22
Kurɔ kpɑɑrun dim gɑri
(I mɑɑ mɛɛrio Luku 14:15-24)
1 Yesu kpɑm kɑ bu mɔndu gɑri sɔ̃ɔwɑ u nɛɛ, 2 n wee, ye Gusunɔn bɑndun gɑri kɑ weenɛ. Sunɔ goo u win biin kurɔ kpɑɑrun sɔɔru kuɑ. 3 U win sɔmɔbu gɔrɑ bu dɑ bu be bɑ dim sokɑ sokumɑ. Adɑmɑ bɑ ǹ kĩ bu nɑ. 4 Mɑ u kpɑm win sɔmɔbu gɑbu gɔrɑ u nɛɛ, i doo i be nɑ dim sokɑ sɔ̃ nɑ sɔɔru kpɑ, nɑ nɛn nɑɑ kinɛnu kɑ yɑɑ sɑbe gumginu go. Ye kpuro yɑ sɔɔru kpeerɑ, bu nɑ kurɔ kpɑɑ yerɔ. 5 Adɑmɑ be bɑ dim sokɑ mi, bɑ ǹ gɑri yi swɑɑ sue mɑ bɑɑwure u wigiru doonɑ, wini win gberu dɑ, wini mɑɑ win tenkuru doonɑ. 6 Ben gɑbɑ sɔmɔ be mwɑ bɑ nɔni sɔ̃ɔwɑ bɑ go. 7 Sunɔ wi, u mɔru bɛsirɑ u win tɑbu kowobu gɔrɑ bu kɑ tɔn gowo be go kpɑ bu ben wuu dɔ̃ɔ sɔku. 8 Sɑnɑm mɛyɑ u win sɔmɔbu sɔ̃ɔwɑ u nɛɛ, kurɔ kpɑɑ dĩɑnu ye, ɑdɑmɑ be nɑ sokɑ bɑ ǹ mɑɑ kɑ nu weenɛ. 9 Ǹ n mɛn nɑ, i doo swɑɑ swɑɑbu i be i wɑɑmɔ sokumɑ. 10 Mɑ sɔmɔ be, bɑ dɑ swɑɑ swɑɑbu bɑ be bɑ wɑ kpuro mɛnnɑ kɔ̃sobu kɑ geobu. Nge mɛyɑ tɔmbɑ kɑ yibɑ kurɔ kpɑɑ yee te sɔɔ.
11 Ye sunɔ wi, u duɑ u kɑ bu wɑ be bɑ dim nɑ, u durɔ goo wɑ wi u kun kurɔ kpɑɑ yɑ̃nu doke. 12 U nùn sɔ̃ɔwɑ u nɛɛ, bɔrɔ, ɑmɔnɑ ɑ kuɑ ɑ kɑ duumɑ mini ɑ ǹ kɑ kurɔ kpɑɑ yɑ̃nu doke. Durɔ wi kun gɛɛ wisɑ. 13 Yerɑ sunɔ wi, u win sɔm kowobu sɔ̃ɔwɑ u nɛɛ, i win nɔmɑ kɑ nɑɑsu bɔkuo kpɑ i nùn kɑsɑ ko yɑm wɔ̃kuru sɔɔ tɔɔwɔ, mi u koo wiru nɔmɑ sɔndi u swĩ. 14 Mɑ Yesu u nɛɛ, dɑbirɑ bɑ sokɑ ɑdɑmɑ fiikowɑ bɑ gɔsɑ.
Wɔ̃ɔ gobin kɔsiɑbun gɑri
15 Sɑnɑm mɛyɑ Fɑlisibɑ bɑ dɑ bɑ mɛnnɑ bu kɑ kɑsu mɛ bɑ koo ko bu kɑ Yesu gɑrin yinɑ bɛriɑ. 16 Mɑ bɑ ben bwɑ̃ɑbu gɑbu kɑ Herodun tɔmbu gɑbu gɔrɑ win mi. Bɑ dɑ bɑ nɛɛ, yinni, sɑ yɛ̃ mɑ ɑ rɑ gem gere, mɑ ɑ tɔmbu Gusunɔn swɑɑ sɔ̃ɔsimɔ dee dee, mɛyɑ ɑ ku rɑ goon nɔnu mɛɛri, domi ɑ ku rɑ gɑri gere binɛ kɑ bɛrum sɔ̃. 17 Ǹ n mɛn nɑ, ɑ sun sɔ̃ɔwɔ, yen mɛ ɑ wɑ. N weenɛ bu tem yɛ̃ro wɔ̃ɔ gobi kɔsiɑ? Nge n ǹ weenɛ.
18 Adɑmɑ Yesu u ben bwisi kɔ̃si yi yɛ̃ mɑ u bu sɔ̃ɔwɑ u nɛɛ, murɑfiti bɛɛ! Mbɑn sɔ̃nɑ i kĩ i nɛn lɑɑkɑri mɛɛri. 19 I mɑn gobi yi sɔ̃ɔsio yi i rɑ kɑ wɔ̃ɔ gobi kɔsie.
21 Bɑ nùn sɔ̃ɔwɑ bɑ nɛɛ, tem yɛ̃rogiɑ.
Yerɑ u bu sɔ̃ɔwɑ u nɛɛ, i tem yɛ̃ro kɔsio ye yɑ sɑ̃ɑ tem yɛ̃rogiɑ, kpɑ i mɑɑ Gusunɔ kɔsiɑ ye yɑ sɑ̃ɑ Gusunɔgiɑ.
22 Ye bɑ gɑri yi nuɑ, bɑ biti soorɑ, mɑ bɑ nùn deri bɑ doonɑ.
Gɔribun seebun gɑri
23 Sɔ̃ɔ tee te sɔɔ, Sɑdusi be bɑ rɑ nɛɛ gɔribɑ kun seemɔ, ben gɑbɑ nɑ Yesun mi. Mɑ bɑ nùn bikiɑ 24 bɑ nɛɛ, tɔnwero, Mɔwisi nɛɛ, durɔ goo ù n gu ù kun bii mɑrɑ, win wɔnɔwɑ koo win gɔmini yɛnu doke kpɑ u kɑ win mɔɔ bweseru seeyɑ. 25 N wee bɛsɛn suunu sɔɔ tundo turosibu nɔɔbɑ yiru gɑbɑ rɑɑ wɑ̃ɑ. Gbiikoo kurɔ suɑ mɑ u gu u ǹ bii mɑrɑ, mɑ u win wɔnɔ gɔmini deriɑ. 26 Ben yirusen tii mɛyɑ, kɑ itɑse, sere kɑ nɔɔbɑ yiruseɔ. 27 Be kpuron biru kurɔ win tii mɑɑ gu. 28 Ǹ n mɛn nɑ, dɔmɑ te gɔribɑ koo se, tɔmbu nɔɔbɑ yiru ye sɔɔ, ben wɑrɑ ko n kurɔ wi mɔ, domi be kpuro bɑ nùn yɛ̃wɑ kurɔ.
29 Yesu bu wisɑ u nɛɛ, i tore yèn sɔ̃ i ǹ Gusunɔn gɑri yɛ̃, mɛyɑ i ǹ mɑɑ win dɑm yɛ̃. 30 Domi sɑnɑm mɛ gɔribɑ koo se, durɔbu kɑ kurɔbu bɑ ǹ mɑɑ suɑnɑmɔ, bɑ ko n sɑ̃ɑwɑ nge Gusunɔ wɔllun gɔrɑdobɑ. 31 Ye n mɑɑ sɑ̃ɑ gɔribun seebun gɑri, i ǹ gɑrire ye Gusunɔ u bɛɛ sɔ̃ɔwɑ? U nɛɛ, 32 nɛnɑ Gusunɔ Aburɑhɑmu kɑ Isɑki kɑ Yɑkɔbun Yinni. Gusunɔ sɑ̃ɑwɑ wɑsobun Yinni, u ǹ sɑ̃ɑ gɔribun Yinni.
33 Tɔn wɔru ge gɑ gɑri yi nuɑ gɑ biti kuɑ win sɔ̃ɔsirun sɔ̃.
Woodɑ ye yɑ bo
34 Ye Fɑlisibɑ bɑ nuɑ mɑ Yesu u Sɑdusibɑ nɔɔ mwɑɑri, yerɑ bɑ mɛnnɑ. 35 Ben turo wi u sɑ̃ɑ woodɑ yɛ̃ro u kĩ u Yesun lɑɑkɑri mɛɛri, mɑ u nùn bikiɑ u nɛɛ, 36 tɔnwero, woodɑ yerɑ̀ yɑ kpɑ̃ɑru bo woodɑbɑ sɔɔ.
37 Yesu nùn wisɑ u nɛɛ, <<A Gusunɔ wunɛn Yinni kĩɔ kɑ wunɛn gɔ̃ru kpuro kɑ wunɛn bwɛ̃rɑ kpuro kɑ wunɛn bwisikunu kpuro.>> 38 Yeyɑ yɑ sɑ̃ɑ woodɑ gbiikɑɑ, yerɑ yɑ mɑɑ kpɑ̃ɑru bo. 39 Yen yiruse wee, ye yɑ kɑ ye weenɛ yerɑ <<A wunɛn tɔnusi kĩɔ nge wunɛn tii tii.>> 40 Woodɑ yiru ye sɔɔn diyɑ Mɔwisin woodɑ kɑ Gusunɔn sɔmɔbun sɔ̃ɔsinu kpuro yɑri.
Dɑfidi kɑ wi Gusunɔ u gɔsɑ
41 Ye Fɑlisibɑ bɑ mɛnnɛ, Yesu u bu gɑri yini bikiɑ. 42 U nɛɛ, ɑmɔnɑ i tɑmɑɑ wi Gusunɔ u gɔsɑ u sɑ̃ɑ. Weren bweserun diyɑ u yɑri.
Bɑ nùn wisɑ bɑ nɛɛ, Dɑfidin bweserun diyɑ.
43 Yesu bu sɔ̃ɔwɑ u nɛɛ, ɑmɔnɑ Dɑfidi kɑ nùn sokɑ Yinni kɑ Hunde Dɛɛron sɔ̃ɔsiru. Domi Dɑfidi geruɑ u nɛɛ,
44 <<Yinni Gusunɔ u nɛn Yinni sɔ̃ɔwɑ u nɛɛ,
ɑ sinɔ nɛn nɔm geuɔ
sere n kɑ nun wunɛn yibɛrɛbɑ tɑɑreɑ.>>
45 Ǹ n mɛn nɑ, Dɑfidi ù n nùn sokɑ Yinni, ɑmɔnɑ u ko n kɑ kpɑm sɑ̃ɑ win bii.
46 Bɑɑ ben turo kun mɑɑ kpĩɑ u nùn gɛɛ wisi. Sɑɑ dɔmɑ ten di goo kun mɑɑ nùn gɛɛ bikiɑre.