Mɑɑku 13

Yesu u sɑ̃ɑ yerun kɔrɑbun gɑri mɔ̀

(I mɑɑ mɛɛrio Mɑteu 24:1-2, Luku 21:5-6)

¹ Nge mɛ Yesu u yɑriɔ sɑ̃ɑ yerun di, win bɔ̃ɔ turo u nɛɛ, yinni, ɑnnɑ ɑ dii bɑkɑnu wɑ kɑ nin kpee burɑnu!

² Mɑ Yesu nùn sɔ̃ɔwɑ u nɛɛ, ɑ dii bɑkɑ ni wɑ? Bɑɑ kpee teeru tɑ ǹ ko n sɔndi ten tensim wɔllɔ. Bɑ koo ni kpuro surɑwɑ.

Wɑhɑlɑ ye yɑ koo nɑ hɑnduniɑ yu sere kpe

(I mɑɑ mɛɛrio Mɑteu 24:3-14, Luku 21:7-19)

³ Yen biru Yesu u dɑ Olifin guurɔ u sinɑ u wuswɑɑ kisi sɑ̃ɑ yeru giɑ. Yerɑ Piɛɛ kɑ Yɑkɔbu kɑ Yohɑnu kɑ Andere bɑ dɑ be tɔnɑ bɑ nùn bikiɑ bɑ nɛɛ, ⁴ ɑ sun sɔ̃ɔwɔ, dommɑ yɑbu ye, yɑ koo koorɑ. Yĩre terɑ̀ tɑ koo sun sɔ̃ɔsi mɑ yen sɑɑ yɑ turɑ.

⁵ Mɑ Yesu u bu sɔ̃ɔbu wɔri u nɛɛ, i tii lɑɑkɑri koowo, kpɑ goo ku rɑɑ bɛɛ nɔni wɔ̃ke. ⁶ Tɔn dɑbirɑ koo nɑ kɑ nɛn yĩsiru bɑ n mɔ̀, beyɑ bɑ sɑ̃ɑ Kirisi wi, kpɑ bu tɔn dɑbinu nɔni wɔ̃ke. ⁷ Ì n tɑbun dɑmu dɑmusu nɔɔmɔ, i ku de n bɛɛ bɛrum ko. Yeni yɑ ǹ koo ko yɑ kun koore, ɑdɑmɑ n ǹ ginɑ hɑnduniɑn kpeeru mi. ⁸ Domi bwesenu koo seesinɑ. Sinɑmbɑ koo seesinɑ. Tem yĩiribu kɑ gɔ̃ɔru ko n wɑ̃ɑ gɑm kɑ gɑm. Ye kpuro n ko n sɑ̃ɑwɑ nge tɔn kurɔn nuku wuriribun tore.

⁹ Adɑmɑ bɛɛ, i n bɛɛn tii sɛ. Domi bɑ koo bɛɛ mwɑ kpɑ bu bɛɛ siri kowobu nɔmu sɔndiɑ. Bɑ koo mɑɑ bɛɛ so mɛnnɔ yenɔ, kpɑ bu kɑ bɛɛ dɑ tem yɛ̃robu kɑ sinɑmbun wuswɑɑɔ nɛn sɔ̃ kpɑ i kɑ seedɑ di. ¹⁰ Yu sere koorɑ mɛ bɑ koo ginɑ bwesenu kpuro Lɑbɑɑri geɑ wɑɑsu kuɑ. ¹¹ Adɑmɑ sɑnɑm mɛ bɑ bɛɛ gɑwe bɑ kɑ dɔɔ bu bɛɛ siri kowobu nɔmu bɛriɑ, i ku gbi i wururɑ kɑ ye i ko gere. Sɑɑ ye, yɑ̀ n tunumɑ, i geruo ye Gusunɔ u koo bɛɛ sɔ̃. Domi n ǹ bɛɛn tii i ko gere, mɑ n kun mɔ Hunde Dɛɛro. ¹² Mɔɔ kɑ wɔnɔ bɑ koo kɔrumɔtɔnu kuɑnɑ bu kɑ ben turo go, mɛyɑ tundobɑ koo mɑɑ ben bibu kuɑ. Bibu bɑ koo ben mɔwɔbu seesi kpɑ bu de bu bu go. ¹³ Tɔmbu kpurowɑ bɑ ko n bɛɛ tusɑ nɛn yĩsirun sɔ̃. Adɑmɑ wi u tɛmɑnɑ sere kɑ nɔrɔ, u koo fɑɑbɑ wɑ.

Gɑ̃ɑ kɔ̃sunun gɑri

(I mɑɑ mɛɛrio Mɑteu 24:15-28, Luku 21:20-24)

¹⁴ Yesu mɑɑ nɛɛ, ɑdɑmɑ i ko kɑm koosion bwɑ̃ɑroku kɔ̃su wɑ gɑ yɔ̃ mi n ǹ weenɛ gɑ n wɑ̃ɑ. Wi u tire teni gɑrimɔ u tubuo sɑ̃ɑ sɑ̃ɑ. Sɑnɑm mɛyɑ n weenɛ be bɑ wɑ̃ɑ Yudeɑɔ bu kpikiru su bu dɑ guunɔ. ¹⁵ Kpɑ wi u wɑ̃ɑ dii tɛɛrɑ wɔllɔ u ku sɑrɑ u du dirɔ u gɑ̃ɑnu suɑ. ¹⁶ Wi u mɑɑ woo gberɔ u ku gɔsirɑ yɛnuɔ u win yɑbe bɑkɑru suɑ. ¹⁷ Annɑ kurɔ ben nɔni swɑ̃ɑrɑ ko n nɛ sɑnɑm mɛ, be bɑ guri mɔ kɑ be bɑ bibu bɔm kɛ̃mɔ. ¹⁸ I Gusunɔ kɑnɔ kpɑ sɑɑ ye, yu ku rɑɑ ko woorun sɑnɑm. ¹⁹ Domi sɑnɑm mɛ sɔɔ, nɔni swɑ̃ɑ bɑkɑrɑ ko n wɑ̃ɑ tèn bweseru tɑ ǹ koore sɑɑ hɑnduniɑn toren di sere kɑ gisɔ. Ten bweserɑ kun mɑm mɑɑ sisi. ²⁰ Yinni ù kun dɑɑ tɔ̃ɔ te kɑwe, goo kun tiɑrɔ. Adɑmɑ wigii be u gɔsɑn sɔ̃nɑ u tɔ̃ɔ te kɑwɑ. ²¹ Sɑɑ ye sɔɔ, goo ù n bɛɛ sɔ̃ɔmɔ u nɛɛ, Kirisi wi, u wɑ̃ɑ mini, ǹ kun mɛ u wɑ̃ɑ miɔnɔ, i ku rɑ nɑɑnɛ ko. ²² Domi Kirisi weesugibu kɑ sɔmɔ weesugibɑ koo yɑri. Bɑ koo yĩrenu kɑ sɔm mɑɑmɑɑkigiɑ ko, bu kɑ be Gusunɔ u gɔsɑ nɔni wɔ̃ke ǹ n ko n koorɑ. ²³ Wee, nɑ bɛɛ yeni kpuro sɔ̃ɔwɑ kɔ yu sere koorɑ. Yen sɔ̃, i n tii sɛ.

Tɔnun Biin nɑɑru

(I mɑɑ mɛɛrio Mɑteu 24:29-31, Luku 21:25-28)

²⁴ Yesu mɑɑ nɛɛ, ɑdɑmɑ sɑɑ ye sɔɔ, nɔni swɑ̃ɑrun biru, sɔ̃ɔ u koo yɑm tĩrɑ, suru kun mɑɑ wɑɑrɔ. ²⁵ Wɔllun kperi yi koo wɔrumɑ temɔ, kpɑ wɔllun dɑm mu yĩiri. ²⁶ Sɑɑ yerɑ bɑ koo Tɔnun Bii wɑ u kurɑmɑ guru winu sɔɔ kɑ dɑm bɑkɑm kɑ yiiko. ²⁷ U koo win gɔrɑdobɑ gɔri hɑnduniɑn goonu nnɛ sɔɔ bu be u gɔsɑ mɛnnɑ sɑɑ hɑnduniɑn nɔrun di sere kɑ wɔllɔ.

Yĩre te dɑ̃ɑ te bɑ mɔ̀ figie

tɑ sɔ̃ɔsimɔ

(I mɑɑ mɛɛrio Mɑteu 24:32-35, Luku 21:29-33)

²⁸ Yesu mɑɑ nɛɛ, tɛ̃ i de dɑ̃ɑ te bɑ mɔ̀ figie tu bɛɛ gɑri gɛɛ sɔ̃ɔsi. Sɑnɑm mɛ tɑ kpɑrɑru toruɑ, i yɛ̃ mɑ tombururɑ tɑ turuku kuɑ. ²⁹ Nge mɛyɑ mɑɑ, ì n wɑ yeni kpuro yɑ koorɑmɔ, i n yɛ̃ mɑ nɛ Tɔnun Bii nɑ turuku kuɑwɑ, nɑ mɑm wɑ̃ɑ kɔnnɔwɔ. ³⁰ Kɑ geemɑ nɑ bɛɛ sɔ̃ɔmɔ, tɛ̃n tɔn beni bɑ ǹ gbimɔ ye kpuro yu kɑ koorɑ. ³¹ Wɔllu kɑ tem bɑɑ yɑ koo doonɑ, ɑdɑmɑ nɛn gɑri kun doonɔ pɑi.

Gusunɔ turowɑ

hɑnduniɑn kpeerun sɑɑ yɛ̃

(I mɑɑ mɛɛrio Mɑteu 24:36-44)

³² Yesu mɑɑ nɛɛ, ye n sɑ̃ɑ nɛn nɑɑrun sɑɑ, goo sɑri wi u yen tɔ̃ru yɛ̃, bɑɑ Gusunɔn gɔrɑdobɑ be bɑ wɑ̃ɑ wɔllɔ, bɑɑ mɑm Biin tii, mɑ n kun mɔ Bɑɑbɑ turo. ³³ I n tii sɛ kpɑ i n swɑɑ mɛɛrɑ, domi i ǹ yɛ̃ dɔmɑ te tɔ̃ɔ te, tɑ koo tunumɑ. ³⁴ N ko n sɑ̃ɑwɑ nge durɔ goo wi u sɑnum dɔɔ. U win yɛnu win sɔm kowobu nɔmu sɔndiɑ, u ben bɑɑwure win sɔmburu wɛ̃, mɑ u kɔnnɔ kɔ̃so sɔ̃ɔwɑ u n swɑɑ mɛɛrɑ. ³⁵ Ǹ n mɛn nɑ, i n swɑɑ mɛɛrɑ, domi i ǹ yɛ̃ nge yɛnu yɛ̃ro u koo tunumɑ yokɑ, ǹ kun mɛ wɔ̃ku suunu, ǹ kun mɛ sɑɑ ye gue sumɔ, ǹ kun mɛ bururu. ³⁶ Ù n tunumɑ suɑru sɔɔ, kpɑ u ku rɑɑ bɛɛ deemɑ i dò. ³⁷ Ye nɑ bɛɛ sɔ̃ɔmɔ yerɑ nɑ mɑɑ bɑɑwure sɔ̃ɔmɔ, i n swɑɑ mɛɛrɑ.