7
Etiɛnin wɑɑsu
1 Yerɑ yɑ̃ku kowo tɔnwero u Etiɛni bikiɑ u nɛɛ, gɑri yi, geemɑ?
2 Etiɛni u wisɑ u nɛɛ, nɛn bisibu kɑ nɛn bɑɑbɑbɑ i mɑn swɑɑ dɑkio. Gusunɔ yiikogii u bɛsɛn bɑɑbɑ Aburɑhɑmu kure sɑnɑm mɛ u wɑ̃ɑ Mɛsopotɑmin tem sɔɔ u sere sinɑ Hɑrɑniɔ, 3 u nùn sɔ̃ɔwɑ u nɛɛ, u win dusibu kɑ win tem derio kpɑ u dɑ tem gɑm mɛ u koo nùn sɔ̃ɔsi. 4 Yen sɔ̃nɑ Aburɑhɑmu u Kɑlɑdegibun tem yɑrɑ, mɑ u dɑ u sinɑ Hɑrɑniɔ. Ye win bɑɑ u gu u kpɑ, Gusunɔ u nùn seeyɑmɑ min di, u nɑ tem mɛ sɔɔ, mi bɛɛ i wɑ̃ɑ tɛ̃. 5 Sɑnɑm mɛ, u ǹ nùn ɑyeru gɑru kɑ̃ tem mɛ sɔɔ, bɑɑ nɑɑ dɑbusɑ teeru, ɑdɑmɑ bɑɑ mɛ Aburɑhɑmu kun ginɑ bii mɑrɑ Gusunɔ u nùn nɔɔ mwɛɛru kuɑ mɑ u koo nùn tem mɛ wɛ̃, kpɑ mu n sɑ̃ɑ wi kɑ mɑɑ win bibugim. 6 Ye wee ye Gusunɔ u Aburɑhɑmu sɔ̃ɔwɑ. U nɛɛ, win bibɑ koo sɔru di tem tukumɔ mi bɑ ko n sɑ̃ɑ yobu, kpɑ bu nɔni swɑ̃ɑru wɑ sere wɔ̃ɔ nɛɛru (400). 7 Gusunɔ u mɑɑ nɛɛ, win tii koo kɑ bwese te siri te tɑ koo bu ko yobu. Yen biru bɑ koo yɑri tem min di bu nɑ tem mɛ sɔɔ mi bɑ koo nùn sɑ̃. 8 Sɑɑ ye sɔɔ, Gusunɔ mɑɑ Aburɑhɑmu bɑngo kobun woodɑ wɛ̃. Mɑ Aburɑhɑmu u win bii Isɑki bɑngo kuɑ ye bɑ wi mɑrɑ u kuɑ sɔ̃ɔ nɔɔbɑ itɑ. Nge mɛyɑ Isɑki u mɑɑ Yɑkɔbu kuɑ, mɑ Yɑkɔbu u mɑɑ win bibu wɔkurɑ yiru kuɑ nge mɛ. Berɑ bɑ kuɑ Yuubɑn bwesenu wɔkurɑ yirun bɑɑbɑbɑ.
9 Yɑkɔbun bii be, bɑ kɑ Yosɛfu nisinu kuɑ, mɑ bɑ nùn Egibitigibu dɔre bɑ kɑ doonɑ. Adɑmɑ Gusunɔ u wɑ̃ɑ kɑ wi, 10 mɑ u nùn yɑkiɑ sɑɑ win wɑhɑlɑ kpuron di. U mɑɑ nùn bwisi kɑ̃ mɑ u durom wɑ, Egibitin sinɑ bokon mi, mɑ u nùn kuɑ Egibitin tem yɛ̃ro kɑ mɑɑ win yɛnu yɛ̃ro. 11 Gɔ̃ɔrɑ tunumɑ Egibiti kɑ Kɑnɑnin tem sɔɔ tɑ bu nɔni sɔ̃ɔwɑ too too. Bɛsɛn sikɑdobɑ bɑ ǹ gɑ̃ɑnu wɑ bu di. 12 Ye Yɑkɔbu u nuɑ mɑ dĩɑnu wɑ̃ɑ Egibitiɔ, u bɛsɛn sikɑdo be gɔrɑ mi, nɔn gbiikiru. 13 Ye bɑ dɑ mi nɔn mɛɛruse, Yosɛfu u tii win mɑɑbu tubusiɑ, mɑ Egibitin sunɔ u mɑɑ Yosɛfun dusibu giɑ. 14 Mɑ Yosɛfu u Yɑkɔbu win tundo sokusiɑ kɑ win dusibu kpuro bu nɑ win mi. Ben geerɑ sɑ̃ɑ tɔmbu wɑtɑ kɑ wɔkurɑ nɔɔbu. 15 Nge mɛyɑ Yɑkɔbu u kɑ dɑ Egibitiɔ. Miyɑ u gu, miyɑ mɑɑ bɛsɛn sikɑdo be, bɑ gu. 16 Mɑ bɑ kɑ be kpuron gonu wurɑ Sikɛmuɔ bɑ nu kpɛ̃ɛ siki kpee wɔrugiru sɔɔ te Aburɑhɑmu dwɑ Hɑmɔrin bibun mi Sikɛmuɔ.
17 Ye sɑɑ yɑ turuku kuɑ ye Gusunɔ u koo kɑ win nɔɔ mwɛɛru yibiɑ te u Aburɑhɑmu kuɑ, bɛsɛn tɔmbɑ sosimɔ bɑ dɑbiɑmɔ Egibitiɔ 18 sere n kɑ kuɑ sinɑ boko goon wɑɑti wi u kun Yosɛfun gɑri yɛ̃. 19 Sinɑ boko wi, u bɛsɛn tɔmbu nɔni wɔ̃kuɑ u kɑ bu kɔ̃sɑ kuɑ, u bu tilɑsi kuɑ bu kɑ ben bii wɛ̃ɛnu kɔ̃ kpɑ nu gbi. 20 Sɑɑ ye sɔɔrɑ bɑ Mɔwisi mɑrɑ. Bii burɔwɑ wi u Gusunɔ wɛ̃remɔ. Bɑ nùn nɔɔri suru itɑ win tundon yɛnuɔ. 21 Ye bɑ kɑ nùn dɑ bɑ kɔ̃, Egibitin sunɔn bii tɔn kurɔ u nùn suɑ u kuɑ nge win tiin bii. 22 Bɑ nùn Egibitigibun keu kpuro sɔ̃ɔsi mɑ u kuɑ tɔn boko gɑri gerubu kɑ kookoosu sɔɔ.
23 Sɑnɑm mɛ u wɔ̃ɔ weeru turɑ, u gɔ̃ru doke u win tɔmbu Isirelibɑ berɑm dɑ. 24 U wɑ Egibitigii goo u ben turo nɔni sɔ̃ɔmɔ. U wigii fɑɑbɑ dɑ, mɑ u Egibitigii wi so u go. 25 U tɑmɑɑ sɑ̃ɑ win tɔmbɑ koo tubuwɑ mɑ Gusunɔwɑ nùn gɔrɑ u kɑ bu yɑkiɑ, ɑdɑmɑ bɑ ǹ tubɑ. 26 Yen sisiru u deemɑ ben gɑbɑ sɑnnɑmɔ. Mɑ u kĩ u bu yɑkiɑnɑ u nɛɛ, i nɛn gɑri swɑɑ dɑkio. Bɛɛ, be i sɑ̃ɑ dusinu, mbɑn sɔ̃nɑ i mɛɛrɑ koonɑmɔ. 27 Adɑmɑ durɔ wi u win beruse nɔni sɔ̃ɔmɔ mi, u Mɔwisi bɔriɑ u nɛɛ, wɑrɑ nun kuɑ bɛsɛn wirugii kɑ siri kowo. 28 A kĩ ɑ mɑɑ mɑn gowɑ nge mɛ ɑ Egibitigii wi go gĩɑ? 29 Ye Mɔwisi u gɑri yi nuɑ, u kpikiru suɑ Mɑdiɑnin tem giɑ. Miyɑ u bii tɔn durɔbu yiru mɑrɑ.
30 Wɔ̃ɔ weerun biru, Gusunɔn gɔrɑdo u Mɔwisi kuremɑ ɑwĩi gɛɛ sɔɔ, yi yi sɑ̃ɑre yi dɔ̃ɔ mwɑɑrɑmɔ, gbɑburu sɔɔ mi guuru gɑrɑ wɑ̃ɑ te bɑ rɑ soku Sinɑi. 31 Mɔwisi u biti soorɑ ye u yi wɑ, mɑ u yi susi u mɛɛrɑ tii. Sɑnɑm mɛyɑ u Yinni Gusunɔn nɔɔ nuɑ gɑ geruɑ gɑ nɛɛ, 32 wiyɑ Gusunɔ win sikɑdobɑn Yinni, wiyɑ Aburɑhɑmu kɑ Isɑki kɑ Yɑkɔbun Yinni. Ye Mɔwisi u nuɑ mɛ, yerɑ u diirɑ, u ǹ mɑɑ kɑ̃kɑ u yɑm mi mɛɛrɑ. 33 Yinni Gusunɔ nùn sɔ̃ɔwɑ u nɛɛ, u win sɑlubɑtɑ pweto, domi yɑm mi u yɔ̃ mi, yɑm dɛɛrɑmɑ. 34 N wee, u win tɔmbun nɔni swɑ̃ɑru wɑ te bɑ wɑɑmɔ Egibitiɔ. U ben weeweenu nuɑ, yerɑ u sɑrɑmɑ u kɑ bu fɑɑbɑ ko. Tɛ̃, u nɑ u nùn gɔri Egibitiɔ.
35 Mɔwisi wi bɑ yinɑ mi, bɑ nɛɛ, wɑrɑ nùn kuɑ ben wirugii kɑ siri kowo, wiyɑ Gusunɔ u gɔrɑ u kuɑ ben wirugii kɑ fɑɑbɑ kowo, kɑ Gusunɔn gɔrɑdo win somiru wi u nùn kure ɑwĩi sɔɔ. 36 Durɔ wiyɑ u bu yɑrɑ sɑɑ Egibitin di. U mɑɑmɑɑki kɑ sɔm dɑmginu kuɑ Egibitiɔ kɑ nim wɔ̃ku sɔɔ ge bɑ mɔ̀ Nɑɑ yɑri kɑ mɑɑ gbɑburu sɔɔ mi bɑ kuɑ wɔ̃ɔ weeru. 37 Mɔwisi wiyɑ u Isirelibɑ sɔ̃ɔwɑ u nɛɛ, Gusunɔ koo bu sɔmɔ goo seeyɑ ben bweserɔ, nge wi. 38 Mɔwisi wiyɑ u wɑ̃ɑ gbɑburɔ Isirelibɑn suunu sɔɔ, kɑ bɛsɛn bɑɑbɑbɑ sɑnnu, kɑ mɑɑ Gusunɔn gɔrɑdo wi u kɑ nùn gɑri kuɑ guuru wɔllɔ te bɑ rɑ soku Sinɑi. Mɑ u Gusunɔn gɑri wɑ̃ɑrugii mwɑ, u kɑ sun yi wɛ̃.
39 Adɑmɑ bɛsɛn bɑɑbɑ be, bɑ yinɑ bu nùn mɛm nɔɔwɑ. Bɑ nùn yinɑ bɑ kĩ bu kpɑm wurɑ Egibitiɔ. 40 Yen sɔ̃nɑ bɑ Aroni sɔ̃ɔwɑ bɑ nɛɛ, u bu bũnu kuo ni nu koo bu swɑɑ gbiiyɑ. Domi Mɔwisi wi, wi u bu yɑrɑmɑ sɑɑ Egibitin tem di, bɑ ǹ yɛ̃ ye n nùn deemɑ. 41 Dɔmɑ terɑ bɑ bwɑ̃ɑroku kuɑ ge gɑ kɑ nɑɑ buu weenɛ, mɑ bɑ gu yɑ̃kuru koosi. Mɑ ben nukurɑ dorɑ ben nɔmɑn sɔmburun sɔ̃. 42 Adɑmɑ Gusunɔ u tii gɑwɑ ben min di, mɑ u derɑ bɑ sɔ̃ɔ kɑ suru kɑ kperi sɑ̃wɑ, nge mɛ u geruɑ win sɔmɔbun tireru sɔɔ u nɛɛ,
<<Bɛɛ Isirelibɑ i kɑ kuɑ wɔ̃ɔ weeru gbɑburu sɔɔ i mɑn yɑ̃kunu kɑ kɛ̃nu kuɑre?
43 Bwɑ̃ɑrokunɑ i sɔɔwɑ ni i kuɑ i kɑ bũnu sɑ̃,
nge Mɔlɔkun kuu bekurugiru kɑ Refɑnin kperɑ.
Yen sɔ̃nɑ nɑ kon bɛɛ bɔrie sere Bɑbilonin berɑ giɔ.>>
44 Bɛsɛn bɑɑbɑbɑ bɑ rɑɑ Gusunɔn kuu bekurugiru mɔ te tɑ sɑ̃ɑ seedɑ mɑ u wɑ̃ɑ kɑ be. Mɔwisi u tu kuɑ nge mɛ wi u kɑ nùn gɑri kuɑ, u nùn sɔ̃ɔwɑ. U tu kuɑwɑ mɑm mɑm nge te u wɑ. 45 Mɑ bɛsɛn bɑɑbɑbɑ be bɑ tu tubi di, be kɑ Yosue ben gbiikoo, bɑ kɑ tu duɑ tɔn tukobun tem sɔɔ mɛ bɑ mwɑ sɑnɑm mɛ Gusunɔ u tɔn tuko be girɑ. Mɑ tɑ wɑ̃ɑ mi sere Dɑfidin wɑɑti. 46 Gusunɔ u kɑ Dɑfidi nɔnu geu mɛɛrɑ, mɑ u kɑnɑru kuɑ u kɑ kpĩ u wi Yɑkɔbun Yinni diru bɑniɑ. 47 Adɑmɑ Sɑlomɔɔwɑ u nùn dii te bɑniɑ.
48 Kɑ yen de kpuro Wɔrukoon wɑ̃ɑ yerɑ kun wɑ̃ɑ dinu sɔɔ ni tɔnu u bɑnɑ. Nge mɛ Gusunɔn sɔmɔ goo u yoruɑ,
49 <<Yinni Gusunɔ u nɛɛ,
wɔllɑ nɛn sinɑ gɔnɑ.
Mɑ tem mu sɑ̃ɑ nɛn nɑɑ sɔnditiɑ.
Ǹ n mɛn nɑ, dii teren bweserɑ i ko i mɑn bɑniɑ.
Nge wɑ̃ɑ yee terɑ̀ tɑ ko n sɑ̃ɑ nɛn wɛ̃rɑ yeru.
50 N ǹ nɛn nɔmɑ yɑ ye kpuro tɑkɑ kuɑ?>>
51 Etiɛni u mɑɑ bu sɔ̃ɔwɑ u nɛɛ, bɛɛ degɑngɑmgibu! Bɛɛn gɔ̃rusu kɑ bɛɛn swɑsu su sɑ̃ɑ nge be bɑ ǹ Gusunɔ nɑsiegisu, i rɑ n Hunde Dɛɛro yinɑmɔ, i mɔ̀wɑ nge bɛɛn bɑɑbɑbɑ. 52 Gusunɔn sɔmɔ wɑrɑ bɛɛn bɑɑbɑbɑ bɑ ǹ nɔni sɔ̃ɔwɑ. Bɑ bu go be bɑ Geegiin nɑɑrun gɑri kuɑ, mɑ tɛ̃, bɛɛn tii i Geegii wi kɔrumɔtɔnu kuɑ i nùn go. 53 Bɛɛyɑ i Gusunɔn woodɑ mwɑ ye bɑ bɛɛ wɛ̃ Gusunɔn gɔrɑdobɑn min di. Adɑmɑ i ǹ ye mɛm nɔɔwɛ.
Etiɛnin gɔɔ
54 Ye bɑ Etiɛnin gɑri yi nuɑ, bɑ mɔru bɛsirɑ sere bɑ ben nikibii dwɛ̃ɛmɔ. 55 Adɑmɑ Etiɛni u Hunde Dɛɛro yibɑ, mɑ u wɔllu nɔni girɑri u Gusunɔn yiiko wɑ, u mɑɑ Yesu wɑ u yɔ̃ Gusunɔn nɔm geuɔ. 56 Mɑ u nɛɛ, wee, nɑ wɑ wɔllɑ wukiɑre, mɑ Tɔnun Bii u yɔ̃ Gusunɔn nɔm geuɔ.
57 Sɑnɑm mɛyɑ bɑ ben swɑsu kɔruɑ kɑ nɔmɑ, bɑ kuuki kuɑ, mɑ bɑ duki dɑ sɑnnu bɑ nùn kunisi. 58 Bɑ nùn gɑwɑ bɑ yɑrɑ wuun di, mɑ bɑ nùn kpenu kɑsukum wɔri. Tɔn be, bɑ ben kumboorosu pwetɑ bɑ yi ɑluwɑɑsi goon mi wi bɑ rɑ nɛɛ Sɔɔlu. 59 Sɑnɑm mɛ bɑ Etiɛni kpenu kɑsukumɔ u kɑnɑru kuɑ u nɛɛ, Yinni Yesu, ɑ nɛn hunde mɔɔ. 60 U yiirɑ u gbɑ̃rɑ wɔllɔ u nɛɛ, Yinni ɑ ku bu torɑ teni gɑrisi.
Ye u yeni geruɑ u kpɑ, mɑ u gu.