2
Yesun mɑrubu
(I mɑɑ mɛɛrio Mɑteu 1:18-25)
1 Sɑnɑm mɛ sɔɔ, tem yɛ̃ro Ogusitu u woodɑ yɑrɑ bu tem bɑɑmɑ kpuron tɔmbu gɑri. 2 Gɑri gɑri gbiikɑɑ ye, bɑ ye kuɑwɑ Kirinusi Sirin tem yɛ̃ron wɑɑti. 3 Mɑ bɑɑwure u dɑ win wuuɔ bu kɑ nùn tireru doke.
4 Yosɛfu u mɑɑ seewɑ Gɑlilen wuu gɑgun di ge bɑ rɑ soku Nɑsɑrɛti, u dɑ Yudeɑn temɔ sere Dɑfidin wuuɔ ge bɑ rɑ nɛɛ Bɛtelehɛmu yèn sɔ̃ u sɑ̃ɑ Dɑfidin sikɑdobu, 5 kpɑ bu kɑ bu tireru doke, wi kɑ win kurɔ kɛ̃ɛro Mɑɑri. Mɑɑri wi, u gurɑ mɔ. 6 Ye bɑ wɑ̃ɑ mi, win sɑnɑm yibɑ ye u koo kɑ mɑ. 7 Mɑ u win bii gbiikoo mɑrɑ tɔn durɔ, mɑ u nùn sɛ̃kɑtiɑ tɛ̃kusi u nùn kpĩ yɑ̃ɑnun yɑkɑsu wɔllɔ, yèn sɔ̃ bɑ ǹ ɑyeru wɑ sɔbun sɔbiɑ yerɔ.
Gusunɔn gɔrɑdo
u yɑ̃ɑ kpɑrobu kure
8 N deemɑ yɑ̃ɑ kpɑrobɑ wɑ̃ɑ berɑ mi yɑkɑsɔ, bɑ ben yɑ̃ɑnu kɔ̃su wɔ̃kuru. 9 Yerɑ Gusunɔn gɔrɑdo u bu kure mɑ Gusunɔn yiikon girimɑ yɑ bu burure yɑ kɑ sikerenɑ mɑ bɛrum bu mwɑ gem gem. 10 Mɑ gɔrɑdo u bu sɔ̃ɔwɑ u nɛɛ, i ku nɑndɑ domi nɑ kɑ bɛɛ Lɑbɑɑri geɑ nɑɑwɑwɑ ye yɑ koo tɔmbu kpuro nuku doo bɑkɑbu wɛ̃. 11 Gisɔ Dɑfidin wuuɔ bɑ bɛɛ Fɑɑbɑ kowo mɑruɑ wi u sɑ̃ɑ Kirisi Yinni. 12 Wee, nge mɛ i ko kɑ nùn tubu, i ko bii wɛ̃ɛru wɑ bɑ sɛ̃kɑtiɑ tɛ̃kusi, u kpĩ yɑ̃ɑnun yɑkɑsu wɔllɔ.
13 Suɑru sɔɔ wɔllun tɑbu kowobu dɑbi dɑbiru bɑ kurɑmɑ gɔrɑdo win bɔkuɔ bɑ Gusunɔ siɑrɑmɔ bɑ gerumɔ,
14 bu Gusunɔ bɛɛrɛ wɛ̃ɛyɔ wɔllɔ.
Bɔri yɛndɑ n wɑ̃ɑ hɑnduniɑ sɔɔ be bɑ Gusunɔn nukuru dorɑsiɑmɔn suunu sɔɔ.
Yɑ̃ɑ kpɑrobɑ dɔɔ Bɛtelehɛmuɔ
15 Sɑnɑm mɛ wɔllun gɔrɑdo be, bɑ bu doonɑri bɑ wurɑ Gusunɔ wɔllɔ, yɑ̃ɑ kpɑro be, bɑ gerunɑ bɑ nɛɛ, ǹ n mɛn nɑ, su dɑ Bɛtelehɛmuɔ su wɑ ye yɑ koorɑ ye Yinni Gusunɔ u sun sɔ̃ɔsi.
16 Bɑ dɑ kɑ sɛndɑru mɑ bɑ Mɑɑri kɑ Yosɛfu wɑ kɑ bii wɛ̃ɛ te, tɑ kpĩ yɑ̃ɑnun yɑkɑsu wɔllɔ. 17 Ye bɑ nùn wɑ bɑ kpɑ bɑ sɑɑrɑ ye gɔrɑdo wi, u rɑɑ bu sɔ̃ɔwɑ bii win wɔllɔ. 18 Mɑ be kpuro be bɑ gɑri yi nuɑ bɑ biti soorɑ kɑ ye yɑ̃ɑ kpɑrobɑ bu sɔ̃ɔwɑ. 19 Adɑmɑ Mɑɑri u gɑri yi kpuro doke gɔ̃ruɔ u yi lɑsɑbu mɔ̀. 20 Mɑ yɑ̃ɑ kpɑro be, bɑ gɔsirɑ bɑ Gusunɔ bɛɛrɛ wɛ̃ɛmɔ, bɑ nùn siɑrɑmɔ yɑbu ye kpuron sɔ̃ ye bɑ nuɑ kɑ ye bɑ wɑ, nge mɛ gɔrɑdo wi, u rɑɑ bu sɔ̃ɔwɑ.
Bɑ Yesu yĩsiru kɑ̃
21 Ye sɔ̃ɔ nɔɔbɑ itɑ yɑ yibɑ bɑ bii wi bɑngo kuɑ, mɑ bɑ nùn yĩsiru kɑ̃ Yesu, yĩsi te Gusunɔn gɔrɑdo u nùn kɑ̃ bɑ sere win gurɑ suɑ.
Bɑ Yesu Gusunɔ tusiɑ sɑ̃ɑ yerɔ
22-23 Amɛniwɑ bɑ yoruɑ Yinnin woodɑ sɔɔ bɑ nɛɛ, <<Bii tɔn durɔ gbiikoo bɑɑwure wi bɑ mɑrɑ, bɑ koo nùn wunɑwɑ nɛnɛm Yinni Gusunɔn sɔ̃.>> Yen sɔ̃nɑ ye sɑnɑm yibɑ bu kɑ tii sɑ̃rɑsiɑ nge mɛ Mɔwisin woodɑ yɑ geruɑ, Mɑɑri kɑ Yosɛfu bɑ kɑ bii wi dɑ Yerusɑlɛmuɔ bu nùn Yinni tusiɑ, 24 kpɑ bu kɑ yɑ̃kuru ko nge mɛ bɑ geruɑ Yinnin woodɑ sɔɔ bɑ nɛɛ, <<Kpɑrukonu yiru, ǹ kun mɛ totobɛrɛ binu yiru.>>
25 Durɔ goo wɑ̃ɑ Yerusɑlɛmuɔ, win yĩsirɑ Simɛɔ. Durɔ wi, u sɑ̃ɑwɑ geegii wi u Gusunɔn bɛɛrɛ yɛ̃. U wi u koo Isirelibɑn nukuru yɛmiɑsiɑ swɑɑ dɑki mɑ Hunde Dɛɛro nùn wɑ̃ɑsi. 26 Hunde Dɛɛro wi, u mɑɑ nùn sɔ̃ɔsi mɑ u koo Kirisi, wi Yinni u gɔsɑ wɑ u sere gbi. 27 U dɑ sɑ̃ɑ yerɔ kɑ Hunde Dɛɛron kpɑrɑbu. Ye Yesun dusibɑ kɑ nùn duɑ bu nùn kuɑ nge mɛ woodɑ yɑ geruɑ, 28 Simɛɔ u nùn mwɑ win nɔmɑɔ mɑ u Gusunɔ sɑɑbu kuɑ u nɛɛ,
29 Yinni, tɛ̃ kɑɑ de nɛ wunɛn sɔm kowo, n hɑnduniɑ deri kɑ ɑlɑfiɑ
nge mɛ ɑ mɑn sɔ̃ɔwɑ.
30 Domi nɛn nɔni yi wunɛn fɑɑbɑ wɑ
31 ye ɑ sɔɔru kuɑ bwesenu kpuron wuswɑɑɔ.
32 Yeyɑ yɑm bururɑm mɛ mu koo tɔn tukobu wunɛn swɑɑ sɔ̃ɔsi.
Mu koo mɑɑ wunɛn tɔmbu Isirelibɑ bɛɛrɛ doke.
Simɛɔ u Gusunɔn gɑri geruɑ
33 Ye bɑ geruɑ bii win sɔ̃ yɑ win bɑɑ kɑ win mɛro biti kuɑ. 34 Simɛɔ u bu domɑru kuɑ mɑ u Mɑɑri, bii win mɛro sɔ̃ɔwɑ u nɛɛ, bɑ bii wini gɔsɑ bɑ yi u kɑ tɔn dɑbiru wɔrumɑsiɑ Isirelibɑ sɔɔ, kpɑ u tɔn dɑbinu seesiɑ. U koo mɑɑ ko yĩreru Gusunɔn min di te tɔmbɑ kun wurɑmɔ 35 kpɑ dɑbirun gɔ̃run bwisikunu nu sɔ̃ɔsirɑ. Wunɛn tii, nuku sɑnkirɑnu nu koo nun sɔku gɔ̃ruɔ nge tɑkobi.
Anɑ, Gusunɔn sɔmɔ tɔn kurɔ
36 Gusunɔn sɔmɔ tɔn kurɔ goo mɑɑ wɑ̃ɑ, win yĩsirɑ Anɑ, Fɑnuɛlin bii Asɛɛn bweseru sɔɔ. U tɔkɔru kuɑ gem gem. U rɑɑ sinɑ kɑ win durɔ wɔ̃ɔ nɔɔbɑ yiru sɑɑ win wɔndiɑrun di. 37 Mɑ u gɔminiru sinɑ wɔ̃ɔ wɛnɛ kɑ nnɛ. U ku rɑ kpe sɑ̃ɑ yerɔ, u rɑ n Gusunɔ sɑ̃ɑmɔ bururu kɑ yokɑ kɑ nɔɔ bɔkuru kɑ kɑnɑru. 38 U besirɑmɑ sɑɑ ye sɔɔ, u Gusunɔ sɑɑbu mɔ̀, mɑ u bii win gɑri tɔmbu kpuro sɔ̃ɔmɔ be bɑ mɑrɑ Gusunɔ u Yerusɑlɛmu yɑkiɑ.
Ben wurɑmɑru Nɑsɑrɛtiɔ
39 Sɑnɑm mɛ bɑ bɑɑyere kuɑ bɑ kpɑ nge mɛ Yinni Gusunɔn woodɑ, bɑ gɔsirɑ Nɑsɑrɛti ben wuuɔ Gɑlilen temɔ. 40 Mɑ bii wi, u kpɛ̃ɑmɔ mɑ u dɑm sosimɔ mɑ bwisi gee yibɑ wi sɔɔ. Gusunɔn durom mɑɑ wɑ̃ɑ kɑ wi.
Yesu dɑ sɑ̃ɑ yerɔ win birun sɑɑ
41 Wɔ̃ɔ bɑɑgere Yesun dusibu bɑ rɑ Gɔɔ sɑrɑribun tɔ̃ɔ bɑkɑru dewɑ Yerusɑlɛmuɔ. 42 Sɑnɑm mɛ Yesu u wɔ̃ɔ wɔkurɑ yiru mɔ bɑ tɔ̃ɔ bɑkɑ te dɑ nge mɛ ben komɑru. 43 Ye tɔ̃ɔ bɑkɑ ten sɑnɑm kpɑ sɑnɑm mɛ bɑ wiɔ, bii wi, Yesu u sinɑ Yerusɑlɛmuɔ, win dusibɑ kun yɛ̃. 44 Bɑ tɑmɑɑ sɑ̃ɑ u wɑ̃ɑwɑ ben wuuru sɔɔ. Ye bɑ sĩɑ tɔ̃ɔ giriru bɑ nùn kɑsu ben dusibu kɑ ben bɔrɔbɑ sɔɔ. 45 Adɑmɑ bɑ ǹ nùn wɑ mɑ bɑ gɔsirɑ Yerusɑlɛmuɔ bɑ nùn kɑsu. 46 Yen sɔ̃ɔ itɑse bɑ nùn wɑ sɑ̃ɑ yerɔ u sɔ̃ woodɑ yɛ̃robun suunu sɔɔ u bu swɑɑ dɑki u mɑɑ bu gɑri bikiɑmɔ. 47 Be bɑ nùn swɑɑ dɑki kpuro bɑ biti kuɑ win bwisi kɑ win gɑri wisibun sɔ̃. 48 Sɑnɑm mɛ win dusibɑ nùn wɑ biti yɑ bu mwɑ mɑ win mɛro u nùn bikiɑ u nɛɛ, nɛn bii ɑmɔnɑ ɑ kɑ sun kuɑ mɛ. Nɛ kɑ wunɛn bɑɑ wee, sɑ nun kɑsu kɑ nuku sɑnkirɑnu.
49 Mɑ u bu bikiɑ u nɛɛ, mbɑ n kuɑ i kɑ mɑn kɑsu. I ǹ yɛ̃ mɑ nɑ ǹ kon ko nɑ kun nɛn bɑɑbɑn wunɑnɔsu kue?
50 Adɑmɑ gɑri yi u bu sɔ̃ɔwɑ mi, yi ǹ bu yeeri.