3
Durɔ wìn nɔm teu gɑ gu
(I mɑɑ mɛɛrio Mɑteu 12:9-14, Luku 6:6-11)
1 Mɑ Yesu u kpɑm duɑ mɛnnɔ yerɔ. Durɔ goo wɑ̃ɑ mi, wìn nɔm teu gɑ gu. 2 Tɔmbɑ Yesu mɛɛrɑ bu wɑ ù n koo durɔ wi bɛkiɑ tɔ̃ɔ wɛ̃rɑrugiru sɔɔ, kpɑ bu kɑ wɑ bu nùn durum mɑni. 3 Mɑ u durɔ wi sɔ̃ɔwɑ wìn nɔmu gɑ gu mi, u nɛɛ, ɑ seewo ɑ yɔ̃rɑ suunu sɔɔ.
4 Mɑ u tɔn be bikiɑ u nɛɛ, mbɑ n weenɛ bu tɔmbu kuɑ tɔ̃ɔ wɛ̃rɑrugiru sɔɔ. Geɑ? Nge kɔ̃sɑ. N weenɛ bu tɔnu fɑɑbɑ ko? Nge bu nùn go.
Adɑmɑ bɑ mɑɑri. 5 Yesu u bu mɛɛrɑ kɑ mɔru u kɑ sikerenɑ, mɑ win nukurɑ sɑnkirɑ ben woo bɔbunun sɔ̃. Yerɑ u durɔ wi sɔ̃ɔwɑ u nɛɛ, ɑ wunɛn nɔmu dɛmiɔ.
U ge dɛmiɑ mɑ gɑ wurɑ nge mɛ gɑ rɑɑ sɑ̃ɑ. 6 Yen sɔ̃nɑ Fɑlisibɑ bɑ yɑrɑ mɑ bɑ yɑnde mɛnnɑ kɑ Herodun tɔmbu, bɑ wesiɑnɑ nge mɛ bɑ koo ko bu kɑ Yesu go.
Tɔn wɔru gunɑ yɑ nɑ Yesun mi
7 Yesu kɑ win bwɑ̃ɑbu bɑ tii gɑwɑ bɑ dɑ Gɑlilen dɑɑ bureru giɑ, mɑ tɔn wɔru gunɑ nùn swĩi. Tɔn be, bɑ nɑwɑ Gɑlilen di kɑ mɑɑ Yudeɑn tem di, 8 kɑ Yerusɑlɛmun di, kɑ Idumɛn tem di, kɑ Yuudɛnin gurun di, kɑ Tiri kɑ Sidonin bɑru kpɑɑnun di. Tɔn wɔru gunɑ ye, yɑ nɑ Yesun mi yèn sɔ̃ bɑ ye u mɔ̀ kpuron lɑbɑɑri nuɑ. 9 Tɔn wɔru gunɑ yen kpɑ̃ɑrun sɑɑbu Yesu u win bwɑ̃ɑbu sɔ̃ɔwɑ u nɛɛ, bu nùn goo nimkuu sɔɔru kuo, kpɑ tɔn be, bu ku nùn bɑɑsi. 10 Yesu u rɑɑ tɔn dɑbinu bɛkiɑ, yen sɔ̃nɑ be bɑ bɑrɔ bɑ bɔrikiɑnɑmɔ bu wɑ bu kɑ nùn bɑbɑ. 11 Wɛrɛkunu nù n nùn wɑ nu rɑ nùn kpunɛwɑ kpɑ nu n kuuki mɔ̀ nu n gerumɔ, wunɑ Gusunɔn Bii. 12 Adɑmɑ Yesu u rɑ nu gerusi gem gem nu ku kɑ gere wi u sɑ̃ɑ.
Yesu u bwɑ̃ɑbu wɔkurɑ yiru gɔsɑ
(I mɑɑ mɛɛrio Mɑteu 10:1-4, Luku 6:12-16)
13 Yen biru Yesu u dɑ guuru wɔllɔ, mɑ u tɔmbu gɑbu sokɑ be u kĩ. Mɑ bɑ dɑ win mi. 14 Yerɑ u ben wɔkurɑ yiru gɔsɑ, ((u bu yĩsiru kɑ̃ gɔrobu)), be bɑ ko n kɑ nùn wɑ̃ɑ, kpɑ u bu gɔri bu Lɑbɑɑri geɑ kpɑrɑ, 15 kpɑ u bu dɑm wɛ̃ bu kɑ wɛrɛkunu girɑ. 16 Tɔnu wɔkurɑ yiru ye u gɔsɑ wee, Simɔɔ wi u yĩsiru kɑ̃ Piɛɛ, 17 kɑ Yɑkɔbu kɑ win wɔnɔ Yohɑnu, Sebeden bibu be u yĩsiru kɑ̃ Buɑnɛge, yen tubusiɑnɑ guru kukirinugibu, 18 kɑ Andere, kɑ Filipu, kɑ Bɑɑtelemi, kɑ Mɑteu, kɑ Tomɑɑ, kɑ Yɑkɔbu Alufen bii, kɑ Tɑde, kɑ Simɔɔ wi u win tem gɑri kĩ, 19 kɑ sere Yudɑsi Isikɑriɔtu wi u tɔmbu Yesu nɔmu sɔndiɑ.
Yesun tɔmbu bɑ kĩ
bu kɑ nùn doonɑ
20 Mɑ bɑ wurɑ yɛnuɔ. Tɔn wɔru gɑ wure gɑ mɛnnɑ sere Yesu kɑ win bwɑ̃ɑbu bɑ fɛɛ biɑ bu di. 21 Sɑnɑm mɛ win dusibɑ ye nuɑ, bɑ dɑ bu kɑ nùn doonɑ min di, domi bɑ gerumɔ u wiirɑwɑ.
Yesu u kɑ tii yinɑmɔ
22 Mɑ woodɑ yɛ̃ro be bɑ wee sɑɑ Yerusɑlɛmun di bɑ gerumɔ bɑ mɔ̀, Beseburu u nùn wɑ̃ɑsiwɑ. Wɛrɛkunun sunɔ wiyɑ u nùn dɑm wɛ̃ u kɑ wɛrɛkunu girɑ.
23 Yen sɔ̃nɑ Yesu u tɔmbu sokɑ mɑ u bu bikiɑ kɑ mɔndu u nɛɛ, ɑmɔnɑ Setɑm yɑ koo kpĩ yu yen tii girɑ. 24 Bɑndun tɔmbu bɑ̀ n tɑbu mɔ̀ ben suunu sɔɔ, bɑn te, tɑ ǹ kpɛ̃ tu tɛ. 25 Yɛnu gèn tɔmbɑ mɑɑ sɑnkinɑmɔ, gɑ ǹ kpɛ̃ gu tɛ. 26 Setɑm yɑ̀ n mɑɑ kɑ yen tii tɑbu mɔ̀, yen dɑm mù n bɔnu kuɑ, yɑ ǹ kpɛ̃ yu tɛ, yen dɑm mu koo nɔru ko.
27 Goo kun kpɛ̃ u du dɑmgiin yɛnuɔ u kɑ win yɑ̃nu gurɑ u kun ginɑ dɑmgii wi bɔkue u sere win yɑ̃nu gurɑ.
28 Kɑ geemɑ, nɑ bɛɛ sɔ̃ɔmɔ, torɑru kɑ gɑri kɑm kpuro ye tɔmbɑ gerumɔ, bɑ koo bu ye suuru kuɑ. 29 Adɑmɑ bɑɑwure wi u Hunde Dɛɛro gɑri kɑm gerusimɔ, u ǹ suuru wɑsi. Win torɑrɑ ko n mɑɑ nùn wɑ̃ɑsiwɑ kɑ bɑɑdommɑɔ.
30 Yesu u yeni geruɑwɑ yèn sɔ̃ gɑbɑ nɛɛ wɛrɛkuwɑ gɑ nùn wɑ̃ɑsi.
Berɑ̀ bɑ sɑ̃ɑ Yesun wɔnɔbu
kɑ win mɛro
(I mɑɑ mɛɛrio Mɑteu 12:46-50, Luku 8:19-21)
31 Sɑnɑm mɛyɑ win wɔnɔbu kɑ win mɛro bɑ tunumɑ. Bɑ yɔ̃rɑ tɔɔwɔ, bɑ goo gɔrɑ u nùn sokumɑ. 32 Tɔn wɔru gɑ sɔ̃ gɑ nùn sikerenɛ, mɑ goo u nùn sɔ̃ɔwɑ u nɛɛ, wee, wunɛn mɛro kɑ wunɛn wɔnɔbu bɑ yɔ̃ tɔɔwɔ bɑ nun soku.
33 Mɑ u nɛɛ, wɑrɑ sɑ̃ɑ nɛn mɛro. Berɑ̀ bɑ sɑ̃ɑ nɛn wɔnɔbu.