LABAARI GEA
NGE MƐ LUKU U YORUA
1
Nge mɛ bɑ kuɑ
bɑ kɑ tire te yoruɑ
1-4 Teofiru, bɛɛrɛ bɑkɑgii, n mɑn wɛ̃re n nun tireru yoruɑ n nun sɔ̃ dee dee ye n koorɑ bɛsɛn suunu sɔɔ. Be bɑ ye wɑ toren di bɑ kuɑ yen lɑbɑɑrin sɔm kowobu mɑ bɑ sun ye sɔ̃ɔwɑ. Dɑbiru be bɑ ye nuɑ bɑ kookɑri kuɑ bu kɑ ye yore dee dee. Nɛn tii nɑ gɑri yi kpuro wɛ̃ɛrɑ yin toren di. N mɑɑ mɑn wɛ̃re n nun ye yoruɑ ɑ n kɑ yen gem yɛ̃ ye bɑ nun sɔ̃ɔsi.
Gusunɔn gɔrɑdo u Yohɑnu Bɑtɛmu kowon mɑrubun gɑri nɔɔsiɑ
5 To, Herodu Yudeɑn tem yɛ̃ron wɑɑti, yɑ̃ku kowo goo wɑ̃ɑ yɑ̃ku kowobun wuuru sɔɔ te bɑ mɔ̀ Abiɑ, win yĩsirɑ Sɑkɑri. Win kurɔ mɑɑ sɑ̃ɑwɑ Aronin bweseru, win yĩsirɑ Elisɑbɛti. 6 Be yiru kpuro geegibɑ Gusunɔn wuswɑɑɔ. Bɑ sĩimɔ Yinni Gusunɔn woodɑ kɑ win sɔ̃ɔsibu kpuro sɔɔ dee dee. 7 Adɑmɑ bɑ ǹ bii mɔ yèn sɔ̃ Elisɑbɛti sɑ̃ɑ wĩro, be yiru kpuro bɑ mɑɑ tɔkɔnu kuɑ.
8 N wee sɑnɑm mɛ n ben wuuru girɑri, Sɑkɑri win yɑ̃ku kobun sɔmburu mɔ̀ Gusunɔn wuswɑɑɔ. 9 Mɑ tubu tubu yɑ nùn mwɑ nge mɛ yɑ̃ku kowobun komɑru, u kɑ du Yinni Gusunɔn sɑ̃ɑ yerɔ u turɑre dɔ̃ɔ doke. 10 Tɔn wɔru kpuro gɑ kɑnɑru mɔ̀ tɔɔwɔ sɑnɑm mɛ u turɑre dɔ̃ɔ dokemɔ. 11 Mɑ Yinnin gɔrɑdo u nùn kure u yɔ̃ mi bɑ rɑ turɑre dɔ̃ɔ doken nɔm geuɔ. 12 Ye Sɑkɑri u nùn wɑ, u wom torurɑ mɑ bɛrum nùn mwɑ. 13 Mɑ gɔrɑdo wi, u nùn sɔ̃ɔwɑ u nɛɛ, ɑ ku bɛrum ko Sɑkɑri, domi bɑ wunɛn kɑnɑru mwɑ. Wunɛn kurɔ Elisɑbɛti u koo nun bii tɔn durɔ mɑruɑ, kpɑ ɑ nùn yĩsiru kɛ̃ Yohɑnu. 14 Kɑɑ nuku doo bɑkɑbu wɑ, tɔn dɑbirɑ koo mɑɑ yɛ̃ɛri win mɑrubun sɔ̃. 15 Domi u koo ko tɔn boko Yinni Gusunɔn wuswɑɑɔ. U ǹ tɑm nɔrumɔ. U ko n mɑɑ Hunde Dɛɛro yibɑ win mɛron nukurun di. 16 U koo de Isirelibɑ dɑbiru bu wurɑ Gusunɔ ben Yinnin mi giɑ. 17 U koo nùn swɑɑ gbiiyɑ kpɑ u n sɑ̃ɑ nge Gusunɔn sɔmɔ Eli, u n dɑm mɔ u kɑ bɑɑbɑbɑ kɑ ben bibu dorɑsiɑ, kpɑ u mɑɑ kɑ mɛm nɔɔ sɑribɑ wurɑ geegibun swɑɑ sɔɔ, kpɑ u mɑɑ tɔmbun gɔ̃rusu sɔɔru koosiɑ mɑm mɑm Yinnin sɔ̃.
18 Sɑkɑri u gɔrɑdo wi bikiɑ u nɛɛ, ɑmɔnɑ ko nɑ n kɑ yɛ̃ mɑ gɑri yi gemɑ. Domi nɛ durɔ tɔkɔrɑ, nɛn kurɔn tii mɑɑ tɔkɔru kuɑ.
19 Mɑ gɔrɑdo wi, u nùn wisɑ u nɛɛ, nɛnɑ Gɑbiriɛ, nɛ wi nɑ rɑ n yɔ̃ Gusunɔn wuswɑɑɔ. Bɑ mɑn gɔrimɑwɑ n kɑ nun gɑri ko kpɑ n kɑ nun lɑbɑɑri geɑ ye nɔɔsiɑ. 20 Adɑmɑ ɑ ǹ nɛn gɑri nɑɑnɛ doke yi yi koo koorɑ yin sɑɑ sɔɔ. Yen sɔ̃nɑ, ɑ ǹ mɑɑ kpɛ̃ ɑ gɑri gere sere dɔmɑ te yɑbu ye, yɑ koorɑ.
21 Tɔmbɑ Sɑkɑri mɑrɑ, mɑ biti yɑ bu mwɑ ye u kɑ tɛ mɛ sɑ̃ɑ yerɔ. 22 Ye u yɑrɑ, u ǹ kpĩɑ u kɑ bu gɑri kue, mɑ bɑ giɑ mɑ u kɑ̃siru wɑwɑ sɑ̃ɑ yeru mi. U kɑ bu nɔmɑ gɑri sɔ̃ɔmɔ, u ǹ nɔɔ wukie.
23 Ye win yɑ̃ku kowo sɔmburɑ kpɑ, u sĩɑ win yɛnuɔ. 24 Yen biru win kurɔ Elisɑbɛti u gurɑ suɑ, mɑ u tii beruɑ suru nɔɔbu. U nɛɛ, 25 n wee ye Yinni Gusunɔ u mɑn kuɑ. U kɑ mɑn nɔnu geu mɛɛrɑ u mɑn sekuru yɑrɑ tɔmbun wuswɑɑɔ.
Wɔllun gɔrɑdo
u Yesun mɑrubun gɑri nɔɔsiɑ
26-27 Elisɑbɛtin gurɑn suru nɔɔbɑ tiɑse, Gusunɔ u win gɔrɑdo Gɑbiriɛ gɔrɑ Nɑsɑrɛtiɔ, Gɑlilen tem sɔɔ wɔndiɑ goon mi, wi u kun durɔ yɛ̃. Wɔndiɑ win durɔ kɛ̃ɛro Yosɛfu u sɑ̃ɑwɑ Dɑfidi sinɑ bokon bweseru. Wɔndiɑ win tiin yĩsirɑ Mɑɑri. 28 Gɔrɑdo wi, u dɑ win mi mɑ u nùn sɔ̃ɔwɑ u nɛɛ, nɑ nun tɔburɑ, Gusunɔ u nun durom kuɑ, u mɑɑ wɑ̃ɑ kɑ wunɛ.
29 Mɑɑrin lɑɑkɑri yɑ burisinɑ kɑ gɑri yi, mɑ u tii bikiɑ u nɛɛ, tɔbiri teren bweserɑ mini. 30 Gɔrɑdo u nùn sɔ̃ɔwɑ u nɛɛ, ɑ ku bɛrum ko Mɑɑri domi Gusunɔ u nun durom kuɑ. 31 Wee kɑɑ gurɑ suɑ ɑ bii tɔn durɔ mɑ kpɑ ɑ nùn yĩsiru kɛ̃ Yesu. 32 U koo ko tɔn boko. Bɑ ko n dɑ nùn soku Wɔrukoon Bii. Yinni Gusunɔ u koo nùn win sikɑdo Dɑfidin bɑndu wɛ̃. 33 U ko n bɑndu dii Yɑkɔbun yɛnuɔ sere kɑ bɑɑdommɑɔ. Win bɑndu tɑ ǹ ko n nɔru mɔ.
34 Mɑ Mɑɑri u gɔrɑdo bikiɑ u nɛɛ, ɑmɔnɑ yeni yɑ koo kɑ koorɑ domi nɑ ǹ durɔ yɛ̃.
35 Gɔrɑdo u nùn wisɑ u nɛɛ, Hunde Dɛɛro u koo nun deemɑ, kpɑ Wɔrukoon dɑm mu nun wukiri. Yen sɔ̃nɑ bɑ koo bii dɛɛro wi kɑɑ mɑ mi soku Gusunɔn Bii. 36 Wee wunɛn mɛro bisi Elisɑbɛti wi bɑ rɑɑ sokumɔ wĩro, win tii u bii tɔn durɔn gurɑ mɔ win tɔkɔru sɔɔ. U wɑ̃ɑ win suru nɔɔbɑ tiɑse sɔɔ tɛ̃. 37 Domi gɑ̃ɑnu sɑri ni Gusunɔ kpɑnɛ.
38 Mɑɑri nɛɛ, nɛnɑ Yinnin yoo. N mɑn kuo nge mɛ ɑ geruɑ. Mɑ gɔrɑdo wi, u doonɑ.
Mɑɑri u Elisɑbɛti berɑm dɑ
39 Sɔ̃ɔ mɛɛ te sɔɔ, Mɑɑri u seewɑ kpɑɑkɑ u dɑ Yudeɑn wuu gɑgu sɔɔ ge gɑ wɑ̃ɑ guunun berɑ giɑ. 40 U duɑ Sɑkɑrin yɛnuɔ mɑ u Elisɑbɛti tɔburɑ. 41 Ye Elisɑbɛti u Mɑɑrin tɔbiribu nuɑ, yerɑ bii wi u wɑ̃ɑ win nukurɔ u diirɑ mɑ Elisɑbɛti u Hunde Dɛɛro yibɑ. 42 Mɑ u gbɑ̃rɑ u nɛɛ, domɑrugiiwɑ wunɛ tɔn kurɔbu sɔɔ, domɑrugiiwɑ mɑɑ bii wi kɑɑ mɑ. 43 Wɑrɑ rɑ n nɛ, nɛn Yinnin mɛro u kɑ mɑn berɑm nɑ. 44 Domi wee, ye wunɛn tɔbiribun nɔɔ gɑ nɛn swɑɑ wɔri, bii wi u wɑ̃ɑ nɛn nukurɔ u diirɑ kɑ nuku dobu. 45 Doo nɔɔrugiiwɑ wunɛ ye ɑ kɑ nɑɑnɛ doke mɑ ye kpuro yɑ koo koorɑ ye Gusunɔ u nun sɔ̃ɔwɑ.
Mɑɑrin womu
46 Mɑɑri u womu kuɑ u nɛɛ,
nɛn gɔ̃ru gɑ Yinni sɑɑbu mɔ̀.
47 Nɛn hunde yɛ̃ɛrimɔ Gusunɔ nɛn Fɑɑbɑ kowon sɔ̃,
48 yèn sɔ̃ u kɑ mɑn nɔnu geu mɛɛrɑ, nɛ wi nɑ sɑ̃ɑ win yoo bwɛ̃ɛbwɛ̃ɛ.
Wee, sɑɑ tɛ̃n di sɑɑ bɑɑyeren tɔmbu bɑ koo mɑn soku doo nɔɔrugii
49 yèn sɔ̃ Gusunɔ dɑm kpurogii u mɑn gɑ̃ɑ bɑkɑnu kuɑ.
Win yĩsirɑ Dɛɛro.
50 U rɑ be bɑ nùn nɑsie durom kue sɑɑ bɑɑyere.
51 U win dɑm sɔ̃ɔsi,
mɑ u be bɑ tii suɑbun bwisikunu mɔ yɑrinɑsiɑ.
52 U sinɑmbu bɑndu yɑrɑ.
Mɑ u bwɛ̃ɛbwɛ̃ɛbu wɔlle suɑ.
53 U gɔ̃ɔrobu debiɑ kɑ gɑ̃ɑ geenu.
Mɑ u gobigibu girɑ nɔm dirɑ.
54 U win sɔmɔ Isireli somi
yèn sɔ̃ u win durom yɑɑyɑ
55 mɛ u Aburɑhɑmu kɑ win bibu kuɑmmɛ sere kɑ bɑɑdommɑ
nge mɛ u bɛsɛn bɑɑbɑbɑ nɔɔ mwɛɛru kuɑ.
56 Mɑɑri u kɑ Elisɑbɛti sinɑ nge suru itɑ, yen biru u gɔsirɑ win kpɑɑrɔ.
Yohɑnu Bɑtɛmu kowon mɑrubu
57 Elisɑbɛtin mɑrubun sɑnɑm yibɑ, mɑ u bii tɔn durɔ mɑrɑ. 58 Win berusebu kɑ win dusibu bɑ nuɑ mɑ Yinni u nùn durom bɑkɑm kuɑ, mɑ bɑ kɑ nùn nuku dobu mɔ̀ sɑnnu. 59 Mɑ n kuɑ sɔ̃ɔ nɔɔbɑ itɑse bɑ mɛnnɑ bu kɑ bii wi bɑngo ko, mɑ bɑ kĩ bu nùn yĩsiru kɛ̃ Sɑkɑri nge win tundon yĩsiru. 60 Adɑmɑ win mɛro u geruɑ u nɛɛ, ɑɑwo, Yohɑnuwɑ bɑ koo nùn soku.
61 Mɑ bɑ nɛɛ, wunɛn bweseru sɔɔ, goo sɑri wi u yĩsi te mɔ.
62 Yerɑ bɑ win tundo gɑri bikiɑ kɑ yĩreru bu kɑ giɑ mɛ u kĩ bu nùn soku. 63 Mɑ u bu gɑ̃ɑnu bikiɑ nì sɔɔ u koo yore mɑ u yoruɑ, Yohɑnuwɑ win yĩsiru. Mɑ biti yɑ tɔn be kpuro mwɑ. 64 Yɑnde win nɔɔ gɑ wukiɑrɑ, win yɑrɑ dɛndɑ, u gɑri mɔ̀ mɑ u Gusunɔ siɑrɑmɔ. 65 Bɛrum be kpuro mwɑ be bɑ wɑ̃ɑ berɑ mi, mɑ bɑ gɑri yi kpuro sɔ̃ɔnɑ bɑ kɑ sikerenɑ Yudeɑn tem wusu sɔɔ si su wɑ̃ɑ guunun berɑ giɑ. 66 Mɑ be bɑ gɑri yi nuɑ kpuro, bɑ yi beruɑ ben gɔ̃rusɔ, bɑ bikiɑnɑmɔ bɑ mɔ̀, ǹ n mɛn nɑ, ɑmɔnɑ bii wi, u koo rɑ ko.
Domi bɑ wɑ Yinnin nɔmu gɑ wɑ̃ɑ kɑ wi.
Sɑkɑri u Gusunɔn gɑri geruɑ
67 Mɑ bii win tundo Sɑkɑri, u Hunde Dɛɛro yibɑ mɑ u geruɑ u nɛɛ,
68 su Gusunɔ Isirelibɑn Yinni siɑrɑ
ye u kɑ win tɔmbu nɑɑwɑ
mɑ u bu yɑkiɑ.
69 Mɑ u kɑ sun Fɑɑbɑ kowo dɑmgii nɑɑwɑ
wi u sɑ̃ɑ Dɑfidi win sɔm kowon sikɑdobu.
70-71 Wiyɑ u koo sun fɑɑbɑ ko sɑɑ bɛsɛn yibɛrɛbɑn min di,
kɑ be bɑ sun tusɑ kpuron nɔmɑn di,
nge mɛ u rɑɑ geruɑ
sɑɑ win sɔmɔ dɛɛrobun nɔsun di
be bɑ wɑ̃ɑ yellu.
72 Mɛyɑ u kɑ bɛsɛn bɑɑbɑbɑ durom kuɑ,
mɑ u mɑɑ win nɔɔ mwɛɛ dɛɛrɑru yɑɑyɑ.
73 Nge mɛ u rɑɑ bɔ̃ruɑ
Aburɑhɑmu bɛsɛn bɑɑbɑn wuswɑɑɔ
74 u kɑ sun wɔrɑ sɑɑ bɛsɛn yibɛrɛbɑn nɔmɑn di,
kpɑ u sun ɑyeru wɛ̃ su kɑ nùn sɑ̃ bɛrum sɑriru sɔɔ,
75 kpɑ su ko dɛɛrobu kɑ gemgibu win wuswɑɑɔ
bɛsɛn wɑ̃ɑrun sɑnɑm kpuro sɔɔ.
76 Wunɛ mɑɑ nɛn bii,
bɑ koo nun sokuwɑ Wɔrukoon sɔmɔ
domi kɑɑ Yinni gbiiyɑ ɑ kɑ win swɛɛ sɔmɛ,
77 kpɑ ɑ mɑɑ win tɔmbu sɔ̃ mɑ bɑ koo fɑɑbɑ
wɑ bɑ̀ n bu ben torɑnu suuru kuɑ
78 bɛsɛn Yinnin wɔnwɔndun sɔ̃ te tɑ kpɑ̃.
Wɔnwɔn ten sɑɑbuwɑ
yɑm bururɑm ko n sun nɑɑwɑ wɔllun di
nge buruku sɔ̃ɔ yɑnɑ,
79 u kɑ bu yɑm dɛɛrɑsiɑ
be bɑ wɑ̃ɑ yɑm wɔ̃kuru sɔɔ
kɑ be gɔɔn bɛrum wukiri nge yɑm wɔ̃kuru.
Kpɑ u kɑ bɛsɛn nɑɑsu kpɑrɑ ɑlɑfiɑn swɑɑ sɔɔ.
80 Mɑ bii wi, u kpɛ̃ɑmɔ u bwisi mɔ̀, mɑ u dɑ u wɑ̃ɑ gbɑburɔ sere n kɑ kuɑ tɔ̃ɔ te u tii sɔ̃ɔsi Isirelibɑn wuswɑɑɔ.