8
1 Sɑɑ ye, Sɔɔlu u kɑ be bɑ Etiɛni go nɔɔ tiɑ sɑ̃ɑ.
Sɔɔlu u Yesun yigbɛru nɔni sɔ̃ɔwɑ
Sɑɑ dɔmɑ ten diyɑ bɑ Yesun yigbɛ te tɑ wɑ̃ɑ Yerusɑlɛmuɔ nɔni sɔ̃ɔ bɑkɑbu toruɑ. Nɑɑnɛ dokeobu kpuro mɑ n kun mɔ gɔrobu, bɑ yɑrinɑ bɑ dɑ Yudeɑn temɔ kɑ Sɑmɑrin temɔ. 2 Mɑ durɔbu gɑbu be bɑ Gusunɔn bɛɛrɛ yɛ̃, bɑ Etiɛni sikuɑ kɑ nuku sɑnkirɑ bɑkɑnu.
3 Adɑmɑ Sɔɔlu u kookɑri mɔ̀ u kɑ Yesun yigbɛru kɑm koosiɑ. U yɛnusu duurimɔ u tɔn durɔbu kɑ tɔn kurɔbu gɑwɑmɔ u bu kpɛ̃ɛmɔ pirisɔm sɔɔ.
Filipu u Lɑbɑɑri geɑ wɑɑsu mɔ̀ Sɑmɑriɔ
4 Be bɑ yɑrinɑ bɑ dɑ bɑɑmɑ kpuro bɑ Lɑbɑɑri geɑ wɑɑsu mɔ̀. 5 Filipu u dɑ Sɑmɑri mɑroɔ mɑ u wuu gen tɔmbu Kirisi win gɑri wɑɑsu kuɑ. 6 Tɔn wɔrusu su win gɑri nuɑ mɑ su sɔm mɑɑmɑɑkiginu wɑ ni u kuɑ, mɑ be kpuro bɑ win gɑri swɑɑ dɑki mɑm mɑm. 7 Filipu u wɛrɛkunu girɑ tɔn dɑbinun wɑsin di, mɑ nu yɑrimɔ kɑ wuri bɛkɛ. U mɑɑ yɛmɔ dɑbinu bɛkiɑ, kɑ bèn wɑsin bee tiɑ gu. 8 Mɑ nuku doo bɑkɑbu wɑ̃ɑ wuu ge sɔɔ.
9 Durɔ goo wɑ̃ɑ wuu ge sɔɔ, wi bɑ rɑ nɛɛ Simɔɔ. U rɑ n kɑ dobo dobo mɑɑmɑɑki dɑbiru mɔ̀ Sɑmɑrigibun wuswɑɑɔ, u mɑɑ tii gɑrisi tɔn boko. 10 Tɔmbu kpuro bwɛ̃ɛbwɛ̃ɛbu sere kɑ dɑmgibu, bɑ rɑ n win gɑri swɑɑ dɑki gem gem kpɑ bɑ n mɔ̀, wiyɑ Gusunɔn dɑm bɑkɑm mɔ.
11 Bɑ rɑ nùn swɑɑ dɑki yèn sɔ̃ sɑɑ tɛɛbun di win dobo dobo yɑ rɑ n bu biti sɑ̃ɑ. 12 Adɑmɑ ye tɔmbɑ Lɑbɑɑri geɑ nɑɑnɛ doke ye Filipu u bu wɑɑsu kuɑ, ye yɑ kɑ Gusunɔn bɑndu kɑ Yesu Kirisin yĩsiru yɑ̃, bɑ bu bɑtɛmu kuɑ tɔn durɔbu kɑ tɔn kurɔbu. 13 Simɔɔn tii mɑɑ nɑɑnɛ doke mɑ bɑ nùn bɑtɛmu kuɑ. U Filipu swĩi bɑɑmɑ kpuro mɑ u biti kuɑ too ye u sɔm dɑmginu kɑ mɑɑmɑɑki wɑ ye yɑ koorɑmɔ.
14 Ye gɔro be bɑ wɑ̃ɑ Yerusɑlɛmuɔ bɑ nuɑ mɑ Sɑmɑrigibu bɑ Gusunɔn gɑri nɑɑnɛ doke bɑ bu Piɛɛ kɑ Yohɑnu gɔriɑ. 15 Ye bɑ turɑ mi, bɑ kɑnɑru kuɑ nɑɑnɛ dokeo ben sɔ̃ Hunde Dɛɛro u kɑ du be sɔɔ. 16 Domi Hunde Dɛɛro kun ginɑ sɑrɑmɛ ben goon mi, bɑ gesi bu bɑtɛmu kuɑwɑ kɑ Yinni Yesun yĩsiru. 17 Yerɑ Piɛɛ kɑ Yohɑnu bɑ bu nɔmɑ sɔndi wirɔ, mɑ Hunde Dɛɛro duɑ be sɔɔ.
18 Ye Simɔɔ u wɑ mɑ Hunde Dɛɛro duɑ be sɔɔ sɑnɑm mɛ gɔro be, bɑ bu nɔmɑ sɔndi wirɔ, yerɑ u kĩ u bu gobi kɛ̃. 19 U nɛɛ bu mɑɑ nùn yiiko ye wɛ̃ɛyɔ, kpɑ bɑɑwure wi u nɔmu sɔndi wirɔ Hunde Dɛɛro u n dɑ du yɛ̃ro sɔɔ.
20 Adɑmɑ Piɛɛ nùn sɔ̃ɔwɑ u nɛɛ, wunɛ kɑɑ kɑm ko kɑ wunɛn gobi sɑnnu yèn sɔ̃ ɑ tɑmɑɑ kɑɑ kpĩ ɑ Gusunɔn kɛ̃ru kɑ gobi dwe. 21 A ǹ kpɛ̃ ɑ n nɔmɑ mɔ sɔmbu te sɔɔ, domi wunɛn gɔ̃ru gɑ ǹ dee dee sɑ̃ɑ Gusunɔn wuswɑɑɔ. 22 Yen sɔ̃, ɑ gɔ̃ru gɔsio wunɛn kom kɔ̃sum di, kpɑ ɑ Yinni kɑnɑ u nun wunɛn bwisiku kɔ̃sunu suuru kuɑ ǹ n koo koorɑ. 23 Domi nɑ wɑ mɑ wunɛn dɑɑ yɑ sosu, mɑ torɑru tɑ nun bɔkuɑ.
24 Simɔɔ u bu wisɑ u nɛɛ, bɛɛn tii i mɑn kɑnɑru kuo Yinnin mi kpɑ gɑ̃ɑ ni i mɑn sɔ̃ɔwɑ mi, nu ku mɑn deemɑ.
25 Ye bɑ seedɑ ye di mɑ bɑ Yinnin gɑrin wɑɑsu kuɑ bɑ kpɑ, bɑ gɔsirɑ bɑ Yerusɑlɛmun swɑɑ wɔri. Nge mɛ bɑ dɔɔ bɑ Lɑbɑɑri geɑn wɑɑsu mɔ̀ Sɑmɑrin bɑru kpɑɑ dɑbinu sɔɔ.
Filipu kɑ Etiopin wirugii goo
26 Adɑmɑ Yinnin gɔrɑdo goo u kɑ Filipu gɑri kuɑ u nɛɛ, u seewo u dɑ sɔ̃ɔ yɛ̃sɑn nɔm dwɑru giɑ u swɑɑ ye swĩi ye yɑ dɔɔ sɑɑ Yerusɑlɛmun di sere kɑ Gɑsɑ. Swɑɑ ye, swɑɑ tɔkɔrɑ.
27 Mɑ u seewɑ u dɑ. Miyɑ u Etiopin tɔn kurɔ sunɔn dukiɑn wunɑnɔsun wirugii wɑ wi bɑ mɑɑtɑm kuɑ. Durɔ wi, u dɑ Yerusɑlɛmuɔ u kɑ Gusunɔ sɑ̃. 28 Yerɑ u wiɔ u sɔ̃ win dumin kɛkɛ sɔɔ u Gusunɔn sɔmɔ Esɑin tireru gɑrimɔ. 29 Hunde Dɛɛro u Filipu sɔ̃ɔwɑ u doo kɛkɛ yen bɔkuɔ.
30 Filipu u dukɑ dɑ kɛkɛ yen mi, mɑ u nuɑ durɔ wi, u gɑrimɔ Gusunɔn sɔmɔ Esɑin tireru sɔɔ. U nùn bikiɑ u nɛɛ, n nun yeeri ye ɑ gɑrimɔ mi?
31 Wirugii wi, u wisɑ u nɛɛ, ɑmɔnɑ n ko n kɑ mɑn yeeri mɑ n kun mɔ goo u mɑn yi tubusiɑ.
Mɑ u Filipu kɑnɑ u kɛkɛ ye yɔɔmɑ bu sinɑ sɑnnu. 32 Ye wee ye durɔ wi, u gɑrimɔ sɑɑ Gusunɔn gɑrin di.
<<Bɑ kɑ nùn dɑ nge yɑ̃ɑ te bɑ koo sɑkɑ.
Nge yɑ̃ɑ buu ge gɑ mɑɑri sɛ̃ɛ sɑnɑm mɛ bɑ gen sɑnsu burɑmɔ,
nge mɛyɑ u ǹ win nɔɔ bɑɑye.
33 Bɑ nùn kɑwɑ, mɑ bɑ yinɑ bu nùn siriɑ dee dee.
Wɑrɑ koo kpĩ u sɑɑ yen tɔmbun gɑri gere.
Domi bɑ nùn wɑ̃ɑru wunɑri, u ǹ mɑɑ wɑ̃ɑ tem mɛ sɔɔ.>>
34 Durɔ wi, u Filipu bikiɑ u nɛɛ, nɑ nun kɑnɑmɔ, ɑ mɑn sɔ̃ɔwɔ wɑrɑn sɔ̃nɑ Gusunɔn sɔmɔ wi, u yeni yoruɑ. Win tiin sɔ̃nɑ? Nge goon sɔ̃.
35 Yerɑ Filipu u wɑɑsu wɔri. U toruɑ kɑ sɔmɔn gɑri yi, mɑ u nùn Yesun Lɑbɑɑri geɑ tubusiɑ.
36 Nge mɛ bɑ dɔɔ sɑnnu swɑɑ ye sɔɔ, bɑ turɑ dɑɑru gɑrun mi, mi nim wɑ̃ɑ. Mɑ durɔ wi, u nɛɛ, nim wee, mbɑ n mɑn tie nɑ ǹ kon kɑ bɑtɛmu ko. ((
37 Filipu u nùn wisɑ u nɛɛ, kɑɑ kpĩ ɑ bɑtɛmu ko ɑ̀ n nɑɑnɛ doke kɑ wunɛn gɔ̃ru kpuro.
Durɔ wi, u nɛɛ, mɛyɑ nɑ nɑɑnɛ doke mɑ Yesu Kirisi sɑ̃ɑwɑ Gusunɔn Bii.))
38 Mɑ wirugii wi, u derɑ bɑ win kɛkɛ yɔ̃rɑsiɑ. Wi kɑ Filipu bɑ sɑrɑ bɑ dɑ dɑɑru mi, mɑ u nùn bɑtɛmu kuɑ. 39 Ye bɑ yɑrɑ min di, Yinnin Hunde u kɑ Filipu doonɑ. Wirugii wi, u ǹ mɑɑ nùn wɑ, ɑdɑmɑ u win swɑɑ wɔri u doonɑ kɑ nuku dobu. 40 Filipu mɑɑ deemɑ u wɑ̃ɑ wuu gɑgu sɔɔ ge bɑ rɑ soku Asɔtu. U Lɑbɑɑri geɑn wɑɑsu kuɑ mi, kɑ mɑɑ wuu si su wɑ̃ɑ swɑɑ ye sɔɔ kpuro sere u kɑ turɑ Sesɑreɔ.