21
Gobi yi kurɔ gɔmini goo u kpɛ̃ɛ
(I mɑɑ mɛɛrio Mɑɑku 12:41-44)
1 Yesu u nɔni seeyɑ mɑ u dukiɑgibu wɑ bɑ gobi kpɛ̃ɛmɔ sɑ̃ɑ yerun kpɑkororu sɔɔ mi bɑ rɑ gobi doke. 2 U mɑɑ kurɔ gɔmini sɑ̃ɑro goo wɑ u gobi piiminu yiru kpɛ̃ɛmɔ mi. 3 Mɑ u nɛɛ, nɑ bɛɛ sɔ̃ɔmɔ kɑ gem, gɔmini sɑ̃ɑro wi, u kpɛ̃ɛ n be kpuro kere be bɑ tie. 4 Domi ye n sɔndi ben mɔɔ bɑkɑru sɔɔ yerɑ bɑ wunɑ bɑ doke, ɑdɑmɑ win yɑ̃ɑru sɔɔ u kpuro kpɛ̃ɛ ye u kɑ tii kɔ̃su.
Yesu u sɑ̃ɑ yerun
kɔrɑbun gɑri mɔ̀
(I mɑɑ mɛɛrio Mɑteu 24:1-2, Mɑɑku 13:1-2)
5 Gɑbɑ gerumɔ mɑ sɑ̃ɑ yeru tɑ burɑru mɔ tɑ wɑ̃ ten kpee burɑnu kɑ kɛ̃ɛ ni bɑ Gusunɔ wɛ̃n sɔ̃. Yerɑ Yesu u nɛɛ, 6 sɑnɑm sisi mɛ̀ sɔɔ ye i wɑɑmɔ mini kpuro yen gɑɑn kperɑ kun ko n wɑ̃ɑ ten tensim wɔllɔ. Ni kpurowɑ nu koo wɔri.
Wɑhɑlɑ ye yɑ koo nɑ
hɑnduniɑ yu sere kpe
(I mɑɑ mɛɛrio Mɑteu 24:3-14, Mɑɑku 13:3-13)
7 Bɑ nùn bikiɑ bɑ nɛɛ, yinni, ǹ n mɛn nɑ, dommɑ yeni yɑ koo tunumɑ. Yĩre terɑ̀ tɑ koo gbi tu kookoo si sɔ̃ɔsi.
8 Yesu u nɛɛ, i lɑɑkɑri koowo, i ku de bu bɛɛ nɔni wɔ̃ke. Domi dɑbirɑ koo nɑ kɑ nɛn yĩsiru, kpɑ bɑ n gerumɔ bɑ n mɔ̀, sɑɑ yɑ turuku kuɑ, beyɑ bɑ sɑ̃ɑ Kirisi wi. Adɑmɑ i ku bu swĩi. 9 Ì n tɑbun dɑmu nɔɔmɔ kɑ nɔɔsinɑɑ sɑriru, i ku nɑndɑ. Domi yerɑ n ko n gbi n tunumɑ, ɑdɑmɑ n ǹ kpee te mi ginɑ.
10 Yerɑ u kpɑm bu sɔ̃ɔwɑ u nɛɛ, bwesenu koo seesinɑ, sinɑmbɑ koo mɑɑ seesinɑ. 11 Tem yĩiri bɑkɑbu ko n wɑ̃ɑ kɑ bɑrɑnu kɑ gɔ̃ɔru, gɑm kɑ gɑm. Mɑɑmɑɑki bɛrumgii kɑ yĩre bɑkɑnu nu ko n wɑ̃ɑ wɔllɔ.
12 Adɑmɑ yɑbu ye kpuro yu sere koorɑ bɑ koo bɛɛ mwɑ bu bɛɛ nɔni sɔ̃. Bɑ koo bɛɛ siri kowobu nɔmu sɔndiɑ mɛnnɔ yenɔ, bɑ koo bɛɛ pirisɔm doke, kpɑ bu kɑ bɛɛ dɑ sinɑ bokobu kɑ tem yɛ̃robun kɔnnɔsɔ nɛn yĩsirun sɔ̃. 13 Yerɑ n koo bɛɛ ɑyeru wɛ̃ i kɑ seedɑ di. 14 I de i n yɛ̃ mɑ n ǹ bɛɛn bwisikunu i ko kɑ tii yinɑ. 15 Domi kon de i gɑri gere kɑ bwisi yi bɛɛn yibɛrɛbɑ kpuro bɑ ǹ kpɛ̃ bu yinɑ, ǹ kun mɛ bu siki. 16 Bɛɛn mɔwɔbu mɑm, kɑ bɛɛn mɑɑbu kɑ bɛɛn wɔnɔbu kɑ bɛɛn dusibu kɑ bɛɛn bɔrɔbɑ, bɑ koo bɛɛ bu nɔmu sɔndiɑ kpɑ bu dɑbiru go bɛɛ sɔɔ. 17 Bɑɑwure koo bɛɛ tusi nɛn yĩsirun sɔ̃. 18 Adɑmɑ bɑɑ bɛɛn wirun serɑ kun borimɔ. 19 Bɛɛn tɛmɑnɑbun sɑɑbu bɛɛn hunde yɑ koo fɑɑbɑ wɑ.
Yerusɑlɛmun kpeerɑbun gɑri
(I mɑɑ mɛɛrio Mɑteu 24:15-21, Mɑɑku 13:14-19)
20 Mɑ Yesu mɑɑ nɛɛ, dɔmɑ te i wɑ tɑbu kowobɑ Yerusɑlɛmu tɑrusi, i n yɛ̃ mɑ yen kpeerɑsiɑbu turuku kuɑwɑ. 21 Sɑnɑm mɛ, be bɑ wɑ̃ɑ Yudeɑɔ, bu suuwo guunu wɔllu giɑ. Be bɑ mɑɑ wɑ̃ɑ Yerusɑlɛmun suunu sɔɔ bu yɑrio, be bɑ mɑɑ wɑ̃ɑ gberɔ bu ku wurɑ wuuɔ. 22 Domi sɑɑ yeyɑ mɔru kɔsiɑrun sɑnɑm, kpuro yu kɑ koorɑ ye bɑ yoruɑ Gusunɔn gɑri sɔɔ. 23 Gurigibu kɑ tɔn kurɔ be bɑ bibu bɔm kɛ̃mɔ sɑɑ ye sɔɔ, bɑ koo nɔni swɑ̃ɑru wɑ. Domi nuku sɑnkirɑ bɑkɑnu ko n wɑ̃ɑ tem sɔɔ, kɑ mɑɑ mɔru bɑkɑ bu kɑ tɔn be sɛɛyɑsiɑ. 24 Bɑ koo bu sɔ̃siri kɑ tɑkobi, kpɑ bu bu yoru mwɑ tem bɑɑmɑ. Bwese tukunu koo mɑɑ Yerusɑlɛmu tɑɑku sere nin sɑɑ yu kɑ turi.
Tɔnun Biin nɑɑru
(I mɑɑ mɛɛrio Mɑteu 24:29-31, Mɑɑku 13:24-27)
25 Yesu kpɑm nɛɛ, yĩrenu ko nu n wɑ̃ɑ sɔ̃ɔ kɑ suru kɑ kperi sɔɔ. Tem sɔɔ, nɔni swɑ̃ɑ bɑkɑrɑ koo bwesenu deemɑ kpɑ nu biti soorɑ nim wɔ̃ku kɑ nim kurenun wurenun sɔ̃. 26 Nɑndɑbu koo tɔmbu wɑsikirɑ bɑ̀ n mɑrɑ ye n koo koorɑ hɑnduniɑ sɔɔ, domi wɔllun dɑm mu koo yĩiri. 27 Sɑɑ yerɑ bɑ koo Tɔnun Bii wɑ u kurɑmɑ guru wiru sɔɔ, kɑ dɑm bɑkɑm kɑ yiiko. 28 Yeni yɑ̀ n nɑɑbu toruɑ, i yɔ̃rɔ sɔnwɔ kpɑ i bɛɛn wiru seeyɑ yèn sɔ̃ bɛɛn yɑkiɑbu turuku kuɑ.
Yĩre te dɑ̃ɑ te bɑ mɔ̀ figie
tɑ sɔ̃ɔsimɔ
(I mɑɑ mɛɛrio Mɑteu 24:32-35, Mɑɑku 13:28-31)
29 Mɑ u bu gɑrin weenɑsii kuɑ u nɛɛ, i dɑ̃ɑ te bɑ mɔ̀ figie mɛɛrio kɑ dɑ̃nu kpuro. 30 Nù n kpɑrɑru toruɑ, bɛɛn tii ì n mɛɛrɑ, i yɛ̃ mɑ yɑnde tombururɑ tɑ turuku koomɑ. 31 Nge mɛyɑ bɛɛ mɑɑ, ì n yɑbu ye wɑ yɑ wee, i n yɛ̃ mɑ n turuku kuɑwɑ Gusunɔ u kɑ bɑndu swĩi. 32 Kɑ geemɑ nɑ bɛɛ sɔ̃ɔmɔ, sɑɑ yenin tɔmbu gɑbu bɑ ǹ gbimɔ yɑbu ye kpuro yu kɑ koorɑ. 33 Wɔllu kɑ tem mu koo doonɑ, ɑdɑmɑ nɛn gɑri kun doonɔ.
I tii lɑɑkɑri ko
34 Mɑ Yesu kpɑm nɛɛ, i n bɛɛn tii sɛ, kpɑ i ku rɑ ko lɑɑkɑri sɑribɑ dibu kɑ nɔrubun sɔ̃ kɑ hɑnduniɑn wururɑbu, kpɑ tɔ̃ɔ te, tu ku bɛɛ suɑru wɔri nge yinɑ. 35 Domi tɑ koo bɑɑwure deemɑ wi u wɑ̃ɑ tem mɛ kpuro sɔɔ. 36 Yen sɔ̃, i n swɑɑ mɛɛrɑ kpɑ i n kɑnɑru mɔ̀ sɑɑ bɑɑyere, kpɑ i dɑm wɑ i kɑ kisirɑ kpuro ye n koo nɑn di, kpɑ i kɑ kpĩ i yɔ̃rɑ Tɔnun Biin wuswɑɑɔ.