Mɑɑku 4

Dĩɑ bwese yɛ̃kon gɑri

¹ Yesu u kpɑm Gusunɔn gɑrin keu sɔ̃ɔsim wɔri dɑɑ burerun goorɔ. Tɔn wɔru gunɑ yɑ mɛnnɑ yɑ nùn sikerenɑ, yen sɔ̃nɑ u bu deri goorɔ u goo duɑ ge gɑ wɑ̃ɑ nim sɔɔ, mɑ u sinɑ. ² Mɑ u bu gɑ̃ɑ dɑbinu sɔ̃ɔsim wɔri kɑ mɔnnu. Win sɔ̃ɔsibu sɔɔ u geruɑ u nɛɛ, ³ i swɑɑ dɑkio. Durɔ goo u yɑrɑ u kɑ dĩɑ bweseru yɛ̃kɑ. ⁴ Sɑnɑm mɛ u yɛ̃kɑmɔ, sukum wɔrumɑ swɑɑ sɔɔ. Gunɔsu nɑ su di. ⁵ Sukum gɑm mɑɑ wɔri kpee sɑɑrɑ wɔllɔ mi tem kun duku. Mɑ mu kpiɑ yɑnde yèn sɔ̃ tem kun duku. ⁶ Adɑmɑ ye sɔ̃ɔ u bɔbiɑ mu dɔ̃ɔ mwɑɑrɑ mɑ mu gberɑ yèn sɔ̃ mu ǹ gbini mɔ. ⁷ Sukum gɑm mɑɑ kpɑm wɔri sɑ̃ki sɔɔ. Sɑ̃ki kpiɑ fuuku mɑ yi yinɑ mu kpɛ̃ɑ. Mu ǹ mɑrɑ. ⁸ Adɑmɑ sukum gɑm mɑɑ wɔrumɑ tem gem sɔɔ. Mu kpiɑ mɑ mu kpɛ̃ɑ mɑ mu mɑrɑ sukum tɛn tɛnibu, sukum wɑtɑ wɑtɑ, sukum wunɔm wunɔm.

⁹ Mɑ u nɛɛ, wi u swɑɑ mɔ u kɑ nɔ, u nɔɔwɔ.

Mɔnnun ɑsɑnsi

(I mɑɑ mɛɛrio Mɑteu 13:10-17, Luku 8:9-10)

¹⁰ Sɑnɑm mɛ Yesu u tiɑ wi turo, be bɑ nùn swĩi kɑ bwɑ̃ɑbu wɔkurɑ yiru ye sɑnnu, bɑ nùn mɔnnun ɑsɑnsi bikiɑ. ¹¹ U bu sɔ̃ɔwɑ u nɛɛ, bɛɛyɑ Gusunɔ u win bɑndun ɑsiri sɔ̃ɔsi, ɑdɑmɑ be bɑ tie bɑ gɑri kpuro nɔɔmɔ kɑ mɔnnu, ¹² kpɑ

<<Bu kɑ mɛɛri bɑ kun wɑ.

Bɑ̀ n mɑɑ nuɑ, kpɑ n ku bu yeeri,

kpɑ bu ku rɑɑ kɑ gɔ̃ru gɔsie,

Gusunɔ u sere bu suuru kuɑ.>>

Mɔn ten tubusiɑnu

(I mɑɑ mɛɛrio Mɑteu 13:18-23, Luku 8:11-15)

¹³ Mɑ u bu sɔ̃ɔwɑ u nɛɛ, mɔn teni tɑ ǹ bɛɛ yeeri? Ǹ n mɛn nɑ, ɑmɔnɑ ni nu tie kpuro nu koo kɑ bɛɛ yeeri. ¹⁴ Durɔ wi, Gusunɔn gɑriyɑ u yɛ̃kɑmɔ. ¹⁵ Tɔn be bɑ kɑ swɑɑ bɑɑru weenɛ mi bɑ gɑri yi yɛ̃kɑ, beyɑ bɑ̀ n gɑri yi nuɑ Setɑm dɑ nɛ u yi wunɑ ben gɔ̃run di. ¹⁶ Mɛyɑ mɑɑ be bɑ kɑ kpee sɑɑrɑn tem weenɛ, beyɑ bɑ̀ n gɑri yi nuɑ mii mii bɑ rɑ yi mwɛ kɑ nuku dobu. ¹⁷ Adɑmɑ bɑ ku rɑ n gbini mɔ ben tii sɔɔ, bɑ ku rɑ yɔ̃re n kɑ tɛ. Sɑnɑm mɛ wɑhɑlɑ kɑ nɔni swɑ̃ɑrɑ tunumɑ gɑri yin sɔ̃, yɑnde kpɑ bu biru wurɑ. ¹⁸ Gɑbɑ mɑɑ sɑ̃ɑ be bɑ kɑ tem sɑ̃kunugum weenɛ. Beyɑ bɑ rɑ gɑri yi nɔ ¹⁹ ɑdɑmɑ bɑ rɑ n wurure kɑ ben hɑnduniɑn wɑ̃ɑru kpɑ dukiɑn kĩrɑ n bu tɑki dii. Bɑ gɑ̃ɑ dɑbinun kɔdɛ mɔ. Ye kpurowɑ yɑ rɑ gɑri yi tɛɛsi kpɑ yi kpɑnɑ yi binu mɑ. ²⁰ Be bɑ mɑɑ kɑ tem gem weenɛ, beyɑ bɑ rɑ gɑri yi nɔ kpɑ bu yi mwɑ kpɑ bu binu mɑ, gɑbu tɛnɑ, gɑbu wɑtɑ, gɑbu wunɔbu (100).

Fitilɑn mɔndu

(I mɑɑ mɛɛrio Luku 8:16-18)

²¹ Yerɑ Yesu u bu bikiɑ u nɛɛ, bɑ rɑ fitilɑ ge gɑ sɔ̃re kɑɑru wukiri? Bɑ rɑ gu doke kpinun kɔkɔrɔ? Bɑ ku rɑ gu sɔndi dɑbu wɔllɔ? ²² Gɑ̃ɑnu sɑri ni nu beruɑ mɑ nu ǹ koo terɑ, ɑsirin gɑ̃ɑnu mɑɑ sɑri ni nu ǹ koo sɔ̃ɔsirɑ. ²³ Wi u swɑɑ mɔ u kɑ nɔ, u nɔɔwɔ.

²⁴ U mɑɑ bu sɔ̃ɔwɑ u nɛɛ, i lɑɑkɑri koowo ye i nɔɔmɔ. Sɑkɑku ge i kɑ yĩirumɔ, geyɑ bɑ koo kɑ bɛɛ yĩiruɑ, kpɑ bu bɛɛ sosiɑ. ²⁵ Domi wi u mɔ, wiyɑ bɑ koo sosiɑ. Adɑmɑ wi u kun gɑ̃ɑnu mɔ, piiko ye u mɑm mɔ bɑ koo nùn ye wɔrɑri.

Dĩɑ bwese te bɑ yɛ̃kɑn gɑri

²⁶ Mɑ Yesu u nɛɛ, Gusunɔn bɑndɑ sɑ̃ɑwɑ nge durɔ goo wi u bweseru yɛ̃kɑ gberɔ. ²⁷ U kpunɑmɔ wɔ̃kuru, u seemɔ bururu. Sɑɑ ye kpurowɑ bwese te, tɑ kpiimɔ tɑ kpɛ̃ɑmɔ. U ǹ yɛ̃ ɑmɔnɑ n koosinɑmɔ. ²⁸ Temɑ mu kɑ mɛn tii tu kpiisiɑmɔ, gbiikɑɑ kpii nɔnu, yen biru kɛri, dɑ̃kuru kpɑ tu bɛm doke. ²⁹ Sɑnɑm mɛ bɛm mu ye, kpɑ bu gɛ̃ kɑ kɔmbɔ domi gɛ̃ɛbun sɑnɑm mu turɑ.

Mutɑɑdin bimɑn gɑri

(I mɑɑ mɛɛrio Mɑteu 13:31-32, 34, Luku 13:18-19)

³⁰ Yesu u kpɑm wure u nɛɛ, mbɑ sɑ ko kɑ Gusunɔn bɑndu weesinɑ. Kɑ mɔn terɑ̀ sɑ ko tu tubusiɑ. ³¹ Tɑ kɑ mutɑɑdin bimɑ weenɛ. Bɑ̀ n ye duurumɔ gberɔ, hɑnduniɑn gɑ̃ɑ bweseru kpuro sɔɔ yeyɑ yɑ piiburu bo. ³² Adɑmɑ bɑ̀ n ye duurɑ bɑ̀ n kpɑ yɑ rɑ kpɛ̃yɛ yu ko dɑ̃ru, kpɑ yu kɑ̃ɑsi bɛkɛ ko sere gunɔsu su sokunu ko yin kukɔsɔ.

³³ Yesu u tɔn be Lɑbɑɑri geɑn gɑri sɔ̃ɔwɑ kɑ mɔn dɑbinu nge nini, nge mɛ̀n sɑkɑ bɑ koo kpĩ bu nɔ. ³⁴ U ǹ kɑ bu gɑri diri kue mɑ n kun mɔ kɑ mɔndu, ɑdɑmɑ ù n tiɑ kɑ win bwɑ̃ɑbu tɔnɑ, u rɑ bu kpuro tubusiewɑ.

Yesu u nim kurenu mɑrisiɑ

(I mɑɑ mɛɛrio Mɑteu 8:23-27, Luku 8:22-25)

³⁵ Tɔ̃ɔ ten yokɑ, u win bwɑ̃ɑbu sɔ̃ɔwɑ u nɛɛ, i de su tɔburɑ guru giɔ.

³⁶ Bɑ tɔn wɔru deri, mɑ bɑ duɑ goo ge sɔɔ, mi u sɔ̃, bɑ tɔburɔ sɑnnu. Mɑ goosu gɑsu bu swĩi. ³⁷ Suɑru sɔɔ woo bɔkɔ gɑ nɑ kɑ dɑm mɑ nim kurenu wisi goo sɔɔ sere gɑ kĩ gu yɑnde nim yibu. ³⁸ Adɑmɑ Yesu u dò goo sɔɔ biruɔ u leferi wiru kpĩiri. Bwɑ̃ɑ be, bɑ nùn yɑmiɑ bɑ nɛɛ, yinni n ǹ nun gɑm sɑ̃ɑ ye sɑ kɑm kobu dɔɔ?

³⁹ Yerɑ u yɑndɑ mɑ u woo gerusi kɑ dɑm mɑ u nim kurenu sɔ̃ɔwɑ u nɛɛ, n turɑ mɛ, i mɑrio sɛ̃ɛ.

Woo gɑ mɑri mɑ yɑnde nim kurenu kpɑ. ⁴⁰ Yerɑ u bu bikiɑ u nɛɛ, mbɑn sɔ̃nɑ i nɑndɑ nge mɛ. Amɔnɑ i ǹ kɑ mɑn nɑɑnɛ sɑ̃ɑ.

⁴¹ Ben yɑro suɑ mɑ bɑ bikiɑnɑmɔ, tɔnu weren bweserɑ wini wi bɑɑ woo kɑ nim kurenu nu mɛm nɔɔwɑmmɛ.