 Yerɑ Piɛɛ u nɛɛ, Anɑniɑ, mbɑn sɔ̃nɑ ɑ derɑ Setɑm duɑ wunɛn gɔ̃ruɔ mɑ ɑ Hunde Dɛɛro weesu kuɑ, mɑ ɑ tem mɛn gobin sukum tii yiiyɑ. 4 A sere tem mɛ dɔrɑ, n ǹ wunɑ ɑ mu mɔ ro? Ye ɑ mu dɔrɑ ɑ kpɑ, mɛn gobi kun sɑ̃ɑ wunɛgii? Ǹ n mɛn nɑ, mbɑn sɔ̃nɑ ɑ gɔ̃ru doke ɑ kɑ yenin bweseru ko. N ǹ tɔmbu ɑ weesu kuɑ, Gusunɔwɑ ɑ kuɑ.
5 Ye Anɑniɑ u gɑri yi nuɑ, mii mii u wɔrumɑ u gu. Mɑ bɛrum bɑkɑm tɔn be kpuro mwɑ be bɑ gɑri yi nuɑ. 6 Aluwɑɑsibɑ bɑ seewɑ bɑ win goru bɔkuɑ bɑ kɑ yɑrɑ bɑ sikuɑ.
7 Yen biru n kuɑ nge kɔbɑ itɑ, mɑ win kurɔ Sɑfirɑ u duumɑ. N deemɑ u ǹ yɛ̃ ye n win durɔ kuɑ. 8 Piɛɛ nùn bikiɑ u nɛɛ, ɑ mɑn sɔ̃ɔwɔ, ɑmɛ kɑsɑwɑ i tem mɛ dɔrɑ?
Mɑ u wisɑ u nɛɛ, oo, mɛyɑ mi.
9 Piɛɛ nùn sɔ̃ɔwɑ u nɛɛ, mbɑn sɔ̃nɑ bɛɛ yiru kpuro i gɔ̃ru doke i kɑ Gusunɔn Hunden lɑɑkɑri mɛɛri mɛsum. Wee be bɑ wunɛn durɔ sikuɑ bɑ wɑ̃ɑ dii kɔnnɔwɔ, bɑ koo mɑɑ kɑ nun yɑri.
10 Mii mii u wɔrumɑ Piɛɛn wuswɑɑɔ u gu. Mɑ ɑluwɑɑsi be, bɑ duɑ bɑ deemɑ u gu, bɑ mɑɑ win tii suɑ bɑ kɑ yɑrɑ bɑ dɑ bɑ sikuɑ win durɔn sikirun bɔkuɔ. 11 Bɛrum bɑkɑm Yesun yigbɛru kpuro mwɑ, kɑ mɑɑ bɑɑwure wi u gɑri yi nuɑ.
Sɔm mɑɑmɑɑkigii dɑbinu
12 Gɔro be, bɑ mɑɑmɑɑki kɑ sɔm dɑmgii dɑbinu mɔ̀ tɔmbun suunu sɔɔ. Mɑ nɑɑnɛ dokeobu kpuro bɑ mɛnnɛ sɑnnu Sɑlomɔɔn kɔbɛɔ. 13 Tɔn tuko goo kun kɑ̃kɑ u kɑ bu mɛnnɛ, ɑdɑmɑ tɔmbɑ bu bɛɛrɛ wɛ̃ gem gem. 14 Mɑ nɑɑnɛ dokeo ben geerɑ sosimɔ tɑ dɔɔ, durɔbu kɑ kurɔbu dɑbinu, be bɑ Yinni nɑɑnɛ doke. 15 Mɑ bɑ bɑrɔbu yɑrɑ swɛɛɔ bɑ bu kpĩ kpin yenu kɑ kɑ̃ɑsu wɔllɔ, n wɑ Piɛɛ ù n sɑrɔ, win tiro gu kɑ ben gɑbu wukiri. 16 Tɔn dɑbinu mɑɑ nɑɑmɔ sɑɑ Yerusɑlɛmun bɑru kpɑɑnun di kɑ ben bɑrɔbu, kɑ be bɑ wɛrɛkunu mɔ. Mɑ be kpuro bɑ bɛkurɑmɔ.
Gɔrobun nɔni swɑ̃ɑru
17 Adɑmɑ yɑ̃ku kowo tɔnwero, kɑ win tɔmbu be bɑ sɑ̃ɑ Sɑdusibɑ bɑ kɑ gɔrobu nisinu seewɑ. 18 Bɑ gɔro be mwɑ, mɑ bɑ bu pirisɔm doke. 19 Adɑmɑ yen wɔ̃kuru Yinnin gɔrɑdo u nɑ u pirisɔm gɑmbobɑ kɛniɑ, u bu yɑrɑ. U bu sɔ̃ɔwɑ 20 bu doo bu yɔ̃rɑ sɑ̃ɑ yerɔ kpɑ bu tɔmbu wɑ̃ɑ ten gɑri kpuro nɔɔsiɑ.
21 Ye gɔro be, bɑ yeni nuɑ bɑ kpɑ, bɑ duɑ sɑ̃ɑ yerɔ yɑm sɑ̃reru, bɑ wɑɑsu wɔri yɑnde.
Ye yɑ̃ku kowo tɔnwero kɑ win tɔmbu bɑ mɛnnɑ bɑ wuun wirugibu kɑ Isirelibɑn guro gurobu kpuro sokɑ, mɑ bɑ gɔrɑ pirisɔm mi, bɑ nɛɛ, bu kɑ gɔro be nɑ. 22 Adɑmɑ ye sɑ̃ɑ yerun kɔ̃sobɑ turɑ mi, bɑ ǹ gɔro be wɑ pirisɔm sɔɔ. Mɑ bɑ wurɑ mɛnnɔ yerɔ 23 bɑ nɛɛ, ye sɑ turɑ mi, sɑ deemɑ pirisɔm dirɑ bɛri mɑm mɑm, sɑ mɑɑ kɔ̃sobu deemɑ bɑ yɔ̃ kɔnnɔwɔ. Adɑmɑ ye sɑ gɑmbobɑ bɛsiɑ, sɑ ǹ goo wɑ dii te sɔɔ.
24 Ye sɑ̃ɑ yerun kɔ̃sobun tɔnwero kɑ mɑɑ yɑ̃ku kowo tɔnwerobu bɑ gɑri yi nuɑ, bɑ biti soorɑ, bɑ ǹ gɑri yin wii goberu yɛ̃. 25 Yerɑ durɔ goo u nɑ u nɛɛ, ɑse tɔn be i pirisɔm doke mi, bɑ wɑ̃ɑ sɑ̃ɑ yerɔ bɑ tɔmbu keu sɔ̃ɔsimɔ!
26 Mɑ kɔ̃sobun tɔnwero wi, kɑ win tɔmbu gɑbu bɑ dɑ bɑ kɑ bu nɑ mɛnnɔ yerɔ. Adɑmɑ n ǹ kɑ dɑm, yèn sɔ̃ bɑ tɔmbun bɛrum mɔ bu ku rɑɑ bu kpenu kɑsuku. 27 Ye bɑ kɑ bu nɑ, bɑ bu yɔ̃rɑsiɑ Yuubɑn guro gurobun wuswɑɑɔ. Yɑ̃ku kowo tɔnwero wi, u bu gɑri bikiɑ 28 u nɛɛ, sɑ bɛɛ yinɑri mɑm mɑm sɑ nɛɛ, i ku mɑɑ wɑɑsu ko kɑ durɔ win yĩsiru. Adɑmɑ wee, i bɛɛn sɔ̃ɔsiru kpɑrɑ i keu sɔ̃ɔsi Yerusɑlɛmu kpuro sɔɔ, mɑ i kĩ i sun durɔ win gɔɔn tɑɑrɛ wɛ̃.
29 Yerɑ Piɛɛ kɑ gɔro be bɑ tie bɑ nɛɛ, tilɑsiwɑ su kɑ Gusunɔ mɛm nɔɔwɑ, n ǹ mɔ tɔmbu. 30 Gusunɔ bɛsɛn sikɑdobɑn Yinniwɑ u Yesu seeyɑ gɔrin di, wi i rɑɑ dɑ̃ɑ bunɑnɑru kpɑre i go. 31 Wiyɑ Gusunɔ u suɑ wɔllɔ u sinɑsiɑ win nɔm geuɔ, u n sɑ̃ɑ sunɔ kɑ Fɑɑbɑ kowo u kɑ de Isirelibɑ bu gɔ̃ru gɔsiɑ, kpɑ bu ben torɑnun suuru wɑ. 32 Bɛsɛrɑ sɑ sɑ̃ɑ yen seedɑ diobu, bɛsɛ kɑ Hunde Dɛɛro wi Gusunɔ u tɔmbu kɑ̃ be bɑ nùn mɛm nɔɔwɑ.
33 Ye bɑ gɑri yi nuɑ, bɑ mɔru bɑrɑ too too sere bɑ kĩ bu gɔro be go. 34 Adɑmɑ Fɑlisi turo be sɔɔ wi bɑ rɑ nɛɛ Gɑmɑliɛli, wi u sɑ̃ɑ woodɑn keu koosio, u bɛɛrɛ mɔ gem gem tɔmbu kpuro sɔɔ, u seewɑ u yɔ̃rɑ mɛnnɔn wuswɑɑɔ, u nɛɛ, bu ginɑ gɔro be yɑro. 35 Mɑ u bu sɔ̃ɔwɑ u nɛɛ, bɛɛ Isirelibɑ, i lɑɑkɑri koowo ye i kĩ i durɔ beni kuɑ. 36 Gɑsɔ, durɔ goo u kurɑmɑ wi bɑ sokumɔ Tedɑsi wi u tii bɛɛrɛ wɛ̃ gem gem, mɑ tɔmbu nge nɛɛru (400) bɑ nùn swĩi. Adɑmɑ bɑ nùn go, win bwɑ̃ɑbɑ yɑrinɑ bɑɑmɑ kpuro, mɑ bɑ win gɑri duɑri. 37 Win biru gɑri gɑrin sɑnɑm, durɔ goo wi bɑ mɔ̀ Yudɑsi Gɑlilegii, u kurɑmɑ. U mɑɑ tɔn dɑbinu wɑ be bɑ nùn swĩi. Adɑmɑ bɑ mɑɑ durɔ wi go mɑ win tɔmbɑ yɑrinɑ. 38 Yen sɔ̃, nɑ bɛɛ bwisi kɛ̃mɔ gɑri yini sɔɔ, i durɔ beni derio i de bu doonɑ. Ǹ n tɔnun sɔ̃ɔsirun nɑ, ǹ kun mɛ tɔnun sɔmburu, n koo nɔru ko. 39 Adɑmɑ ǹ n Gusunɔn sɔmburun nɑ, i ǹ kpɛ̃ i bu kɑmiɑ. I ku tii kɑri bɔrie i kɑ Gusunɔ sɑnnɑ.
Mɑ bɑ win gɑri wurɑ. 40 Bɑ gɔro be sokɑ bɑ sɛni so, mɑ bɑ bu yinɑri bu mɑɑ kɑ Yesun yĩsiru gɑri ko pɑi. Mɑ bɑ bu yɔ̃su. 41 Mɑ gɔro be, bɑ doonɑ mɛnnɔ yeru min di kɑ nuku doo bɑkɑbu yèn sɔ̃ Gusunɔ u bu gɑrisi be bɑ turɑ bu yɑɑ kɑsiki Yesun yĩsirun sɔ̃. 42 Tɔ̃ru bɑɑtere, sɑ̃ɑ yerɔ kɑ yɛnusɔ, bɑ rɑ n Lɑbɑɑri geɑ wɑɑsu mɔ̀ kpɑ bɑ n keu sɔ̃ɔsimɔ mɑ Yesuwɑ Kirisi wi.