2
Yesu u durɔ goo bɛkiɑ wìn wɑsin bee tiɑ gu
(I mɑɑ mɛɛrio Mɑteu 9:1-8, Luku 5:17-26)
1 Sɔ̃ɔ mɛɛrun biru, Yesu u wurɑ Kɑpenɑmuɔ. Tɔmbɑ nuɑ mɑ u wɑ̃ɑ yɛnuɔ. 2 Mɑ tɔn wɔru gɑ mɛnnɑ sere ɑyeru mɑɑ sɑri bɑɑ kɔnnɔwɔ. Mɑ u bu Lɑbɑɑri geɑn gɑri nɔɔsiɑmɔ. 3 Bɑ kɑ nùn durɔ goo nɑɑwɑ wìn wɑsin bee tiɑ gu. Tɔmbu nnɛwɑ bɑ nùn sɔɔwɑ. 4 Adɑmɑ tɔn wɔru gen sɔ̃ bɑ kpɑnɑ bu Yesu susi. Yen sɔ̃nɑ bɑ diru mi u wɑ̃ɑn wɔllɔ yɑbɑ win deedeeru. Ye bɑ yɑbɑ bɑ kpɑ, mɑ bɑ kɑ wɛ̃ɛ beku bɔɔ te sɑrɑsiɑ tè sɔɔ durɔ wi, u kpĩ. 5 Ye Yesu u durɔ ben nɑɑnɛ dokebu wɑ bi bɑ mɔ wi sɔɔ, u bɑrɔ wi sɔ̃ɔwɑ u nɛɛ, bii durɔbu, ɑ wunɛn durum suuru wɑ.
6 Woodɑ yɛ̃robu gɑbu bɑ sɔ̃ mi, mɑ bɑ tii bikiɑmɔ gɔ̃ruɔ bɑ mɔ̀, 7 mbɑn sɔ̃nɑ durɔ wi, u gɑri gerumɔ mɛsum. U Gusunɔ wɔmmɔwɑ. Wɑrɑ koo kpĩ u durum suuru ko Gusunɔ turo bɑɑsi. 8 Mii mii Yesu u giɑ ye bɑ bwisikumɔ. Mɑ u bu bikiɑ u nɛɛ, mbɑn sɔ̃nɑ i gɑri yinin bweseru bwisikumɔ bɛɛn gɔ̃ruɔ. 9 Yerɑ̀ yɑ sɛ̃sɔ bo, bu kɑ bɑrɔ wi sɔ̃ u win durum suuru wɑ, ǹ kun mɛ bu nùn sɔ̃ u seewo u win kpin yeru kure, kpɑ u sĩ. 10 Adɑmɑ nɑ kĩ i n yɛ̃ mɑ Tɔnun Bii u yiiko mɔ hɑnduniɑ ye sɔɔ u kɑ durum suuru ko.
12 Nge mɛ tɔmbu kpuro bɑ nùn mɛɛrɑ swee, durɔ wi, u seewɑ u win kpin yeru suɑ, u n yɑriɔ. Biti bɑkɑ tɔn be mwɑ gem gem, mɑ bɑ Gusunɔ bɛɛrɛ wɛ̃ɛmɔ. Bɑ gerumɔ bɑ mɔ̀, bɑ ǹ yenin bweseru wɑɑre.
Yesu u Lefi sokɑ
(I mɑɑ mɛɛrio Mɑteu 9:9-13, Luku 5:27-32)
13 Yerɑ Yesu u kpɑm wurɑ dɑɑ burerun goorɔ. Tɔmbu kpuro bɑ nɑɑmɔ win mi, mɑ u bu Gusunɔn gɑrin keu sɔ̃ɔsimɔ. 14 Sɑnɑm mɛ u sɑrɔ u Lefi wɑ, Alufen bii, u sɔ̃ gbere yerɔ. U nùn sɔ̃ɔwɑ u nɛɛ, ɑ mɑn swĩiyɔ.
Lefi seewɑ mɑ u nùn swĩi.
15 N deemɑ sɑnɑm mɛ Yesu u dimɔ Lefin yɛnuɔ, gbere mwɑɔbu kɑ kɔ̃sɑn kowobu dɑbirɑ sɔ̃ kɑ wi, kɑ win bwɑ̃ɑbu sɑnnu, domi bɑ dɑbi be bɑ nùn swĩi. 16 Ye Fɑlisibɑn woodɑ yɛ̃robu bɑ Yesu wɑ u dimɔ kɑ gbere mwɑɔbu kɑ kɔ̃sɑn kowobu sɑnnu, bɑ win bwɑ̃ɑbu bikiɑ bɑ nɛɛ, mbɑn sɔ̃nɑ u kɑ gbere mwɑɔbu kɑ kɔ̃sɑn kowobu dimɔ sɑnnu.
17 Ye Yesu u ye nuɑ, u woodɑ yɛ̃ro be sɔ̃ɔwɑ u nɛɛ, be bɑ bwɑ̃ɑ do bɑ ǹ timgiin bukɑtɑ mɔ mɑ n kun mɔ be bɑ bɑrɔ. Nɑ ǹ nɛ n kɑ gemgibu soku. Nɑ nɑwɑ n kɑ torobu soku.
Nɔɔ bɔkurun gɑri
(I mɑɑ mɛɛrio Mɑteu 9:14-17, Luku 5:33-39)
18 Ye Yohɑnun bwɑ̃ɑbu kɑ Fɑlisibɑgibu bɑ nɔɔ bɔkuɑ, tɔmbɑ nɑ bɑ Yesu bikiɑ bɑ nɛɛ, mbɑn sɔ̃nɑ Yohɑnun bwɑ̃ɑbu kɑ Fɑlisibɑgibu bɑ nɔɔ bɔkuɑ, mɑ wigibɑ kun bɔkuɑ.
19 Yesu u bu bikiɑ u nɛɛ, kurɔ kpɑon durɔn bɔrɔbɑ bɑ koo kpĩ bu nɔɔ bɔke sɑnɑm mɛ̀ sɔɔ kurɔ kpɑon durɔ wɑ̃ɑ kɑ be? Aɑwo, bɑɑ ǹ n sɑɑ yeren nɑ, ù n wɑ̃ɑ kɑ be, bɑ ǹ kpɛ̃ bu nɔɔ bɔke. 20 Adɑmɑ sɑɑ sisi yè sɔɔ bɑ koo bu kurɔ kpɑon durɔ suɑri, sɑnɑm mɛyɑ bɑ koo nɔɔ bɔke.
21 Bɑ ku rɑ yɑbe tɔkɔru kɔre kɑ kĩɑ kpɑɑ si bɑ ǹ nim doke. Bɑ̀ n kuɑ mɛ, kĩɑ kpɑɑ si, su koo gɑwɑnɑ kpɑ su yɑbe tɔkɔrugisu gĩɑ kpɑ gɛ̃ɛrɑbu sosi. 22 Bɑ ku rɑ mɑɑ tɑm kpɑm wisi gɔnɑn bɔɔnu sɔɔ ni nu diirɑ. Bɑ̀ n kuɑ mɛ, tɑm kpɑm mɛ, mu koo de bɔɔnu nu kurɑ, kpɑ mu yɑri kpɑ bɔɔ ni kɑ tɑm mɛ, n kɑm ko kpuro. Adɑmɑ bɑ rɑ tɑm kpɑm wisiwɑ gɔnɑn bɔɔ kpɑɑnu sɔɔ.
Tɔ̃ɔ wɛ̃rɑrugirun gɑri
(I mɑɑ mɛɛrio Mɑteu 12:1-8, Luku 6:1-5)
23 Tɔ̃ɔ wɛ̃rɑrugiru gɑru sɔɔ, n deemɑ Yesu kɑ win bwɑ̃ɑbu bɑ sĩimɔ swɑɑ sɔɔ ɑlikɑmɑ gbɑɑrun bɔkuɔ. Nge mɛ bɑ sĩimɔ, win bwɑ̃ɑbu bɑ ɑlikɑmɑ wɔkɑmɔ. 24 Yerɑ Fɑlisibɑ bɑ Yesu sɔ̃ɔwɑ bɑ nɛɛ, u mɛɛrio, mbɑn sɔ̃nɑ win bwɑ̃ɑbɑ mɔ̀ ye woodɑ yɑ yinɑ bu ko tɔ̃ɔ wɛ̃rɑrugiru sɔɔ.
25 Mɑ Yesu u bu bikiɑ u nɛɛ, i ǹ gɑrire ye Dɑfidi u kuɑ sɑnɑm mɛ gɔ̃ɔrɑ bu mɔ̀ wi kɑ win bwɑ̃ɑbu, mɑ bɑ ǹ gɑ̃ɑnu mɔ ni bɑ koo di? 26 U duɑ Gusunɔn dirɔ Abiɑtɑɑ, yɑ̃ku kowo tɔnweron wɑɑti, mɑ u pɛ̃ɛ di ye bɑ Gusunɔ yiiye, ye n ǹ weenɛ goo u di mɑ n kun mɔ yɑ̃ku kowobu tɔnɑ. Adɑmɑ Dɑfidi u ye di, u mɑɑ win bwɑ̃ɑbu wɛ̃.