12
Gbɑɑ wuko kɔ̃sobun gɑri
(I mɑɑ mɛɛrio Mɑteu 21:33-46, Luku 20:9-19)
1 Yen biru, Yesu u kɑ bu mɔndu gɑri sɔ̃ɔwɑ. U nɛɛ, durɔ goo u gbɑɑru kuɑ mi u dɑ̃ɑ bii duronu duurɑ ni bɑ rɑ soku resɛm, mɑ u kɑrɑ kuɑ u kɑ sikerenɑ. U mɑɑ wɔru gbɑ mi bɑ koo dɑ̃ɑ bii ni gɑmɑ mɑ u gbɑɑ kɔ̃su yeru kuɑ. Yerɑ u gbɑɑ wukobu kɑsu u bu ye nɔmu bɛriɑ mɑ u wigiru doonɑ. 2 Sɑnɑm mɛ dɑ̃ɑ binun sɔribu turɑ, u win sɔm kowo gɔrɑ gbɑɑ wuko ben mi bu win bɔnu mwɑɑmɑ. 3 Yerɑ gbɑɑ wuko be, bɑ sɔm kowo wi mwɑ bɑ so mɑ bɑ nùn gɔsiɑ nɔm dirɑ. 4 Yerɑ u kpɑm bu sɔm kowo goo gɔriɑ mɑ gbɑɑ wuko be, bɑ nùn so wirɔ mɑ bɑ nùn yɑɑ kɑsiki. 5 Gbɑɑ yɛ̃ro wi, u kpɑm mɑɑ bu sɔm kowo gɔriɑ, mɑ bɑ nùn go. Mɛyɑ bɑ ben dɑbinu kuɑ, bɑ gɑbu so bɑ gɑbu go. 6 Tɛ̃, n tie gbɑɑ yɛ̃ro win bii kĩnɑsin tii tii. Wiyɑ u bu gɔriɑ dɑ̃kuru u nɛɛ, bɑ koo win biin nɔnu nɑsiɑ. 7 Adɑmɑ gbɑɑ wuko be, bɑ wesiɑnɑ bɑ nɛɛ, winiwɑ gbɑɑ ten tubi dio. I nɑ su nùn go kpɑ gbɑɑ te, tu ko bɛsɛgiru. 8 Yerɑ bɑ ɑluwɑɑsi wi mwɑ bɑ go. Mɑ bɑ win goru yɑrɑ gbɑɑrun di.
9 Yesu u nɛɛ, tɛ̃, ɑmɔnɑ gbɑɑ yɛ̃ro wi, u koo ko. U koo dɑ u gbɑɑ wuko be go kpɑ u win gbɑɑru gɑbu nɔmu sɔndiɑ. 10 Bɛɛ i ǹ gɑri yini gɑrɑ Gusunɔn gɑri sɔɔ yi yi nɛɛ,
<<Kpee te bɑnɔbɑ yinɑ, terɑ tɑ kuɑ gɑni gɔmburun dɑm.
11 Yinniwɑ ye kuɑ, mɑ n kuɑ mɑɑmɑɑki bɛsɛn nɔni sɔɔ.>>
12 Yerɑ bɑ swɑɑ kɑsu bu kɑ nùn mwɑ, domi bɑ tubɑ mɑ ben sɔ̃nɑ u mɔn te kuɑ. Adɑmɑ bɑ tɔn wɔru nɑsiɑ, mɑ bɑ nùn deri bɑ doonɑ.
Wɔ̃ɔ gobin kɔsiɑbun gɑri
(I mɑɑ mɛɛrio Mɑteu 22:15-22, Luku 20:20-26)
13 Mɑ bɑ Fɑlisi gɑbu kɑ Herodun tɔmbu gɑbu gɔrɑ Yesun mi, bu kɑ nùn gɑrin yinɑ bɛriɑ. 14 Ye bɑ turɑ win mi, bɑ nɛɛ, yinni, sɑ yɛ̃ mɑ ɑ rɑ gem gere. Mɛyɑ ɑ ku rɑ goon nɔnu mɛɛri, domi ɑ ku rɑ gɑri gere binɛ kɑ bɛrum sɔ̃, ɑdɑmɑ ɑ tɔmbu Gusunɔn swɑɑ sɔ̃ɔsimɔwɑ dee dee. N weenɛ su tem yɛ̃ro wɔ̃ɔ gobi kɔsiɑ? Nge su ku kɔsiɑ.
15 Adɑmɑ Yesu u ben murɑfiti te tubɑ mɑ u nɛɛ, mbɑn sɔ̃nɑ i kɑ mɑn gɑrin yinɑ bɛriɑmmɛ. I mɑn sii geesun gobi sɔ̃ɔsimɑ n wɑ.
16 Bɑ nùn sɔ̃ɔsi. Mɑ u bu bikiɑ u nɛɛ, weren foto kɑ yĩrerɑ mini. Bɑ nùn sɔ̃ɔwɑ bɑ nɛɛ, tem yɛ̃rogiɑ.
17 Yerɑ Yesu u bu sɔ̃ɔwɑ u nɛɛ, i tem yɛ̃ro kɔsio ye yɑ sɑ̃ɑ tem yɛ̃rogiɑ kpɑ i mɑɑ Gusunɔ kɔsiɑ ye yɑ sɑ̃ɑ Gusunɔgiɑ.
Yerɑ biti bɑkɑ bu mwɑ n bɑndɑ win sɔ̃.
Gɔribun seebun gɑri
(I mɑɑ mɛɛrio Mɑteu 22:23-33, Luku 20:27-40)
18 Yerɑ Sɑdusi be bɑ rɑ nɛɛ, gɔribɑ kun seemɔ, bɑ dɑ Yesun mi, bɑ nùn bikiɑ bɑ nɛɛ, 19 yinni, Mɔwisi u sun woodɑ wɛ̃ u nɛɛ, goo ù n gu mɑ u kurɔ deri, mɑ wi kɑ kurɔ wi, bɑ ǹ bii mɔ, n weenɛ yɛ̃ro win wɔnɔ u kurɔ gɔmini wi suɑ, kpɑ u kɑ mɔɔ bibu mɑruɑ. 20 Wee, tundo turosibu nɔɔbɑ yiru gɑbɑ rɑɑ wɑ̃ɑ. Ben gbiikoo u kurɔ suɑ mɑ u gu, u ǹ kɑ kurɔ wi bii mɑrɑ. 21 Yerɑ ben yiruse u kurɔ gɔmini wi suɑ. Win tii mɑɑ gu, u ǹ kɑ kurɔ wi bii mɑrɑ. Nge mɛyɑ ben itɑsen tii, 22 sere n kɑ girɑri ben nɔɔbɑ yiruse, bɑ ǹ kɑ kurɔ wi bii mɑrɑ. Be kpuron biruwɑ kurɔ win tii mɑɑ gu. 23 Dɔmɑ te gɔribɑ koo se, tɔn ben wɑrɑ ko n kurɔ wi mɔ. Domi be nɔɔbɑ yiru ye kpuro bɑ nùn yɛ̃wɑ kurɔ.
24 Yesu bu wisɑ u nɛɛ, i ǹ Gusunɔn gɑri kɑ win dɑm yɛ̃. N ǹ yen sɔ̃nɑ i tore? 25 Domi sɑnɑm mɛ gɔribɑ koo se durɔbu kɑ kurɔbu bɑ ǹ mɑɑ suɑnɑmɔ, bɑ ko n sɑ̃ɑwɑ nge Gusunɔn gɔrɑdobɑ. 26 Ye n mɑɑ sɑ̃ɑ gɔribun seebun gɑri, i ǹ gɑrire Mɔwisin tireru sɔɔ mi ɑwĩi dɔ̃ɔgiin gɑri wɑ̃ɑ nge mɛ Gusunɔ u kɑ nùn gɑri kuɑ u nɛɛ, <<Wiyɑ Aburɑhɑmun Yinni, kɑ Isɑkin Yinni, kɑ Yɑkɔbun Yinni.>> 27 Wee, Gusunɔ u ǹ sɑ̃ɑ gɔribun Yinni. U sɑ̃ɑwɑ wɑsobugii. Yenin sɔ̃nɑ bɛɛn torɑrɑ kpɑ̃.
Woodɑ ye yɑ bo
(I mɑɑ mɛɛrio Mɑteu 22:34-40, Luku 10:25-28)
28 N wee, woodɑ yɛ̃ro goo u ben sikirinɔ ge nuɑ. U wɑ mɑ Yesu u Sɑdusi be gɑri gee wisɑ, mɑ u dɑ Yesun mi u nùn bikiɑ u nɛɛ, woodɑbɑ kpuro sɔɔ yerɑ̀ yɑ kere.
29 Yesu u nɛɛ, woodɑ ye yɑ kere wee. <<Bɛɛ Isirelibɑ, i swɑɑ dɑkio, Gusunɔ bɛsɛn Yinni, wi turowɑ Yinni. 30 A Gusunɔ wunɛn Yinni kĩɔ kɑ wunɛn gɔ̃ru kpuro kɑ wunɛn bwɛ̃rɑ kpuro kɑ wunɛn bwisikunu kpuro kɑ wunɛn dɑm kpuro.>> 31 Yen yiruse wee. <<A wunɛn tɔnusi kĩɔ nge wunɛn tii tii.>> Woodɑ gɑɑ mɑɑ sɑri ye yɑ yeni kere.
32 Mɑ woodɑ yɛ̃ro wi, u Yesu sɔ̃ɔwɑ u nɛɛ, to, n wɑ̃ yinni. Gemɑ ɑ geruɑ ye ɑ nɛɛ Gusunɔ turowɑ wɑ̃ɑ, goo mɑɑ sɑri mɑ n kun mɔ wi. 33 Mɑ tɔnu ù n Gusunɔ kĩɑ kɑ win gɔ̃ru kpuro kɑ win bwisikunu kpuro kɑ win dɑm kpuro, ù n mɑɑ win tɔnusi kĩɑ nge win tii tii, yeyɑ yɑ yɑ̃ku dɔ̃ɔ mwɑɑrɑruginu kɑ yɑ̃ku ni nu tie kere.
34 Ye Yesu u wɑ mɑ u yeni geruɑwɑ kɑ yɛ̃run bɑɑ, yerɑ u nùn sɔ̃ɔwɑ u nɛɛ, ɑ turuku koomɑ ɑ kɑ du mi Gusunɔ u bɑndu swĩi.
Yenin biru goo kun mɑɑ kɑ̃kɑ u Yesu gɑ̃ɑnu gɑnu bikie.
Dɑfidi kɑ wi Gusunɔ u gɔsɑ
(I mɑɑ mɛɛrio Mɑteu 22:41-46, Luku 20:41-44)
35 Yen biru, nge mɛ Yesu u Gusunɔn gɑrin keu sɔ̃ɔsimɔ sɑ̃ɑ yerɔ, u tɔmbu bikiɑ u nɛɛ, ɑmɔnɑ woodɑ yɛ̃robɑ koo kpĩ bu gere mɑ Kirisi u sɑ̃ɑwɑ Dɑfidin bii. 36 Dɑfidin tii, kɑ Hunde Dɛɛron sɔ̃ɔsiru u nɛɛ,
<<Yinni Gusunɔ u nɛn Yinni sɔ̃ɔwɑ u nɛɛ,
ɑ sinɔ nɛn nɔm geuɔ
sere n kɑ nun wunɛn yibɛrɛbɑ tɑɑreɑ.>>
37 Dɑfidin tii u nùn sokɑ Yinni. Amɔnɑ u ko n mɑɑ kɑ sɑ̃ɑ win bii.
I tii lɑɑkɑri koowo
kɑ woodɑ yɛ̃robu
(I mɑɑ mɛɛrio Mɑteu 23:1-36, Luku 20:45-47)
Mɑ tɔn wɔru ge, gɑ Yesun gɑri swɑɑ dɑki kɑ nuku dobu. 38 Win keu sɔ̃ɔsibu sɔɔ u nɛɛ, i tii lɑɑkɑri koowo kɑ woodɑ yɛ̃robu be bɑ kĩ bɑ n bɔsu kɑ yɑbe dɛndɛnnu, bɑ mɑɑ tɔbirinɑɑ kĩ bɑtumɑ sɔɔ kɑ bɛɛrɛ. 39 Mɑ bɑ sin yee bɛɛrɛginu kĩ mɛnnɔ yenɔ kɑ mɑɑ ɑye bɛɛrɛginu tɔ̃ɔ bɑkɑ yerɔ. 40 Bɑ gɔminibun yɛnusu dimɔ kɑ tɑki mɑ bɑ kɑnɑ dɛndɛnnu mɔ̀ bu kɑ bu wɑn sɔ̃. Bɑ koo bu tɑɑrɛ wɛ̃ n kpɑ̃.
Gobi yi kurɔ gɔmini goo u kpɛ̃ɛ
(I mɑɑ mɛɛrio Luku 21:1-4)
41 Yerɑ Yesu u dɑ u sinɑ sɑ̃ɑ yerun kpɑkoro te bɑ rɑ gobi doken bɔkuɔ, mɑ u mɛɛrɑ nge mɛ tɔmbɑ gobi kpɛ̃ɛmɔ te sɔɔ. Gobigibu dɑbiru bɑ gobi bɛkɛ doke. 42 Yerɑ gɔmini sɑ̃ɑro goo u nɑ mɑ u gobi piiminu yiru doke mi, yìn geerɑ sɑ̃ɑ nge fɑrɑm yirun sɑkɑ. 43 Mɑ Yesu u win bwɑ̃ɑbu sokɑ u bu sɔ̃ɔwɑ u nɛɛ, kɑ geemɑ nɑ bɛɛ sɔ̃ɔmɔ, gɔmini sɑ̃ɑro wini, u gobi doke kpɑkoro teni sɔɔ n tɔmbu kpuro kere. 44 Domi be kpuro, ye n sɔndi ben mɔɔ bɑkɑru sɔɔ, yerɑ bɑ wunɑ bɑ doke, ɑdɑmɑ kurɔ wi, win yɑ̃ɑru sɔɔrɑ u kpuro kpɛ̃ɛ ye u kɑ tii kɔ̃su.