6
Bɑ sɔm kowobu nɔɔbɑ yiru gɔsɑ
1 Sɔ̃ɔ mɛɛ te sɔɔ, nge mɛ nɑɑnɛ dokeobɑ sosimɔ, Yuu be bɑ Gɛrɛkim tɔnɑ gerumɔ bɑ kɑ be bɑ tie wɔki yèn sɔ̃ bɑ ben gɔminibu duɑrimɔ tɔ̃ɔ bɑɑteren dĩɑnun bɔnu sɔɔ. 2 Mɑ gɔrobu wɔkurɑ yiru ye, bɑ nɑɑnɛ dokeobu kpuro mɛnnɑ bɑ nɛɛ, n ǹ weenɛ su Gusunɔn gɑrin wɑɑsu deri kpɑ sɑ n dĩɑnun gɑri mɔ̀. 3 Yen sɔ̃, bɛsɛgibu i tɔn durɔbu nɔɔbɑ yiru gɔsio bɛɛn suunu sɔɔ be bɑ seedɑ geɑ diiyɑmmɛ, be bɑ Hunde Dɛɛro yibɑ kpɑ bɑ n bwisi mɔ, kpɑ su bu sɔmbu te nɔmu sɔndiɑ. 4 Kpɑ bɛsɛn tii sɑ n kɑnɑru kɑ Gusunɔn gɑrin wɑɑsu mɔ̀ sɑ n dɔɔ.
5 Tɔn be kpuro bɑ gɑri yi wurɑ kɑ nuku dobu. Mɑ bɑ Etiɛni gɔsɑ wi u Hunde Dɛɛro yibɑ, win nɑɑnɛ dokebu bu mɑɑ kpɑ̃, kɑ mɑɑ Filipu kɑ Pokori kɑ Nikɑnɔri kɑ Timɔɔ kɑ Pɑɑmɛnɑsi kɑ sere Nikolɑ Antiɔsigii wi u gɔsirɑ Yuu. 6 Bɑ kɑ bu dɑ gɔrobun mi, mɑ gɔrobɑ bu kɑnɑru kuɑ bɑ bu nɔmɑ sɔndi wirɔ.
7 Nge mɛyɑ Gusunɔn gɑri yi kɑ kpɑrɑrɑmɔ bɑɑmɑ. Mɑ nɑɑnɛ dokeobun geerɑ sosimɔ tɑ dɔɔ Yerusɑlɛmuɔ, mɑ yɑ̃ku kowo dɑbirɑ mɑɑ nɑɑnɛ doke.
Bɑ Etiɛni mwɑ
8 Etiɛni wi, Gusunɔ u nùn durom bɑkɑm kuɑ u nùn dɑm kɑ̃, mɑ u sɔm mɑɑmɑɑkiginu kɑ yĩrenu kuɑ tɔmbun suunu sɔɔ. 9 Adɑmɑ durɔbu gɑbu sɑɑ Yuubɑn mɛnnɔ yerun di te bɑ rɑ soku tii mɔwɔbugiru, kɑ Sirɛnin Yuu gɑbu kɑ Alesɑndirigibu kɑ gɑbu sɑɑ Silisi kɑ Asin di bɑ seewɑ bɑ kɑ Etiɛni sikirinɑmɔ. 10 Adɑmɑ bɑ kpɑnɑ bu nùn kɑmiɑ yèn sɔ̃ u gɑri gerumɔ kɑ Hunde Dɛɛron dɑm kɑ bwisi. 11 Yerɑ bɑ durɔbu gɑbu gobi kɑ̃ ɑsiri sɔɔ bu kɑ gere mɑ bɑ nuɑ u Mɔwisi kɑ Gusunɔ gɑri kɑm gerusi. 12 Mɛyɑ bɑ kɑ tɔmbun mɔru seesiɑ, kɑ guro gurobu kɑ woodɑ yɛ̃robu. Bɑ dɑ Etiɛnin mi bɑ nùn mwɑ mɑ bɑ kɑ nùn dɑ Yuubɑn guro gurobun mɛnnɔn wuswɑɑɔ. 13 Yen biru bɑ kɑ durɔbu gɑbu nɑ be bɑ nùn seedɑ weesugiɑ diisi bɑ nɛɛ, durɔ wini u rɑ n bɛsɛn sɑ̃ɑ yee dɛɛrɑru kɑ Mɔwisin woodɑ sɑnkumɔwɑ. 14 Domi sɑ nuɑ u geruɑ mɑ Yesu Nɑsɑrɛtigii wi, u koo sɑ̃ɑ yee teni surɑ, kpɑ u bɛsɛn deemɑ kpuro kɔsi ye Mɔwisi u sun wɛ̃.
15 Be kpuro be bɑ sɔ̃ mɛnnɔ ge sɔɔ, bɑ Etiɛni nɔni girɑri, mɑ bɑ wɑ win wuswɑɑ bɑllimɔ nge Gusunɔn gɔrɑdogiɑ.