Luku 14

Yesu u bɑrɔ goo bɛkiɑ

¹ Tɔ̃ɔ wɛ̃rɑrugiru gɑru sɔɔ Yesu duɑ Fɑlisibɑn wirugii goon yɛnuɔ u kɑ di. Mɑ bɑ nùn lɑɑkɑri sɑ̃ɑ. ² N wee durɔ goo wìn wɑsi yi mɔsɑ u yɔ̃ Yesun wuswɑɑɔ. ³ Mɑ Yesu u woodɑ yɛ̃robu kɑ Fɑlisibɑ bikiɑ u nɛɛ, n weenɛ bu tɔnu bɛkiɑ tɔ̃ɔ wɛ̃rɑrugiru sɔɔ? Nge n ǹ weenɛ.

⁴ Bɑ mɑɑri. Yerɑ u bɑrɔ wi tii gɑwe u nùn bɛkiɑ mɑ u derɑ u doonɑ. ⁵ Mɑ u bu bikiɑ u nɛɛ, bɛɛn wɑrɑ, win bii ǹ kun mɛ win nɑɑ yɑ̀ n dɔkɔ wɔri tɔ̃ɔ wɛ̃rɑrugiru sɔɔ, u ǹ koo ye wunɑ fuuku.

⁶ Yerɑ bɑ kpɑnɑ bu gɑri yi wisi.

Mi n weenɛ ɑ sinɑ

dim soku yerɔ

⁷ Ye u lɑɑkɑri kuɑ mɑ be bɑ dim sokɑ nge mɑɑ wi, bɑ sin yee bɛɛrɛginu gɔsimɔ, u bu mɔndu kuɑ u nɛɛ, ⁸ sɑnɑm mɛ bɑ nun sokɑ kurɔ kpɑɑ yerɔ, ɑ ku sinɑ sin yee bɛɛrɛgirɔ. Sɔrɔkudo bɑ koo rɑ goo soku wi u nun bɛɛrɛ kere. ⁹ Mɑ wi u bɛɛ kpuro sokɑ u koo nɑ u nɛɛ, ɑ durɔ wi sin yee te wɛ̃ɛyɔ. Sɑɑ yerɑ sekurɑ koo nun mwɑ ɑ kɑ dɑ ɑ sinɑ sin yee birukirɔ. ¹⁰ Adɑmɑ sɑnɑm mɛ bɑ nun dim sokɑ, ɑ doo ɑ sinɑ sin yee birukirɔ, kpɑ wi u nun sokɑ ù n tunumɑ u nɛɛ, ɑ seewo nɛn bɔrɔ ɑ nɑ wuswɑɑɔ. Sɑɑ ye, n ko n sɑ̃ɑ bɛɛrɛ bɑkɑ wunɛ sɔɔ be kpuron wuswɑɑɔ be bɑ sɔ̃ kɑ wunɛ sɑnnu. ¹¹ Kɑ geemɑ bɑɑwure wi u tii suɑ wɔllɔ, bɑ koo nùn kɑwɑ. Bɑɑwure wi u mɑɑ tii kɑwɑ, bɑ koo nùn suɑ wɔllɔ.

¹² U mɑɑ wi u nùn dim sokɑ sɔ̃ɔwɑ u nɛɛ, sɑnɑm mɛ ɑ tɔmbu yɑɑ dibu ǹ kun mɛ tɔ̃ɔ bɑkɑru sokɑ, ɑ ku wunɛn bɔrɔbɑ soku, ǹ kun mɛ wunɛn mɑɑbu, ǹ kun mɛ wunɛn dusibu, ǹ kun mɛ wunɛn beruse gobigibu, kpɑ ben tii bu ku rɑɑ nun soku bu kɑ nun kɔsiɑ. ¹³ Adɑmɑ sɑnɑm mɛ ɑ tɔmbu dim kɑnɑ, ɑ sɑ̃ɑrobu sokuo kɑ ɑlebugibu kɑ kɔ̃ri bɑrɔbu kɑ wɔ̃kobu. ¹⁴ Kɑɑ ko doo nɔɔrugii yèn sɔ̃ bɑ ǹ mɔ bu kɑ nun kɔsiɑ. Kɑɑ wunɛn kɔsiɑru wɑ Gusunɔn min di sɑnɑm mɛ bɑ koo geegibu seeyɑ gɔrin di.

Dim bɑkɑm gɑri

(I mɑɑ mɛɛrio Mɑteu 22:1-10)

¹⁵ Ye be bɑ dimɔ kɑ Yesu sɑnnu, ben turo u gɑri yi nuɑ mɑ u nɛɛ, doo nɔɔrugiiwɑ wi u koo di bɑn te Gusunɔ u swĩi sɔɔ.

¹⁶ Mɑ Yesu nùn wisɑ u nɛɛ, durɔ goo u dim bɑkɑm sɔɔru kuɑ mɑ u tɔn dɑbiru sokɑ. ¹⁷ Ye dim sɑɑ yɑ turɑ u win sɔm kowo gɔrɑ tɔn ben bɑɑwuren mi bu nɑ domi yɑɑ dibu kpuro sɔɔru kpeerɑ. ¹⁸ Adɑmɑ be kpuro bɑ suuru kɑnɑ bɑ nɛɛ, bɑ ǹ fɛɛ wɑsi bu nɑ. Gbiikoo nɛɛ, wi, u gberu dwɑ, tilɑsiwɑ u kɑ dɑ u te wɑ. ¹⁹ Kpɑo mɑɑ nɛɛ, wi, u nɛɛ dwɑ wɑsi yiru yiru yen nɔɔbu, mɑ u koo den kɑ yi sɔmburu ko u wɑ. ²⁰ Kpɑo kpɑm nɛɛ, tɛ̃ gerɑ wi, u kurɔ suɑ. Yen sɔ̃nɑ wi, u ǹ kpɛ̃ u nɑ. ²¹ Sɔm kowo wi, u gɔsirɑ u kɑ be kpuron suuru kɑnɑ bi dɑ u win yinni sɔ̃ɔwɑ. Yerɑ yinni win mɔru seewɑ mɑ u win sɔm kowo sɔ̃ɔwɑ u nɛɛ, ɑ doo fuuku wuun bɑtumɑ kɑ gen swɛɛ sɔɔ ɑ kɑ sɑ̃ɑrobu nɑ kɑ ɑlebugibu kɑ wɔ̃kobu kɑ kɔ̃ri bɑrɔbu. ²² Mɑ sɔm kowo wi, u nɛɛ, yinni, ye ɑ mɑn yiire mi, nɑ ye kuɑ. Wee, ɑyerɑ mɑɑ tie. ²³ Mɑ yinni wi, u nɛɛ, ɑ swɛɛ swĩiyɔ kɑ kɑrɑn goonu ɑ tɔmbu duusiɑmɑ kɑ kɑnkɑnsi, kpɑ nɛn yɛnu gu yibu. ²⁴ Domi geemɑ nɑ gerumɔ, bɑɑ tɔn ben turo kun mɑɑ nɛn dĩɑnu dendɑmɔ, be, be nɑ gbiɑ nɑ sokɑ.

Ye tɔnu koo ko

u kɑ ko Yesun bɔ̃ɔ

(I mɑɑ mɛɛrio Mɑteu 10:37-38)

²⁵ Tɔn wɔru gunɑ yɑ swɑɑ mɔ̀ bɑ sĩimɔ kɑ Yesu sɑnnu, mɑ u sĩirɑ u bu sɔ̃ɔwɑ u nɛɛ, ²⁶ goo ù n kĩ u mɑn swĩi, mɑ u ǹ mɑn kĩɛ n kere win bɑɑ kɑ win mɛro kɑ win kurɔ kɑ win bibu kɑ win mɑɑbu kɑ wɔnɔbu kɑ win sesubu kɑ mɑm win tiin wɑ̃ɑru, u ǹ kpɛ̃ u ko nɛn bɔ̃ɔ. ²⁷ Bɑɑwure wi u kun win tiin dɑ̃ɑ bunɑnɑru sue, u kɑ nɛn yirɑ swĩi, u ǹ kpɛ̃ u ko nɛn bɔ̃ɔ. ²⁸ Nge wɑrɑ bɛɛ sɔɔ ù n kĩ u diru bɑni, u ǹ koo ginɑ sinɑ u dooru ko u wɑ win gobi yì n turɑ u kɑ tu wiru go. ²⁹ Mɑ n kun mɛ, ù n kpɛɛkpɛɛku surɑ, mɑ u kpɑnɑ u dɑkurɑ, be bɑ gu wɑɑmɔ kpuro bɑ koo nùn yɑɑkoru ko, ³⁰ kpɑ bu nɛɛ, durɔ wi, u bɑnɑ toruɑ, mɑ u kpɑnɑ u ye dɑkurɑ. ³¹ Nge sunɔ wɑrɑ ù n seewɑ kɑ tɑbu kowobu nɔrɔbun subɑ wɔkuru (10.000) u kɑ tɑbu ko kɑ win sunɔsi goo wi u tɑbu kowobu mɔ nɔrɔbun subɑ yɛndu (20.000), u ǹ koo ginɑ sinɑ u mɛɛri u wɑ ù n dɑm mɔ u kɑ tɑɑ bi ko? ³² Ù n wɑ u ǹ kpɛ̃, sɑnɑm mɛ wini kun tunumɑm kpɑ, u koo nùn sɔmɔbu gɔriɑ bu nùn bikiɑ ye u koo mɔɔru mwɑ bu ku mɑɑ kɑ tɑbu ko. ³³ Yen sɔ̃nɑ bɛɛn bɑɑwure wi u kun deri kpuro ye u mɔ, u ǹ kpɛ̃ u ko nɛn bɔ̃ɔ.

Bɔru te tɑ nɔɔ gu

(I mɑɑ mɛɛrio Mɑteu 5:13, Mɑɑku 9:50)

³⁴ Mɑ Yesu mɑɑ nɛɛ, bɔru\f |b14:34 bɔru|d - Bɔɔ te bɑ kɑ yɑ̃ mini, tɑ sɑ̃ɑwɑ nge bɔɔ swɑ̃ɑru. Tɑ koo kpĩ tu nɔɔ gbi.\F gɑ̃ɑ geenɑ, ɑdɑmɑ bɔru tɑ̀ n nɔɔ gu, mbɑ bɑ koo mɑɑ kɑ tu dorɑsiɑ. ³⁵ Bɑ ǹ mɑɑ kɑ tu bukɑtɑ gɑɑ mɔ̀ gberɔ bɑɑ tɑɑki wɔllɔ bu kɑ tem kɔ̃sisiɑ. Bɑ rɑ kubewɑ tɔɔwɔ. Wi u swɑɑ mɔ u kɑ nɔ, u nɔɔwɔ.