24
Yesu u sɑ̃ɑ yerun kɔrɑbun gɑri mɔ̀
1 Yesu yɑrɑ sɑ̃ɑ yerun di. Sɑnɑm mɛ u doonɔ win bwɑ̃ɑbɑ dɑ win mi bu kɑ nùn sɑ̃ɑ yerun bɑnɑ sɔ̃ɔsi. 2 Yerɑ u bu sɔ̃ɔwɑ u nɛɛ, i yɑbu ye kpuro wɑ? Kɑ geemɑ nɑ bɛɛ sɔ̃ɔmɔ bɑ koo ye kpuro surɑ, bɑɑ kpee teeru tɑ ǹ ko n sɔndi ten tensim wɔllɔ.
Wɑhɑlɑ ye yɑ koo nɑ hɑnduniɑ yu sere kpe
3 Yesu u sɔ̃ guu te bɑ mɔ̀ Olifin wɔllɔ. Yerɑ win bwɑ̃ɑbɑ dɑ win mi be tɔnɑ bɑ nùn bikiɑ bɑ nɛɛ, ɑ sun sɔ̃ɔwɔ ǹ n dommɑn nɑ yɑbu ye, yɑ koo koorɑ kɑ yĩre te tɑ koo wunɛn nɑɑru kɑ hɑnduniɑn kpeeru sɔ̃ɔsi.
4 Yesu bu sɔ̃ɔwɑ u nɛɛ, i n tii sɛ kpɑ goo u ku rɑɑ bɛɛ nɔni wɔ̃ke. 5 Domi tɔn dɑbirɑ koo nɑ kɑ nɛn yĩsiru bɑ n mɔ̀, beyɑ bɑ sɑ̃ɑ wi Gusunɔ u gɔsɑ, kpɑ bu tɔn dɑbiru nɔni wɔ̃ke. 6 I ko i n tɑbun dɑmu dɑmusu nɔɔmɔ. I ku de n bɛɛ bɛrum ko. Yeni yɑ ǹ koo ko yɑ kun koore, ɑdɑmɑ n ǹ ginɑ hɑnduniɑn kpeeru mi. 7 Bwesenu koo seesinɑ nu tɑbu ko, sinɑmbɑ koo tɑbu seesinɑ. Gɔ̃ɔru kɑ tem yĩiribu ko n wɑ̃ɑ berɑ kɑ berɑ. 8 Ye kpuro yɑ ko n sɑ̃ɑwɑ nge tɔn kurɔn nuku wuriribun tore.
9 Tɔmbɑ koo bɛɛ gɑbu nɔmu sɔndiɑ bu bɛɛ tɔ̃yɑ ko kpɑ bu bɛɛ go. Bwesenu kpuro nu koo bɛɛ tusi nɛn yĩsirun sɔ̃. 10 Sɑnɑm mɛ sɔɔ, tɔn dɑbirɑ koo biru wurɑ. Bɑ koo kɔrumɔtɔnu kuɑnɑ kpɑ bu tusinɑ. 11 Sɔmɔ weesugii dɑbirɑ koo yɑrimɑ bu tɔn dɑbinu nɔni wɔ̃ke. 12 Kɔ̃sɑn kobu koo dɑbiɑ sere tɔn dɑbi dɑbinun kĩrɑ koo yɛmiɑ. 13 Adɑmɑ wi u tɛmɑnɑ sere kɑ nɔrɔ, wiyɑ u koo fɑɑbɑ wɑ. 14 Gusunɔn bɑndun Lɑbɑɑri geɑ yeni yɑ koo nɔɔrɑ hɑnduniɑ kpuro sɔɔ, kpɑ yu ko seedɑ bwesenu kpuron mi. Sɑnɑm mɛ sɔɔrɑ kpeerɑbu koo tunumɑ.
Gɑ̃ɑ kɔ̃sunun gɑri
15 Yesu mɑɑ nɛɛ, Gusunɔn sɔmɔ Dɑniɛli u rɑɑ <<Kɑm koosion bwɑ̃ɑroku kɔ̃sun>> gɑri kuɑ. Geyɑ i ko wɑ gɑ yɔ̃ yɑm dɛɛrɑm sɔɔ. Wi u tire teni gɑrimɔ, u tubuo sɑ̃ɑ sɑ̃ɑ. 16 Sɑnɑm mɛyɑ n weenɛ be bɑ wɑ̃ɑ Yudeɑɔ bu duki su bu dɑ guunu giɑ. 17 Wi u wɑ̃ɑ dii tɛɛrɑn wɔllɔ u ku rɑɑ sɑre u du dirɔ u yɑ̃nu gurɑ. 18 Wi u mɑɑ woo gberɔ u ku gɔsirɑ yɛnuɔ u kɑ win kumbooro suɑ. 19 Amɔnɑ kurɔ ben wɑhɑlɑ ko n nɛ sɑnɑm mɛ sɔɔ, be bɑ guri mɔ kɑ be bɑ bibu bɔm kɛ̃mɔ. 20 I Gusunɔ kɑnɔ kpɑ bɛɛn kpikirun sɑnɑm mu kun sɑ̃ɑ woorun sɑɑ ǹ kun mɛ tɔ̃ɔ wɛ̃rɑrugiru sɔɔ. 21 Domi sɑnɑm mɛ sɔɔ, nɔni swɑ̃ɑ bɑkɑrɑ ko n wɑ̃ɑ tèn bweseru tɑ ǹ koore sɑɑ hɑnduniɑn toren di sere kɑ gisɔ. Ten bweserɑ kun mɑm mɑɑ sisi. 22 Gusunɔ ù kun dɑɑ sɑnɑm mɛ kɑwe goo kun tiɑrɔ. Adɑmɑ u mu kɑwɑwɑ be u gɔsɑn sɔ̃.
23 Sɑɑ ye sɔɔ, goo ù n bɛɛ sɔ̃ɔwɑ u nɛɛ, Kirisi wi, u wɑ̃ɑ mini, ǹ kun mɛ u wɑ̃ɑ giɔ, i ku rɑ nɑɑnɛ ko. 24 Domi Kirisi weesugibu kɑ Gusunɔn sɔmɔ weesugibɑ koo yɑri. Bɑ koo yĩre bɑkɑnu kɑ sɔm mɑɑmɑɑkigiɑ ko bu kɑ tɔmbu nɔni wɔ̃ke, kɑ mɑm be Gusunɔ u gɔsɑ, ǹ n ko n koorɑ. 25 N wee, nɑ bɛɛ ye sɔ̃ɔwɑ yɑ sere nɑ.
26 Bɑ̀ n mɑɑ bɛɛ sɔ̃ɔwɑ, wee u wɑ̃ɑ gbɑburɔ, i ku dɑ mi. Nge bɑ̀ n bɛɛ sɔ̃ɔwɑ, wee u wɑ̃ɑ dii sɔɔwɔ, i ku rɑ nɑɑnɛ ko. 27 Nge mɛ guru mɑɑkinu rɑ bɑlli wɔllɔ sɑɑ sɔ̃ɔ yɑri yerun di n kɑ dɑ duu yerɔ, nge mɛyɑ Tɔnun Biin nɑɑru tɑ ko n mɑɑ sɑ̃ɑ. 28 Yɑm mi gorɑ wɑ̃ɑ, miyɑ yɑberekunu koo mɛnnɑ.
Tɔnun Biin nɑɑru
29 Mɑ Yesu mɑɑ nɛɛ, sɑnɑm mɛn nɔni swɑ̃ɑrun biru, mii mii sɔ̃ɔ koo yɑm tĩrɑ, suru kun mɑɑ win yɑm bururɑm sɔ̃ɔsimɔ, kperi koo wɔrumɑ wɔllun di kpɑ wɔllun dɑm mu yĩiri. 30 Sɑnɑm mɛyɑ Tɔnun Biin yĩrerɑ koo kurɑ wɔllɔ. Hɑnduniɑn bwesenu kpuro nu koo swĩ. Nu koo Tɔnun Bii wɑ u wee wɔllun di guru wiru sɔɔ kɑ dɑm bɑkɑm kɑ yiiko. 31 Kɔbi bɑkɑ koo swĩ kpɑ u win wɔllun gɔrɑdobɑ gɔri hɑnduniɑn goonu nnɛ sɔɔ. Bɑ koo be u gɔsɑ mɛnnɑ hɑnduniɑ kpuron di.
Yĩre te dɑ̃ɑ te bɑ mɔ̀ figie
tɑ sɔ̃ɔsimɔ
32 Yesu mɑɑ nɛɛ, i de n bɛɛ yeeri ye dɑ̃ɑ te bɑ mɔ̀ figie tɑ sɔ̃ɔsimɔ. Sɑɑ mìn di ten kɑ̃ɑsi dwiiyɑ mɑ tɑ kpɑrɑru torumɑ, i yɛ̃ mɑ tombururɑ tɑ turuku kuɑ. 33 Nge mɛyɑ bɛɛ mɑɑ, ì n yɑbu ye kpuro wɑ, i n yɛ̃ mɑ sɑɑ yɑ sisi yɑ turuku koomɑ. 34 Kɑ geemɑ nɑ bɛɛ sɔ̃ɔmɔ, tɔn be bɑ wɑ̃ɑ tɛ̃ ben kpuro kun gbimɔ yɑbu ye kpuro yu kɑ tunumɑ. 35 Wɔllu kɑ tem bɑɑ yɑ koo doonɑ, ɑdɑmɑ nɛn gɑri kun dɔɔnɔ pɑi.
Gusunɔ turowɑ
hɑnduniɑn kpeerun sɑɑ yɛ̃
36 Yesu mɑɑ nɛɛ, ye n sɑ̃ɑ nɛn nɑɑrun sɑɑ, goo sɑri wi u yen tɔ̃ru yɛ̃, bɑɑ gɔrɑdobɑ be bɑ wɑ̃ɑ wɔllɔ, bɑɑ mɑm Biin tii, mɑ n kun mɔ Bɑɑbɑ turo. 37 Nge mɛ n kuɑ Nɔwɛn sɑɑ, mɛyɑ n ko n mɑɑ ko sɑnɑm mɛ Tɔnun Bii u koo nɑ. 38 Geemɑ nim yibu bɑkɑ te, tu sere nɑ, tɔmbɑ dimɔ bɑ nɔrumɔ bɑ kurɔ kpɑɑnu mɔ̀, bɑ ben bibu durɔbu kɛ̃mɔ sere dɔmɑ te Nɔwɛ duɑ goo sɔɔ. 39 Bɑ ǹ gɑ̃ɑnu bwisikɑ sere nim yibu bɑkɑ te, tɑ kɑ turɑ tɑ kɑ bu doonɑ kpuro. Nge mɛyɑ n ko n sɑ̃ɑ sɑnɑm mɛ Tɔnun Bii u koo nɑ. 40 Sɑnɑm mɛyɑ tɔmbu yiru bɑ ko n wɑ̃ɑ gberɔ. Bɑ koo turo suɑ bu turo deri. 41 Tɔn kurɔbu yiru bɑ ko n nɑmmɔ. Bɑ koo turo suɑ bu turo deri. 42 Yen sɔ̃, i n swɑɑ mɛɛrɑ domi i ǹ yɛ̃ tɔ̃ɔ te bɛɛn Yinni u koo tunumɑ. 43 I de yeni yu bɛɛ yeeri. Yɛnu yɛ̃ro ù n yɛ̃ wɔ̃kurun sɑɑ ye gbɛnɔ u koo nɑ, u koo dom se kpɑ u ku de u du win yɛnuɔ. 44 Yen sɔ̃, bɛɛn tii i n sɔɔru sɑ̃ɑ domi Tɔnun Bii u koo nɑwɑ sɑɑ ye i ǹ bwisikɑ.
Yoo nɑɑnɛgii
kɑ nɑɑnɛ sɑrirugii
(I mɑɑ mɛɛrio Luku 12:41-48)
45 Mɑ Yesu nɛɛ, wɑrɑ sɑ̃ɑ yoo lɑɑkɑrigii wi u nɑɑnɛ mɔ. Wiyɑ wi win yinni u win sɔm kowo be bɑ tie nɔmu sɔndiɑ, u kɑ bu nɔɔri sɑɑ ye n weenɛ. 46 Doo nɔɔrugiiwɑ sɔm kowo wi, win yinni ù n deemɑ u mɔ̀ mɛ, sɑnɑm mɛ u koo wurɑmɑ. 47 Kɑ geemɑ nɑ bɛɛ sɔ̃ɔmɔ, yinni wi, u koo win dukiɑ kpuro sɔm kowo wi nɔmu bɛriɑ. 48 Adɑmɑ ù n sɑ̃ɑ sɔm kowo kɑm, mɑ u bwisikumɔ u mɔ̀, win yinni tɛɛmɔ, 49 mɑ u seemɔ u win sɔm kowosibu soomɔ, mɑ u dimɔ u nɔrumɔ kɑ tɑm nɔrobu sɑnnu, 50 win yinni koo wurɑmɑ dɔmɑ te u ǹ nùn yĩiyɔ kɑ sɑɑ ye u ǹ yɛ̃. 51 Kpɑ u nùn bɔɔri kpiri kpirikɑ kpɑ u dɑ u kɑ murɑfitibɑ nɔni swɑ̃ɑru bɔnu ko. Miyɑ u koo wiru nɔmɑ sɔndi u swĩ.